2 Samiyel 15

Absalum a dzik à ba aà mayaha Əbay Dawda

1 I dəba taŋa ya ka, Absalum a ŋgat gà muta piris nda gà piris ŋa dze. Dite nda gà asləka dzik əzləm na ti ndzewere a aka miɗ a. 2 I mèkwède hedwe ka, Absalum a hitse, a da, a tə ndza bise nda biye hərmaga mada a kwite ata. Gà mburma ana ti dere a, ti de a a seriye a bəra Əbay ya ka, Absalum a zalawa a tar, a tsamawa aà tar: « Kà dara ana i gwala wara ya? » Ta gwaɗawar aaka, « Mala meslire yak a dara ka, i gwala gà Isərayel a . » 3 I fata ya ka, Absalum a gwaɗawa a tar aaka: « Pər ahər kwaŋ, seriye yak ka, ndzer, ar ka, kalkal lele. Ama ka, wura a riŋ na a dzere a zləm i bəra Əbay ya tsa. 4 Absalum a gwaɗawa a tar asa: « Assàh, i ge mala mege seriye i kwite aaha ka! Gà mburma ana ti dere a ta pe a gudze, kige tsa, nda gà na ti dere a mege seriye ya fit tserdze ya ka, ti dere a a təv gà ya, i ge a a ter a seriye ndaka vatwa ŋa . » 5 I fata ya ka, na bəla wura aka sərəkàhà a təv ŋgar, aka dzar gurmits a bəɗ ka, a vilere a ahər, ta gis a ba ihər a, dite a gis a aba ŋgat. 6 Absalum a gewe dər kamala taŋa ya, ku mege nda weke, na aka daha a təv Əbay aà meger seriye ya, ku mege i gwala wara na i Isərayel a. Nda parsà ŋgar ata na Absalum a ndzək aba gà Isərayel a. 7 I dəba ana a ge mive faɗ a ka, Absalum a gwaɗa a Əbay, kamkam viliŋ vatwa i da a Hevrun, aà məvəla aàba dukw ana i tsik i sida ya i gwa i ta vile a a BATSAH kwa ŋa ya. 8 Aɗaba iye mala meslire yak, Yàa tsik aba duwa i sida ya, aka na i ndzawa i Gesur ana ika ahəɗ Siriya ya nda megweɗe ka, na bəla BATSAH kwa ŋa aka me a à iye a Yeruzalem ka, i gere a megemir. 9 Əbay a gwaɗar: « da nda zay . » I fata ya ka, Absalum a hitse a da a Hevrun. 10 Absalum a slər gà mburma nda metsehe, a gà kwite ana ika ahəɗ gà Isərayel a fit tserdze, nda magwaɗa a tar: « Na kàa tsarakum meɗe mezleliŋ ka, kə gwaɗum Absalum aka ne Əbay i Hevrun. 11 Gà mburma dərməka sula na Absalum a zala a tar, tə da akaba i Yeruzalem a nda gà ŋgat a dze ya. Tə da ka, kataya pəra, tə sər a dukw ana a ta ge a riŋ ba ya tsa. 12 I təv ana Absalum a riŋ a dzəba aà məvəla dukw taf ata a vile a Mbulum a ka, a slər mburma aà mazalara Ahitufel mala meɗife à metsehe a Dawda a, i kwite ŋgar i Gilu a ya. kərga taŋa ya, na gà ɓəzla ana ti ner a are a Dawda, tə səkah hinne ya, dite dukw tar ana ta wayà mege a Dawda a ka, ndzəɗa a ge ihər ndeyndey asa.

