Lewi 11

Gà dukw gənaw nda gà dukw dala ana tar gà dukw zlaŋgatsak tsiye, nda gà ana tar gà dukw zlaŋgatsak a

1 BATSAH kwa ŋa a gwaɗa a gà Musa nda Haruna: 2 « Dzeŋgwim gà məpala ahəm aaha a gà Isərayel: ‹ Ika magər gà dukw gənaw nda gà dukw dala ana tar riŋ nda mesife tserdze ɗa ika gər ahəɗ a ka, araha na gà na ki slwim a aà mipepiɗe ya: 3 gà dukw gənaw nda gà dukw dala ana tərpak tar matayaŋa ya, dite ta mbeɗe a kwizir a. 4 Ama kə̀la ka, ika magər gà dukw ana ta mbeɗe a kwizir a ɗekɗek, kige tsa tərpak tar mataya ŋa ya ka, araha na gà dukw ana ki pepiɗwime a tsik tsiye:

Zligweme ka, a mbaɗawa kwizir, ama tərpak ŋgar mataya ŋa tsa. Taŋa ka, dukw zlaŋgatsak, na biy kurum a.

5 Kutsum ka, a mbeɗe a kwizir ama tərpak ikəka tsa. Taŋa ka, dukw zlaŋgatsak na biy kurum a.

6 Həndak ka, a mbeɗe a kwizir, ama ŋgat ka, tərpak ikəka tsa, taŋa ka, dukw zlaŋgatsak, na biy kurum a.

7 Wedeliŋ ka, tərpak ŋgar mataya ŋa, ama a mbaɗawa kwizir tsa. Taŋa ka, dukw zlaŋgatsak, na biy kurum a.

8 Ka ta papuɗum gà dukw ata tsa. Aka mət ka, kà ta ləmum ahər tsa, biy kurum taŋa ka, dukw zlaŋgatsak.

9 Ika magər gà dukw ana tə ndzawa i huɗ yam, i gà bàba gà duluv, kige tsa i gà dulwa ya ka, araha na gà na ki slwim a aà mipepiɗe a ya: Gà na gà mibitser nda gà dəba aà tar a. 10 Ama i liwiŋ gà ɓəza gà dukw ana ti de a nda huɗ i yam a, i gà bàba gà duluv kige tsa i gà dulwa ya ka, gà na mibitser, kige tsa dəba aà tar tsiye tserdze ka, fərum aà tar kamala gà dukw zlaŋgatsak ndeyndey ya. 11 Gà taŋa ka, gà dukw zlaŋgatsak ndeyndey, ki pepiɗwim a tsa, dite kaslum ba kurum, kà ləmum aà tar tsa, na gà məməta ŋa ya, tar ka, gà dukw zlaŋgatsak ndeyndey. 12 Kərga taŋa ya, gà dukw dala ana i huɗ yam a ka, gà na gà mibitser nda gà dəba a tar tsiye, ki pepiɗwim a tsidze, ti ne ka, gà dukw zlaŋgatsak ndeyndey.

13 Ika magər gà ɗiyeŋ ka, araha na gà na ki firwim a a ter a kamala gà dukw zlaŋgatsak ndeyndey ya, ki pepiɗwim a tsa: Gà zləra, gà kwatsamba, gà zləra ana i yam a, 14 gà maafuk, gà ndawraw nda gà mendzekeɗeba tar tserdze, 15 zləməŋa gà ana ti ndzekeɗe ba gà ŋgaak a, 16 gà zirwe, gà guwum, gà tilgew, nda gà mendzikiɗe ba gà megwiyer tserdze, 17 gà guwum ana za kəla za kəla ya, tətwalwaha ana i yam a, kwirndeyek, 18 gà guwum ana herre ya, dzwadzwahaɗa, nda gà mendzikiɗe ba gà kwatsamba, 19 gà ɗiyeŋ ana ti ndzekeɗeba gà kwirndeyek a, gà mendzikiɗe ba gà ndeezek, gà guŋgwazl mbulum, mekibekibe.

