Yesuwa 21

Gà huɗ kwite ana tə dza a gà gwala Lewi ya

1 Gà ɓəzla ga ana i gà gwala Lewi ya, tə dara a təv mala məbatsa duwa a Mbulum Eliyazar a, Yesuwa kəla Nun a ya, àha nda gà ɓəzla ga ana i gà gwala gà Isərayel a. 2 Ta fafəl a tar i Silu ika ahəɗ kwite Kanana, ta gwaɗa tar: « BATSAH kwa ŋa aka tsik àba nda ahər Musa ya ka, tə dza mə̀r gà huɗ kwite aà mendze a iɗəm, nda gà təv makəva iɗəm gà dukw gənaw mə̀r. » 3 Gà Isərayel tə sasaya aà gà təv meleke tar a, tə dza gà huɗ kwite a gà gwala Lewi nda gà təv makəva iɗəm gà dukw gənaw tar, kamala ana BATSAH kwa ŋa a gwa ya.

4 Tsetse a lah mediɗe aka gà gwala Kehat. Gà ɓəza Haruna mala ɓəzla məbatsa duwa a Mbulum ika magər gà gwala Lewi ya ka, tə dzə tar gà huɗ kwite kurwa gər ŋgar makər (13) nda tsetse, ika gà ahəɗ Yahuda, Simeyun nda Bendzamen. 5 Gà asiŋ gà ɓəza Kehat ŋgiɗ aaha ka, tə dzaɗa tar gà huɗ kwite kurwa (10) nda tsetse ika gà ahəɗ Efərayim, Dan, àha ika ahəɗ mezehe gwala Manasse ŋgiɗ.

6 Gà ɓəza gà gwala Gersun ka, tə dzaɗa tar gà huɗ kwite kurwa gər ŋgar makər (13) nda tsetse, ika gà ahəɗ Issakar, Aser, Naftali, dite àha ika ahəɗ mezehe gwala Manasse ŋgiɗ ana tə ndzawa ika ahəɗ Basan a. 7 Gà ɓəza Merari ka, tə dzaɗa a tar gà huɗ kwite kurwa gər ŋgar sula (12), kəla aà kəla məkəs ika gà ahəɗ Ruben, Gad nda Zabulun. 8 Gà Isərayel tə dzaya gà huɗ kwite ata, nda gà təv makəva iɗəm gà dukw gənaw ŋa, a gà gwala Lewi nda tsetse ka, kamala ana BATSAH kwa ŋa a tsik nda ahər Musa ya.

Gà huɗ kwite ana tə dza a gà ɓəza Haruna ya

9 Araha na gà zləm gà huɗ kwite ana ika ahəɗ gà gwala Yahuda nda Simeyun tə dza 10 a gà ɓəza Haruna, gà ɓəza Kehat, gà gwala Lewi ya. Tar na tsetse a lah mediɗe aka tar a. 11 Ta vəl a tar ka, Kiriyat-Arba, ana tə zalawar, huɗ kwite Arba ya, zləm batsah tsir gà Anakiya. Kinehe ka, tə zalawa a huɗ kwite ata ka, Hevrun. Ar ka, ika gər kwite Yahuda. Ta vəl a tar huɗ kwite ata ka, nda təv makəva iɗəm gà dukw gənaw ana a mbere aaha ya. 12 Ama gà guvah nda gà kwite ana ta mbeyeha a huɗ kwite ata ya ka, tə dzaɗa a Kalep kəla Yefunne, a ne təv meleke ŋgar.

13 Biy gà ɓəza mala məbatsa duwa a Mbulum Haruna ka, ta vəl a tar huɗ kwite Hevrun, huɗ kwite makaha ba gà ɓəzla maŋgasla kəla, Livna, 14 Yattir, Estemuwa, 15 Hulun, Devir, 16 Ayin, Yutta, Bet-Semes. Gà huɗ kwite ata ta gaw ba fit ka, tswiɗ (9) nda gà təv makəva iɗəm gà dukw gənaw tar ŋa dze. Tə ndzək ka, ika ahəɗ gà gwala Yahuda nda Simeyun a.

17 Ika ahəɗ gà gwala Bendzamen ka, tə dza tar Gabawun, Geva, 18 Anatut, Almun. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze. 19 Gà ɓəzla məbatsa duwa a Mbulum ana i gwala Haruna ya, ta ŋgat gà huɗ kwite kurwa gər ŋgar makər (13), nda gà təv makəva iɗəm gà dukw gənaw tar ŋa dze.

Gà huɗ kwite gà ɓəza Kehat

20 Gà gwala Lewi ŋgiɗ, gà ɓəza Kehat ka, tə dza a tar gà huɗ kwite nda tsetse ka, ika ahəɗ gà gwala Efərayim. 21 Ta vəl a tar Sehem, huɗ kwite makaha ba, biy gà ɓəzla maŋgasla kəla, ika gər kwite Efərayim, Gezer, 22 Kivtsayim, Bet-Hurun. Gà huɗ kwite ata ta gaw ba fit ka faɗ (4) nda gà təv makəva iɗəm gà dukw gənaw tar ŋa dze.

