Dawda a pàt aà ŋgwal ŋgar à Mifibuset kəla Yunatan
9
1 A pat ŋgiɗ duwa ka, Dawda a wiz ikaba ya: « wànà wura aka zeha i gwala Sawul a te tsiye? »I waya i gere a ŋgwal agəra Yunatan. 2 Tsaatsa i gwala Sawul ka, mala meslire duwa a riŋ ilik, zləm ŋgar ka, Siba. Tə daha aà ŋgat aka miɗ Əbay. Dawda a gwaɗar: « Kər ana Siba ndzer a?» Seba a gwaɗar aaka: « Batsah gà ŋa, haya iye ŋa » 3 Əbay a gwaɗar: « Wànà wura aka zeha i gwala Sawul a te tsedzì ya? Aɗaba i waya i gere a ŋgwal, kamala na, i tsik ika miɗ Mbulum a. » Siba a gwaɗar aaka: « Kəla aka zeha i gwala Yunatan a ilik, matəraŋa i sik a sula məma. » 4 Əbay a gwaɗar: « Ar dzena i ŋga? » Siba a gwaɗar aaka a Əbay: « Ŋgat ka, i bəra Makir kəla Ammiyel i Ludebar . » 5 Əbay Dawda a slər aaka mburma a bəra Makir kəla Ammiyel ana i Ludabar a. 6 I təv ana Mifibuset kəla Yunatan, Yunatan tekeɗe kəla Sawul a dara a təv Dawda a ka, a dza gurmits a biye a kal aba aka miɗ Dawda luz a kal a gər a bəɗ. Dawda a gwaɗar: « Kər ana Mifibuset a? » Mifibuset a gwaɗar aaka: « Batsah gà ŋa, haya iye ŋa, mala meslire yak . » 7 Dawda a gwaɗar: « magəɗa magik tsa, nda ndzer ka, i gike a ŋgwal ŋa agəra dede yak Yunatan. I meke a à gà guvah tsir yak Sawul fit ahər, ki zimewwime a dukw mezime məma. » 8 Wele ata a yè ba a bəɗ asa a gwa: « Iye ka, mala meslire yak dzena, iye ana weke? Iye ana kəra ana məməta ŋa tsiye, na dite ki giŋ a ŋgwal a.? » 9 I fata ya ka, Əbay a zala a Siba mala meslire Sawul dite a gwaɗar: « Gà dukw Sawul nda gà ma ŋgar fit ka, i dzeɗe a à Mifibuset kəla, kəla mala gà yak Sawul. 10 Kurum ŋa nda gà ɓəza yak nda gà ɓəzla meslire yak ka, ki fitewimeriŋa. Kəla ɓele yak, a ŋgetewe a dukw mezime ka, i fata ya. Ama Mifibuset ka, mìi zimewe a akaba ɗaf kəla pat . » Siba ka, gà ɓəza ŋgar a riŋ gà asləka ŋa kurwa gəra əzləm, dite gà ɓəzla meslire ŋgar tekeɗe dzik səla. 11 I fata ya ka, Siba a gwaɗa à Əbay: « Ɓele yak a ge a dukw ana mala ga ŋgar a tsiker a fit . » Dawda aka mbər metsike a aà Mifibuset ka, ti zimewa akaba ɗaf kamala ana ŋgat ka, kəla Əbay a. 12 Mifibuset ka, kəla ŋgar a riŋ màandwùm ŋa, zləm ŋgar Mika. Gà mburma ana i bəra Siba ya fit ka, ti ne gà ɓəzla meslire Mifibuset. 13 kərga taŋa ya, na Mifibuset a ndzawa i Yeruzalem a. Aɗaba tə zəmawà akaba ɗaf ka, nda Əbay, dite ŋgat ŋa ka, matəraŋa i sik a sula məma.