2 Samiyel 18

Məməta Absalum

1 15 Dawda a hadzal gà sliwdze ŋgar ana tar akaba nda gà ŋgat fit tserdze ya. A dzaya gà ɓəzla miɗ aka gər gà sliwdze də̀buw, də̀buw, dite aka gər gà sliwdze dərməka, dərməka asa . 2 Dawda a ndzaka ikaba gà sliwdze ya pampam medzige makər, gà biy ŋgiɗ ka, a dza ahər a Yuwab. Gà biy ŋgiɗ tekeɗe a dza tar ahər a Abisay kəla Tsuriya damər Yuwab. Gà asiŋ aha tekeɗe a dza tar ahər a Itaya ana a ndzawa i Gat a. I fata ya ka, Əbay a gwaɗa a gà sliwdze. Nda ndzer ŋa ka, i de a guvəl ata, ki tekwe a akaba nda gà iye ŋa, dze. 3 Ama gà sliwdze ta gwaɗar: '' Awaŋ ki tekwe a akaba a guvəl nda gà kər ŋa dze tsa, Aɗaba i təv ana mìi tize a ya ka, gà ɓəzla mene are kwa ti dze a are aà mə̀r tsa. Ku mege mezehe ŋa ika magər mə̀r a ta mata ya tekeɗe ka, ti dze a à mə̀r a zləm ɓav tsa. Aɗaba kər ka, Əbay. Ka za gà sliwdze kamala mə̀r aaha ya dəbuw kurwa. Kinehe ka, ŋgulum ndza ɗa i faha i huɗ kwite, kamala taŋa ya, na ki sle a aà mazlekeha mə̀r a. 4 I fata ya ka, Əbay a gwaɗa a tar: '' I ge a dukw ana ka dzàlum ahər ŋgwal ŋa ya'' . Əbay a ndza bise aà biye hərmaga madara i huɗ batsah kwite ya, ndaka təv ana gà sliwdze tə ndəra dərra ba ya, gà asiŋ a, dərməka dərməka, gà asiŋ a aha tekeɗe də̀buw də̀buw a. 5 Əbay a gwaɗa a gà Yuwab, Abisay, aha Itaya : '' Keslwimìŋ kəla gà Absalum, ka ta gwimer dukw ana ŋgwal ŋa tsiye tsa'' . Akahər Əbay ana a riŋ a fefile a ter a, a gà ɓəzla aka miɗ gà sliwdze, aka gər Absalum a ka, gà sliwdze tserdze tar a riŋ ti tserekiŋ a. 6 Gà sliwdze fit tserdze tə dzəba aà mede, aà maləma akaba nda gà Isərayel. Ta ge a guvəl ata ka, i dala i ga ɗaf Efərayim. 7 Gà sliwdze Dawda ta mba aà gà sliwdze gà Isərayel. Tàa dzeye a pat ŋa ata ka, hinne. Gà sliwdze dəduw dzik səla na ta bats tar a. 8 Guvəl ata ta ge ya ka, a ləm aka gà ahəɗ ata fit. A pat ŋa ata ka, gà na ta mata i dala i ga ɗaf a ka, tə za gà na ta bats tar ika miɗ guvəl a. 9 Akahər ana, gà Absalum tə ləma nda gà sliwdze Dawda siser ser a ka, Absalum ŋgat mandza ŋa ika mule. I fata ya ka mule ata a da nda huɗ batsah dizl duwa tə zalar Tereben. Gə̀dzə̀zl gər Absalum a mətsa a liwiŋ gà mazlalagam dizl ata. A mətsa təndàwall a aà dizl ata. Mule ŋgar ata a ndza aaka ya ka, a ndìɗik gər aà mede hiywe. 10 Sliwdze Dawda duwa a ŋgatar, a da, a ta tsik à Yuwab a gwaɗar: '' Araàka Yàa ŋgat a à Absalum aà dizl ana tə zalawar Tereben a, təndàwall a'' . 