Lewi 10

Bakal gà Nadab nda Abihu

1 Gà ɓəza Haruna, gà Nadab nda Abihu, ku mege weke a zlaba tətəgwa madula aɗəm wirde ŋgar. Tə ndaya aɗəm avir nda akwa ŋa. Dite tə ndaya aaka makərɗa dizl ana a ze hwaŋŋa ya, tə dulaha a BATSAH kwa ŋa, nda akwa ana aka vəl a tar ahər vatwa aà mege dər megemir ata tsiye^*. 2 Tsara ka, akwa a vataraba ika miɗ BATSAH kwa ŋa ya, a wànà tar, ta mata a fata aka miɗ ŋgar.

3 Lewi a gwaɗa a Haruna: « BATSAH kwa ŋa aka mbər metsike a kurum piŋŋe, na i təv ana a gwa ka:

‹ Gà mburma ana ti sirəkere a a təv gà ya ka, tə sər iye ka, Mbulum ana tsəɗaŋŋa ya,

i waya ka, ti zlibe a à iye ika miɗ gà mburma tserdze › . »

Haruna a ndza tiytiy.

4 Musa a zal a gà Misayel nda Elitsafan gà ɓəza Uzziyel, damər tsir Haruna, a gwaɗa a tar: « Dumara, kà ndzəkum gà məməta gà damər kurum ika miɗ ga petek aha tsəɗaŋŋa ya. Kà dum à tar diriŋ aà təv madzəba ya . » 5 Ta gəs ahəm aà Musa, tə ndzək gà məməta ata ka, nda gà andiw megemir tar, tə da à tar a bəra diriŋ aà təv madzəba tar a.

6 I dəba ŋa ya, Musa a gwaɗa a gà Haruna nda gà asiŋ gà ɓəza ŋgar ŋgiɗ aaha sula ya, gà Eliyazar nda Itamar: « Kà miyakum aà gà ambəz kurum kataya sivve tsa. Kà kwayaɗum aà gà petek kurum ana ikaba ya tsa. Na kàa gwim dər kataya tsəka, ki metwimiŋa, dite matsəɓatsəɓ BATSAH kwa ŋa a dere a aka gər gà mayahaba gər gà mburma ya fit tserdze. Vəlum vatwa ivaɗ ka, a gà damər kurum gà Isərayel, tə tuwa a gər a akwa ana BATSAH kwa ŋa a bats dər gà mburma aaha ya. 7 Kurum ka, ka tə dum ika biye hərmaga ga petek mayahaba gər a tsa, na dite ki ta metwime a tsiye, aɗaba mal metike mburma a megemir BATSAH kwa ŋa ika gər kurum . » Gà Haruna nda gà ɓəza ŋgar ta gəs ahəm a dukw ana Musa a tsik a tar a.

Gà ɓəzla məbatsa duwa a Mbulum ti se a dukw mekweye tsa

8 BATSAH kwa ŋa a gwaɗa a Haruna: 9 « Kurum nda gà ɓəza yak, i təv ana ki dwim a a ga petek mayahaba gər a ka, diydiy ka ta sum guzum viŋye tsa, kige tsa dukw mekweye ŋgiɗ tsa. Tsəka ki ta metwimiŋa. Taŋa ka, məpala ahəm ana ki gəswim a ahər a ahəm, a ndze a à biybiy wa ahər kəla, wa ahər kəla ya. 10 Ki gwim a kataya ka, aà masəra dər ikaba a gà dukw ana tsəɗaŋŋa ya, nda ana tsəɗaŋŋa tsiye, aà gà dukw ana dukw zlaŋgatsak ihər tsiye nda gà dukw ana dukw zlaŋgatsak a, 11 dite ki dzeŋgwime a gà məpala ahəm ata BATSAH kwa ŋa a vəl a gà mayahaba gər gà Isərayel nda ahər Musa ya fit a . »

