2 Samiyel 22

Dawda a zlə̀b à BATSAH kwa ŋa nda dimis

1 Dawda a lah dimis aaha ka, a BATSAH kwa ŋa i dəba ana a be a à ŋgat ihər gà ɓəzla mene are ŋgar, nda gà Sawul a tserdze. 2 A gwa, BATSAH kwa ŋa ka, gurum gà, təv ndzəɗa gà, dite ŋgat na a be à iye ya. 3 Mbulum ŋgat ka, gurum gà ana i kehe a ahər a ba ya. Ŋgat ka, slakwa gà, mala ndzəɗa ana a geye ika iye ya. Ŋgat ka, mala mimbile a à iye. I kehe a ba a təv ŋgar ka, aà mibe a à iye ihər gà mburma ana gà ŋgwal ŋa tsiye. 4 I zele a à be a ka, a BATSAH kwa ŋa, ŋgat na a da dər biy mazləba dər a. Na dite i ta be a ihər gà ɓəzla mene are gà ya. 5 Məməta aka zla iye kamala màazaw ana a tsele akebe a ya. Məməta a giŋ magəɗa kamala duluv ana wakitwakit a ɓəzle a i dulwa ya. 6 Məməta aka lawara iye nda tsitsirɓe ŋgar. Ziwiɗ məməta aka gəs iye i sik a. 7 I huɗ mesewere are gà ata ya ka, Yàa zal aba a BATSAH kwa ŋa. Yàa tuwaha aba a Mbulum gà, nda ndzəɗa. Tuwa gà aka ɗe ahəraha aka təv mendze ŋgar. Aka tsara ka tuwa gà nda zlə̀m ŋgar. 8 I fata ya ka, gər ahəɗ fit a dzəba a meɓèzle akaba, gà zlile mbulum fit tàa ɓazla akaba, tàa dzàdzàr agəra matsəɓatsəɓ Mbulum. 9 Hədzək a hitsera i hitir ŋgar a, dite batsah akwa a dara i bazlam ŋgar a, nda aver ŋa a gise a ŋgarŋgar. 10 BATSAH kwa ŋa a pəl à gəza mbulum kamala məpəla à bwìtse ya, dite hulɓukw ziŋziŋ a tarəra à huɗ sik ŋgar a. 11 Ar mandza ŋa, ika sereben, a riŋ a sewiye a dər i himbiɗ pakar pakar. 12 Lùvùŋ a lawara ŋgat, kamala ana ar ka, i mekiriwe ga petek a. A le ba à hulɓùk ana a zəɓara, yam kàa medzere iɗəm a ziŋziŋ a. 13 Ika miɗ ŋgar ka, dzaydzay a riŋ a dəv hinne, zlir akwa a riŋ a mbiritsere a iɗəm a. 14 BATSAH kwa ŋa a fafəl i Mbulum nda biye ɗa ŋgələkəka kamala malaka mbulum a, i Mbulum i gər ŋa. 15 BATSAH kwa ŋa a ndaɓa gà sìmir ŋgar ka, gà ɓəzla mene are ŋgar tə gwitse aàba sweyèh ku mege ndaka tseke awara tserdze. A witiɗe ka, sweyèh tə təz fit. 16 BATSAH kwa ŋa a pala ahəm nda ndzəɗa. I huɗ matsəɓatsəɓ ŋgar ata ya ka, a pàt à mendislndisl duluv. Madzàha gər ahəɗ, a pàt aba kwandalàz. 17 Daga ara i gər ŋa ya, a dzakara ahər ŋgar a, a zla iye, a ŋgəlara à iye ika gər duluv ata ŋgwal ŋa tsiye. 18 A be à iye, i ahər mala mene are gà ana ndzəɗa ŋa hinne ya, dite ihər gà mburma ana ti niŋ are ya. Aɗaba tar ka, ti ze iye nda ndzəɗa. 19 A pàt ana iye i mesewere are ya, na gà ɓəzla mene are gà ta ŋgat a aà iye vatwa ya. Ama BATSAH kwa ŋa ilik na a dara a mezleke iye ya. 20 A be à iye ka, a viliŋ mendze barbarərra. A mbil à iye, aɗaba ana a waya iye ya. 21 BATSAH kwa ŋa aka viliŋ dukw mayaba gà, agəra ndzer gà. A viliŋ dukw mayaba ata ka, agər ana ahər gà aka ləm aà dukw bakal tsiye. 22 Aɗaba Yàa zàzàm vatwa BATSAH kwa ŋa lele. Yàa niw magəsa ahəm aà Mbulum gà ilik, dite ka, Yàa ger dukw ana ŋgwal ŋa tsiye tsa. 23 Gà məpala ahəm ŋgar fit ka, tar ika miɗ gà. Yàa sərək vatwa a gà dukw ŋgar ana a tsikeyiŋ a ilik tsa. 24 I sər ka, a mìŋ a à bakal ika miɗ ŋgar a tsa, dite ka, Yàa kasla ba aà mege dukw ana ŋgwal ŋa tsiye asa. 25 Asa ka, BATSAH kwa ŋa a viliŋ dukw mayaba gà, agəra ndzer gà. A viliŋ dukw mayaba ata ka, agəra ana ahər gà aka ləm aà dukw bakal i təv are ŋgar tsiye. 26 Nda təv wele ana ŋgat mala magəsa ahəm a ka, ki gise a her a ahəm mbaŋa. Nda təv wele ana a ge a dukw ŋgwal ŋa ya ka, ki gere a ŋgwal mbaŋa. 