11 Yuwab a gwaɗa à wele ata a ɗemere a dukw ata ya: '' Na kàa ŋgatar dzena ana, aàmala na kə kəɗ a aaka ŋgat a fata tsiye? Ana tsəka, i dzeke a gà kur siŋgwe kurwa nda kandà ilik a! '' . 12 Ama wele ata a gwaɗa a Yuwab: '' Ku mege ki ti dzeŋa kur siŋgwe dəduw tekeɗe, i sle a aà mege dukw ana ŋgwal ŋa tsiye a kəla Əbay tsa. Aɗaba Əbay aka tsik a kurum. A kər, a Abisay, dite a Itaya. A gwaɗa a kurum ka, '' I ge kurum kamkam keslwimiŋ kəla gà Absalum te ka, maa tsara ka nda zləm mə̀r. 13 Na bəla i ge a aba kamala ana Yàa tsara ka mifefile Əbay ndeɗiŋa tsiye, i kəɗ ŋgat ka, balaari Əbay ka, a tserekiŋa, dite kər tekeɗe ka, ki ndze ba iɗəm a tsakalak, ki ta geye ika iye ɓav tsa. 14 Yuwab a gwa: '' I dzeye a ba à ahər gà i təv yak tsa'' A pala gà zlìrɗe makər i bəɗ i fata ya, ahər. Dite a da a ndwàndwàyar a uswa à Absalum ana ŋgat riŋ nda are mba, ika magər gà ɓəza ahər dizl ata tə zalar Tereben a. 15 Gà ɓəza gà gawla gà sliwdze ana kurwa tə ndzə̀kawar gà dukw ahər Yuwab a ka, ti lawara a Absalum, ta gə̀zl a mət dər. 16 Yuwab a tsəl a mezleliŋ ka, biy mehitse à guvəl, dite gà sliwdze Dawda ta məsak aà màzàzàma gà sliwdze Absalum. 17 Tə zla məməta Absalum, ti ye a biye duwa i dala i gà ɗaf. Tə dzawa aaka kur serrre. Gà sliwdze Absalum fit tàa təz, ku mege weke a val aba ka, à ma ŋgar. 18 Akahər ana Absalum a riŋ nda are mba ya ka, aka mbər mehitse aba batsah kur a, a tulwah Əbay a. Aɗaba a dzala a gwa: '' Kwets kəla gà a riŋ na dite gà mburma ti te a mewebe a dərra à zləm gà a gər a ya tsa'' . Aka mbər meɗè aba zləm ŋgar a kur ata ya. Kur ata a riŋ haa mbakum mba, tə zalawar Absalum.

Dawda a tsara ka məməta kəla ŋgar Absalum

19 Ahimas kəla Tsaduk a gwaɗa a Yuwab: '' BATSAH kwa ŋa aka ge seriye ndaka vatwa ŋa, a Əbay, nda mibe à ŋgat ihər gà ɓəzla mene are ŋgar a'' 20 Yuwab a gwaɗar: '' Kər ka, wele ana a ti ɗe a à labara aaha mbakum a tsa, ama ki ta me a à gà labara ŋgiɗ, a pat ŋgiɗ, mabum ka, ki sle a məma a labara ŋa tsa, aɗaba kəla Əbay na, a mət a. 21 Yuwab a gwaɗa à kəla gà Itiyupiya duwa. Kər, da ta mà labara dukw ana kə ŋgatar a, à Əbay. Kəla gà Itiyupiya ata a dza gurmits à bəɗ aka miɗ Yuwab, dite a val mivele. 