2 Samiyel 7

Dawda a waya mazlazla ga mahama iɗəm a BATSAH kwa ŋa

1 I təv ana Dawda a ndza i ga i ma ŋgar a ka, BATSAH kwa ŋa tekeɗe, a vəlar mesìkìka ba nda təv gà ɓəzla mene are ŋgar fit tserdze. 2 A pat ŋgiɗ duwa ka, Dawda a gwaɗa a mala məma aà guma Mbulum Natan: « Pər ahər kwaŋ, i gək kamkam, iye ka, i ga ana tə zlazl nda dizl ana tə zalawar seder a^ª ya. Ama sahər Mbulum ka, ar i ga ana ta kiriw nda petek a. » 3 Natan a gwaɗar aaka a Əbay: « Da ge dukw ana ka dzala i gəzləŋ yak a fit, aɗaba BATSAH kwa ŋa a riŋ mandza ŋa nda kər. » 4 Tsaatsa i huɗ həvəɗ ŋa ata ya, na BATSAH kwa ŋa a fafəl a Natan a, a gwaɗar: 5 Da ta gwaɗa à mala meslire yak Dawda ka, araha na BATSAH kwa ŋa a gwa ya: « wànà kər a, na ki giŋ a ga ana i ndze a iɗəm a? . » 6 Aɗaba Yàa ndza i ga ana ndzəɗa ŋa ta ge nda dizl a tsa, daga a gər ana i ndzəkara gà ɓəza Isərayel ika ahəɗ Ezipt a ya, ndisl à mbakum. Ama tə suwaya aà iye ka, i gà ga ana ta geye nda petek a pəra. 7 Maa suwaya akaba nda gà Isərayel fit tserdze, akahər mesìweye mə̀r ata mìi suwayawaya ana, wànà Yàa tsik duwa aà wura ilik i liwiŋ gà mburma ana ta kive a gà mburma gà ana i ndzək tar aà məpəra aà tar a ya. Wànà Yàa gwa aàmala na ki gwimiŋ ga Sedèr tsiye ya? Awaŋ Yàa wiz duwa aà wura ilik tsidze.» 8 Kinehe ka, ki gweɗe a à mala meslire gà, Dawda ka, araha na dukw ana BATSAH kwa ŋa mala mege guvəl gà Isərayel a gwa ya: « Iye na i zla kər, ika makəva gà təmaŋ a, aà kà ne mala makə̀va gà Isərayel gà mburma gà ya. 9 Iye a riŋ mandza ŋa nda kər hiywe i gà təv ana ka dawa a ɗəm a. Yàa dzeye a aà gà ɓəzla mene are yak fit ika miɗ yak a. Yàa ne a à zləm yak batsah ŋa kamala zləm gà bàba gà mburma ana ika gər ahəɗ a. 10 I te vile a à gà Isərayel gà mburma gà, təv ana i dze aɗəm a tar, ti ndze a iɗəm ka, magəɗa duwa a ge tar a tsiye. Gà ɓəzla məbatsa mburma ti sle a mege tar a duwa ku kwizikw tsidze, kamala ana ta ge tar ɗa akahər ata piŋŋe ya asa tsa. 11 Dite daga à pat ana i dza aɗəm gà ɓəzla mege seriye aka gər gà mburma gà, gà Isərayel a. Yàa vəlak mesìkìka ba nda təv gà ɓəzla mene are yak fit. BATSAH kwa ŋa a gwaɗak ka, a gik a ga. 12 Aka təv ana mandza aà bəra yak aka ndəv a, dite kàa da a təv gà tsir yak a ka, i zle a wura ilik na a dara i huɗ yak a. A zle a təv mendze Əbay yak, i te vile a ndzəɗa a mekwere ŋgar. 13 Ŋgat na a ta giŋ a ga gà ata, ti ta zele a iɗəm aà zləm gà batsah ŋa ya. I ta ge a gà dukw ana a pete a dər ka, ti ta zlewe Əbay ka, i gwala ŋgar a aà biybiy. 14 I ti ne a dede ŋgar, ŋgat tekeɗe a ta ne a kəla gà. Na aka ge dukw ana ŋgwal ŋa tsiye ka, i lekere a nda zəva magə̀zla mburma. Kamala tsir ana a ɗife a à metsehe a kəla ŋgar a. 15 Ama ŋgwal gà ka, a ti de a i təv ŋgar a kamala ana i zla aà Sawul a tsa. I zla Əbay a Sawul a ka, ika miɗ yak a. 16 Dite gà mburma yak, nda Əbay yak ka, ti nìkìɗe a tsa aà biybiy na ika miɗ yak a. Mekwere yak a ŋgete a ndzəɗa aà biybiy asa . » 17 kərga taŋa ya, Natan a mà dər a Dawda, aà dukw ana Mbulum a patar dər i sunwa ya fit a.

