2 Samiyel 19

Dawda a tuwa kəla ŋgar dite a mbəɗ gər a Yeruzalem

1 I fata ya ka, a wur aà Əbay hinne. A tsəl a ga ana ika gər biye hərmaga mada a batsah kwite ata ya, a dzə ba aà tuwa. Metsile ana a riŋ a tsile a ya ka, a riŋ ihər a gwaɗawa dər « Waya kəla gà Absalum a, waya kəla gà ya, waya kəla gà Absalum a. Aɗaba la, na iye ŋa i mət ndeɗiŋa avukw kər tsiye? Waya kəla gà Absalum a!, waya kəla gà Absalum a! » . 2 wura a da a ta mə dər a Yuwab a gwaɗar: « Araha Əbay a tiwe a kəla ŋgar Absalum, a riŋ ihər a kiɗe a ba hinne » 3 A pat ŋa ata ka, mege gara, a ne tuwa aka gà mayahaba gər gà mburma ata tserdze. I fata ya ka, gà mburma tə tsara ka, mbaŋa ka, Əbay a riŋ a dzebe a are tsehe agəra məməta kəla ŋgar. 4 A pat ŋa ata asa ka, gà sliwdze tə mbəɗ gər a huɗ kwite ka, nda makàhà ba ŋa, kamala gà sliwdze ana hwarwa a ndaɗa aka tar ba, aɗaba ana tə təzara ika miɗ guvəl a ya. 5 Əbay ka, ŋgat a riŋ nda gà makumbuhwa are ŋa, dite a riŋ a ndiɗike a gər aà tuwa nda magala hinne, a gwa: « Waya kəla gà Absalum a!, waya Absalum a!, waya kəla gà ya!, waya kəla gà ya! 6 I fata ya ka, Yuwab a da, a le a aà Əbay a təv ana ar iɗəm a, a daha a gwaɗar: « Mbakum ka, kàa ndaɗa hwarwa aka gà sliwdze yak fit. Tar na ta mbəl à kər mbakum, nda gà ɓəza yak, nda gà dəm yak, nda gà məkəs yak, aha nda gà kəra gà məkəs yak fit dze ya. 7 Aha ka, kà waya gà ɓəzla mene are yak, dite kər, ki ne are ka, a gà na ta waya kər a. Nda mege dukw ata ki ge kamala taŋa ya, ka pàt dər ka, gà ɓəzla aka miɗ gà sliwdze yak, nda gà ɓəzla megemir yak ka, ta gike a ŋgulum tsa. Dite i sər mbakum kuɗa ka, na Absalum mege aà bəra, dite mə̀r fit na mì dzeye iɗəm a ndeɗiŋ a ya ka, Taŋa na a deke a ger a lele ya. 8 Kinehe ka, hitse a aà mbulum, dite ka fafəl bazlam ilik à gà mburma yak, biy mege tar kəkaaha. Na kàa da tsəka, i mbaɗa nda zləm BATSAH kwa ŋa, gəs a mbakum a, wura a zeha i megemir asa tsa. Taŋa a ne aka kər a, batsah mesle dukw ana diydiy aka gik ba a gər tsa, daga aà gər ana ki ge gawla ya. 9 I fata ya ka, Əbay a hitse, a da, a ta mendze a bəɗ aà guva biye hərmaga mada a huɗ kwite. Gà sliwdze tə tsara ka kataya ka, dite ti yaha ba aha gər fit tserdze a təv ŋgar. Gà sliwdze Absalum ka, tàa təz, ku weke a da ba a ma ŋgar. 10 I gà gwala gà Isərayel a, fit tserdze ka, tar a riŋ ta meye ba a bakal. Gà mburma ta gwa: « Əbay Dawda na a beye a kwa ya, ndeyndey ŋana ka, i ahər gà Filistiya ya, dite kinehe ka, aka a val i huɗ kwite ya, agəra Absalum. 11 Ama Absalum ata, kà zla kwa ŋgat kamala Əbay ya ka, aka mət i guvəl, ana Dukula na ki vevekwe a à məmàra a Dawda a, kamala Əbay kwa ya » . 12 I fata ya ka, Əbay Dawda a slər gà mburma a təv gà ɓəzla məbatsa duwa a Mbulum, gà Tsaduk nda Abiyatar aà tə ta gwaɗa a gà bàba ŋana ika ahəɗ Yahuda ya: « Ka ti nwim gà ɓəzla dəba tsa, na à məmàra a Əbay à ma ŋgar a. Əbay ka, a sər madzala gà gər gà Isərayel » 13 Kurum ka, gà damər dìnde gà, gà damər gà ana gà atasl nda slu ba kwa ka, ilik a. Dite ana agər la dziye, na ki nwim a gà ɓəzla dəba, na i təv məmàra à Əbay a ma ya ya? 14 Ki te gwaɗum a a Amasa asa mbaŋa ka, wànà kər dzena damər dìnde gà ana gà atasl nda slu ba ma ilik a ibam a? Mbulum miviliŋ batsah mesewere are hinne na Yàa vəlak təv mendze Yuwab mala aka miɗ gà sliwdze gà aà biybiy tsiye! 15 Dawda a mbəɗara à madzala gər gà mburma gà Yahuda a təv ŋgar a. Tar fit tàa gəs aba a təv ilik ŋa, aà metsiker à Əbay ka, mumara nda gà mburma yak a. 16 I fata ya ka, Əbay a mbəɗara gər a, dite tsìm a ndze a dulwa Yurdan ka, gà mburma ana i Yahuda ya ka, tàa daha a Gilgal aà maləma akaba nda gà Əbay, aà mazlaka ŋgat aà matsəlara i dulwa Yurdan a.

