2 Samiyel 23

Mandəvandəv mifefile Dawda

1 Araha na mandəvandəv gà mifefile Dawda kəla Yasa ana a wetse ya. Dzum zləm mifefile wele ana Mbulum a zla ŋgat a tike ŋgat aka miɗ gà mburma ya. Wele ana Mbulum Zakup a zla i gwala ŋgar, a ne dər Əbay ya. Tə sər ŋgat fit i Isərayel mbaŋa, ŋgat ka, wele ana a làhawa gà ŋgwal gà dimis ana a tsahənawa aà gà Isərayel hinne ya. 2 Mezite BATSAH kwa ŋa a fèfiliŋ i ba gà, dite bazlam ŋgar ika arah gà. 3 Mbulum gà Isərayel a gwa, mala makasla gà Isərayel a gwaɗiŋ: « Əbay ana a kwere gà mburma nda ndzer ŋa, dite a kive a tar a ka, nda magəsa ahəm à Mbulum. 4 Wele ata a ne ka, kamala dzaydzay mèkwède ya, Kamala pat ana a dive a i gəza mbulum hulɓukw ikə̀ka tsiye. Agəra avuk ŋgar ana a gewa ya, na gà duwa tə sləlawara i ahəɗ a, i dəba ana yam aka dza ya. 5 Kərga taŋa ya mbaŋa, na Mbulum a ge nda gà mburma ana i gwala gà ya: Aka gəs masla nda iye aà biybiy. A tike ahər gà məpala ahəm ana a kèsle a dər a. Gà mege gara gà, nda gà dukw ana gà ŋgwal ŋa i waya ya ana, wànà ŋgat tsiye na a ti rèhe à gà dukw ata fit tserdze ya? 6 Ama gà falay gà mburma ka, Mbulum aka dza tar a dala kamala gà ɓəza ahər dizl ɗaf ana adak ihər, ti yè a a dala ka, wura sle aà megìse a nda ahər tsiye. 7 Wele ana a waya maləma ahər a ka, say a zle a ka, nda dukw ana ta və̀ɗ biy ndzemde ya, kige tsa nda melìgwe, dite na a wene a fata ndirɓek fit a.

Gà ɓəzla ndzəɗa ana i təv Dawda a

8 Araha na, gà zləm gà mburma ana i təv Dawda, tar gà ɓəzla ndzəɗa ya. Yused-Basebet ana ŋgat gà Takumuniya, ŋgat ka, ika magər gà mburma ana tə zal a tar: « Gà ɓəzla slagama ata makər yam a dza à tar are tsiye, » ŋgat, mala aka miɗ tar. Tə zalawar mbaŋa ka, Adinu gà Esnetiya. Ŋgat na a bats gà mburma dərməka tsamakər i guvəl pat ŋa ilik a. 9 I dəba ŋgat a ka, Eliyazar kəla Dudu dite Dudu ka, kəla wele duwa i gwala gà Akukit. Ŋgat ika magər gà mburma ata makər a, gà ɓəzla guvəl tə zàzàmawa Dawda ika miɗ guvəl ana ta ge nda gà Filistiya ya. Gà asiŋ gà sliwdze gà Isərayel, tə təz aà tar a. 10 Ama Eliyazar, a ma aba arəv a bats gà Filistiya haa a yè ba, ahər a kùlar akaba kwits nda masalama ŋgar. A pat ata ka, BATSAH kwa ŋa a vəl batsah mege gara a gà Isərayel. Gà sliwdze tə mbəɗara gər a dəba a təv Eliyazar ka, aà məpala gà dukw ahər gà mburma ata ta bats a. 11 I dəba ŋgat a ka, Samma kəla Age gà Harariya. A pat duwa ka, gà Filistiya ti yaha ba gər a Lehi. I fata ka, guvah duwa a riŋ ayer iɗəm mege ba ŋa hinne. Dite gà sliwdze gà Isərayel ka, tàa təz ika miɗ gà Filistiya ya. 12 Ama Samma a dzə̀ ba a magər guvah ata. A dəgəz gà Filistiya a bats tar. kərga taŋa ya na, BATSAH kwa ŋa a vəl a tar batsah mege gara a gà Isərayel a. 13 A pat ŋgiɗ duwa, nda məpala gà duwa ŋa i bəɗ a ka, gà mburma makər, i liwiŋ gà ɓəzla aka miɗ gà mburma ana ta kwere a mburma ya, tə tarr, a bəra Dawda a sləlàk bise nda Adullam. Tsaatsa ka, gà mayahaba gər gà sliwdze gà Filistiya əŋgal tàa ge təv mandzəba tar i tulwah Rifayim. 14 Dawda ŋgat ka, i ga ana ta kaslawa ya. Akahər ata ka, təv mandzəba gà Filistiya a riŋ ika ahəɗ Betelehem. 15 Dawda a dzala gà gər tsara, a gwa: « weke na a de a, a tifiŋara yam mese i suwàh ana aà guva biye hərmaga mada a Betelehem a? » 16 I fata ya ka, gà ɓəzla ndzəɗa ata makər a, tə daha nda melelìkwe serèh sèreh serèh ndaka magər təv mandzəba gà Filistiya. Tə təfarra yam ata, i suwah ata aà guva biye hərmaga mada a Betelehem a. Tə dar dərra a Dawda a. Ama a waya mese tsa, a dza dər a bəɗ a BATSAH kwa ŋa kamala dukw taf a. 17 A gwa: « diydiy mege ba nda iye tsa na masa yam aaha ya BATSAH kwa ŋa. Ar kalkal məmbəz gà mburma ana tə da aaka, tə sewer are, tàa mendzeye a à mesife tar a . » A niw masa ŋa. Taŋa na dukw ana gà ɓəzla ndzəɗa ata makər ta ge ya. 18 Abisay damər Yuwab kəla Tsuriya ka, ŋgat na a ne mala aka miɗ gà ɓəzla ndzəɗa ata makər a mbaŋa . A bats gà mburma dərməka makər nda suwal ŋgar. kərga taŋa ya, na a ɗe zləm a. 19 Ŋgat na gà mburma tə sər zləm ŋgar ika magər gà mburma ata dzik makər a. Ŋgat na a ne mala aka miɗ tar a, ama kəla ka, ŋgat ika magər gà mburma ata makər a tsidze

