Natan a pàt à bakal Dawda
12
1 I fata ya ka, BATSAH kwa ŋa a slər mala məma aà guma ŋgar Natan a təv Dawda. Natan a da a təv Dawda a tsiker bazlam minew duwa: « I kwite duwa ka, gà mburma duwa a riŋ sula, ilik ka, mala limana dite ilik ŋa aaha ka, mala matawak. 2 Mala limana ata ka, gà dukw gənaw ŋgar a riŋ, gà sla nda gà təmaŋ a riŋ hinne. 3 Ama mala matawak ata ka, duwa ŋgar a riŋ tsa, kəla təmaŋ ŋgar duwa ilik na a riŋ a səkəm a. A vəlawar dukw mezime, dite ta gala ba akaba ka, i təv ŋgar nda gà ɓəza ŋgar fit tserdze. Kəla təmaŋ ata ka, tə zəmawa akaba ɗaf i səra ŋa ya ilik, nda masa akaba yam i kəzləm ŋa ya ilik, a hənawar ka, aka sik ŋgar. Kəla təmaŋ ata a ne aka wele ata ka, kamala dəm ŋgar a. 4 A pat ŋgiɗ duwa ka, mbə̀ləkw a le a aà mala Əbay aaha, a niw mekiɗer à gà təmaŋ nda gà sla ŋgar aaha, a mbə̀ləkw ŋgar ata. A daha a gəsara ka, kəla təmaŋ mala matawak aaha ilik a. Na a kəɗ à mbə̀ləkw ŋgar ata a daha a ma ŋgar a. 5 I fata ya ka, a tsəɓ à Dawda hinne, gəzləŋ tùrtùr, aka gər Əbay ata a ge dukw ata ya, a gwaɗa a Natan: « BATSAH kwa ŋa a riŋ nda mesife, wele ata a ge dukw ata ya ka, a da dər mekiɗe. 6 A me a à təmaŋ ata ilik a ka, faɗ. Aɗaba ana mendze are tsehe i təv ŋgar tsa, a ge dukw ata ya. 7 I fata ya ka, Natan a gwaɗa a Dawda: « Kər na wele ata ya, araha na dukw ana BATSAH kwa ŋa Mbulum gà Isərayel a gwa ya, I zla kər i ne a kər Əbay aka gər gà Isərayel. I be a à kər ihər Əbay Sawul a. 8 Yàa dzak gà mburma batsah yak ŋa Sawul ahər. Yàa dzak gà məkəs ŋgar ata ahər yak mbaŋa . Yàa dzak gà Isərayel nda gà Yahuda ahər yak. Na aka slek à are ndeɗiŋe tsəka, i sle a a medzeke a aaka gà asiŋ gà dukw ŋgiɗ asa mbaŋa. 9 Aàla na kà ne bakal aà bazlam gà, nda mege dukw ana i ŋgatar ŋgwal ŋa tsa, i təv are gà ya? Kə kəɗ Uriya gà Hittiya nda masalama, kàa zla məkəs ŋgar, kà ne ba dər biy yak, dite ŋgat ŋa ka, kə kəɗ nda ahər gà Ammuniya ya? 10 Aɗaba kàa gəs məpala ahəm gà tsa, dite kàa zla məkəs Uriya gà Hittiya aà daala asa ka, masalama a ndehewe a ika hərmaga yak a tsa aà biybiy. 11 Araha na BATSAH kwa ŋa a gwa ya: Mesewere are a hitsere a ka, i huɗ ga i ma yak a. I ndzike a gà məkəs yak nda təv are yak, i dzeɗe a misle ŋgiɗ ilik i liwiŋ gà mburma ana i huɗ ga i ma yak a. A həneye a aà gà məkəs yak nderzayya ndaapat. 12 Aɗaba kər ki ge ka, kə kàh dər ba, ama iye ka, i ge a parakka aà are gà Isərayel fit tserdze, dite ndaapat mbaŋa. 13 I fata ya ka, Dawda a gwaɗa a Natan: « Yàa ge bakal aà BATSAH kwa ŋa ya, dite Natan a gwaɗa a Dawda: « Na kamala taŋa ya ka, BATSAH kwa ŋa aka pəlak à bakal yak ki mit a tsa. » 14 Ama i huɗ bakal yak ata ya ka, kàa vəl vatwa a gà ɓəzla mene are BATSAH kwa ŋa aà mege dukw zlaŋgatsak ika miɗ ŋgar. Aɗaba taŋa kəla ata ta wa ya ka, a mitiŋa ndzer . » 15 I fata ya ka, Natan a mbəɗ aba gər a ma.Məməta kəla Dawda
