Yuwab a ge metsehe aà maləma akaba à gà Dawda nda Absalum
14
1 Yuwab kəla Tsuriya a pər ka, Əbay Dawda a riŋ a dzele a gà gər aka Absalum. 2 A slər mburma aà Tekuwa aà mayaharra məkəs ana a tsah hinne ya. A gwaɗa a məkəs ata: « I gək kamkam. Ge a à ba kamala ana kər ka, nda gà tuwa aà are ya. Kamkam dza akaba gà petek matuwa məməta. Kà dzaya aba wirdè tsa, ge aà ba kamala ana ki tiwe a wur yak ana a mət ka, aka ndza zaakwa ya. 3 I dəba ŋa ya, ki de a a təv Əbay, ki ɗemere a kamala dukw ana i tsikike a ya . » I dəba ŋa ya Yuwab a ɗamar dukw ana a ta tsike a ya fit. 4 Məkəs ata a dara i Tekuwa ya, a da a təv Əbay. A ndzehe ka, a dza gurmits a bəɗ, luz a yè gər a bəɗ aka miɗ ŋgar a gwaɗar: « Əbay gà, be aà iye te. » 5 Əbay a gwaɗar: « Dukula na a ge ba ya?» A gwaɗar aaka: « Nda ndzer, iye ka, madakwa məkəs zal gà aka mət. » 6 Iye ɓele yak, gà ɓəza gà a riŋ sula, Tar sula məma ta ge maàga i dala. Wura a riŋ na aà magàsà ikaba tar a tsa. Ilik ŋa a laka a damər ŋgar ŋgiɗ aaha a mət dər. 7 I fata ya ka, gà gwala gà ana tar a riŋ i kwite mə̀r a ka, ta hitse a aà ɓele yak ta gwa: « Vəl à mə̀r kəla ata a kəɗ ̀dàmə̀r ŋgar a. Mìi kiɗe aɗəm a ŋgat aɗaba ana a kəɗ ̀dàmə̀r ŋgar a. Kərga taŋa ya ka, wele ana a zime a ga gà ya ka, a riŋ asa tsa. Kamala taŋa ya, na ti dzeye a à mifendèz ŋa ata a ziŋaha ya. Ta mbeete a à zləm zal gà, nda mada a bəɗ ŋgar ana ɗa a ika gər ahəɗ a. 8 Əbay a gwaɗa a məkəs ata mbəɗ gər a ma, i vile a megemir ŋa a gà mburma gà, tə zlak kər. 9 Məkəs ata a dara i Tekuwa ya, a gwa: « Əbay gà, bakal ŋa mege ika gər gà, nda gà ika gər gà mburma ana i huɗ ga i bəra tsir gà ya. Gà Əbay nda gà mburma ŋgar ka, bakal mege ika gər tar tsa . » 10 Əbay a gwaɗar: « wele ana aka fafəl aà kər a ka, ɗiŋ dərra, a me a kər a asa tsidze . » 11 Məkəs ata a gwaɗar asa: « Kamkam Əbay gà tsikiŋ duwa i sìdà ya, nda zləm BATSAH kwa ŋa Mbulum yak, dite ka, wele ana a waya a pile a ba ŋgar nda mandza aà məmbəz a bəɗ a ka, masəkah aà manəsa à duwa tsa, dite asa ka, ti dzeye à kəla gà tsa. Əbay a gwa: « BATSAH kwa ŋa a riŋ nda mesife na ambəz kəla yak ilik pəra aka dəɗ a bəɗ a. » 12 Məkəs ata a gwa: « I gək kamkam vəl vatwa a ɓele yak məfafələk ilik asa» Əbay a gwaɗar « fafəl « 13 Məkəs ata a gwaɗar: « Aɗaba Dukula, na ki ge mandzəba bakal ata aka gər gà mburma Mbulum a? Nda mifefile yak ata kinehe ya ka, kamala ana kà sər aà bakal yak a, aɗaba ana ki mere a aà Absalum ana ka dalawa ŋgat a slele ya tsiye ya. 14 Kwa tserdze ka, ki metekwe a na a pat ŋgiɗ a, kà nekwa ka, kamala yam ana tə dza dər a bəɗ a ka, ti zle a à me a à kəzləm asa tsiye. Ama Mbulum ka, a dzeye a a mesife ŋgar tsa, ama kəla ka, a ge a metsehe ka, a wele ana tàa dalawa i kwite ŋgar a ka, mandza kamala taŋa ya, hiywe tsa na ika miɗ Mbulum a. 15 Kinehe i dara a metsikik gà dukw ata fit a ka, a kər ana Əbay batsah gà ŋa ya, aɗaba gà mburma a riŋ ti dze aà ye a magəɗa hinne. I dzala ka, i ti tsike a à Əbay, gà biy ŋgiɗ tsəka, Əbay a ge a dukw ana ɓele ŋgar a tsikere a ya. 16 Biy tsəka, a gìse a mibe à iye ihər wele ana a waya