2 Samiyel 17

Metsehe Husaya ana a ɗif dər a Absalum ka, biy medzeye a à ŋgat

1 Ahitufel a gwaɗa a Absalum. « Kamkam viliŋ vatwa, i pele a gà mburma dəbuw kurwa gəra sula, aà mazàzàma Dawda i huɗ həvəɗ ŋa aaha ya. 2 I de a aakaha ka, a sire a aàba tsa, akahər ana aka yiba, aka hàɓa ba à ahər a. I dze ahər a magəɗa, i fata ya ka, gà mburma ana tar akaba fit tserdze ya ka, ti tize a ihər a. Kamala taŋa ya na, i kiɗe a Əbay, aka təv ana aka zeha a gər ŋgar ilik a. 3 I fata ya ka, wele ana ki yehe a ya, aka mət ka, gà mburma fit ta mbiɗere a gər a təv yak a, ti ndze a zay. 4 Metsehe ata ka, a tsahən aà gà Absalum nda gà bàba gà Isərayel fit tserdze. 5 I fata ya ka, Absalum a gwa: '' Zalakwaha a Husaya gà Arkiya, ki tserekwe dukw ana ŋgat a tsike a ya mbaŋa '' . 6 I təv ana Husaya a ndzehe a təv Absalum a ka, Absalum a gwaɗar: '' Araha na metsehe Ahitufel ana a gwa ya. Wànà ki gekwe a dukw ana a tsik a ya? Tsəna kər kà dzala ana meme mbaŋa ya! 7 Husaya a gwaɗar aaka a Absalum. Metsehe Ahitufel ana mbakum a ka, a da ndaka vatwa ŋa tsa. 8 Husaya a riŋ a gweɗere a aaka hiywe, kər kà sər gà dede yak, nda gà mburma ŋgar. Tar ka, gà ɓəzla ndzəɗa, tàa rah nda matsəɓatsəɓ, kamala kəra dala ana tə ndzək ihər gà ɓəza i dala ya. Dede yak ka, mala guvəl, a sle a aà mehinne a, ti ndze a nda gà mburma i təv ilik ŋa tsa. 9 Kinehe ka, a ge a ka, makaha ba ŋa i sləlak, kige tsa ika tseke ŋgiɗ pam. Na i təv ana tàa bats gà mburma ika magər kwa ya ka, gà mburma ti tsikeriŋa, ta gweɗere a ka, gà mburma ana ti zezeme a Absalum a ka, tàa mba a tar. 10 I fata ya ka, ku mege gà sliwdze gà ndzəɗa ŋana ika magər tar, arəv tar kamala azil a tekeɗe ka, ta heɓebe a à ahər. Aɗaba gà Isərayel fit tə sər, dede yak ka, mala ndzəɗa, dite gà mburma ana tar akaba dziye tekeɗe ka, tàa saya aba yam a. 11 Araha na metsehe gà ana i ɗifeke a dər a, yaha gər a gà sliwdze gà Isərayel a təv yak, daga ara i Dan a tsikw a Beer-Seva. Ta ge hinne kamala hewiyeŋ ana i dulwa ya. Kər ŋa tekeɗe ki dwìm a akaba a guvəl nda gà tar. 12 Ki lekwe ahər a a təv ana ŋgat iɗəm a, ki hitsekwe a ter a, kamala mə̀rah ana a dze a aka ahəɗ, a zehe a aà təv tsiye. Ki miyakikwe a wura ilik a zeha tsa. Ku mege ŋgat, ku mege gà mburma ana tar akaba dze ya. 13 Nà aka kaha ba i kwite ka, gà sliwdze kwa fit tserdze ti ndzekeha gà liɓir aà mə̀ŋgəla à kwite ata a batsah dulwa ana a mbərehe ya, i fata ya ka, wura a le a kur ilik i təv ata asa tsa'' . 14 Gà Absalum nda gà Isərayel fit tserdze ta gwa: '' Metsehe Husaya gà Arkiya ka, a za dər metsehe Ahitufel. Tsaatsa ka, BATSAH kwa ŋa na a mbète a metsehe Ahitufel, kamala taŋa ya, na a zlere a mesewere are aka Absalum a.

