Məməta Isbuset
4
1 I təv ana Isbuset kəla Sawul a tsaraka ka, Abiner aka mət i Hevrun a ka, a haɓar aba à ahər mìtèslslèslsle. Gà Isərayel tserdze. ta ge magəɗa. 2 Isbuset kəla Sawul ka, gà ɓəzla aka miɗ gà sliwdze ŋgar a riŋ sula. Ilik ŋa tə zalar Baana, ma sula ŋana tə zalar Rekab. Tar gà ɓəza Rimmun gà Beerutiya. Beerut ka, ika mekwere gà Bendzamen. 3 Gà Beyrutiya ka, tàa təz a Bitayim, tə ndzawa riŋ i fata haa mbakum. 4 Yunatan kəla Sawul ka, kəla ŋgar riŋ magàha bəɗ ŋa i sik a sula məma. I təv ana məməta gà Sawul nda Yunatan a ɗere i Yizereyel a ka, ar mive əzləm. Matuwar ŋgar a vele a dər akaba ka, a dəɗ ihər a, aɗaba ana a riŋ a mbebe a ya. A geha a bəɗ i sik a, zləm ŋgar ka, Mifibuset. 5 Gà ɓəza Rimmut gà Biyrutiya ka, nda gà Rekab aha Baana ka, tə da a bəra Isbuset. Ti ndze ka, aka pat ana makəɗa dəvar ide ya. Ti le ahər a riŋ mahəna ŋa i ga a sìkìke a ba, biy mala magər pat. 6-7 Tə da a huɗ ga, kamala ana ti de a a mandzəkara ble ya ka, tə lakar aka huɗ. Gà Rekab nda damər ŋgar Baana, i təv ana ta kəɗ aba ya ka, tə sas ikə̀ka gər a. Ta val dərra i ga ya. Gà wele ata nda damər ŋgar a, tə dəɗ aka tulwah Yurdan i huɗ həvəɗ ŋa ata ya fit. 8 Tə zlara gər Isbuset ata a Dawda a Hevrun a, dite ta gwaɗar: « Gər Isbuset kəla Sawul mala mene are yak ana a waya medzeye a a kər a ka, araha BATSAH kwa ŋa aka pəl kər aà gà Sawul nda gà mà ŋgar a mbakum. » 9 Dawda a gwaɗa a Rekab nda damər ŋgar Baana gà ɓəza Rimmut gà Biyrutiya ata: « BATSAH kwa ŋa a riŋ nda mesife, ŋgat na a bewe a iye i mesewere are gà ya. 10 Wele ana a ɗiŋerra aà məməta Sawul a ka, a pər ahər ka, a dìŋerra taŋa ka, aà ŋgwal labara ya. Ama i gəs, i kəɗ ŋgat i Tsiklak. kərga taŋa ya na i pəlar dukw mayaba labara ŋgar ata ya. 11 Meme dze kuɗa ya, na i ge a nda gà mburma ana ta kəɗ wele ana aka ge duwa tsa, i ga i ma ŋgar ika sləlah ŋgar a. I pile a kurum a aɗəm a ka, nda mesewere are biy ana ki ndzwime a dər ika gər ahəɗ tsiye. » 12 Dawda a vəl vatwa a gà sliwdze ŋgar aà məbatsa gà Rekab nda Baana. Ta bats tar tə sasa ika tar gà ahər nda gà sik a. Tə danaya məməta tar aà dizl bise nda tə̀kə̀r yam ana i Hevrun a. Gər Isbuset ka, ti tike a dive Abiner i Hevrun.