Dawda a hadzal gà sliwdze gà Isərayel
24
1 A pat duwa, BATSAH kwa ŋa a dzəba aà mege matsəɓatsəɓ aka gər gà Isərayel asa. A bana Dawda aà mege dukw ana a ge ter a ŋgulum tsiye, nda magwaɗar ka: « Daha ɗama gà Isərayel nda gà mburma gà Yahuda . » 2 I fata ya ka, Əbay a gwaɗa a Yuwab mala aka miɗ gà sliwdze ana ta riŋ nda gà ŋgat a: « Da ya a gà kwite ana i Isərayel a fit, daga i Dana ndisl a Ber-Seba, aɗaba i waya aà masəra ŋa, gà mburma ana ndaw a . » 3 Yuwab a gwaɗa a Əbay: « I waya ka, BATSAH kwa ŋa Mbulum yak, ma səkah à gà mburma maza na tar a riŋ a, sik dərməka. I waya na, kə ŋgatar nda are yak a. Ama aɗaba la na Əbay batsah gà ŋa, a waya maɗama gà mburma ata dze ya? » 4 Ama mifefile Əbay ata ka, a ne aka gà Yuwab nda gà ɓəzla aka miɗ gà sliwdze ka, dukw balaari. Gà Yuwab nda gà ɓəzla aka miɗ gà sliwdze ata ka, tə dara ika miɗ Əbay ya, tə da a maɗama gà Isərayel. 5 Tə tsala i dulwa Yurdan a, na dite tə dzəba aà maɗama gà mburma ana mandza ŋa i kwite Arur, nda gà mburma ana ika tulwah a. Tə tawaɗ ika ahəɗ Gad a, tə zla vatwa ana a da ndara a Yaazer a. 6 Tə daha aka ahəɗ Galaad, dite tə da aka ahəɗ gà Hittiya. I fata ya ka, tə da a kwite ana tə zalar Dan-Yan a, aha nda gà kwite ana ta mbeyeraha a kwite Sidun a, tə ɗamaya gà mburma ana i gà kwite ata ya fit. 7 Tə dara a batsah huɗ kwite ana malawaraŋa tits, zləm ŋa Tir a, a gà kwite ana tserdze i Hivviya ya, aha nda gà kwite ana ika ahəɗ Kananiya ya. I fata ya ka, tə nda gər ndaka tseke gular Yahuda, tə da a Beer-Seva. 8 I dəba ana tə ləma aka gà kwite ata tserdze ya, ta ge a riŋ ka, kiye tswiɗ nda mehinne dzik səla na dite ta màra a Yeruzalem a. 9 I dəba ŋa ya, Yuwab a ɗif à maɗama gà mburma ana tar mandza ŋa i huɗ kwite ya, à Əbay. Gà mburma ana mada a guvəl ide i Isərayel a ka, dəbuw dərməka tsamakər, dite gà mburma ana i Yahuda ya ka, tar dəbuw dərmə̀rka əzləm. 10 I dəba ana Dawda a ɗama aba mburma ya ka, arəv a da ihər a, a gwaɗa a BATSAH kwa ŋa: « Yàa ge batsah bakal nda maɗama gà mburma ata i ɗama tar a! Ama kinehe ka. BATSAH kwa ŋa peliŋ aà bakal ŋa, a iye mala meslire yak te, aɗaba i ge dukw ata ka, nda magazlavda ŋa. » 11 Dawda a hitse à Mbulum i mèkwède ka, BATSAH kwa ŋa aka mbər metsikeha bazlam ŋgar a mala məma aà guma ŋgar, Gad, a ŋgat ana mala maɗife a à metsehe a Dawda a. 12 A gwaɗar: « Da a təv Dawda, ka tsiker, araha na dukw ana BATSAH kwa ŋa a gwa ya: « Gà duwa makər i dzeke a aka miɗ, ki zle a iɗəm a ilik na i gike a ya . » 13 I fata ya ka, Gad a da a bəra Dawda, dite a màr à dukw ana Mbulum a gwaɗar daha tsiker a. I dəba ŋa ya a wiz ahər: Dukula na kà waya i gik ka, a gike a ŋgulum a? Wànà kà waya ana may mege i kwite