Ti ɗif à dukw ana Absalum a ge ya, a Dawda

15 Husaya a gwaɗa a gà Tsaduk nda Abiyatar gà ɓəzla məbatsa duwa a Mbulum: Ahitufel a vəl metsehe ŋgar ka, aha aha àhày, na a gà Absalum nda gà bàba ŋana i Isərayel a. Dite iye tekeɗe i gwa ka, àhày àhày. 16 Kinehe ka, slərakwa mburma tsəmma a təv Dawda nda magwaɗar ka, ka həna ndaavəɗ aaha ika varavada ana i dala i kusak a tsa, say ki tsìle a i dulwa ya, ki sərake a diriŋ aka miɗ. Na kàa da tsəka, ta betse a kurum nda gà mburma yak fit dze. 17 Gà Yunatan kəla Abiyatar nda Ahimas kəla Tsaduk ka, tar a riŋ ta bebe a ŋgat, tar gà mehitse ŋa bise nda dulwa En-Rugel. Mala meslire duwa məkəs ŋa, a dawaha hiywe, aà mibe a tar aà ɗaf ka, tar nda ahər tar ŋa ti tsik à Əbay Dawda. Aɗaba ti sle aà mede à huɗ kwite ata ta ŋgete a ter a a riŋ tsa. 18 Kəla duwa gawla ŋa a ŋgat a a tar, a dara a tsik a Absalum. Gà ɓəzla məma aà labara ata sula ya, ta mba aà ba, ti ndze a Bakurim ka, wele duwa a riŋ i kwite ata sùwah riŋ i ma ŋgar. Gà mburma ata tə tàrr aɗəm. 19 Məkəs wele ata a zla bas, tits a tike aka biye suwàh ata, dite a fətə̀l aaka ble aà tə sər a à tar tsa. 20 Gà ɓəzla meslire Absalum tə da a bəra məkəs ata, tə tsam ahər ta gwaɗar: '' Gà Ahimas nda Yunatan ana i ŋga?'' Məkəs ata a gwaɗa a tar: '' Tàa tsala i dulwa ya. Tə dzəba aà mayaha tar ka, tàa le a tar tsa, dite ta mbəɗ gər a Yeruzalem. 21 I dəba ana tə da iɗəm a ka, gà Ahimas nda Yunatan tə tsalara i suwàh ata ya. Tə da, tə ɗama dukw ana a ge ba ya, a Əbay Dawda, ta gwaɗar: '' Tsàlum i dulwa ya tsəmma, aɗaba Ahitufel ana a ɗif a kurum aà metsehe aha a gwa: aha aha àhày a ka, aka gər kurum. 22 Gà Dawda tə tsala nda gà mburma ŋgar ana tar akaba ya, i dulwa Yurdan a. I mèkwède hedwe ka, tar fit tàa tsala wura ilik aka zehe tsa. 23 I təv ana Ahitufel a samata ka, gà mburma tàa gəs metsehe ŋgar ata tsiye ka, a dza lidzà aka hezweŋe ŋgar, a da à ma à kwite ŋgar. A ɗif aà gà metsehe ŋgiɗ pampam a gà ma ŋgar. A da, a ta mehiriwe ba, a mət. Ti tike məməta ŋgar a dive dede ŋgar.

24 Dawda a da a Mahanayim. I fata ya ka, Absalum a tsəl i dulwa Yurdan a, ŋgat nda gà Isərayel ana tar akaba fit dze ya. 25 Absalum a tike Amasa aka miɗ gà sliwdze ŋgar avukw Yuwab. Amasa ka, tsaatsa kəla wele ana tə zalar Yitra gà Isərayel a. A zla Abigayel dəm Nakas damər ana Tseruya mama Yuwab a. 26 Gà Absalum nda gà Isərayel ana tar akaba ya ka, təv mandzəba tar ka, ika ahəɗ Galaad. 27 I təv ana Dawda a ndze a Mahanayim a ka, gà mburma aaha tə daha a təv ŋgar. Suhi kəla Nahas ana i Rabba ŋgat gà Ammuniya ya. Makir kəla Ammiyel ana i Ludebar a nda Barzilay ana i Rugelim ika ahəɗ Galaad a. 28 Gà mburma ata tə ndzək aaha gà təv mehinne, gà gah yam, gà dzagwaya, gà ble, gà urga, gà gùfa, gà masawla wur duwa, gà ayer, nda gà asiŋ gà wur ayer ŋgiɗ pampam, 29 gà amùm, gà màkə̀rkasla awah gà sla nda gà awak nda biy gà təmaŋ makwasa ŋa. Tə ndzək a taraha a gà Dawda nda gà mburma ana tar akaba dze ya, tə zəm. Aɗaba tə dzala ta gwa, gà mburma tàa yiba, may aka bats tar, kige tsa yam aka bats tar i dala i kusak.