2 Samiyel 6

Dawda a zla sahər BATSAH kwa ŋa, tə da dər a Yeruzalem

1 Dawda a yaha gər a gà sliwdze ana tar gà Isərayel ndzer a, dəbuw dzik makər. 2 I fata ya ka, gà Dawda tə dzəba a mede, nda gà sliwdze ata fit tserdze. Tə da a Baal ana ika ahəɗ Yahuda ya, aà ma ta məmàra à sahər Mbulum ata ya. Ika gər sahər ata ka, ta wetse ahər zləm BATSAH kwa ŋa Mbulum gà ɓəzla guvəl gà Isərayel, ana mandza ŋa ika liwiŋ gà sereben ata sula ika gər sahər ata ya. 3 Tə zla sahər Mbulum ata tə tike a muta piris ata tə ge awiya ŋa ya, tə tar dərra i bəra Abinadab ana ga ŋgar ika dzàzl ŋa ya. Gà Uza nda Ahiyu gà ɓəza Abinadab tar a riŋ ti zezeme a muta piris ata awiya ŋa ya. 4 Tə zlara sahər Mbulum ata ya ka, i bəra Abinadab ana ga ŋgar ika dzàzl ŋa ya. Ahiyu ka, a ndzar aka miɗ. 5 Gà Dawda nda gà Isərayel fit tserdze, ta ŋgayaba ika miɗ BATSAH kwa ŋa, nda gà dukw ana ta gəzləwa aka dimis pampam a. Gà kazlaŋa megirive ana ta papaza biy dizl duwa tə zalar Sipir a. Gà gandzavəl ana ti dzewa nda ahər sula ya, nda gà gandzavəl ana liɓir diŋ a, gà bàba gà mediye, gà megwidzel nda gà zara ana ti lekeye a dər aba ka, a da aka megirive ya. 6 Ti ndze aka tawar Nakun, i təv ana gà sla tə sahaka, sahər Mbulum ata a dzadzàk a diɗe a zləmana ya ka, Uza a ler ahər ŋgar aà mekətsawa sahər Mbulum ata. Aɗaba muta piris ata aà gà sla ya ti diɗe a dər akaba 7 I fata ya ka, matsəɓatsəɓ BATSAH kwa ŋa a dara aka gər Uza ya. Mbulum a kəɗ ŋgat, aɗaba ana aka zàzàm məpala ahəm ana tə tsik aka gər sahər Mbulum ata tsiye ya. A mət a fata bise nda sahər Mbulum ata. 8 A tsəɓ a Dawda hinne, na BATSAH kwa ŋa a kə̀ɗa Uza ka, aka ge duwa tsiye ya. Ha mbakum tekeɗe təv ata tə zalawar hiywe (Peres-Uza). 9 Dawda a ge magəɗa a BATSAH kwa ŋa ndaàswunənwa asa na a pat ŋa ata ya, dite a gwa: « Meme dziyè na sahər BATSAH kwa ŋa a de a ga ma ga ya? » 10 Dawda a niw madàc à sahər Mbulum ata a ga mà ŋgar. A kwite ana tə zalar kwite Dawda a. Ama Dawda a zla dər vatwa ana a da a bəra Ubed-Edum gà Gat a. 11 Sahər BATSAH kwa ŋa ata a ndza riŋ i bəra Ubed-Edum ata gà Gat a, kiye makər. BATSAH kwa ŋa a pìse a ahəm aka gər gà wele ata nda gà mà ŋgar fit dze. 12 Tə dara tə tsik a Əbay Dawda ta gwaɗar: « BATSAH kwa ŋa aka pìse ahəm aka ga Ubed-Edum nda gà dukw ŋgar fit kweleŋ, agəra sahər Mbulum ata. » I fata ya ka, Dawda a da a tə zlara sahər Mbulum ata i bəra Ubed-Edum a. A da dərra nda gà maŋgayaba, a kwite ŋgar a. 13 