2 Samiyel 21

Mbulum a ge seriye a gà Isərayel ka, nda may

1 Akahər mekwere Dawda ka, may aka ge, aka ndza, mive makər. Dawda a wiz à BATSAH kwa ŋa dite BATSAH kwa ŋa a gwaɗar aaka: « Aɗaba gà Sawul nda gà ma ŋgar tàa ge bakal nda məbatsa gà Gabawuniya . » 2 Əbay a zal a gà Gabawuniya a fafəl a tar. Gà mburma ata ka, tsaatsa tar gà Isərayel tsa. Ama tar ka, gà Amuriya ana tə zehe ika magər gà Isərayel a. Gà Isərayel ta mbàɗa aà ta mesak à tar nda mesife. tsaatsa Sawul ka, a waya medzeye iɗəm aà gà mburma ata ya, aà dite ka, gà Isərayel nda gà Yahuda ti ne gà ɓəzla ndzəɗa. 3 Dawda a wiz a gà Gabawuniya: « Dukula na i ge a kurum a? dite meme na i mbète a à bakal Sawul ana a ge a kurum, na dite ka, ki piswim a ahəm a kwite Isərayel a?» 4 Gà Gabawuniya ta gwaɗar aaka: « Mesle dukw ana ika magər mə̀r nda gà Sawul, nda gà mburma ŋgar a ka, a sle a membète tsa. Ku mege ka, nda siŋgwe, ku mege nda gura ya. Kige tsa asa mbaŋa ka, ta kəɗ aà gà Isərayel a tekeɗe ya . » Dawda a gwaɗa a tar aaka hiywe: « Tsikwimiŋ dukw ana ka wayum a, i ge a kurum ŋa.» 5 Gà Gabawuniya ta gwaɗar aaka asa: « Sawul aka waya medzeye a mə̀r, aka ge dukw ana a dzeye a dər iɗəm a mə̀r a, ika ahəɗ gà Isərayel tserdze ya. 6 Ta gasakwara gà mburma ya təsəla, i liwiŋ gà gwala ŋgar a. Ki hireweyekwe a tar, aka miɗ BATSAH kwa ŋa i Giveya, i kwite ana Sawul wele ana BATSAH kwa ŋa a zla, a ndzawa iɗəm a. I fata ya ka, Əbay a gwa: « I ta gese a a kurumara tar a. 7 Əbay a məsak à Mifibuset kəla Yunatan nda mesife, Yunatan ka, kəla kəla Sawul, agəra mazəma mimbeɗe tar ana ta mbàɗa aba nda masla ŋgar Yunatan, nda zləm BATSAH kwa ŋa ya. 8 Əbay a ndzək gà ɓəza Rispa sula, gà biy dəm Aya ana a wa a Sawul a. Gà Armuni nda Mifibuset, nda gà ɓəza Mirab dəm Sawul ana a wa tar a Adriyel a, əzləm, Adriyel ka, kəla Barzilay gà Mehulatiya. 9 Dawda a dza tar ahər gà Gabawuniya, tə hirweye tar aà dizl ika gər diyis ika miɗ BATSAH kwa ŋa. Gà mburma ata təsəla ya. Ta bats tar, ta mata akaba ka, akahər malahalah pàt mezle urga. 10 Rispa dəm Aya a zla buhwa, a tike aka gər kur a ndza aaka bise nda təv gà məməta ata. A ndza i fata, gəs a malahalah məpala gà duwa i bəɗ a, tsikw a malahalah yam ana a dza aka tarəra i mbulum a. Aka vəl vatwa a gà ɗiyeŋ ana aà gəza mbulum a, aà tə ndza aka tar tsa na ndaàpàt a. Ku mege, a gà dukw dala ana i dala ndaavəɗ a, a dalawuwa ihər tar a, asa mbaŋa. 11 I fata ya ka, ta mà à dukw ana Rispa dəm Aya kəra məkəs Sawul ata a ge ya fit a Dawda. 12 I fata ya kuɗa ka, Dawda a da, a mà aka mandzəkara gà atasl gà Sawul nda kəla ŋgar Yunatan a, ara i Yabes ana tar mandza ŋa i Galaad a. I dəba taŋa ya, i təv ana gà Filistiya ta mba à gà Sawul i Gilbuwa ta bats tar a ka, tə danaya gà məməta tar aà dizl, i təv ana gà mburma tə zar tsiye i Bet-Seyan. I fata ya na gà mburma ana i Yabes a, tə dara, ta pala ya à gà məməta ata à dizl a. 13 kərga taŋa ya na, Dawda a ndzəkara gà atasl gà Sawul nda biy kəla ŋgar Yunatan i Yabes a. I dəba ŋa ya asa, a yaha gər a gà atasl gà mburma ata təsəla tə danaya tar aà dizl a. 14 Ti le akaba gà atasl gà Sawul nda kəla ŋgar Yunatan a təv ilik ŋa, ika ahəɗ gà Bendzamen i Tsila, a dive Akis dede ŋgar. Gà dukw ata tserdze a geye ba ya ka, kamala ana Əbay a waya ya. I dəba taŋa ya kuɗa ka, Mbulum a pàt à ŋgwal ŋgar ika ahəɗ ata.

Gà Isərayel ta ge guvəl nda gà Filistiya asa

15 Gà Filistiya ta ge guvəl nda gà Isərayel asa. Gà Dawda nda gà sliwdze ŋgar tə da a mandza maŋgwaɓa aà gà Filistiya. I fata ya ka, Dawda aka yè ba bise tsara. 16 I dəba ŋa ya ka, Yisbi-Benuw gà gwala gà Harafa a tsə̀nah ba aà makəɗa Əbay. Yisbi-Benuw ata ka, masalama ihər awiya ŋa aà kandà. Ahəm suwal ŋgar ana nda virzegènè ya ka, mibe ŋgar a ze a kiliw makər. 17 Abisay kəla Tsuriya a daha a zlak Dawda, a lak a Filistiya ata a mət dər. I fata ya ka, gà sliwdze ti tsiker i sida ya, a Dawda ta gwaɗar: « Ki tekwe a akaba a guvəl nda gà kər asa tsa. kərga taŋa ya, na Əbay a de a ihər gà Isərayel a asa tsiye. 18 I dəba mendze zaakwa ya ka, guvəl a ge ba nda gà Filistiya asa i Gub. I fata na Sibkay gà Husa a kəɗ Saf wele ana i gwala gà Harafa ya. 19 Ta ge guvəl i Gub asa nda gà Filistiya, Elhanan kəla Yarre-Uregim gà Betelehem a kəɗ Guliyat gà Gat. Gəràh suwal ŋgar ka, dàgwalum ŋa kamala dizl maŋgara petek a. 20 Ta ge guvəl ŋgiɗ i Gad asa, i fata ka, wele duwa a riŋ zubul ŋa, ɓəza ahər ndilik ndilik, dite gà ɓəza sik ŋgar ndilik ndilik asa, a gaw ba fit ka, dzik səla gəra faɗ. Ŋgat a dara, i gwala Harafa ya. 21 Wele ata a ndavaya a gà Isərayel. I fata ya ka, Yunatan kəla Samma damər Dawda a kəɗ. 22 Gà sliwdze gà Filistiya ata faɗ a ka, tar gà gwala Harafa gà Gad. Na bats tar ka, gà Dawda nda gà sliwdze ŋgar.