20 Zləməŋa gà ɓəza gà dukw ana gà gwezleviyek aà tar, sik a tar faɗ a ka, i kurum taŋa ka, gà dukw zlaŋgatsak ndeyndey. 21 Ama i liwiŋ gà ɓəza gà dukw ana ta beye a, sik aà tar faɗ a, ki slwim a aà mipepiɗe a ka, gà ana mendekwiyek aà tar, nda gà dzerisl ba, ti ndebeye a dər ika ahəɗ a, 22 kamala megweɗe ya ka, gà heyew, nda gà dukw ana ti ndzekeɗe ba fit a, dite nda gà dzara, nda gà mendzekeɗeba tar, nda gà guɗah. 23 Ama kə̀la ka, gà ɓəza gà dukw ana, ta beye a sik aà tar faɗ a, i kurum taŋa ka, gà dukw zlaŋgatsak ndeyndey ›.

Gà dukw ana ti ne a à mburma dukw zlaŋgatsak a

24 ‹ Araha asa na gà dukw gənaw ana ti ne a à kurum a gà dukw zlaŋgatsak a, ku weke na aka ləm aà məməta ŋa ya ka, a ndze a i dukw zlaŋgatsak ŋa tsikw a hawa. 25 Ku mege weke na aka zla məməta tar ka, say a bere a aà gà petek ŋgar a, a ndze a i dukw zlaŋgatsak ŋa tsikw a hawa. 26 Zləməŋa gà dukw gənaw nda gà dukw dala ana tərpak tar matayaŋa tsiye, dite ta mbeɗe a kwizir tsiye ka, ti ne i təv kurum ka, gà dukw zlaŋgatsak. Ku weke na aka ləm ahər ka, aka ne dukw zlaŋgatsak. 27 Zləməŋa gà dukw gənaw ana sik aà tar faɗ, tərpak ika tar tsiye ka, tar ka,gà dukw zlaŋgatsak na i təv kurum a, wele ana aka ləm aà məmətaŋa ya ka, a ndze a i dukw zlaŋgatsak ŋa tsikw a hawa. 28 Wele ana aka zla məməta dukw gənaw ata ya ka, say a bere aà gà petek ŋgar a, dite ŋgat ŋa a ndze a i dukw zlaŋgatsak ŋa tsikw a hawa. Tar ka, gà dukw zlaŋgatsak na i təv kurum a.

29 Ika magər gà ɓəza gà dukw ana ti seweye a ika gər ahəɗ a ka, araha na gà na gà dukw zlaŋgatsak i təv kurum a: Gà meetswil, gà kwahum, gà aziw nda gà mendzekeɗeba tar, 30 gà mekwirdidik, gà makurdəba, gà aziw ana kwizir kwizir a, gà mekwiseɗik, gà meendzwerwe. 31 Gà ɓəza gà dukw ata ka, gà dukw zlaŋgatsak na i təv kurum a, wele ana aka ləm aà məməta ŋa ya ka, aka ne à ŋgat dukw zlaŋgatsak tsikw a hawa. 32 Na bəla kinehe, ilik i liwiŋ gà dukw dala ata ya, aka mət, a dəɗ a duwa, a kwatama, aka petek, aka bagwa, kige tsa a kiywa nda gà tsa, ku mege aka kazlaŋa megemir zlaŋgwaɗ ŋgiɗ tekeɗe ya ka, aka ne dukw zlaŋgatsak. Say ti tike a a yam, a ndze a i dukw zlaŋgatsak ŋa haa a hawa. Tsam ka, dukw zlaŋgatsak a ge a ihər asa tsa. 33 Na aka dəɗ a mesigire dwaɗwa ka, dukw ana iɗəm a fit ka, aka ne dukw zlaŋgatsak, ki betswim a mesigire ata. 34 Na bəla kinehe, yam ana i mesigire ata ya, aka dza aka dukw mezime ana biy mezime ya ka, dukw mezime ata aka ne a dukw zlaŋgatsak, kige tsa na i mesigire ata ka, dukw mese ana biy mese ya ka, dukw mese ata aka ne dukw zlaŋgatsak. Ku mege mesigire ata ka, biy Dukula tekeɗe ya, zləməŋa pəra. 35 Na ilik ŋa aà gà dukw dala ata ya, aka mət, a dəɗ aka duwa ka, dukw ata a ne a dukw zlaŋgatsak. Na bəla tsa a dəɗ ka, a ga mede peŋ, kige tsa a liwit ka, batsum gà dukw ata. Tàa ne gà dukw zlaŋgatsak, dite pərum ahər ka, kamala gà dukw ana dukw zlaŋgatsak a. 36 Ama kə̀la ka, dukw dala ata a mət a, a dəɗ ka, a suwah, kige tsa a təkər yam, yam ata a ndze a ka, dukw zlaŋgatsak ŋa tsa. Ama wele ana aka ləm aà məməta dukw ata ya ka, a ne a ŋgat a dukw zlaŋgatsak. 37 Na bəla məməta dukw dala ata a dəɗ ka, aka hwilfe ka, hwilfe ata i dukw zlaŋgatsak tsa. 38 Ama na a dəɗ ka, aka wur dukw ana tàa dza ahər yam ti de ya ka, wur dukw ata aka ne dukw zlaŋgatsak.