22 I fata ya ka, Ahimas kəla Tsaduk a gwaɗar aaka a Yuwab asa : '' Ku mege Dukula na a le a aà iye ya tekeɗe ka, iye i gik kamkam mbaŋa, i vele a i dəba kəla gà Itiyupiya ata ya'' . I fata ya ka, Yuwab a gwa: '' Aàmala na ka waya mivele mbaŋa ya kəla gà? Medzibe labara ata ka, ki ŋgete a iɗəm nùba ya tsa? 23 Ahimas a gwa aaka: '' Ku mege Dukula na a le a aà iye ya tekeɗe ka, i waya i de hiywe'' . Yuwab a gwaɗar aaka: « Haya lele. Da » . I fata ya ka, Ahimas a val ndaka vatwa ana ndaka tùlwah Yurdan a, a za dər kəla gà Itiyupiya ata nda a mivele, a lahar. 24 Dawda riŋ mandza ŋa ika magər gà biye hərmaga ata sula ya. Mala metike are tekeɗe a tsəl aka gər biye hərmaga metike are. A zla gər aà mbulum, dite a pər ikaba ya ka, a ŋgataha wele duwa a riŋ ilik, a vele a à gər ŋgar. 25 Mala metike are ata a ɗifer dərraha à Əbay nda Mewideye ŋgelakəkka. I fata ya ka, Əbay a gwa: '' Na ar ka, a gər ŋgar ilik ka, a dekwere a ka, à gà labara ya. Wele ata a sərə̀kaha. 26 Mala metike are ata a ŋgataha à wele ŋgiɗ, a riŋ a veleha asa. Mala metike are ata a mədəraha a wele ana a riŋ à kèsle a biye hərmaga ya nda magala, a gwaɗar: « Araha misle ŋgiɗ naha a velere a ŋgat a gər ŋgar ilik asa. Əbay a gwa: '' Wele ata mbaŋa ka, a de a à kwere a ka, aà gà labara ya'' . 27 Mala metike are a gwa: '' I madzala i gər gà ka, malahalah ŋana ka, Ahimas kəla Tsaduk. I sər ka, i gà mivele ana a valawa ya'' . Əbay a gwa: '' Taŋa ka, ŋgwal mburma, nda ndzer a de a kwere a ka, à gà labara ya. 28 Ahimas a ndzehe ka, a gwaɗa Əbay nda magala: '' Kwa a riŋ ka, zay'' I dəba ŋa ya, a dza gurmits a bəɗ aka miɗ Əbay, a gwa: '' Mezlibe mene ka, biy BATSAH kwa ŋa Mbulum yak. Ŋgat na a dzak gà ɓəzla mene are yak ana, tə zla aka kər ahər a mbulum a, Əbay, Batsah gà ŋa. 29 Əbay a gwaɗar: '' Wànà Absalum riŋ zay tsiye?'' Ahimas a gwaɗar: '' Akahər ana Yuwab a slərra mə̀r, iye nda mala meslire yak ŋgiɗ aaha ya ka, Yàa ŋgatar, aka vəl madzala gà gər a gà mburma hinne, wisikikiɗkiɗ, ama i sər dukw ana a ge ba ya tsa. 30 Əbay a gwaɗar aaka: '' Sərək aàba, a ma ka da deriŋ tsa'' . Ahimas a sərək i fata ya, dite a dza zləm. 31 I fata ya ka, kəla gà Itiyupiya ata a ndzeha ka, a gwa: '' Əbay, batsah gà ŋa, araha ŋgwal labara aɗaba kər. Mbakum ka, BATSAH kwa ŋa aka gik seriye nda vatwa ŋa, aka be a aà kər i ahər gà ɓəzla mene are yak a'' . 32 Əbay a gwaɗa a kəla gà Itiyupiya ata: '' Wànà Absalum riŋ zay tsiye?'' Kəla gà Itiyupiya ata a gwaɗar aaka: '' Əbay gà, batsah gà ŋa, gər a gwa ka, gà ɓəzla mene are yak nda gà mburma ana ta waya magə̀k dukw ana ŋgwal ŋa tsiye ka, tə dzeye kamala kəla gawla ata ya ^ª.