Tsaatsa ka, i təv ana gà ɓəzla mazlara sahər BATSAH kwa ŋa ata ya, tàa ɓala dər sik ndilik ka, ta kə̀ɗawar mbuluv sla nda sla ana dàgal ŋa dàɓàslɓàslsla ta gəl megile ya. 14 Dawda a gərə̀v nda ndzəɗa ŋgar fit kweleŋ ika miɗ BATSAH kwa ŋa. Dawda a tike akaba petek gà ɓəzla mendə̀va kuɗa a Mbulum ana tə zalar Efud a, ta ŋgar nda liŋ ^ª. 15 Gà Dawda nda gà mburma Isərayel fit tserdze tə da à sahər BATSAH kwa ŋa ata a Yeruzalem nda gà Mewideye, nda gà maŋgayaba, nda gà mezlibe ana pampam a, nda məvata gà mezleliŋ. 16 I təv ana tə zlara aba sahər BATSAH kwa ŋa ata a zlagam Dawda a ka, Mikal dəm Sawul a riŋ a pire a a tereha ndaka biye mendiwek. A ŋgata a Dawda a riŋ a ndebeye a a mbulum nda gà megirive ika miɗ BATSAH kwa ŋa tsam ka, a dzəba aà mene dər bakal i huɗ gəzləŋ ŋgar hinne. 17 Tə da a à sahər BATSAH kwa ŋa ata a təv ana tə làmbaɗar aba ya ya, ti tike a huɗ mekirewe ga petek ana Dawda a kiriwer aba ya ya. I fata ya ka, Dawda a bats gà dukw gənaw aà madular a Mbulum, dite a batsar gà duwa, biy masəra ba gà Mbulum nda mburma asa, biy mandza zay zay gà mburma nda gà Mbulum. 18 I təv ana Dawda, a ndəv aba aà mege ye gà dukw ata ya ka, a pìse a ahəm aka gà mburma nda zləm BATSAH kwa ŋa mala mege guvəl ana ika gər gà duwa fit tserdze ya. 19 I dəba ŋa ya, a dzəba aà madzaya gà dukw mezime, a gà Isərayel ata mayahaba gər ŋa ya. Ku mege asləka ŋa, ku mege məkəs ŋa ka, aka ŋgat peŋ zaakwa, mandazà slu zaakwa, nda matakwala manaha dizl ana tə zalar viŋye makùla ŋa. I fata ya ka, ku mege weke a da ba a ma ŋgar. 20 I dəba ŋa ya ka, Dawda a mbəɗ gər a ma, aà megeye wusa a gà mburma ŋgar. Mikal dəm Sawul, a dara aka miɗ Dawda a ka, a gwaɗar: « Meme na mbakum ka, Əbay gà Isərayel a vəl aba mezlibe, ika miɗ gà dəm ana ta gewa megemir i bəra gà ɓəzla meslire ŋgar, nda mandzə̀ka ikaba petek a. Nda ndzer ka, say məfara mburma na a ge a kərga taŋa ya. » 21 Dawda a gwaɗa a Mikal: « I ge kamala taŋa ya ka, ika miɗ Mbulum ana a zla iye, ika dede yak a, nda gà mà ŋgar fit tserdze ya. A tike iye, a Əbay ika gər gà Isərayel gà mburma BATSAH kwa ŋa. Ika miɗ BATSAH kwa ŋa, na i pat aà maŋgayaba gà nda megirive ya. 22 I ti nikiɗ a à gər gà, a ze a dər na mbakum a. Iye ka, i pər a à ba gà ka, mala mahəna aà gər a bəɗ. Ama kərga taŋa ya, na gà ɓəzla meslire yak ata gà dəm ŋa kà tsikw a, na ti te zlìbe a aà iye ya. 23 Aɗaba taŋa na Mikal dəm Sawul aka ŋgat kəla tsa, ndisl a məməta ŋgar a.