2 Samiyel 2

Dawda a ne Əbay gà Yahuda ka, i Hevrun

1 A pat ŋgiɗ duwa ka, Dawda a zal aba a BATSAH kwa ŋa a gwaɗar « wànà i ndə̀zl a kwite ŋgiɗ ilik i liwiŋ gà kwite ana ika ahəɗ gà Yahuda ya ya?» BATSAH kwa ŋa a gwaɗar aaka: « Haya» Dawda a gwaɗar asa. « I ndə̀zl ana a kwite wara ilik a?» BATSAH kwa ŋa a gwaɗar aaka asa: A Hevrun. 2 Dawda a ndə̀zl a fata nda gà məkəs ŋgar sula. Ahinuyam dəm gà Yizereyel, nda Abigayel madakwa məkəs ana zal ŋgar Nabal gà Karmel a mət ihər a ya. 3 Tə ndə̀zl akaba nda gà mburma ana tə zàzàmawa ŋgat a. Ku mege weke nda gà ma ŋgar. Tə ndza i kwite Hevrun. 4 I fata ya ka, gà mburma ana i Yehuyada ya tə dara a təv ŋgar a, aà mandza aaka à mal, aà mene Əbay gà Yahuda. Gà mburma tə dara ta gwaɗa a Dawda ka, gà mburma ana i Yabes ana, ika ahəɗ Galaad a na ti le Sawul a. 5 Dawda a slər mburma aà tə ta gwaɗa, gà mburma Yabes ana, ika ahəɗ Galaad a ka, BATSAH kwa ŋa mepise a kurum ahəm a kurum ana kà patum aà megemir ata nda təv Sawul batsah kurum ŋa ya, kà lwìm ŋgat a. 6 Kinehe ka, BATSAH kwa ŋa mege kurum ŋgwal ŋgar, dite məpat a kurum dər ka, ŋgat ilik na a riŋ a geye a ba à gà gər agəra kurum a. Iye tekeɗe i ge kurum a ŋgwal ŋa aɗaba ana ki gwim ŋgwal ata ya. 7 Aɗaba taŋa, kinehe ka, vəlum aba ndzəɗa. Nwim gà ɓəzla ndzəɗa, aɗaba batsah kurum ŋa Sawul ka, aka mət. Dite iye na kinehe gà Yahuda tə zla iye, ti dze aka iye à mal, ti ne a iye Əbay tar a.

Abiner a ne à Isbuset Əbay gà Isərayel

8 kərga taŋa ya, Abiner kəla Ner, mala aka miɗ gà sliwdze Sawul, a zla Isbuset kəla Sawul a da dər a kwite Mahanayim. 9 A ne dər Əbay aka gər gà mburma ana mandza ŋa i gà Galaad, nda gà Asuriya, nda gà Yizereyel, nda gà Efərayim, nda gà Bendzamen, dite aka gər gà Isərayel fit tserdze. 10 Isbuset kəla Sawul ka, mive ŋgar ka, dzik faɗ na a ne Əbay aka gà Isərayel a. A kwara tar ka, mive sula. Ama gà mburma gà Yahuda, na tar tə zàzàm Dawda a ɗekɗek a. 11 Dawda a kwara gà Yahuda i Hevrun ka, mive təsəla nda mezeheŋa.

Guvəl gà Isərayel nda gà Yahuda.