20 Benaya gà Kabsel ka, kəla Yehuyada. Dite ŋgat, kəla kəla mala mege guvəl duwa slagama ŋa. Aka geye gà megemir ana gà ndzəɗa ŋa, wura a sle aà mege tsiye. Ŋgat na a bats gà slagama ŋa ata yam a dza tar a re tsa sula i Mu'Aviya ya. Ŋgat asa mbaŋa, na a tarr a suwah a pat duwa nda mətasl ŋa, a kəɗ iɗəm azil a. 21 Ŋgat mbaŋa asa, na a kəɗ gà Ezipt a duwa batsah ŋa, suwal ihər a. A da aakaha nda zəva, a kə̀zala suwal aà Ezipt ata ya, a kəɗ dər. 22 Araha na megemir Benaya kəla Yehuyada ya. Ŋgat mbaŋa ka, aka ŋgat meɗe zləm kamala gà mburma ata makər a. 23 Ŋgat ka, wele ana gà mburma tə sər ŋgat hinne ika magər gà mburma dzik makər ŋa aaha ya, ama ŋgat ka, aka ndza ika magər gà mburma makər ŋa aaha diydiy tsidze. Dawda a ne à ŋgat mala aka miɗ gà ɓəzla makasla ŋgat. 24 Ika magər gà mburma ana dzik makər a ka, Asayel damər Yuwab a riŋ iɗəm mbaŋa, nda gà asiŋ gà mburma ŋgiɗ aaha. Elanan kəla Dudu gà Betelehem, 25 Gà Samma nda Elika gà Hurudiya, 26 Heles gà Pelet, Ira kəla Ikes gà Tekuwa, 27 Abiyezer gà Anatut, Mebunay gà Husa, 28 Salmun gà Ahuwa, Maray gà Netufa, 29 Heleb kəla Bana gà Netufa, Itayay kəla Ribay gà Giveya, ŋgat mandza ŋa ika ahəɗ Bendzamen, 30 Benaya gà Piratun, Hidayi ana a dara i dulwa Gayas a, 31 Abiyalbun gà Bet-Arava, Azmavet gà Bahurim, 32 Eliyaba gà Salbun, ilik ika magər gà ɓəza Yasa a, Yunatan, 33 Samma gà Harar, Asiyam kəla sarar gà Harar, 34 Elifelet kəla Ahasbay kəla kəla wele duwa gà Maakiya, Eliyam kəla Ahitufel gà Gilu, 35 Hesray gà Karmel, Parray gà Arab, 36 Igal kəla Natan gà Suba, Beni ana i gwala gà Gad a, 37 Selek gà Ammuniya, Naray gà Berut ŋgat na a ndzəkawa dukw ahər Yuwab kəla Seruya ya, 38 Gà Ira nda Gareb tar gà gwala Yeter, 39 dite nda Uriya gà Hittiya. Tar fit ka, dzik makər gəra təsəla.