I dəba ŋa ya ka, BATSAH kwa ŋa a slərra dukw məməta aka gər kəla məkəs Uriya ata a war a Dawda a. A dəɗ a batsah dukw məməta. 16 Dawda a tuwaha aba a Mbulum agəra kəla ata, a ge ndəra, dite i təv ana a mara a ma ya ka, hiywìp a həna ka, ika ahəɗ. 17 Gà ŋgwal gà bàba gà mburma ana i ga i ma ŋgar a ka, tə dara a təv ŋgar a, aà mehìtse aà ŋgat ika ahəɗ a. Ama a waya tsa, ku mege mazəma akaba dukw mezime nda gà tar tekeɗe ya. 18 Dukw məməta ata a ge a a kəla ata mehinne təsəla ka, a mət. Gà ɓəzla sik Dawda ta ge magəɗa aà meɗer a məmət kəla ata, aɗaba tə dzala ka, ta gwa: « Akahər ana kəla ata a riŋ nda mesife mba ya ka, a dzawa zləm aà mifefile kwa tsa ana, dite meme na ki gwaɗe a kwere a ka, aka mət a? Biy tsa a ge be a dukw ana ŋgwal ŋa tsiye. 19 Dawda a tsaraka gà ɓəzla meslire ŋgar a riŋ ta fefile a nda akəl, a tsarakara iɗəm a ka, kəla ata ka, aka mət. I fata ya ka, Dawda a wiz à gà ɓəzla meslire ŋgar ata: « kəla ata ana aka mət a? » Ta gwaɗar aaka: « Haya aka mət » 20 Tsə̀kwaɗ Dawda a hitse ika ahəɗ a, a dza akaba yam, a dzaya aba aà wirdè, a mbəɗ akaba gà petek ŋgiɗ. A da a ga ana ta hamawa iɗəm a BATSAH kwa ŋa ya. A dzar gurmits a bəɗ. I dəba ŋa ya, a mbəɗabara gər a ma ya. A wiz dukw mezime ta vəlar a zəm. 21 Gà ɓəzla meslire ŋgar tə tsam ahər ta gwaɗar: « Dukula na ki ge ya? Aka na kəla ata a riŋ nda are ya ka, kàa ge ndəra, kàa tuwa, ama kinehe kəla ata a riŋ asa tsəka, kà hitse ika ahəɗ a, kà zəm ɗaf a? » 22 Dawda a gwaɗa a tar: « Aka ana kəla ata a riŋ nda mesife mba ya ka, Yàa ge ndəra, Yàa tuwa. Aɗaba i dzala ka, i ndze a are tsehe a BATSAH kwa ŋa dite ka, kəla ata mandza aà bəra. 23 Ama kinehe aka mət ana, aàmala na i ge a ndəra asa ya? I sle a aà mbimbile a dərra i məməta ya asa tsa? Iye ka, i ti leherahiŋa, ama ŋgat ka, a sle a aà madara à təv gà ya asa tsidze. 24 Dawda a vəl magəsa gəzləŋ a məkəs ŋgar Bat-Seba. Ta həna, a ŋgat kəla. A wa kəla ata ka, a ɗər zləm Salumun. BATSAH kwa ŋa a waya ŋgat. 25 A patar dər a Dawda ka, nda ahər mala məma aà guma Mbulum Natan. Ta vəlar zləm à kəla ata ka, Yedidiya 26 Akahər taŋa ka, Yuwab batsah gà ɓəzla aka miɗ gà sliwdze, a ge guvəl aà batsah kwite gà Ammuniya ana tə zalar Rabba ya. A zəm huɗ kwite ana Əbay tar mandza ŋa iɗəm a. 27 Yuwab a slər gà ɓəzla məmaya à labara a təv Dawda aà magwaɗar ka: « Yàa ge guvəl aà kwite ana Əbay tar mandza ŋa iɗəm a, dite Yàa zəm huɗ kwite ana yam tar iɗəm a asa mbaŋa. 28 Kinehe ka, yaha gər a gà asiŋ gà sliwdze, kà dara, kà zəm, kər nda gər yak ŋa, huɗ kwite ana a zeha ya, tsəka iye ka, i sle a aà mezəme a asa tsa, aɗaba ti te zlibe a ka, a zləm gà. 29 I fata ya ka, Dawda a yaha gər a gà sliwdze fit tserdze. Tə daha aka kwite Rabba. Te ge guvəl ka, tə dùŋ kwite ata. 30 A zlarra baramusa i gər Əbay tar a. Baramusa ata ka, a be hinne kamala gura ya. Mewetse ŋa nda kur ana tsakala ŋa hinne a səkime a ba tsiye. Ti tike baramusa ata aka, gər Dawda. Tàa kazalara aà tar gà ŋgwal gà duwa ya hinne na aà gà kwite ata ya. 31 Dawda a dara aà gà mburma ata ya ka, a dzaya tar gà megemir ndzəɗa, gà məbatsa ya kur ndà məpapazaya ŋa. Màdzaya aà dizl ɗaf. Megeye a gà dzelep. Dawda a ge aà gà asiŋ gà Ammuniya ana i gà kwite ŋgiɗ a ka, kataya mbaŋa. I dəba ŋa ya ka, a mbəɗ aba gər a ma a Yeruzalem tar nda gà sliwdze ŋgar.