3
1 Guvəl ata ka, aka ndza hinne na ika magər gà mburma Sawul, nda gà mburma Dawda a. Gà Dawda nda gà mburma ana ta hitser a dəba ya ka, tar a riŋ ti sikehe a aka miɗ aka miɗ. Ama gà mburma Sawul ka, tar riŋ ti nìkìɗiŋ a.Gà ɓəza Dawda ana a wa tar i Hevrun a.
2 Araha, na gà ɓəza Dawda ana a wa tar i Hevrun a. Malkwara ŋgar ka, Ammun, na a war ka, Ahinuyam dəm gà Yizereyel. 3 Masula kəla ŋgar ka, Kilab na a war ka, Abigayel madakwa məkəs ana zal ŋgar Nabal gà Karmel a mət a. Məmakər ŋana ka, Absalum na a war ka, Maka dəm Talmay Əbay gà Gesur. 4 Məfaɗ ŋana ka, Aduniya na a war ka, Hagit. Mi əzləm ŋana ka, Safatiya na a war ka, Abital. 5 Ma ndilik ŋana ka, Yitram na a war ka, Egəla ŋgat məkəs Dawda mbaŋa. Gà taŋa, na gà ɓəza Dawda ana a wa tar i Hevrun a. 6 Akahər guvəl ata ika magər gà mburma Sawul nda gà mburma Dawda a ka, Abiner ka, mazlə̀ɓ ŋgar a səkah aka miɗ aka miɗ na ika magər gà mburma Sawul a. 7 Sawul ka, məkəs ŋgar ŋgiɗ a riŋ a gar kə̀ra i gər a, tə zalar Rispa dəm Aya. Pat ŋgiɗ duwa ka, Isbuset a gwaɗa a Abiner: « Aàmala, na ka ndzum nda məkəs dede yak ata ya? » 8 Bazlam Isbuset ata a tsik a Abiner a ka, a tsəɓar hinne, a gwa: « wànà iye ana kə̀ra gà Yahuda ya? Haa kinehe ka, i gewa ŋgwal a gà mburma tsir yak Sawul nda gà damər ŋgar, nda gà masla ŋgar tserdze. Yàa geye gà dukw pampam biy na ka, kà dəɗ a ahər a Dawda a tsiye. Ama kər mbakum ka, ki dene a à iye bakal nda təv məkəs dede gà ata ya! » 9 Abiner a gwa: « Mbulum miviliŋ batsah mesewere are, na i ge a dukw ana BATSAH kwa ŋa a mbaɗa, a ge a a Dawda a tsiye. » 10 Aka mbaɗa, a gwa: « I ti zle a Əbay aà gà gwala Sawul a. A ta vile a mazlə̀ɓ ka, a Dawda ana a ne a Əbay a . » A ta kwere a gà Isərayel nda gà Yahuda tserdze daga ara i Dan a ndisl a Beer-Seva. 11 Isbuset ka, a sle a aà mifefile aaka a Abiner kwizikw tsidze, aɗaba magəɗa Abiner a ger. 12 I fata ya ka, Abiner a slər gà ɓəzla sik ŋgar a təv Dawda, aà tə ta gwaɗar nda zləm ŋgar ka, kwite ŋa dzena biy weke? Gəs aà iye masla, i zleke a kər, na dite ka, gà Isərayel tserdze ta hitsek a dəba ya. 13 Dawda a gwaɗar: « Lele, na ki giseme a masla nda kər a, ama i wize a kər a duwa ilik, ki miŋera aà məkəs gà Mikal dəm Sawul a dzekwiŋ, na dite ki mbiɗere a gər a təv gà ya ya. » 14 Dawda a slər gà ɓəzla sik ŋgar a təv Isbuset kəla Sawul aà magwaɗar ka, miŋera aà məkəs gà Mikal a, aɗaba Yàa mbər mandza aaka zə̀mə̀ɗ dukw gà tsir gà Filistiya dərməka na i bats tar a. 15 Isbuset a slər mburma aka Mikal ana i zal i bəra Paltiyel kəla Layas a. 16 Zal ŋgar a zàzàmara i dəba ya nda gà tuwa ndisl a Bakurum. I fata na Abiner a gwaɗar: « mbəɗ gər a ma. » Dite na a mbəɗ gər a ma ya. 17 Abiner a zal a gà bàba ŋana i Isərayel a, aà mandza akaba ahəm, ta gwa: Daga piŋŋe na kà wayum ka, Dawda mene Əbay kurum a. 18 Kinehe ka, ahər ŋa aka ndze aɗəm, na aà mege dukw ana BATSAH kwa ŋa a fafəl aaka, aka gər Dawda a, a gwa: Nda ahər mala meslire gà Dawda, na i bere a à gà mburma gà, gà Isərayel ihər gà ɓəzla mene are tar gà Filistiya, nda gà gà asiŋ gà ɓəzla mene are tar ŋgiɗ pampam a. 19 Abiner a fafəl a gà Bendzamen mbaŋa, dite a da a ta tsik a Dawda ana i Hevrun a, nda ahər ŋgar ŋa. Gà dukw ana gà ŋgwal ŋa, i təv are gà Isərayel nda gà mburma gà Bendzamen fit ka, a tsik a tar. 20 Abiner a dara a təv Dawda a Hevrun a, nda gà mburma dzik sela, Dawda a de tar batsah ɗaf. 21 Abiner a gwaɗa a Dawda: « Əbay gà, iye ka, mahadzàlà ba ŋa, na aà mada a mayaha gər a gà Isərayel fit tserdze aà mazazama kər a. Ta gəs masla nda kər. Dite ki kwere a gà kwite gà mburma kamala ana gəzləŋ yak a waya ya. Dawda a məsak à Abiner, dite a da ba nda zay. »