23 Ika ahəɗ gà gwala Dan ka, tə dza tar: Elteke, Gibbetun, 24 Ayyalun, Gat-Rimmun. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze.

25 Ika ahəɗ mezehe gà gwala Manasse ŋgiɗ ka, tə dza a tar gà huɗ kwite sula (2), gà Taanak nda Yivleyam nda gà təv makəva iɗəm gà dukw gənaw tar ŋa dze.

26 Tə dzaɗa a tar fit ka, gà huɗ kwite kurwa (10) nda gà təv makəva iɗəm gà dukw gənaw tar ŋa dze, na biy gà asiŋ gà ɓəza gà gwala gà ɓəza Kehat ŋgiɗ a.

Gà huɗ kwite gà ɓəza Gersun

27 Gà ɓəza gà gwala Lewi, gà ɓəza Gersun ta ŋgat gà huɗ kwite sula (2) nda gà təv makəva iɗəm gà dukw gənaw tar ŋa dze ika ahəɗ mezehe gà gwala Manasse ŋgiɗ, Gulan ana ika ahəɗ Basan a, huɗ kwite makaha ba, biy gà ɓəzla maŋgasla kəla aha Beyestera.

28 Ika ahəɗ gà gwala Issakar ka, tə dza tar: Kisiyun, Daverat, 29 Yarmut, En-Gannim. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze.

30 Ika ahəɗ gà gwala Aser ka, tə dzaɗa a tar: Misal, Avdun, 31 Helkat, Rehuv. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze.

32 Ika ahəɗ gà gwala Naftali ka, tə vəl a tar: Kades ana ika ahəɗ Galile ya, huɗ kwite makaha ba, biy gà ɓəzla maŋgasla kəla, Hammut-Dur àha Kartan. Gà huɗ kwite ata ta gaw ba fit ka, makər (3) nda gà təv makəva iɗəm gà dukw gənaw tar ŋa dze.

33 Gà ɓəza gà gwala Gersun, ta ŋgat fit ka, gà huɗ kwite kurwa gər ŋgar makər (13), nda gà təv makəva iɗəm gà dukw gənaw tar ŋa dze.

Gà huɗ kwite gà ɓəza Merari

34 A gà asiŋ gà ɓəza gà gwala Lewi ŋgiɗ, gà ɓəza Merari, tə dzaɗa a tar ika ahəɗ gà gwala Zabulun ka: Yukneyam, Karta, 35 Dimna, Nahalal. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze.

36 Ika ahəɗ gà gwala Ruben tə dzaɗa a tar ka, Betser, Yahats, 37 Kedemut, Mefaat. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze.

38 Ika ahəɗ gà gwala Gad tə dzaɗa a tar ka, Ramut i Galaad, huɗ kwite makaha ba, biy gà ɓəzla maŋgasla kəla, Mahanayim, 39 Hesbun, Yaazer. Gà huɗ kwite ata ta gaw ba fit ka, faɗ (4) nda gà təv makəva iɗəm gà dukw gənaw tar ŋa dze. 40 Gà ɓəza Merari gà gwala Lewi ŋgiɗ ata, ta ŋgat nda tsetse fit ka, gà huɗ kwite kurwa gər ŋgar sula (12).

41 Gà huɗ kwite gà gwala Lewi ana tə dzaya tar ika meleke gà Isərayel fit a ka, dzik faɗ gər ŋgar tsamakər (48), nda gà təv makəva iɗəm gà dukw gənaw tar ŋa dze. 42 Kə̀la aà gà huɗ kwite ata ka, təv makəva iɗəm gà dukw gənaw ŋgar riŋ tiwlik tits.

BATSAH kwa ŋa a rahaya aà gà bazlam ŋgar

43 Kərga taŋa ya na, BATSAH kwa ŋa a vəl ahəɗ kwite ata fit a gà Isərayel ana a mbaɗa a gà bàba gà tsir tar a. Tə zla ahəɗ kwite ata, tə dzaya ba aka. 44 BATSAH kwa ŋa a vəl a tar mendze zay tserdze ika kwiye ahəɗ kwite ata, kamala ana a mbaɗa a gà bàba gà tsir tar a. Wura ilik ika magər gà ɓəzla mene are tar a, aka sle aà mehitse tar a vatwa tsa. BATSAH kwa ŋa a dza a tar ahər tar fit. 45 I gà ŋgwal gà bazlam ana BATSAH kwa ŋa a tsikeye a a mayahaba gər gà Isərayel a fit tserdze ya ka, aka geye ba, duwa riŋ ilik, na aka zeha a ge ba tsiye ka, a riŋ tsa.