Bəŋa biy gà ɓəzla məbatsa duwa a Mbulum ika gər gà dukw taf a

12 Musa a gwaɗa a gà Haruna nda gà ɓəza ŋgar aaha ti zeha sula ya, gà Eliyazar nda Itamar: « Ndzəkum aà gà dukw taf gà dukw mezime ana ta ge ara i dala ya, a zeha aà gà dukw taf ana ta vakawa a BATSAH kwa ŋa ya. Ka dwim peŋ ana giɗe ikəka tsiye. Dite ka zəmum bise nda təv madula aaka duwa a Mbulum. Taŋa ka, dukw ana tsəɗaŋŋa ndeyndey a. 13 Ki zimwime a kə̀la ka, i təv ana tsəɗaŋŋa ya, aɗaba a ne ka, bəŋa biy yak, nda biy gà ɓəza yak, a dara ka, i gà dukw taf ana ta vakawa a BATSAH kwa ŋa ya. Taŋa ka, məpala ahəm ana i tsarakara i təv BATSAH kwa ŋa ya. 14 Araha na gà dukw ana ki pepiɗwim a i təv ana dukw zlaŋgatsak iɗəm tsiye: Gà gəzləŋ nda gus gà dukw gənaw ata tə dza dukw taf ŋa biy matawala fəla magawuba gà Isərayel a, dite ta pàt dəraha a BATSAH kwa ŋa, nda mege dər gà dukw ana ta pàtawa dər a. Ki pepiɗwim a gà slu ata ka, kurum nda gà ɓəza yak, nda gà dəm yak. Aɗaba gà tseke gà slu ata fit ka, a ne ka, gà bəŋa biy kurum. 15 Aka gər gà tseke gà təv məŋgəl ana ta vakawa ya ka, say gà Isərayel ti ndzəkara gà gus nda gəzləŋ ŋa ya, ti dze a a BATSAH kwa ŋa nda mege dər gà dukw ana ta pàtawar dər a. Gà tseke gà təv slu ata tə tsakal a ka, bəŋa biy kurum nda gà ɓəza yak a biybiy, kamala ana BATSAH kwa ŋa a gwa ya . »

16 Musa a wiz dukw ana ta ge nda vugul ana ta vəl biy məpəla à bakal gà mayahaba gər gà mburma ya. A tsaraka ka, tàa dul kweleŋ. Tsam ka, a ge matsəɓatsəɓ aka gər gà Eliyazar nda Itamar gà ɓəza Haruna ata ti zeha sula ya. Dite a gwaɗa a tar: 17 « Aàla na kà niwum mipepiɗe slu dukw matawala fəla, ana ta vəl biy məpəla à bakal a, i təv ana tsəɗaŋŋa tsiye? Aɗaba taŋa ka, dukw ana tsəɗaŋŋa ndeyndey a. BATSAH kwa ŋa a vəl a kurum dukw gənaw ata ka, aà mazla akwa ika gər gà mayahaba gər gà Isərayel a, dite ki geywim a dər gà dukw ana ta gewa dər biy məpəla à bakal a, aka gər gà mayahaba gər gà Isərayel ika miɗ BATSAH kwa ŋa. 18 Məmbəz dukw gənaw ata ka, tàa da dər a huɗ ga ata tsəɗaŋŋa ya tsa. Ana ka, ki pepidwime a slu vugul ata ka, i təv ata tsəɗaŋŋa ŋa, kamala ana i tsik a kurum a . »

19 Haruna a gwaɗar aaka a Musa: « Tsaraka, a pat ŋa ata gà Isərayel tə dza gà dukw taf matawala fəla məpəla à bakal tar, nda gà dukw taf matawala fəla ana tə dulawa a BATSAH kwa ŋa ya ka, kà sər dukw ana a giŋ ba a gər, a pat ŋa ata ya. Wànà a pat ŋa ata asa kuɗa ka, i sle a aà mipepiɗe a slu dukw gənaw ana ta vəl dukw taf ŋa biy məpəla à bakal a ya? Dukw ata nda ndzer ana, a dere a a gər a BATSAH kwa ŋa ya? » 20 Musa a tsaraka bazlam ŋgar ata ka, a dar a gər.