Məməta Abiner
22 I dəba mendze zaakwa ya ka, gà sliwdze Dawda nda gà sliwdze Yuwab mara i medwiŋwè gà mburma ya ka, tə ndzəkara aà tar gà duwa ya hinne. Abiner ka, ar i təv Dawda i Hevrun asa tsa. Aɗaba Dawda ka məsak à ŋgat aka daba zay. 23 I təv ana gà Yuwab nda gà sliwdze ta mara ya ka, wura a gwaɗa a Yuwab: « Abiner kəla Ner ka, ka dara a bəra Əbay ya. Dite ka, Əbay aka məsak à ŋgat, a daba zay » 24 Yuwab a da a bəra Əbay ya, a gwaɗar: « Dukula dziye na kì ge ya? Abiner a dara a ma yak kə ka, ka məsak à ŋgat, a daba nda zay kataya ya? 25 Ka sər Abiner kəla Ner ata ka, lele, a dara ka, aà mə̀pasak za ya pəra, aà mandza aà kər zləm. Aà masəra dər, meme na ka dawa a guvəl a. Nda gà tsa meme na kà mawàra i guvəl a, dite aà masəra dər dukw ana kì gewa ya fit asa. » 26 I fata ya ka, Yuwab a dara i bəra Dawda a, a slər gà ɓəzla sik ŋgar, tə zàzàm Abiner. Ti ta megìsera ika tə̀kə̀r yam i Sira ya. Dawda ka, aka sər aba tsa. 27 I təv ana Abiner a mbəɗara gər a Hevrun a ka, Yuwab a gəs kətsah a kəla ga duwa a riŋ, aà guva biye hərmaga mada a kwite ata kamala ana a fefilere a nda akəl a. I fata na a lakar aka huɗ a mət aɗəm a. Yuwab a kəɗ ka, a pəl dər damər ŋgar Asayel ana Abiner a kəɗ a. 28 I dəba ŋa ya, Dawda a tsaraka ka, a gwa: « BATSAH kwa ŋa a sər mə̀r nda gà mburma gà ana i kwere a tar a ka, məməta Abiner kəla Ner ka, ahəm mə̀r tsa aà biybiy. 29 Məmbəz ŋa ka, mege ika gər gà Yuwab nda gà ma ŋgar fit, na tə sa mesewere are ŋa ya. Mezelme ŋa mege i liwiŋ gà gwala ŋgar hiywe. » Dukw məməta ana kamala sampiyas a, a ta ŋgizewere a a ter a, mbəlak ba a gewe teriŋa. Gà asləka ti te gewe a megemir gà məkəs. Ti te betse a gà asiŋa, kige tsa may a te gewe a teriŋa. 30 kərga taŋa ya, na gà Yuwab nda damər ŋgar Abisay ta kəɗ Abiner a. Ta kəɗ ̀ŋgat ka, aɗaba a kəɗ damər tar i guvəl ana ta ge i Gabawun a. 31 Dawda a gwaɗa a Yuwab nda gà sliwdze ana i təv ngar a tserdze: « Kwayaɗum ikaba aà gà petek kurum a, dite ka dzàyum akaba gà buhwa, ka tuwum Abiner. » Əbay Dawda a zàzàm məməta ŋana tə zla nda sləlah a. 32 Ti le Abiner i Hevrun, Əbay Dawda a tuwa ika dive Abiner nda ndzəɗa. Dite gà mburma tserdze tə tuwa akaba nda gà ŋgat. 33 I dəba ŋa ya, Əbay Dawda a lah dimis məməta a gwa:
Ku mege gà sik yak tekeɗe ŋgeyek akaba nda tsìtsirɓe ɓav tsa asa.
Ta kəɗ kər ka, kamala gà ɓəzla məbatsa mburma ya. » Gà mburma tə dza akaba tuwa nda magala asa. 35 I dəba ŋa ya, gà mburma tserdze tə dara a təv Dawda a, aà metike aaka balaari ma zəm dukw mezime te, ələk ana pat a diɗe a ya. Ama Dawda a mbaɗa a gwa: « Mbulum miviliŋ batsah mesewere are na, Yàa məndzər dukw mezime ku mege Dukula, na pat aka dəɗ zukw tsiye. » 36 Gà sliwdze tserdze tə tsaraka ka, ta gəs kamala ana Əbay a tsik a. kərga ana ta gəsawa ahəm Əbay a fit. 37 kərga taŋa ya, gà sliwdze nda gà Isərayel tserdze tə sər dər, a pat ŋa ata ka, ta kəɗ Abiner kəla Ner ka, na a vəl ahər vatwa ka, Əbay tsa. 38 Dawda a gwaɗa a gà sliwdze ŋgar: « wànà kà sərum te tsiye ka, kəla Əbay, batsah mburma aka mət i Isərayel mbakum a? 39 Iye mbakum ka, ku mege tàa ne aà iye Əbay tekeɗe ka, magàhà à bəɗ aka gəs iye. Gà ɓəza Tsuriya ata ka, sègèmè i gər tar na ika miɗ gà ya. kərga taŋa ya, BATSAH kwa ŋa məma tar aɗəm à bakal ŋa kalkal bakal dukw mage megemir tar ana ta ge ya»