2 Samiyel 16

Gà Dawda tə lə̀ma nda Tsiba

1 Dawda a tàrra zaakwa i gər kwite ya, ndaka tseke ŋgiɗ ka, tə ləma nda Tsiba mala meslire Mifibuset, a daha a təv ŋgar nda gà hezweŋe sula madana ŋa aba. Nda gà peŋ dərməka sula ika tar, nda matakwala mawa dizl ana tə zalar viŋyè ya dərməka. Biy mawa dizl ana tə zalar figiye ya tekeɗe dərməka mbaŋa, dite aha guzum ana i kiwa kwiye ya ilik. 2 Əbay a gwaɗa a Tsiba: « Ki ge a dər ana meme, na nda gà dukw aaha ya»? Tsiba a gwaɗar aaka: « Gà hezweŋe ka, gà mburma Əbay ti tsilewe aakiŋa, gà peŋ nda gà matakwala mawa dizl figiye aaha ka, ti ne dukw mezime gà sliwdze Əbay. Guzum aaha ka, na tàa sa ka, a vile ter a ndzəɗa i təv ana tàa yèyè ba i dala i kusak a. » 3 Əbay a gwa: « Mifibuset ana ŋgat kəla kəla batsah yak Sawul ana i ŋga? » Tsiba a gwaɗar aaka a Əbay: « Aka ndza ba i Yeruzalem aɗaba a dzala a gwa: Mbakum ka, gà Isərayel ta miŋ a à mekwere tsir gà ahər . » 4 Əbay a gwaɗa a Tsiba: « Kinehe ka, gà dukw Mifibuset fit ka, ti ne a gà biy yak . » Tsiba a gwa: « I hənak à gər a bəɗ Əbay gà, batsah gà ŋa, agəra ŋgwal yak ata ki giŋ a . »

Simhi a vəl mezelme a Dawda

5 Əbay Dawda a ndze bise nda Bakurim ka, pəzlaŋ wele duwa a dara i gwala Sawul a. Zləm ŋgar Simhi kəla gà Gera, a daha ka, a riŋ ihər a ndeve a ya dər a Dawda, 6 dite ar ihər aà makàlàwà gà Dawda nda kur, nda gà mburma ŋgar fit tserdze. Tsaatsa ka, gà mayahaba gər gà mburma nda gà sliwdze ana gà ndzəɗa ŋa ya, ti ler tits, tar a riŋ ika tseke ahər gula, dite ika tseke ahər mezime Əbay asa. 7 Araha na zləm mendeveye ŋana Simhi a ndavaya a Dawda a. « Da i faka ya! da i faka ya! kər mala məbatsa mburma, welewele mburma taf. 8 BATSAH kwa ŋa aka màk à məmbəz gà mburma Sawul a gər, aɗaba ana kà zla aà tar mekwere ya. Dite araha BATSAH kwa ŋa aka zla a kər mekwere ya, aka vəl ahər à kəla yak Absalum, kinehe ka, ki sèwère are aɗaba ana kər mala məbatsa mburma ya . » 9 Abisay kəla Tsuriya^ª a gwaɗa a Əbay: « Aàla na kəra ka məməta ŋa a ndeveye a Əbay, batsah gà ŋa ya. Viliŋ vatwa i sese a ikə̀ka gər a . » 10 Ama Əbay a gwa: « Dukula na a ləma akaba aà iye nda gà kurum a? A kurum gà ɓəza Tsuriya. Na bəla wele aka a ndeveyiŋa ka, biy tsa BATSAH kwa ŋa na a tsiker, a gwaɗar mendeveyiŋ ŋa ana, kinehe ana weke na a gweɗere a ka, aàmala na kà ndavaya a Dawda a ya? 11 Dawda a gwaɗa a Abisay nda gà ɓəzla meslire ŋgar fit dze. Na kəla gà ana, a dara i huɗ gà ya ka, a waya medzeye aà iye seyiŋ ana sakwàn, nda kəla gà Bendzamen aaha ya! Məsàkum aà ŋgat mendeveyiŋ, aɗaba BATSAH kwa ŋa na a gwaɗar a. 12 Bəla tsa BATSAH kwa ŋa aka fər aà mesewere are gà ka, a mbiɗe aà mendeveye ŋgar ata, a ndeveyiŋ mbakum a, a ne a dər mipise ahəm. 13 Gà Dawda nda gà mburma ŋgar, tə zàzàm aba vatwa tar. Simhi ŋgat, a zla vatwa ana a da nda kwite bise ndaka tseke Dawda a. A riŋ a ndeveyere a dər, a kelewa a dər ŋgat nda kur, dite a ndewe a aaka ter aà argwadwa tùtùktùkkwa. 14 Gà Əbay nda gà mburma ŋgar ana tar akaba fit dze ya, ti ndze aka gigize dulwa Yurdan ka, tàa yèyè ba, ti sìkìk ba a fata.

Ahitufel a vəl metsehe a Absalum

15 Gà Absalum nda gà mayahaba gər gà Isərayel ana fit tserdze ti zezeme a ŋgat a ka, tə da a Yeruzalem, nda gà Ahitufel fit dze mbaŋa. 16 I təv ana Husaya kəla gà Arkiya masla Dawda a dara a təv Absalum a ka, a gwaɗa a Absalum: « Əbay mandza aà bəra! Əbay mandza aà bəra! » 17 Absalum a gwaɗa a Husaya: « Wànà kərga taŋa ya ya? Na ke gewar ŋgwal à masla yak Dawda a? Agər la dziye na kà dəɗ aaka tsiye? » 18 Husaya a gwaɗa a Absalum: « Awaŋ i ge a meslire ka, a Əbay ana gà BATSAH kwa ŋa nda gà mayahaba gər gà Isərayel tə zla ya. Nda ŋgat na mìi ndze a ya. 19 Masula ŋana, i ge a meslire dzena a weke? Wànà a kər ana, kəla masla gà ya tsiye? Kataya tsiye? I gewa meslire ka, a dede yak haa mbakum, kamala taŋa ya na, i gike a meslire ya mbaŋa . » 20 Absalum a gwaɗa a Ahitufel: « Ɗifwim aba a metsehe ika magər kurum, aka gər a dukw ana ki gekwe a ya . » 21 Ahitufel a gwaɗa a Absalum: « Da ta həna ya à gà kəra gà məkəs dede yak ana a məsak à tar aà makasla ga ya. Gà mayahaba gər gà Isərayel fit tserdze ti tsereke a ka, kàa ne mala falày nda təv dede yak. Kamala taŋa ya, na gà mburma ana tə zàzàm a kər a ka, ta vilebe a dər ndzəɗa ya . » 22 Ta da kirew ga petek a Absalum ika gər ga Əbay. Absalum a da à ta həna ya aà gà kəra gà məkəs dede ŋgar ata, i təv are gà Isərayel tserdze. 23 Metsehe Ahitufel ata a ɗifer dər a pat ŋa ata ya ka, a ge a aà gà mburma fit ka, kamala Mbulum a, na a riŋ a fefil ya. Kamala taŋa ya mbaŋa, na gà Dawda nda Absalum tə gəsawa metsehe Ahitufel ana a ɗifewa tar dər a.