Gà Dawda ta ge muva nda məkəs Uriya
11
1 Ndiziŋ ŋana nda ləpat ka, a ndze ahər ana gà Əbay tə̀ dawa mege guvəl a ka, Dawda a slər gà Yuwab nda gà ɓəzla meslire ŋgar gà bàba ŋana, dite nda gà sliwdze ana i Isərayel a fit tserdze. Tə da a maduŋwa gà Ammuniya nda mege guvəl aà gà mburma ana i kwite Rabba ya. Ama Dawda ka, a ndza i Yeruzalem. 2 A pat ŋgiɗ duwa i hawa ka, Dawda a hitse ika mesìkìka ba ika sləlah ŋgar a, a riŋ a seweye a ika gər ga ana ŋgat Əbay mandza ŋa iɗəm aª . Ika gər ga Əbay ŋgar ata ka, a ŋgataha à məkəs duwa, a riŋ a dze akaba yam. Məkəs ata ka, a tsahən ahər hinne. 3 Dawda a slər mburma aà mada masəra ikaba duwa aka gər məkəs ata ya. Ta gwaɗar: « zləm ŋgar ka, Bat-Seba, dəm Eliyam, məkəs Uriya gà Hittiya. » 4 Dawda a slər aaka gà ɓəzla sik ŋgar aà mazalarra. A dara a ma ŋgar a, ta həna, na dite a mbəɗ gər a ma ya. Tsaatsa ka, məkəs ata, a ya aba məbara ba ya kinkin, na a tawal aba fəla ŋa yaª. 5 Məkəs ata a ŋgat kəla, a slər mburma a təv Dawda aà maŋgwaɗar ka: « huɗ aka ɗe aka ìyerra . » 6 I fata ya ka Dawda a slər mburma aà magwaɗaha a Yuwab: « Sliriŋara Uriya gà Hittiya aka ya. « Yuwab a slərra Uriya a Dawda a. » 7 I təv ana Uriya a ndzeha a təv Dawda a ka, Dawda a wiz mendze zay Yuwab, mendze zay gà sliwdze, dite meme na mege guvəl a? 8 I fata ya asa ka, Dawda a gwaɗa a Uriya: « Da a ma, ka sifik ba. » Uriya a dara i bəra Əbay a. Əbay a slərraha gà dukw taf. 9 Ama Uriya a həna ba ika biye hərmaga ga Əbay nda gà sliwdze ana ta kèsle a Əbay ya, fit akaba dze, aka zikwe a aba a ma tsa. 10 Ta mə dər a Dawda ta gwaɗar: « Uriya ka, aka da a ma tsa. I fata ya ka, Dawda a gwaɗa a Uriya: « Wànà ka dara dzena ika zùbel vatwa ya tsiye? Aàla na kàa da a ma tsiye?» 11 Uriya a gwaɗa a Dawda: « Sahər Mbulum tsəɗaŋŋa ŋana, dite gà sliwdze gà Isərayel nda gà biy gà Yahuda ka, tar mandza ŋa i ga ana ta kiriw nda petek a. Batsah gà ŋa Yuwab nda gà asiŋ gà sliwdze kà, tar i təv maŋgwaɓa i dala ka, dite iye ka, i de a a ma aà mazəmaya gà dukw mezəme, nda gà tsa aà masaya gà dukw mese, nda gà tsa aà mahəna nda məkəs gà asa ya? Nda ndzer, nda zləm yak, i sle a mege a dukw kamala taŋa ya tsidze! 12 Dawda a gwaɗa a Uriya: « ndza ɗa i faha mbakum asa dite ndidwe ka, i miseke a a kər a, ki debiŋà. Uriya a ndza i Yeruzalem a pat ata haa ndidwe ŋana. 13 Dawda a zalar aà dukw mezime nda gà dukw mese aka miɗ ŋgar, i fata ya ka, a vəlar dukw mese haa a kwaya dər. I hawa ŋana ka, Uriya a da, ta həna akaba nda gà asiŋ gà sliwdze ana ta kèsle a Əbay a, tsəka aka da a ma ɓav tsa hiywe.Dawda a kəɗ Uriya zal Bat-Seba
