2 Samiyel 13

Amnun a həna à damər ŋgar Tamar

1 I dəba ŋa ya ka, araha na dukw ana a le a aà Absalum kəla Dawda a, damər ŋgar a riŋ dəm ŋa a tsahən hinne zləm ŋgar Tamar. Amnun kəla Dawda ata a dzəba aà mawaya dəm ata, hinne. 2 Mawaya Tamar damər ŋgar ata ka, a za ndzəɗa a Amnun haa a ne dər kamala ana ŋgat i dukw məməta ya. Dite asa ka, vatwa Amnun a riŋ tsa, na aà maləma ahər a. Aɗaba ŋgat ka, tàa ləma nda asləka diydiy tsa. 3 Amnun ka, masla ŋgar a riŋ ilik zləm ŋgar Yunadab, kəla Samma damər Dawda. Yunadab ka, wirwir ŋa hinne. 4 Yunadab a gwaɗar: « Aàla na kà ndzawube tsèhhe kəla wur gà pat a? Kər ana kəla Əbay tsiye? Wànà ki tsikiŋ a tsəna aɗaba Dukula?» Amnun a gwaɗar aaka: « I waya Tamar damər, i damər gà Absalum. » 5 Yunadab a gwaɗar: « Həna aka slə̀làh yak, dite ki ge a aba kamala ana kər i dukw məməta ya. I təv ana dede yak, aka daha aka məpəra kər a ka, ki gweɗere a. « I gək kamkam, damər gà Tamar ma dara, a miviliŋ dukw mezime te, mediŋ ɗaf i təv are gà, dite i ŋgetere a meme na a de a ya, a ndzìkiŋŋa a riŋŋa, i mendzire a ahər ŋgar . » 6 I fata ya ka Amnun a həna aka slə̀làh ŋgar, a ge a aba kamala ana ŋgat i dukw məməta ya kaɗəŋ. Əbay a daha à məpə̀ra aka ŋgat ka, Amnun a gwaɗar: « I gək kamkam, Tamar damər gà madara, mediŋ gà gatuw sula i təv are gà, i mendzire a ahər ŋgar te . » 7 Dawda a slər mburma, aka Tamar ana i huɗ ga i ma ŋgar a, aà magwaɗar ka, da a bəra Amnun damər yak, kà ti der dukw mezime. 8 Tamar a da a ga Amnun damər ŋgar ata mahəna ŋa iɗəm a, a ndzək gà dukw ana ta həlaɓawa dər gatuw a, a hə̀laɓ i təv are ŋgar i fata. A der gatuw ata. 9 A zla tasa pələhayam ŋana, a mbəɗ a aaka i təv are ŋgar, ama Amnun a niw mazəma dukw mezime ata. A gwa: « gwaɗa a gà mburma aaha tə da a bəra. I fata ya ka, gà mburma ana i təv ŋgar a tserdze ya, tə dara a bəra i ga i ma ŋgar a. 10 I fata ya ka, Amnun a gwaɗa a Tamar: « Ndzìkiŋara dukw mezime aaha a təv gà aka slə̀làh gà ya, i zime a ika ahər yak a. » Tamar a zla gatuw ata a de ya, a sərəkar dərraha a damər ŋgar Amnun bise nda slə̀làh ŋgar. 11 Akahər ana a riŋ a vilere a dukw mezime ata ya ka, a gəs ŋgat a gwaɗar: « Dara hənama damər gà» . 12 Tamar a gwaɗar: « Awaŋ damər gà, kə kəzala iye tsa, aɗaba medzibe dukw aaha ka, ta gewe a i Isərayel tsa. Ki ge dukw zlaŋgatsak ata tsa. 13 Dite iye dzena i de a à hwarwa ŋa dzena nda awara? Dite kər a ge, ki ne a mala mege dukw zlaŋgatsak ana i Isərayel a tsiye? Kinehe ka, i gək kamkam, da a təv Əbay a niweke a à iye tsa. 14 Ama Amnun aka dzar zləm a mifefile ŋgar ata tsa, a gəs, a kəzala ŋgat nda ndzəɗa a həna aà ŋgat. 15 I fata ya ka, Amnun a ner are, gəzləŋ ŋgar aka rah nda mene are hinne. Mene are ata a nere a ya ka, a za dər meweye ŋgar ana a waya ŋgat ndeɗiŋe ya. I fata ya ka, Amnun a gwaɗar: « Hitse, da ba. » 16 Tamar a gwaɗar: « Medìgìze a iye ka, masəkaha akwa aka dukw ana ki giŋ a. « Ama Amnun aka dzar zləm tsa. 17 Amnun a zalara a mala megemir ŋgar ana gawla ŋa ya ilik, a gwaɗar: « Dəgəz dəm aka i ma gà ya, aha a bəra, kà hə̀ndə̀k a ahəraha a bəra. 18 Petek ana ikə̀ka ya ka, a sìkim a ba tsa, tsakala ŋa hinne. Aɗaba gà dəm gà Əbay ana tàa ləmà nda gà asləka zukw tsiye ka, tə̀ dzawa aka ba ka, medzibe petek ata. Mala megemir ŋgar ata a hə̀ndə̀kara aà ŋgat a bəra ya 19 I fata ya ka, Tamar a ndaya aba ahəɗ a gər, a kwayaɗa à ŋgwal petek ŋgar aaha ikaba ya, a dza ahər a gər, dite a daba nda gà tuwa. 20 damər ŋgar Absalum a gwaɗar: « wànà damər yak Amnun aka nəs aà kər a? Kinehe ka, damər ga Tamar, ndza ba tiytiy. Ŋgat ka damər yak, kà tike dùgwùn ŋa a gəzləŋ yak tsa. Tamar a ndza i bəra damər ŋgar Absalum ka, kamala məkəs ana tàa mə̀sak dər a. 21 Əbay Dawda a tsaraka gà dukw ata a geye ba fit ka, a vəlar matsəɓatsəɓ hinne. 22 Absalum ka, ta fafəlawa aba nda Amnun tsa. Absalum a ner are a Amnun ka, aɗaba ana a nə̀s à Tamar damər ŋgar a.