Dawda a hama a BATSAH kwa ŋa.

18 I fata ya ka, Dawda a da a ga ata sahər Mbulum iɗəm a, a ndza aka miɗ BATSAH kwa ŋa, dite a gwaɗar: « Iye dzena weke Batsah gà ŋa BATSAH kwa ŋa? Gà mburma gà dzena gà weke na kà ndzera à iye tsikw ara a faha ya ya»? 19 Taŋa ka, a sle duwa tsa na i təv yak a Batsah gà ŋa, Mbulum. Kàa fafəl aka ga mala meslire yak nda mendzena ika miɗ mba ya. Taŋa dzena a sle aà madàra i madzala gà gər mburma ya ya, Batsah gà ŋa BATSAH kwa ŋa. 20 Dite Dawda dzena a gweɗeke a ana la na ŋgat tiye? Kər ka, kà sər mala meslire yak Batsah gà ŋa Mbulum. 21 Ki ge gà bàba gà dukw ata fit tserdze ya ka, nda bazlam yak, dite i huɗ meweye yak a asa, na ka, pat dər à mala meslire yak a. 22 Aɗaba taŋa Batsah gà ŋa BATSAH kwa ŋa, kà pat aà bà yak ka, wura a riŋ batsah ŋa kamala kər a ilik tsa. Mbulum a riŋ ilik kamala kər a tsa. Kamala dukw ana mì tsaraka nda zləm mə̀r a fit. 23 Dite gà weke dziye na kamala gà mburma yak gà Isərayel, ɗa ika gər ahəɗ a, na Mbulum a da à məmbala aà tar, aà ti ne gà mburma ŋgar, na dite zləm ŋgar a ɗe zləm hinne ya, aà megeye gà bàba gà dukw mene aà mburma aaha, gà mawura ba ŋa ya nda ahər tar i kwite yak a. Ika miɗ gà mburma yak ana kà beyera aà tar, i ahər gà mburma ana ika ahəɗ Ezipt a ya, nda gà mbulum tar ŋa tserdze ya? 24 Kàa ndzək gà mburma yak gà Isərayel, aà ti ne gà mburma yak aà biybiy. Dite kər BATSAH kwa ŋa ka, kà ne Mbulum tar. 25 Kinehe ka, BATSAH kwa ŋa Mbulum gà mifefile ana kà fafəl aka gər ɓele yak nda gà mà ŋgar a ka, gəs dukw ana kà tsik i sida ya, ge kamala ana kə gwa ya. 26 Mezlibe mene biy yak aà biybiy. kərga taŋa ya, gà mburma ta gwaɗawa ka, BATSAH kwa ŋa mala mege guvəl, ŋgat ka, Mbulum ana a kwere a gà Isərayel a. Ga ɓele yak Dawda ka, mandza nda gà ndzəɗa ika miɗ yak. 27 Aɗaba kər ŋa na BATSAH kwa ŋa mala ndzəɗa Mbulum gà Isərayel a, na kà tsik aba à mala meslire yak, kə gwaɗar ka, i geke a ga. Aɗaba taŋa na ɓele yak a mə̀r aba i gəzləŋ ŋgar aà mahàmàkaha ya. 28 Kinehe kər na Batsah gà ŋa ya, BATSAH kwa ŋa. Kər na Mbulum a, dite gà mefefile yak, na gà ndzer ŋa ya. Kà tsikiŋ a iye mala meslire yak ka, gà ŋgwal gà duwa na taŋa ya. 29 Kinehe, na kà waya ka, pìse a ahəm aka ga ɓele yak, dite mandza ika miɗ yak aà biybiy. Aɗaba kər na Batsah gà ŋa ya, BATSAH kwa ŋa na fafəl nda mipise a ahəm ŋgar a, mipise a ahəm ata a ndze a ika gà mburma gà aà biybiy.