Gà huɗ kwite makaha aɗəm ba
20
1 BATSAH kwa ŋa a gwaɗa a Yesuwa: 2 « Gwaɗa a gà Isərayel: ‹ Palum gà huɗ kwite aà makaha aɗəm ba, kamala ana i tsik a kurum nda ahər Musa ya. 3 Wele ana aka ŋgasla kəla, nda meweye ŋgar tsiye ka, a sle a aà mede a aà makaha ba aɗəm a fata. Ti te neye aka kurum ka, gà təv makaha aɗəm ba, aà gà mburma ana ta pile a wele ata ta kəɗ a. 4 Wele ata a ŋgasla kəla ya, a vele a huɗ kwite makaha aba ata. A dehe a a hitse a, aka biye hərmaga mada a huɗ kwite ata, dite a ɗeme a dukw ana a ge ba nda ŋgat a, a gà bàba ŋana i huɗ kwite ata ya. Gà mburma ata, ta vilere a vatwa aà mada a huɗ kwite ata, dite ti ɗifere a aà təv ana a ndze a iɗəm i tsaka tar a. 5 Na ilik ŋa aà gà gwala wele ata ta kəɗ a, aka zazamaha wele ata a ŋgasla kəla ya, tsim a huɗ kwite ata ka, gà mburma ana mandza ŋa iɗəm i fata ya, ti sle a aà mivelere a wele ata ahər tsa. Aɗaba a ŋgasla ka kəla, dugwun tar riŋ nda wele ata tsa. 6 A ndze a i huɗ kwite ata, haa a təv ana gà mayahaba gər gà mburma ta gere a seriye ya. A ndze a ka, haa a pat məməta batsah mala məbatsa duwa a Mbulum ana a le ahər aaha akahər ŋa ata ya. Tsam ka, a sle a aà mimbiɗe a gər a ma a huɗ kwite ŋgar ana a valara iɗəm a ya. › »7 Araha na gà huɗ kwite ana gà Isərayel, tə ndzək iɗəm a pam a: Kades, ika ahəɗ Galile ika gər kwite Naftali, Sehem, ika gər kwite Efərayim, aaha Kiriyat-Arba ana tə zalawar Hevrun a, ika gər kwite Yahuda. 8 Ndaka tseke lide Yurdan ŋgiɗ, nda kadwa Yeriku, tə ndzək ka, Betser, i dala ana ika dala gər ahəɗ gà gwala Ruben, Ramut i Galaad, ika ahəɗ gà gwala Gad, àha Gulan ana i Basan ika ahəɗ gà gwala Manasse ya. 9 Taŋa na, gà huɗ kwite ana ta pala agəra gà Isərayel nda gà slele ana ti dehe a ti ndze a ika magər tar a. Na wura aka ŋgasla kəla ka, a sle aà mibe aɗəm a aà gà gwala wele ata ta kəɗ a. Kərga taŋa ya na ŋgat ŋa tekeɗe ka, ta kiɗe a ŋgat tsa, na əlak ŋana gà mayahaba gər gà mburma ta gere a seriye ya.