2 Samiyel 8

Dawda a mba aà gà asiŋ gà mburma ana ta mbehe a kwite Isərayel a

1 I təv ana Dawda a kwere a ya ka, araha na dukw ana a ge ba ya. Dawda a bats gà Filistiya, dite na ta hənar aà gər a bəɗ a. Dawda a zla ndzəɗa ana gà Filistiya ta kwere a dər kwite tar ata fit a. 2 A mba aà gà Mu'Aviya, a hənaya aà tar a bəɗ aka ahəɗ, dite a lìveyè tar nda liɓir melìve duwa, aà masəra dər ka, gà weke na ta betse a tar a, kige tsa, gà weke na ti ndze a aà bəra ika magər tar a. Gà mburma ana tàa tike liɓir ata sik sula aka live nda gà tar a ka, ta betse a tar fit. Ama gà wele ana tàa tike liɓir ata sik ilik, a live nda gà tar a ka, ta betse a tar tsa. kərga taŋa ya, na ta geye aà gà mburma ata ta hənaya aà tar a bəɗ a. Gà Mu'Aviya ti ne gà ɓele mandza hadàm a Dawda. 3 I fata ya ka, Dawda a kəɗ Hadadezer kəla Rehub, Əbay gà Tsuba, akahər ana a riŋ a waya məma aka makwara gà mburma ana i Efrat asa ya. 4 Dawda a ndzək ihər gà mburma ana, tə tsalawa a muta piris a dəbuw nda dərməka təsəla, dite gà mburma ana tə dawa nda sik a, dəbuw dzik səla. Dawda a sàsa mazləŋàzlə̀ŋ aà gà piris tar ana nda gà muta ya fit. Ama aka zeba dər aha aà gà piris dərməka, na aka sàsa aà tar mazləŋàzlə̀ŋ a tsiye. 5 Gà Siriya ana i Damas a, tə dara a mazlàkà Hadadezer Əbay gà Tsuba ya. Dawda a bats aà tar a, dəbuw dzik səla gəra sula na ika magər gà Siriya ata ya. 6 Dawda a dzaya gà ɓəzla makwara ahəɗ, aka gər gà mburma à Siriya ana i Damas a. Gà Siriya, ti ne gà ɓele mandza hadàm a Dawda. BATSAH kwa ŋa a vəlawa mege gara a Dawda i gà təv ana a dayawa ya fit. 7 Dawda a ndzək gà slakwa gura ana aà gà ɓəzla meslire Hadadezer a, a da dərra a Yeruzalem a. 8 Əbay Dawda aka ndzək, gà bàba mayaha gər gà virzegènè ana i gà bàba gà kwite ana ika ahəɗ Hadadezer a mbaŋa, i gà Betak nda Berutay a ya asa. 9 Tuhi Əbay Hamat a tsaraka Dawda aka bats gà sliwdze Hadadezer fit tserdze ka, 10 a slər kəla ŋgar Yehuram a təv Dawda, aà mewize mendze zay ŋgar, dite aà meger wusa agəra ana a ge guvəl aà gà Hadadezer dite ka, a mba aà tar asa ya. Aɗaba gà Hadadezer ka, gà ɓəzla mene are Tuhi. Yehuram a ndzə̀kàha a Dawda ka, gà dukw ana məvə̀ɗa ŋa, nda ndzemde kur siŋgwe ya, nda gura ya, dite nda dukw ana məvə̀ɗa ŋa, nda virzegènè ya. 11 Gà dukw ata mbaŋa ka, Əbay Dawda a dza aka miɗ BATSAH kwa ŋa, akaba nda gà gura nda gà ndzende məvə̀ɗa kur siŋgwe ana a ndzàkàha aà gà asiŋ gà mburma ana a mba aà tar a. 12 A mba ka, aà gà mburma ana i Siriya ya, i Mu'Aviya ya, i Ammuniya ya, i Filistiya ya dite i Elimelekiya ya, dite nda gà dukw ana a ndzakara aà gà Hadadezer kəla Rehub Əbay gà Tsuba ya. 13 kərga taŋa ya, na Dawda a ɗe zləm hinne asa i gà təv ana a mawàra i məbatsa gà Siriya ana a bats tar dəbuw kurwa gəra tsamakər a i tulwah ana tə zalawar tulwah Slə̀wul a. 14 A dzaya gà mayahaba gər gà sliwdze i Edum. A dzaya gà mayahaba gər gà sliwdze ata fit tserdze i Edum, dite gà Edumiya fit ti ne gà ɓəzla meslire Dawda. BATSAH kwa ŋa a velawa mege gara a Dawda i gà təv ana a dawa ya fit. 15 Dawda a kwara gà Isərayel fit tserdze, a gewa ka, dukw ana ndzer, ndaka vatwa ŋa ya, na a gà mburma ŋgar a, a tikewa gər a biy gà mburma tsa. 16 Yuwab kəla Tsuriya ŋgat ka, mala aka miɗ gà sliwdze, Yehusafat kəla Akiliwd, ŋgat mala məma ahəm Əbay. 17 Tsaduk kəla Akitub nda Akilamek kəla Abiyatar tar ka, gà ɓəzla məbatsa duwa a Mbulum. Səraya ŋgat ka, mala mewetse duwa. 18 Benaya kəla Yuyada ŋgat ka, mala aka miɗ gà Keritiya nda gà Peletiya. Dite gà ɓəza Dawda ka, tar gà bàba ŋana ika gər gà mburma, ta vəlawa a tar vatwa aà megeye gà duwa ya.