14 I mèkwède ndidwe ŋana ka, Dawda a wetseha wakita a Yuwab, a slər dər Uriya. 15 A wetse a wakita ata ka, a gwa: « Mbe a Uriya aka ahəm guvəl ana akwa ihər a, aka təv gà ɓəzla mene are ana gà ndzəɗa ŋa hinne ya. Dite kurum kà mumara ihər a dəba ya. Tə lakar, ta kəɗ. » 16 Araha na gà Yuwab nda gà asiŋ gà sliwdze tə lawara kwite ata ta ge a guvəl nda gà tar a. A mbe a Uriya aka tseke guvəl ana gà sliwdze gà ɓəzla mene are tar ka, gà ndzəɗa ŋa hinne ya. 17 Gà sliwdze tə dara i kwite ata ya, aà mege guvəl aà gà mburma Yuwab. Tàa bats gà asiŋ gà sliwdze nda gà ɓəzla aka miɗ gà sliwdze ana ika magər tar a. Dite Uriya gà Hittiya ata ka, tàa kəɗ ŋgat mbaŋa. 18 Yuwab a slər mburma aà məma à dukw ana a ge ba i guvəl a fit a a Dawda. 19 Dite a fafəl a mala məma à gà labara a gwaɗar: « I təv ana kàa ndəv aà maɗama gà dukw ana, a geye ba fit i guvəl a a Əbay ya ka, 20 biy tsa, na kàa pər ka, aka tsəɓar aka gwaɗak a, « Aàla na ka sərəkumaha bise nda kwite ata aà mege guvəl a? Ka sərum tsiye ka, ta mbelewera kurum a ika gər zlagam a tsik ya? « 21 Weke na a kəɗ Abimalek kəla Yerubaset i Tebes a? Wànà məkəs duwa na a yè aakara tugwàɗ ika gər zlagam a tsiye na a mət a. Aàla dziye, na ka sərəkum bise nda zlagam kərga taŋa ya ya? Ki gweɗe a a Əbay ka: « Mala meslire yak Uriya gà Hittiya ka, tàa kəɗ ŋgat mbaŋa. « 22 Mala məma aà labara a da a maɗama dukw ata a Dawda. A ndzehe ka, a ɗamar dukw ana Yuwab a slər dər aaha ya fit. 23 Mala məma à labara ata a gwaɗa a Dawda: « Gà sliwdze tar ka, tə za mə̀r ndzəɗa. Tə dara aà mege mə̀r aà guvəl a dala ya ka, ama mì dəgəz tar ndisl aka biye hərmaga mada a kwite tar. » 24 Gà ɓəzla likìɗ ta mbalawara gà ɓəzla aka miɗ gà sliwdze yak a ka, ndaka gər zlagam a, na ta bats gà ɓəzla aka miɗ gà sliwdze yak a. Gà ɓəzla aka miɗ gà sliwdze yak, dite Uriya gà Hittiya ata tekeɗe, tàa kəɗ ŋgat mbaŋa. 25 Dawda a gwaɗa a mala məma aà labara ata: « Araha na dukw ana ki gweɗe a a Yuwab a, « Ka ta wise aba a gər nda madzala gà gər aka dukw ata tsa, aɗaba i guvəl ka, məməta a riŋ dukw ŋgar, ku mege ndaka tseke wara, səkah à mə̀mə̀ra ba aà mege guvəl aà kwite ata, duŋ tar, kər ka, daha vəlar aba ndzəɗa a Yuwab kamala taŋa ya. » 26 Məkəs Uriya a tsaraka, tàa kəɗ zal ŋgar ka, a tuwa zal ŋgar. 27 I təv ana tə zla aà ba zal ŋgar a biye ya ka, Dawda a slər mburma aka məkəs ata, a zla ŋgat a ma ŋgar, a ne məkəs ŋgar. A war kəla asləka ŋa. Dukw ata Dawda a ge ya ka, a da a gər a BATSAH kwa ŋa tsa.