2 Samiyel 20

Seba a hitse a caà Dawda

1 Wele duwa a riŋ i Gilgal i fata gà Bendzamen falay mburma, zləm ŋgar Seba kəla Bikri. A tsəl a mezleliŋ ŋgar, dite a gwa: duwa a riŋ na a ki ŋgetekewe a aà Dawda a tsa, duwa aka ləma akaba a kwa nda kəla Yasa ka tsa. Kurum gà Isərayel, ku mege weke, daywim a gà ma kurum. 2 I fata ya ka, gà Isərayel fit tserdze ta miyak à Dawda, tə zàzàm Seba kəla Bikri. Ama gà mburma gà Yahuda ka, ta gəs ba aà Əbay tar hiywe. Tə da akaba nda gà ŋgat daga ara i dulwa Yurdan a tsikw a Yeruzalem. 3 I təv ana Dawda a ndze a ma ŋgar a Yeruzalem ka, a zal a gà kəra gà məkəs ŋgar ata, kurwa a miyak ɗa à tar, aà məvava a ga ya. A dza tar a ga ana makasla ŋa lele ya. A zla akaba mege tar gər. Ama a ləmawa aà tar tsa. Ti ndze a i ga i fata, haa ndisl aà məməta tar, ti ne kamala gà madakwa gà məkəs a, tsaatsa ka, zal tar a riŋ nda mesife ibam. 4 I fata ya ka, Əbay a gwaɗa à Amasa: Yehiŋ a tar akabara gər à gà sliwdze gà Yahuda ya, kà dum akabara nda gà kər aka miɗ gà a faha ya, i huɗ mehinne makər a. 5 Amasa a da a mayaha akabara gər a gà mburma gà Yahuda ya, ama aka za, i gər a mehinne ana Əbay a tikar a bəɗ a. 6 I dəba ŋa ya, Dawda a gwaɗa a Abisay: « Kinehe ka, Seba a ta gikwe a dukw ana ŋgwal ŋa tsiye, a ze a dər biy Absalum. Kər kinehe ka, ndzək tar, ka dum nda gà sliwdze batsah yak ŋa, zàzàmum ŋgat, ma lah a kurum a gà kwite ana malawaraŋa ya, ma ta be aà kwa ya tsa . » 7 Gà sliwdze ana Yuwab a kwere a tar a ka, gà Kiritiya, nda gà Pelitiya, nda gà asiŋ gà sliwdze ana gà ndzəɗa ŋa ya. Tə dara i Yeruzalem a, aà mayaha Seba kəla Bikri ata ya. 8 I təv ana ti ndze bise nda batsah kur ata i Gabawun a ka, Amasa a le a aà tar. Yuwab ka, petek sliwdze ŋgar na ikaba ya. Madana ba ŋa nda kànda i dəmkul a, na a dzak ahər masalama ŋgar ata i ga ŋa ya. I təv ana Yuwab a ndzehe a à ŋgat bise ya ka, masalama ŋgar ata a dəɗ ihər a. 9 Yuwab a gwaɗa a Amasa: Kər a riŋ zay beye damər gà? A gəs Amasa i gumət a, nda ahər mezime ŋgar, kamala na a waya medziwiɗer ahəm a. 10 Amasa ka, a ka ge metsehe à masalama ana ihər gula Yuwab a tsa. Yuwab a ger masalama ata aka huɗ, zəruɓ dìnde Amasa a dza aka ahəɗ. A ger ka, sik ilik pəra tsəka, sik sula tsa na a mət dər a. Gà Yuwab nda damər ŋgar Abisay, ti ndiɗik gər aà mayaha Seba kəla Bikri hiywe. 11 Sliwdze Yuwab duwa ilik a hitse bise nda təv məməta Amasa ata a gwa: Weke na biy gà Yuwab nda Dawda a? Wele ata ka, màzàzàm Yuwab. 12 Amasa aka mbaɗa aba a məmbəz ŋgar, gwezlgwezlizlzle məməta ŋa, ika magər gà vatwa. Sliwdze ata a samata ka, ku weke a hitsawa a fata, i fata ya ka, a sapara məməta Amasa ata a kusak aà guva vatwa. i dəba ŋa ya, a fər asa ka, gà mburma ana ti dehe a ndaka vatwa ata ya ka, ta hitsewa a fata hiywe ka, a tike aaka aba petek a, seɗ aka məməta Amasa ata ya. 13 I təv ana a zla məməta ata ika vatwa ya ka, Gà sliwdze ana tə zàzàmàwa Yuwab a, ti ndiɗik gər à mazazama Seba kəla Bikri. 