39 Na bəla dukw gənaw nda gà dukw dala ana, biy mipepiɗe a ya aka mət ka, wele ana aka ləm məməta ŋa ya ka, aka ne a ŋgat dukw zlaŋgatsak tsikw a hawa. 40 Wele ana aka papəɗ slu dukw gənaw ata ya ka, say a bere a aà gà petek ŋgar a, ŋgat ŋa a ne a dukw zlaŋgatsak tsikw a hawa. Wele ana aka zla dukw gənaw ata məmətaŋa ya ka, say a bere a aà gà petek ŋgar a, ŋgat a dze i dukw zlaŋgatsak ŋa asa mbaŋa tsikw a hawa.

41 Gà ɓəza gà dukw ana ti de a nda huɗ tserdze ika gər ahəɗ a ka, tar ka, gà dukw zlaŋgatsak ndeyndey, ki pepiɗwim a tsa. 42 Ka ta papəɗum gà ɓəza gà dukw ana tə dawa nda huɗ, nda gà na ti de a nda sik faɗ a, kige tsa na tə za sik faɗ a tsa, pərum aà tar kamala gà dukw zlaŋgatsak ana ndeyndey a. 43 Ka ti nwim aba kurum gà dukw zlaŋgatsak ndeyndey, nda maləma a gà ɓəza gà dukw ana ti de a nda huɗ a tsa. Dite kà nwim aba gà dukw zlaŋgatsak nda maləma a tar tsa. Ka ta miyakum aba kurum tə ləma a kurum tsa, tsəka ki nwim a gà dukw zlaŋgatsak. 44 Aɗaba iye na, Batsah kurum ŋa Mbulum kurum a, ndzum ka, tsəɗaŋŋa. Aɗaba iye ka, tsəɗaŋŋa. Ka ti nwim aba kurum gà dukw zlaŋgatsak, nda maləma a gà ɓəza gà dukw ana ti de a nda huɗ ika ahəɗ a tsa. 45 Aɗaba iye ka, Batsah kurum ŋana a ndzəkara kurum ika ahəɗ Ezipt a ya. I ge kərga taŋa ya ka, aà mene Mbulum kurum, nwim à gà aba kurum gà tsəɗaŋŋa ŋa. Aɗaba iye ka, tsəɗaŋŋa › . »

46 Gà taŋa ka, gà dukw ana mehitse dər ŋa, aka gər gà dukw gənaw nda gà dukw dala, gà ɗiyeŋ, nda gà dukw ana tə ndzawa i huɗ yam a fit, nda gà ɓəza gà dukw ana ti siweye a ika gər ahəɗ fit a. 47 Gà dukw ata mehitse dər ŋa ya ka, aà masəra dər ikaba aà gà dukw gənaw, nda gà dukw dala, ana gà dukw zlaŋgatsak tsiye, nda gà na tar ka, gà dukw zlaŋgatsak a. Aà masəra ikaba aà gà dukw gənaw nda gà dukw dala, ana biy mipepiɗe ya, nda dukw gənaw ana biy mipepiɗe tsiye.