Dawda a niw makə̀ɗe Simhi

17 Simhi kəla Gera gà gwala gà Bendzamen ana a ndzawa i Bakurim a, a mba aà ba à matara akaba nda gà mburma ata a dulwa Yurdan, aà maləma akaba nda gà Əbay Dawda. 18 I fata ya ka, gà mburma ana tar gà gwala Bendzamen, akaba nda gà ŋgat tserdze ya ka, dəbuw. Dite gà Siba ana mala megemir i ga, i bəra Sawul a, nda gà ɓəza ŋgar kurwa gəra əzləm, aha gà ɓəzla megemir ŋgar dzik səla. Tə làhəha a Əbay a dulwa Yurdan. 19 Akahər ana slə̀làh yam a da à gà mburma Əbay ika gər yam a ya ka, aà ta ge dukw ana ŋgwal ŋa Əbay a waya, aà ta ger a tserdze . I fata ya ka, Simhi kəla Gera a daha a yè ba aka ahəɗ aka miɗ Əbay, ana a tsəl i dulwa Yurdan a. 20 Dite a gwaɗar: « Əbay gà, ka ta tiye bakal gà aà ahər tsa. Piliŋ à bakal gà ana i gək, a pat ana ka da i Yeruzalem a. Ka ti tike a à iye dùgwùn ŋa tsa! 21 Aɗaba iye mala meslire yak, i sər Yàa gək bakal ka, hinne. Ama mbakum ka, iye ilik na ika magər gà mburma Yusufa i làhara fit a, i mbàra aà ba ya ka, aà maləma akaba nda kər, Əbay batsah gà ŋa, ələk ana gà mburma tserdze ti ndzere a ya.» 22 I fata ya ka, Abisay kəla Tsuriya a dzəba a mifefile a gwa: « Gà dukw ata a ɗama ya ana biy mimbete à makəɗa Simhi, ana a ndavaya a Əbay, wele ana BATSAH kwa ŋa a zla ya ide ya ?» 23 Ama Dawda a gwaɗa a gà Abisay nda damər ŋgar Yuwab: « Dukula na a ləma akaba aà kwa ya, a kurum gà ɓəza Tsuriya? Agər la na, kurum kà nwim gà ɓəzla meniŋ are mbakum a. Mbakum ka, i waya tsa na i kiɗe a mburma aà gà Isərayel a. Iye dzena, i sər tsiye na nda ndzer ka, iye Əbay gà Isərayel mbakum a? 24 Əbay a gwaɗa a Simhi: Yàa zəm mimbeɗe, i kiɗe a kər tsa.

Gà Dawda ta fafəl nda Mifibuset

25 Mifibuset, kəla kəla Sawul a da aà maləma akaba nda Əbay mbaŋa. Aka dzə zləm aà maləmbaɗa gà sik ŋgar, nda gumət ŋgar tsa. Aka bara aà gà petek ŋgar a tsa, à gər pat ana Əbay a da ya, haa a pat ana a mbəɗaha gər a ma nda zay a. 26 I təv ana Mifibuset a da i Yeruzalem a aà maləma akaba nda Əbay a ka, Əbay a gwaɗar: « Agər la na kàa zazam iye tsiye Mifibuset? » 27 Mifibuset a gwaɗar aaka, « Əbay, batsah gà ŋa, mala meslire gà Tsiba na peziŋ za ya! I dzala zləmana i gwa ka, i dze a lidza aka hezwèŋe, i tsìle a aaka ŋa, i zezem a kər Əbay, aɗaba iye ka, magàha a bəɗ ŋa i sik a. 28 Mala meslire gà a daha a təv yak, a mesese aà iye parsa. tsaatsa kər batsah gà ŋa, Əbay gà ka, kər kamala gawla Mbulum a, ge dukw ana a dak a gər a ŋgwal ŋa ya. 29 Ndaka tseke yak ka, gà mburma ana i ga i bəra tsir dede gà Sawul a ka, a da dər mibetse tar fit kweleŋ i təv are yak a. tsaatsa araha kàa zla iye, aka magər gà mburma ana kà zəmawum akaba ɗaf a. Ana wànà iye dzena, i sle aà mewize a duwa ŋgiɗ asa ya? Duwa a riŋ na i wize a a kər a ya asa tsidze Əbay gà ?» 30 Əbay a gwaɗar aaka: « Aàmala na ki fefiliŋ a aka gər gà dukw ata asa ya. Yàa mbər megwe ka, kurum nda Tsiba ka, ki dzwimibe à gà guvah Sawul a» . 31 Mifibuset a gwaɗa a Əbay: « Siba a sle aà mendzike a fit, dukw ana ŋgwal ŋa i təv gà ya ka, na kər Əbay gà, ka ndze a ma nda zay a» .

