2 Samiyel 5

Dawda a ne Əbay aka gər gà Isərayel tserdze.

1 Gà mburma ana i gwala gà Isərayel a tserdze ya, tə dara a Hevrun a, a təv Dawda a, ta gwaɗar: « Kwa ka, nda gà gwala, bise bise. » 2 Pìŋŋe akahər ana Sawul Əbay kwa ya ka, kər na mala aka miɗ gà sliwdze gà Isərayel a, i təv ana tə dawa, ta mawàra i guvəl a ya. Tsaatsa ka, BATSAH kwa ŋa aka mbər magwaɗak, kər na ki kive a gà Isərayel, gà mburma gà ya. Ki ne a Əbay tar. 3 Gà bàba ŋana i Isərayel a tserdze, tə dara a bəra Əbay Dawda a Hevrun a. Dite Əbay Dawda a gəs masla nda gà tar ika miɗ BATSAH kwa ŋa. Ta mbəɗ mal a gər a Dawda, ti ne dər Əbay gà Isərayel. 4 Dawda a ne Əbay ka, ŋgat mive dzik makər. A kwara ka, mive dzik faɗ. 5 I Hevrun a kwara gà Yahuda ka, mive təsəla nda mezehe ŋa. I dəba ŋa ya, i Yeruzalem a kwara gà Isərayel nda gà Yahuda tserdze ka, mive dzik makər gəra makər.

Dawda a zla Yeruzalem

6 Gà Əbay Dawda nda gà sliwdze ŋgar, tə da a Yeruzalem, aka gà mburma ana tə zala a tar gà Yebusiya ya, tar riŋ mandza ŋa i kwite ata. Gà Yebusiya ata ta gwaɗa a Dawda: « Ki dere a a faha ya tsa, ku mege gà ɓəzla guluf nda gà ɓəzla magàha a bəɗ tekeɗe ka, ta mbe a a keriŋa. Ti dìgìze a kər. » Taŋa kamala magweɗe ya ka, Dawda a sle a aà mege guvəl nda gà tar tsa. 7 Ama ka, Dawda a zla kwite Siyuna ana malawaraŋa nda zlagam, ti te zelere a kwite Dawda mba ya. 8 Pat ŋa ata ka, Dawda a gwa: « Wele ana a ta betse a gà Yebusiya ata ya ka, say a de a nda huɗ biye, na dite a sle a aà mele a kwite ata gà ɓəzla guluf, nda gà ɓəzla magaha a bəɗ ana i ne tar a are ya ka, ^ª……. . » Aɗaba taŋa na ta gwa: « Gà ɓəzla guluf nda gà ɓəzla magaha bəɗ ka, ti dewe a à ga ana gà mburma tə zambaɗawa iɗəm a Mbulum a tsa. » 9 Dawda a ndza i zlagam ata tə zalar kwite Dawda a. I dəba ŋa ya Dawda a zlazla gà təv metsile. Gəs ika məvàh ana tə zalar Miluwa ana i bəra ya, tsikw huɗ ga, a ler dər tits. 10 Kər ga taŋa ya, na Dawda a da aka miɗ aka miɗ a. Aɗaba BATSAH kwa ŋa Mbulum gà ɓəzla guvəl a riŋ mandza ŋa nda ŋgat 11 Hiram Əbay gà Tir, a slər gà ɓəzla sik ŋgar a təv Dawda, aà mandzə̀karaha gà dizl dukw ana tə zalar Sedèr^ª nda gà mburma ana tə sər məpàpàza dizl a, nda gà ɓəzla məpapaza kur mazlazlàr dər ŋgwal batsah ga a Dawda. 12 kərga taŋa ya na Dawda a sər ka, BATSAH kwa ŋa nda ahər ŋgar ŋa na a tike ŋgat a Əbay aka gà Isərayel a, aka səkahar aà maŋgaŋgəra à mekwere ŋgar, agəra gà mburma ŋgar gà Isərayel. 13 Dawda a ndzək gà məkəs ŋgiɗ pam asa, gà dəm gà Yeruzalem gà mandərkwasla ŋa, nda gà kəra məkəs i dəba ana a dara i Hevrun a. Gà məkəs ata tàa wayar gà ɓəza gà asləka ŋa nda gà dəm ŋa. 14 Araha na zləm gà ɓəza Dawda ana a wa tar i Yeruzalem a. Samuwa, Subab, Natan, Salumun, 15 Yibhar, Elisuwa, Nefeg, Yafiya. 16 Elisama, Eliyada, Elifelek 17 Gà Filistiya tə tsaraka ka, tàa dza mal aka Dawda aà mene Əbay aka gà Isərayel fit tserdze ka, gà Filistiya tə da a mayaha Dawda. Dawda a tsaraka ka, a da a huɗ zlagam ata. (1Samiyel 5: 7, 9) 18 Gà Filistiya tə dzaya ba gà vatwa sweywèh sweywèh i tùlwàh Refaya. 19 Dawda a wiz aà BATSAH kwa ŋa: « wànà i da mege guvəl nda gà Filistiya ya? Wànà ki dziŋ a tar a ahər gà ya? » BATSAH kwa ŋa a gwaɗa a Dawda: « Da nda ndzer, i dzeke a gà Filistiya ahər yak . » 20 I dəba ŋa ya ka, Dawda a da a Baal-Peratsim, i fata na a bats gà Filistiya ya. A gwa: « BATSAH kwa ŋa aka teyeŋ vatwa i liwiŋ gà ɓəzla mene are ga ya, kamala ana yam a tayawa vatwa i guvah a . » Aɗaba taŋa na tə zal a təv ata ka, Baal-Peratsim a. 21 I fata, na gà Filistiya ta məsak aà gà dukw ana ti newa dər mbulum tar a. Gà Dawda nda gà mburma ŋgar tə ndzək, tə da dər akaba. 22 Gà Filistiya ta mara ma sula ŋa, aà mege guvəl a tulwah Refaya a, tə dzəba i fata. 23 Dawda a wiz aà BATSAH kwa ŋa asa, dite BATSAH kwa ŋa a gwaɗar: « Ka da aka taraha ser tsa, ki de a aka tereha ka, nda dəba tar ndisl aà huɗ dizl duwa tə zalar Baka. 24 I təv ana kàa tsaraka, miɓezle duwa kamala mede mburma ya ika gər gà dizl Baka ata ya ka, mba aka taraha aba kuɗa. Aɗaba Yàa ndzàk aka miɗ aà məbetse gà Filistiya. » 25 Dawda a ge dər kamala ana BATSAH kwa ŋa a tsiker a, na dite a bats gà Filistiya daga i Geba ya ndisl aka ahəm Gezer a.