Dawda a mba aà gà Ammuniya nda gà Siriya
10
1 A pat ŋgiɗ duwa, i dəba ana, Əbay gà Ammuniya a mət a ka, kəla ŋgar Hanun a zla təv mendze ŋgar. 2 Dawda a gwa: « I ge a ŋgwal a Hanun kəla Nahas kamala ana tsir ŋgar a giŋ ŋgwal a. » kərga taŋa ya, na Dawda a slər gà ɓəzla meslire ŋgar, aà meger wùɗàh agəra məməta tsir ŋgar a. Gà ɓəzla meslire Dawda ti ndze aka ahəɗ gà Ammuniya ata. 3 Ama gà Ammuniya ata ta gwaɗa a Hanun batsah tar ŋa, « wànà ka dzala ndzer ana Dawda a slərra gà ɓəzla meslire ŋgar a ana aà megìk wùɗàh agəra tsir yak ana a mət a kaɗəŋ a? Wà gwa: a slərra tar a ka, aà masamata kwite kwa, aà dite ka, ti zim a kwite kwa mba tsiye? » 4 I fata ya ka, Hanun a gasa gà ɓəzla meslire Dawda ata a zaza a tar, gumət ikaba ya, tseke ilik tsezlihzlih. A sasa tar ika petek tar a kwiye nda meèndzwìl tamurmur, dite a dəgəz tar, ta mbəɗ gər a ma ya. 5 Gà mburma ata ka, hwarwa a ge a tar hinne aà məmbəɗa gər a ma. Dawda a tsaraka ka, a slər gà ɓəzla meslire aà maləma akaba nda gà bàba ŋa ata a lah meslire tar a, ta gwaɗum a tar ka: « Dum, ka tə ndzum i Yeriku haa a pat ana gumət kurum tàa sləl a, na dite ki mwimwimere a ma ya. » 6 Gà Ammuniya ta pər ka, a da gər a Dawda tsidze ka, tə ndzək gà sliwdze ana ta pəlawa tar, i Siriya ana i Bet Rehub a, nda Siriya ana i Tsuba ya. Dəbuw dzik səla, na ti de a nda sik, i təv Əbay Maàka ya, dite i gà Tub tekeɗe ka, dəbuw kurwa gəra sula. 7 I təv ana Dawda a tsaraka ya ka, a slə̀r tar aaha Yuwab, mala aka miɗ gà sliwdze ŋgar, nda gà ŋgwal gà sliwdze ana gà slagama ŋa ya, fit tserdze. 8 Gà Ammuniya ata tə da a mandəra ba, aà mege guvəl aà guva biye hərmaga mada à kwite tar. Gà Siriya ana i Tsuba ya, nda gà i Rehub a, aha nda gà na i Tub a ya, dite nda gà na i Maàka ya ka, tar tə da a kusak. 9 Yuwab a pər ka, gà ɓəzla mene are tar tàa lawara tar tits, ndaka miɗ, nda dəba asa ka, a pala gà sliwdze ana gà ndzəɗa ŋa, i liwiŋ gà ɓəzla ndzəɗa ana i liwiŋ gà Isərayel a, a ndər tar ser ser akaba nda gà Siriya. 10 Dite gà asiŋ gà sliwdze ŋgiɗ ka, a dza tar ahər a damər ŋgar Abisay, ŋgat tekeɗe ka, a ndər tar ser ser akaba nda gà Ammuniya. 11 I dəba ŋa ya, a gwaɗa a Abisay: « Na gà Siriya tar gà ndzəɗa ŋa ika iye ya ka, ki dere ki zleke a iye. Dite biy tsa gà Ammuniya na ti sleke a za ya ka, i dehe i zleke a kər mbaŋa. 12 Mər aba, hitse kwa ka, asləka asləka agəra gà mburma kwa, dite agəra huɗ kwite Mbulum kwa. Gà gər a gwa BATSAH kwa ŋa mege ka, dukw ana a dar a gər a. » 13 Gà Yuwab nda gà sliwdze tə da a guvəl aà ga Siriya ka, gà Siriya aaha tə təz a ŋgat a. 14 I təv ana gà Ammuniya ta pər ka, gà Siriya tàa təz a ka, tar tekeɗe tə təz aà gà Abisay a. Tə mbəɗara gər a huɗ kwite ya. I fata ya ka, Yuwab a ndisl aà mege guvəl nda gà Ammuniya ya ka, a mbəɗ gər a Yeruzalem. 15 I təv ana gà Siriya ta pər ka, gà Isərayel tàa mba aà tar a ka, tə yaha ba gər fit tserdze. 16 Hadadezer a slər gà mburma aà mada mayaha gər, a gà sliwdze gà Siriya ana ika lide dulwa ŋgiɗ a, aà mege guvəl nda gà tar dze. Tə dara a Halam a. Subak ka, mala aka miɗ gà sliwdze Hadadezer, ŋgat na ika miɗ gà mburma ata ya. 17 Ti tsik taŋa a Dawda ka, a yaha gər a gà sliwdze gà Isərayel fit tserdze, tə da i Yurdan a, tə ndze a Halam. Gà Siriya tə ndər ba aà mege guvəl, nda gà mburma Dawda, ta ge guvəl. 18 Gà Siriya tə təz aà gà Isərayel a. Dawda a bats aà gà mburma gà Siriya ata ya ka, dərməka təsəla, aà gà na tar nda gà muta piris a. Dite dəbuw dzik faɗ, aà gà na ika piris a. A ger duwa a Subak Əbay gà sliwdze gà Siriya, a mət dər a fata. 19 Gà Əbay ana ta gəs ahəm a Hadadezer a fit tserdze ta pər ka, gà Isərayel na ta mba aà tar a ka, ta həna tar aà gər a bəɗ. Dite ti ne gà ɓəzla megemir tar. Gà Siriya ata ta ge magəɗa aà məmbəɗa gər, a màzlakà gà Ammuniya ya.