Dawda a vəl dukw mayaba ŋgar a Barzilay

32 Barzilay gà Galaad ana a dara i Rugalim a, ŋgat a tàr a dulwa Yurdan a mbaŋa, tə tsala akaba ika gər duluv ata ya nda Əbay, na ələk a ta de a ihər a ndaka tseke ŋgiɗ a. 33 Barzilay ŋgat ka, mandawal ŋa kwetifkwetif, mive ŋgar, dzik tsamakər. Wele ata ka, mala limana hinne, aka vəl dukw mezime hinne a gà Əbay nda gà mburma ŋgar akahər ana ŋgat mandza ŋa i Mahanayim mba ya. 34 Əbay a gwaɗa à Barzilay: '' Dara dəɗ aka iye a Yeruzalem, ki te ndze a i təv gà, i gik a gər''. 35 Barzilay a gwaɗa a Əbay: '' I ti ndze a aà bəra ŋana mive ndaw asa ya, na biy ana ki teme akaba a Yeruzalem a?'' . 36 Mive gà mbakum ka, dzik tsamakər, i sle megeye ikaba à gà dukw ana gà ŋgwal ŋa ya, nda ana ŋgwal ŋa tsiye asa tsa. Dite i sle megeye ikaba aà medzə̀ma gà dukw mezime ana i zime a ya, nda gà dukw mese ana i se ya tsa. I sle megeye ikaba aà gà biye ɗa gà dimis gà asləka nda biy gà məkəs a tsa. Aɗaba la na ki zlekebe a mibe duwa agəra iye ya? 37 Ki tsìleme nda kər ka, i dulwa Yurdan aaha ya pəra. A slaka, i sle meŋgete dukw maya ba ata tsa. 38 Viliŋ vatwa a iye mala meslire yak, i mbə̀ɗa gər a huɗ kwite gà, i da mət a fata, ti le iye a təv dive gà dede gà nda mama gà. Ama Kimham kəla gà naha, ŋgat ka, ki dwim a akabiŋa. Ki ti gere a dukw ana ka waya i gəzləŋ yak, a dak a gər lele ya . » 39 Əbay a gwa: « Haya kaɗəŋ Kimham madara mìi da akabiŋa, i ta gere a dukw ana, kà waya a dak a gər a, dukw ana ki ta wiz a aà iye ya fit ka, i ta vilekeriŋa» . 40 Gà mburma fit tə tsala i dulwa Yurdan a ka, i dəba Əbay ana aka mbər metsile iɗəm a. Dawda a gəs aàba Barzilay, dite a piser ahəm. I fata ya ka, Barzilay a mbə̀ɗa ba gər a ma ŋgar.

Gà gwala gà Yahuda nda gà gwala gà Isərayel ta ge maàga

41 Əbay a da a Gilgal, dite Kimham a dəɗ aaka. Gà mburma gà Yahuda fit tserdze nda mezehe gà Isərayel ana ndaka tseke are yam a, tə zàzàm tar, tə laka Əbay. 42 Gà mezehe gà Isərayel ana ndaka tseke are yam a, tə sərəkaha a təv Əbay, ta wiz ahər ta gwaɗar: « Aàla na gà damər mə̀r gà Yahuda na tə gasara kurum ika gər dulwa Yurdan a, nda gà ma yak a, tsaatsa, kurum akaba ka, nda gà sliwdze yak tserdze ya?» . 43 I fata ya ka, gà mburma gà Yahuda, ta gwaɗa a tar aaka: « Aɗaba mə̀r nda gà Əbay ka, nda gà gwala bise ndeyndey ika kurum a ? Aɗaba Dukula na a tsìɓ a kurum a dziye? Wànà Əbay ya na a vəlawa a mə̀r dukw mezime ya? tsəna a dzayawa a mə̀r gà dukw taf a?» 44 Gà mburma gà Isərayel ana ndaka tseke are yam a, ta gwaɗa tar aaka a gà mburma gà Yahuda: « Ama Əbay ka, biy mə̀r a za biy kurum sik kurwa. Nda ndzer mə̀r nda gà Dawda ka, bise ndeyndey aà kurum a. Aàla na ka witwim a mə̀r a? Mər na mi lah mifefile mìi gwa ka, màkwara à Əbay kwa a ma ya. Ama gà mburma gà Yahuda, tar ta fafəl ka, nda ndzəɗa, nda maàga, ika gà Isərayel a.