Dawda a val i Yeruzalem a

13 Wura a dara, a gwaɗa a Dawda: « Madzala gà gər gà Isərayel ka, aka mbəɗ aba a təv Absalum, tar a riŋ ti zezeme a ŋgat » . 14 I fata ya ka, Dawda a gwaɗa a gà mburma ŋgar ana tar akaba i Yeruzalem a: « Təzakwa i faha ya. Aɗaba Absalum ka, a miseke a à kwa nda are tsa. Gwim tsəmma, təzakwa dite ka, mazla aka kwara mesèwere are ya, madara ma le a kwa mə bats kwa tsa . » 15 Gà ɓəzla meslire Dawda ata ta gwaɗar aaka: « Əbay mə̀r, ge dukw ana kà waya ya. Mər ka, gà ɓəzla megemir yak . » 16 I fata ya, Əbay a da ka, nda sik, tar nda gà mburma ana i ga i ma ŋgar a fit tserdze. Ama Əbay a zeha a riŋ i ma ka, aà gà kəra məkəs kurwa pəra biy məvava aà ga. 17 I təv ana gà Əbay nda gà mburma ŋgar ana ti leke a ŋgat ti de a ya ka, ta hitse bise nda melivè gər, mandəvandəv ga ana ki dere a i huɗ kwite ata ya. 18 Gà ɓəzla megemir ŋgar fit tserdze tar ika miɗ ŋgar. Gà Keritiya, gà Peletiya nda gà mburma gà Gatiya tserdze. Gà sliwdze dərməka ndilik na tə zàzàmara ŋgat i Gat a, na ti ndze a nda gà ŋgat a. Tar fit tserdze ka, tə ndza aà miɗ a Əbay. 19 Əbay a gwaɗa a Itaya ana ŋgat mala aka miɗ gà sliwdze gà Gat a. « Aɗaba la, na kər mbaŋa ka, ka waya ki diɗe a aka mə̀rra ya? Mbəɗ gər a ma, kà ndzùm nda Absalum, aɗaba kər ka, mbə̀ləkw, dite asa ka, tə də̀gə̀zara kər a ka, medègize na i kwite yak a. 20 Ndavànaha na ka ndzera ya ka, dite mbakum i sleke a za, gùnùh gùnùh kwets i sər təv ana i de a aɗəm a ya tsa, ana mbəɗum gər a dəba, nda gà damər yak. BATSAH kwa ŋa məpàt a kurum à ŋgwal ŋgar nda ndzer ŋgar . » 21 Ama Itaya a gwaɗar aaka a Əbay: « BATSAH kwa ŋa a riŋ nda mesife, dite Əbay batsah gà ŋa tekeɗe a riŋ nda mesife asa mbaŋa ka, a təv ana Əbay batsah gà ŋa, a de a aɗəm a ya ka, iye mala meslire ŋgar tekeɗe i de a mbaŋa. Ku mege ki meteme akabiŋa, ku mege biy mandza a bəra tekeɗe ya . » 22 I fata ya ka, Dawda a gwaɗa a Itaya: « Ndza aka miɗ . » Itaya gà Gatiya ata nda gà mburma ŋgar, nda gà ɓəza ana tar akaba dze ya, tə ndza aka miɗ. 23 Gà mayahaba gər gà mburma fit tserdze, tə dza akaba tuwa ɓìrew, na i təv ana gà sliwdze ti de a ya. Əbay ŋgat a tsəl i dulwa ana tə zalar Sedruŋ a, dite gà asiŋ gà mayahaba gər gà mburma, tə zla vatwa ana, a da ser a dala a kusak aka mandazla ya. 24 Mala məbatsa duwa a Mbulum Tsaduk a riŋ i fata mbaŋa, dite gà asiŋ gà mburma ana i gwala Levi tar a riŋ i təv ŋgar nda gà Sahər Mbulum ana a gəs dər masla ya. Dite ti tike a aba Sahər Mbulum a. Abiyatar a bats duwa a Mbulum haa a təv ana gà mayahaba gər gà mburma fit tserdze, tə ndəv akabaha ya. 25 Əbay a gwaɗa a Tsaduk, mà à Sahər Mbulum à huɗ kwite. Na BATSAH kwa ŋa aka waya megiŋ ŋgwal ŋgar ka, a mere à iye, dite a viliŋa ahər, aà maŋgata sahər ata i təv mendze ŋgar asa. 26 Ama na aka dzala, aà mawaya iye tsəka, iye naha mege a iye dukw ana a waya ya. 27 I fata ya ka, Əbay a gwaɗa a Tsaduk mala məbatsa duwa a Mbulum: « Wànà kà sər dùkùməŋa fit tsiye? Mbəɗ gər à huɗ kwite nda zay. Kurum nda Ahimas kəla yak, nda gà Yunatan kəla Abiyatar. 28 Ama iye ka, i bebe kurum ika vàravadà ana ika màndàzla i dala ya, haa a təv ana i tsereke a labara kurum a . » 29 kərga taŋa ya, na gà Tsaduk nda Abiyatar tə zla Sahər Mbulum ata a Yeruzalem, a ndza a riŋ i fata ya. 30 Dawda a zla vatwa ana a tsəl a kwite uliviye ya, nda gà tuwa. A kumhuhwa are ŋgar nda dukw mendiwiɗe gər, dite tsapà i sik tsa. Gà mburma ana tar akaba tserdze ya ka, tar a riŋ ti tsele a akaba a nda gà ŋgat dze. Ma kumbuhwaya gà are ŋa, tar a riŋ ti tsele a nda gà tuwa. 31 Wura a dara a mə dər a Dawda a gwaɗar ka, Ahitufel ka, ar i liwiŋ gà ɓəzla mene are yak nda gà Absalum. I fata ya ka, Dawda a gwa: « kamkam BATSAH kwa ŋa, metsehe Ahitufel ka, mege ŋgulum tsa . » 32 I təv ana Dawda a ndze aka gər kwite, a təv ana gà mburma tə dzawa gurmits a bəɗ à Mbulum a ka, pəzlaŋ Husaya kəla gà Arkiya aka slala aà maləma akaba nda ŋgat a ka, petek ana ika ba ŋgar a makwayaɗa ŋa, dite ahəɗ i gər ŋgar mbulùhmbulùh. 33 Dawda a gwaɗar: « Na ki tekwe a akaba nda gà kər ka, ki giŋ a ŋgulum tsa. 34 Ama, mbəɗ gər a huɗ kwite, ki ta gweɗe a a Absalum ka, Əbay gà, iye naha i waya i gik a meslire, kamala ana piŋŋe i gewa a dede yak a. Kinehe ka, i ne a mala meslire yak. kamala taŋa ya, na ki zleke a iye ki hiɓe a à metsehe Ahitufel a. 35 Dite asa ka, gà ɓəzla məbatsa duwa a Mbulum gà Tsaduk nda Abiyatar tar a riŋ i fata, ti zleke a kər. Gà dukw ana ki tserekere a i bəra Əbay a fit a ka, ki ɗeme a teriŋa. 36 Gà Ahimas kəla Tsaduk nda Yunatan kəla Abiyatar ka, tar akaba a riŋ i fata fit tserdze. Ki slìrwimìŋara tar a, dite ta miŋ à dukw ana ka tsarakawùm a fit. 37 kərga taŋa ya, na Husaya masla Dawda a mbəɗ gər a huɗ kwite ya, akahər taŋa na Absalum tekeɗe a da a Yeruzalem a mbaŋa.