12 Abiner kəla Ner, nda gà mburma ana ta kaslawa Isbuset kəla Sawul a, tə da i Mahanayim a, tə zla vatwa ana a da a Gabawun a. 13 Yuwab kəla Tsuriya nda gà mburma ana ta kaslawa Dawda a, tə dzəba aà madàra mbaŋa. Tə ləma akaba bise nda təv duluv duwa i Gabawun. Ku mege weke tə ndza ndaka lide tar ndàs ndàs. 14 Abiner a gwada a Yuwab: « Gà sliwdze ma ana gà gawla ŋa ya, ta hitse à maàga ika magər tar, ɗa i təv ma. Ta pat aba aà gà ndzəɗa.» Yuwab a gwaɗar aaka: « Mege ba kataya. » 15 Gà sliwdze ata ta kaɗa akaba. Tə dara i gwala Bendzamen a ka, gà mburma kurwa gəra sula. Tə dara ka, nda zləm Isbuset kəla Sawul a. Gà ɓəzla makasla Dawda tekeɗe, tar kurwa gəra sula mbaŋa. 16 Ku mege weke a yab aka wele ana ta ge a maaaga ya i gər a, dite kə̀v a ger masalama aka tsaka, tə dzawa akaba a bəɗ. Tə zala a təv ata i Gabawun ka, Helkat-Hasurim. 17 A pat ŋa ata ka, batsah guvəl ana hinne ya, na te ge ya. Gà Abiner nda gà Isərayel ka, gà mburma Dawda ta mba à tar. 18 I fata ya ka, gà ɓəza Tsuriya ata makər a, tar a riŋ mbaŋa, gà Yuwab Abisay nda Asayel. Asayel ka, a mba aà mivele a za dər miyak dala. 19 A dzəba aà madalawa Abiner, aka məsak dər tsidze. 20 Abiner a mbəɗ aba a gwaɗar: « Naka ana kər a, Asayel ?» Asayel a gwaɗar: « iye» 21 Abiner a gwaɗar: « Məsak aà medelewe a iye, dalawa kəla gawla ŋgiɗ pam kə gəs ŋgat, ka ndzək ikə̀ka, dukw maslawa guvəl ŋgar a. Ama Asayel ka, a waya məmə̀saka a Abiner tsa. 22 Abiner a gwaɗa a Asayel asa: « Məsak aà madalawa iye, aàmala na ki tike a aà iye a balaari aà makəɗa kər a, dite hwarwa a ta giŋa nda təv damər yak Yuwab a. 23 Ama Asayel a waya mə̀mə̀sak a aà ŋgat tsa. Abiner a ger màandwakw suwal ŋgar aka huɗ, pakw a slalar nda magər dəba a dəɗ dər a bəɗ a mət aɗəm. Gà mburma tàa ndze a təv ana Asayel ata a mət a aɗəm a ka, ta hitsewa a fata zaakwa. 24 Ama gà Yuwab nda Abisay, ta dzəba aà mazazama Abiner. Ti ndze a diyis Amma ana ika tseke are pat ana a mbəzawara i Giveya ya ka, pat à dəɗ aà tar, ika vatwa ana a da ndaka mandazla Gabawun a. 25 Gà sliwdze Bendzamen tə ndzar a dəba a Abiner, ti ne ilik, tə dza maŋgwaɓa ika diyis duwa. 26 Abiner a zalaha a Yuwab a gwaɗar: « wànà ki ndzèwime a ana aà mege guvəl hiywe pər ya? Wànà ka sər tsìyè ka, na mà aà guvəl hiywe pəra ka, a zlere dukw ana ŋgwal ŋa tsiye ya? Ki bebe a dər ana Dukula na aà magwaɗa gà mburma yak ka, ta məsak aà mazazama gà damər tar a. » 27 Yuwab a gwaɗar: « Nda zləm Mbulum, nà kà fafəl ndeɗiŋa tsəka, gà mburma gà ta miyeke a mazazama kər tsa, haa ndidwe i mèkwède. » 28 Yuwab a vizl à mezleliŋ ka, gà sliwdze ta məsak aà mazazama gà Isərayel, tàa ge guvəl asa tsa. 29 Gà Abiner nda gà mburma ŋgar ka, tə zàzàm Yurdan i huɗ həvəɗ ŋa ata ya fit. Dite tə tsala iɗəm a. Tə da i tulwah ana tə zalar Bitrun a, dite ti ndze a Mahanayim. 30 I dəba ana Yuwab a məsak aà mazazama Abiner a ka, a yaha gər a gà sliwdze ŋgar. Ama i liwiŋ gà sliwdze Dawda ka, tar riŋ tsa mburma kurwa gər ŋgar tswiɗ dite aha Asayel. 31 Ama gà sliwdze Dawda, ta bats aà gà mburma gà Bendzamen a ka, dərməka makər nda dzik ndilik, nda gà asiŋ gà sliwdze Abiner. 32 Tə zlara məməta Asayel a, ti tike a dive dede ŋgar i Betelehem. I dəba ŋa ya gà Yuwab nda gà sliwdze ŋgar, hìywip ta həna a bəra aka mede. Tə ndze a Hevrun ka, i mèkwède aka pat ana a mbizere ya.