medzeye a à mə̀r a. Mər nda kəla gà sula məma, aha nda gà mburma ana Mbulum a pala tar a. 17 Ɓele yak a dzala ka, mifefile batsah gà ŋa na, a zlere a mesifikaba agəra dukw ata ya. Aɗaba batsah gà ŋa, Əbay gà, kər ka, kamala gawla Mbulum ana mahadzàlà ba ŋa, aà masəra ikaba aà gà dukw ana ŋgwal ŋa, nda na ŋgwal ŋa tsiye. BATSAH kwa ŋa Mbulum yak mandza nda kər. 18 Əbay a gwaɗa a məkəs ata: « Kamkam i tseme a kər a duwa ka, kà ta sesìŋ parsa tsa . » Məkəs ata a gwaɗar, « Batsah gà ŋa, Əbay gà, fafəl. » 19 Əbay a gwaɗa a məkəs ata: « Wànà Yuwab a na a ɗama yak gà dukw ata fit a ya»? Məkəs ata a gwaɗar aaka: « Nda ndzer kər a riŋ nda mesife Əbay gà, gà dukw ata kà tsik a ka, ndzer Əbay gà, batsah gà ŋa, aɗaba Yuwab na a tsikeyiŋ gà dukw ata aà megeye a fit tserdze ya. 20 Yuwab mala meslire yak a ge dukw ata fit a ka, aà məmbəɗa aà medzibe mendze ata. Ama kər batsah gà ŋa ka, kà sər duwa kamala gawla Mbulum ana a sər ikaba aà gà dukw ana a ge a ba i batsah kwite aaha ya. » 21 I dəba ŋa ya Əbay a gwaɗa a Yuwab: « Dukw ata ka, aka ge ba, da ka ta mara à Absalum kəla gawla ata ya. » 22 I fata ya ka, Yuwab a yè ba aka ahəɗ aka miɗ Əbay, a dza gurmits a biye, luz a yè gər aka ahəɗ, a ger kəkaaha a Əbay. I dəba ŋa ya Yuwab a gwa: « Mala meslire yak, a sər mbakum ka, aka ŋgat ŋgwal i təv yak a. Əbay gà, batsah gà ŋa aɗaba ana Əbay a ge dukw ana mala meslire ŋgar a tsiker a. 23 I fata ya ka, Yuwab a da a Gesur a ta mara aà Absalum a Yeruzalem a. 24 Ama Əbay a gwaɗar: « Ma da a ma ŋgar, ma dara aka miɗ gà ya tsa. kərga taŋa yà Absalum a da a ma ŋgar ka, aka ŋgat a Əbay nda are ŋgar tsa. » 25 I Isərayel fit ka, wura a riŋ a tsahən hinne kamala Absalum a tsa. Tə zambaɗawa dər ka, hinne. Daga ara i gər a ndisl aka dəba sik ka, təv mendeve ihər tsa. 26 Kəla aka mandəvandəv mive ka, a zàzàwa ikaba ambəz a. Ambəz ŋgar ata aka zaz ka, na ta ke a nda kiliw Əbay ka, a ze a kiliw sula. 27 Absalum a wa gà ɓəza, gà asləka ŋa makər, dəm ŋa ilik, zləm ŋgar Tamar. Ŋgat ka, a tsahən hinne. 28 Absalum a ndza mive sula i Yeruzalem ka, ziwìɗ aka ŋgat a Əbay nda are ŋgar tsa. 29 A pat duwa ka, Absalum a slər mburma aka Yuwab aà masləra ŋgat a təv Əbay. Ama Yuwab a niw mada a təv Əbay. A slər mburma ma sula ŋa asa, ama Yuwab a niw hiywe asa. 30 I fata ya ka, Absalum a gwaɗa a gà ɓəzla meslire ŋgar: Kà sərum guvah urgaª aaka, i təv biy gà ya tsiye? Dum ka tikwim ahər akwa. kərga taŋa ya na gà ɓəzla meslire Absalum ti tike akwa aà guvah ata ya. 31 I fata ya ka Yuwab a dara a bəra Absalum a a gwaɗar: Aàla na gà ɓəzla meslire yak ti dze akwa aà guvah gà ya? 32 Absalum a gwaɗa a Yuwab, Yàa slərayaha gà mburma aà magwaɗak ka, dara i slire a kər a təv Əbay aà magwaɗar ka, aàla na i dara i Gesur a? Ŋgulum na i ndze a a riŋ ndeɗiŋa i fata ya. I waya kinehe ka, mìi lime a akaba nda Əbay, na duwa a riŋ Yàa ger ŋgwal ŋa tsəka, ma kəɗ iye. 33 Yuwab a da a təv Əbay, a ɗamar dukw ata. Əbay a zala a Absalum, Absalum a daha aka miɗ ŋgar, a dzar gurmits a biye, luz a kal a gər aka ahəɗ aka miɗ Əbay. Əbay a gəs aàba Absalum.