14 Yuwab a da, a tawaɗ ika ahəɗ gà gwala gà Isərayel a fit, tsikw a da a huɗ kwite Abel-Bet-Maaka. Gà mburma ana i Berit a, tə yahaba gər, tə da akaba nda gà ŋgat. 15 Gà Yuwab tə dara tə dza maŋgwaɓa a Seba ana, i Abel-Bet-Maaka ya. Ta ge batsah dava tsìm aka malahalah zlagam ana a kèsle a kwite ata ya. I dəba ŋa ya, ti le zlagam ata, dite aà məmbazla. 16 Məkəs duwa, a tsah hinne, i huɗ kwite ata, a wideye a gwa: '' Tsarakum! tsarakum! gwim kamkam a Yuwab masərəkara a faha ya, i fèfiler ŋa! 17 Yuwab a sərəkaha, Məkəs ata a gwaɗar: « Wànà kər ana Yuwab a? » Yuwab a gwaɗar: « haya iye ŋa . » Məkəs ata a gwaɗar asa: « kamkam, dza zləm a mifefile ɓele yak naha te . » Yuwab a gwaɗar aaka: « iye a riŋ ihər i tserekiŋa » 18 Məkəs ata a riŋ ihər a fèfiler a hiywe, a magwaɗar: « Akahər ata mì gwaɗawa ka, « wizekwara ikaba madzala gà gər, gà mburma ana mandza ŋa i Abel-Bet-Maaka ya, na dite gà dukw mesle ŋa, a zle a ba i bəɗ tsara ya . » 19 Mər ka, ika magər gà mburma ana tar mandza ŋa zay, dite gà ɓəzla magəsa ahəm aà Mbulum gà Isərayel a, ama kər, ka waya medzeye iɗəm aà kwite aha ŋgat ilik na ŋgwal ŋa, ika magər gà kwite ana i Isərayel a. Aàla na ka waya medzeye iɗəm aà dukw ana a ne biy BATSAH kwa ŋa dze ya? 20 Yuwab a gwaɗar aaka, diydiy tsidze, mada aà iye ya diriŋ, na madzala gà gər məmbazla a duwa, kige tsa medzeye a à ku mege ka, à Dukula tekeɗe ya. 21 Awaŋ dukuməŋa ka, taŋa tsa. Ama wele duwa i gər kwite Efərayim, zləm ŋgar Seba, kəla Bekri, na a zla ahər ŋgar a Mbulum aka Əbay Dawda a. Pìlwimiŋara à ŋgat a ilik, dite i de a i kwite kurum a diriŋ. Lele məkəs ata a gwaɗa a Yuwab. Taŋa ka lele, mìi ti yekere a gər ŋgar a ndaka gər zlagam kwite aha ya. 22 Məkəs ata a da a təv gà mburma ana mandza ŋa i kwite ata ya, nda metsehe ŋgar ata, a ɗif a tar à metsehe, dite ka, ta ge kamala taŋa ya, tə sàs gər ika Seba kəla Bikri ya, ti yara a Yuwab a. Yuwab a vizl a mezleliŋ biy mendisle a à guvəl. I dəba ŋa ya ka, gà sliwdze ŋgar tə da i huɗ kwite ata ya tsara, tə da ya ba a gà ma tar. Yuwab nda gər ŋgar, a mbəɗ gər a təv Əbay a Yeruzalem.

Gà bàba gà ɓəzla megemir Dawda

23 Yuwab ŋgat a kwara ka, gà sliwdze gà Isərayel tserdze. Beniye kəla Yehuyada ŋgat a kwara gà Keritiya nda gà Pelitiya, tar gà ɓəzla makasla Əbay. 24 Aduram ŋgat mala aka miɗ gà ɓə̀la megemir ana ta gewa nda balaari ya. Yehusafat kəla Akiliwd ka, ŋgat mala məma ahəm Əbay. 25 Seva ŋgat mala mewetse duwa, dite gà Tsaduk nda Abiyatar ka, tar gà ɓəzla məbatsa duwa a Mbulum. 26 Ira ana i gwala Yayir a mbaŋa ka, a gewa megemir məbatsa duwa a Mbulum i ga i bə̀ra Dawda.