27 Nda wele ana tsəɗaŋŋa ya ka, ki pete aà mendze tsəɗaŋŋa yak mbaŋa. Ama wele ana a gik a dukw ana ŋgwal ŋa tsiye ka, ki sir a dukw ana ki ger a ya mbaŋa. 28 Ki mbele aà gà mburma ana tàa həna a gər a bəɗ a. Ama gà ɓəzla magə̀la à gər ka, ki nìkìɗe a à teriŋa. 29 Aɗaba kər BATSAH kwa ŋa, ka ne ka, lalàmpa gà. Dite kər BATSAH kwa ŋa ka, ki petiŋa à dzaydzay, i huɗ lùvùŋ ana iye mandza ŋa iɗəm a. 30 Aɗaba nda ahər yak na i sle a mege guvəl aà gà ɓèzla mene are gà ya. Nda ndzəɗa Mbulum gà ka, i sle a mendebe a ika zlagam kwite ya. 31 Mbulum ŋgat ka, mala meɗif a à dukw ana ŋgwal ŋa ya, dite asa ka,bazlam ŋgar tekeɗe ka, ndzer. BATSAH kwa ŋa a kèsle a, gà mburma ana ta kèhe a ba a təv ŋgar a, kamala zlakwa ya. 32 Weke dziye na Mbulum a, say na BATSAH kwa ŋa ilik tsiye? Weke na gurum kwa ya, say na Mbulum kwa ilik asa tsiye? 33 Mbulum ŋa ata na a kèsle a iye nda ndzəɗa ŋgar a. Ŋgat na a ɗifìŋ à ŋgwal vatwa ya. 34 Ŋgat na a viliŋ ndzəɗa aà mivele kamala biy miyak a. Ŋgat na a viliŋ ndzəɗa aà mehitse dzeŋŋè ika gər gà diyis a. 35 Ŋgat na a riŋ a tètiɗe a aà ahər gà aà mege guvəl a. dite ŋgat na a riŋ a zleke a iye aà mə̀ŋgəla à lìkiɗ virzegènè ya. 36 Mbulum ka, kamala slakwa ya, ki kèsle a iye, dite ki mbil a à iye ŋa, kə ŋgemewiŋ aka gà mezele gà, dite kà newa aà iye mala ndzəɗa. 37 Nda mezleke yak, na i mba aà mivele tsəmma bise ya, na dite Yàa ndif sik tsiye. 38 Yàa zàzàm gà ɓəzla mene are gà, Yàa dzeye a tar. Yàa mara a dəba ya, zè məbatsa tar tsa. 39 Yàa bats tar, Yàa hə̀nasla ya à tar. Dite ti sle a aà mehitse a aà mbulum asa tsa. Tàa dza a bəɗ aà huɗ sik gà. 40 Kàa rehiŋ a ndzəɗa aba aà mege guvəl. Gà mburma ana te ge a aà iye a guvəl a fit ka, kàa niŋ à tar gà ɓəzla medziŋ gurmits a bəɗ aka miɗ gà. 41 Kàa ge gà dukw ana gà ɓəzla mene are gà, ta mbeɗiŋ dəba, tə təz dər aà iye ya. Gà ɓəzla mene are gà ka, Yàa bats tar fit. 42 Ta pər, ika ba ya ka, wura a riŋ na a mbile a aà tar a tsa. Ta zal aba aà BATSAH kwa ŋa tekeɗe ka, a ŋgeme a a ter a aakara ɓav tsa. 43 Yàa hə̀naslaya aà tar, tàa ne kamala matirfeneh ahəɗ ana himbiɗ a ndzəkawa a gəza mbulum a. I garava aka tar kamala dwaɗwa ana ika vatwa ya. 44 Gà mayahaba gər gà mburma gà, ana ta hitse aà iye ya ka, ama kàa be aà iye i hər tar a. Kà tike iye aka miɗ gà gwala ŋgiɗ. Gà mburma ana i sər tar tsidze ya ka, tàa ne gà ɓəzla megiŋ meslire. 45 Gà slele, ta hiniwiŋ aà gər a bəɗ aà mibene iye. Tàa tsaraka mifefile gà ka, ta gəsawa aà iye ahəm bise tsara. 46 Gà slele ka, tàa haɓa aba à ahər, tə dayara i gà təv makaha ba tar a ka, nda gà medzedzere hinne. 47 I sər ka, BATSAH kwa ŋa a riŋ nda mesife, mezlibe mege ka, biy mala ndzəɗa gà ana, ŋgat gurum gà ya. Mbulum ŋgat batsah ŋa, ŋgat gurum gà, mala mimbile aà iye. 48 Mbulum ka, ŋgat na a pile iye aà gà ɓəzla mene are gà ya. ŋgat na a dziŋ gà mburma ahər gà ya. 49 Dite ŋgat na a be a à iye a ika magər gà ɓəzla mene are gà ya. Kàa ne à iye batsah ŋa aka gər gà mburma ana, ta hitse aà iye aà mege maàga ya. Kà be aà iye i təv gà mburma ana gà ŋgwal ŋa tsa, gà mburma ta ge a ter a magəɗa hìriɓiɓɓe hinne ya. 50 Aɗaba taŋa BATSAH kwa ŋa, i zembeɗe a à kər i liwiŋ gà mburma ana tar gà Yahuda tsiye, i leheke a dimis mazambaɗa à zləm yak. 51 BATSAH kwa ŋa a vəl batsah mege gara a Əbay ŋgar ana a zla ya. A pàt aà mawayàbà ŋgar a Dawda, dite a gà ɓəza gà ɓəza ŋgar aà biybiy.