Absalum a kəɗ Amnun dite ŋgat ŋa a val aba

23 I dəba ana a ge mive sula kalkal a ka, a pat duwa gà ɓəzla mazaza gasgas gà təmaŋ i bəra Absalum i Baal-hatsur bise nda Efərayim ka, a zal a gà ɓəza Əbay fit tserdze. 24 Absalum a dara a təv Əbay ya, a gwaɗar: I gək kamkam, gà ɓəzla mazaza gasgas aà gà təmaŋ a, tar a riŋ i bəra ɓele yak, dumara nda gà bàba gà ɓəzla megemir yak a, a megirive ata i bəra ɓele yak a te. 25 Əbay a gwaɗa a Absalum: « Awaŋ kəla gà, mìi dehe fit tsa, aɗaba a zèke a ndzəɗa. Absalum a hamar hinne asa, ama a waya aà mede tsa hiywe. A gwaɗar aaka, megirive ata mada nda zay pəra. 26 Absalum a gwa: « Kamkam na ki dere a tsəka, vəl vatwa a damər gà Amnun madə̀ɗa aka mə̀r. » I fata ya ka, Əbay a gwaɗar: « Aàla na kà waya mada aaha ya?» 27 Absalum a hamar asa, dite na a slər gà Amnun nda gà asiŋ gà ɓəza ŋgar ŋgiɗ fit a. 28 Absalum a gwaɗa a gà ɓəzla megemir ŋgar: « Gwim metsehe, i ge kurum kamkam, i təv ana kàa ŋgatum a Amnun aka sa guzum, aka sler, dite aka vəlar maŋgayaba ya ka, gəsum kə kəɗum ŋgat. Ki gwim magəɗa tsa, wànà iye tsiye na a vəl a a kurum ahər vatwa ya. Mərum aba hitswìm asləka asləka. » 29 Gà ɓəzla megemir Absalum ta ge a à Amnun kamala ana Absalum a gwaɗa a tar a. I fata ya ka, gà asiŋ gà ɓəza Əbay ta hitse ya aà mbulum, ku mege weke a tsəl aka mule ŋgar aà məvalaba aba ŋgar. 30 Akahər ana tar aà vatwa mba ya ka, labara a ɗere aà Dawda a, ta gwaɗar: « Absalum aka bats gà ɓəza yak fit, ilik aka ze dərraha tsa. » 31 Tsə̀kwaɗ, Əbay a hitse à mbulum, kwaŋŋ kwaŋŋ a kwayaɗa ikaba à gà petek ŋgar a, kùp a yè ba a bəɗ aka ahəɗ. Gà ɓəzla megemir ŋgar a riŋ i fata tserdze. Tar tekeɗe ka, tàa kwayaɗa ikaba à gà petek tar a mbaŋa. 32 Yunadab kəla Samma damər Dawda a zla mifefile a gwa: « Batsah gà ŋa, ka ta dzala ka, tàa bats gà ɓəza yak gà gawla ŋana fit tsa. Aɗaba Amnun ilik na a mət a. Taŋa ka, dukw ana Absalum a dzala aà mege, akahər ana a kəzala damər ŋgar Tamar a. » 33 Batsah gà ŋa, kinehe ka, dukw ata ma ta dzala kər, kə gwa ka, gà ɓəza yak fit tserdze ka, tàa bats tar tsa. Aɗaba Amnun ilik na ta kəɗ a. 34 Absalum aà valaba. Tsaatsa ka, kəla gawla ŋa a riŋ na a tike a are ya, a zla gər aà mbulum, a pər ka, a ŋgataha à mayaha gər gà mburma a riŋ ti dere a nda dəba ŋgar a, bise nda sik kwite ya. 35 Yunadab a gwaɗa a Əbay: « Araha gà ɓəza Əbay naha tàa mendzera, kamala ana mala meslire yak a gwa ya. » 36 Kamala ana a riŋ a ndìve aà mifefile ya ka, pəzlaŋ pàpàpəzlaŋ gà ɓəza Əbay ata tàa ndzeha. Ɓuhh tə dza akaba tuwa, ku mege gà Əbay, nda gà bàba gà ɓəzla megemir ŋgar tekeɗe kwayàmyàmyàm ti tuwe a hinne. 37 Absalum a valaba a da a bəra Talmay kəla Ammihud Əbay gà Gesur. Dawda a tuwuwa kəla ŋgar, kəla wur gà pat. 38 Kərga taŋa ya, na Absalum a val aba a Gesur a. A ndza riŋ i fata mive makər. 39 Əbay Dawda a gəs gəzləŋ agəra məməta kəla ŋgar Amnun, a məsak aà mazazama Absalum.