yak mive təsəla ya? Tsəna wànà kà waya ana ki velewe a aà gà ɓəzla mene are yak, ana ti yehe a kər a, kiye makər a? Tsəna wànà dukw məməta meslesle duwa mege i kwite yak biy mehinne makər a? Dzala aaka gà gər, dite kà tsikiŋ dukw ana i ta me a dər a wele ana a slərra iye ya. 14 Dawda a gwaɗar aaka a Gad: « Iye ka, i batsah meswere are, kamkam ŋgulum i dəɗ ka, akahər BATSAH kwa ŋa, aɗaba ŋgat ka, mburma a ndzawar are tsehe hinne, na nda ana i dìɗ a ka, akahər mburma ya. 15 BATSAH kwa ŋa a slər batsah dukw məməta meslesle duwa aka gà Isərayel. Daga ara aà gər mèkwède ya, tsikw a pat ana a tike məpasla ahər ŋa ya. Daga ara i Dan a tsikw a kwite Ber-Seba. Gà mburma ta mata i kwite ka, dəbəw dzik tə̀sə̀la. 16 Gawla Mbulum a zla ahər ŋgar aka kwite Yeruzalem aà məbatsa gà mburma ata i fata ya. Ama BATSAH kwa ŋa a mbəɗ aà madzala gà gər ŋgiɗ, agəra dukw ata ŋgwal ŋa tsa a waya mege a tar a, a gwaɗa a gawla Mbulum məbatsa mburma ata, taŋa ka, a behe ide, kinehe ka, ma a ahər yak a bəɗ. Akahər ata, gawla Mbulum ata ka, a riŋ bise i təv tawar Arawna gà Yabusiya ana a gəzlawa aɗəm ble ya. 17 I dəba ana Dawda a ŋgat a gawla Mbulum ata a ndìve a mburma ya ka, Dawda a gwaɗa a BATSAH kwa ŋa: « Iye na i ge bakal a, kaɗəŋ ndzer ka, iye na i ge dukw ata ŋgwal ŋa tsiye, ama gà mayahaba gər gà mburma gà dzena ta ge ana əla tiye? Ana ki dzeye a à iɗəm ka, aà iye ya, nda gà mburma ana i gwala gà ya . » 18 A pat ŋa ata, na Gad a dara a təv Dawda a, a gwaɗar: « Tsəl, aka tawar Arawna ana a gə̀zlawa aɗəm ble ya, ka zlazl təv madula aaka gà dukw taf a BATSAH kwa ŋa . » 19 Dawda a tsəl a fata kamala ana Gad a tsiker a, kamala ana BATSAH kwa ŋa a vəlar ahər vatwa aà mege ya. 20 I fata ya Arawna a pər ika ba ya, a ŋgat a gà Əbay nda gà ɓəzla megemir ŋgar tar a riŋ, ti dehe a ndara a təv ŋgar. Tsam ka, Arawna a dara i təv magə̀zla ble ŋgar a, a dza gurmits a biye aka miɗ Əbay, luz gər a bəɗ. 21 Arawna a wiz a gwa: « Aàla na kər Əbay gà, batsah gà ŋa, kà dara a təv mala meslire yak a? » Dawda a gwaɗar aaka: « I dara ka, i waya masə̀kəma aà kər tawar yak aaha ya, dite i zlezle a aɗəm a təv madula aaka dukw taf a BATSAH kwa ŋa. Kamala taŋa ya, na batsah dukw məməta meslesle dukw ata, a ndele a à gà mburma ya . » 22 Arawna a gwaɗa a Dawda: « Batsah gà ŋa, Əbay gà, zla təv aaha biy taf, kamkam, dite ka vəla aaka duwa a BATSAH kwa ŋa kamala ana a dak a gər, a tsahə̀ŋ aà are yak a. Araha gà sla gà naha i dza dukw taf ŋa, a Mbulum. Gà zambal ana gà sla ta ŋgile a dər, ta gìzle a dər ble ya, nda gà zukw ŋa dze, ta ge a ŋgulum aà madula dər ŋa. 23 I fata ya, Arawna a gwa asa: « Iye Arawna, i dza gà dukw aha fit a ka, a kər Əbay ga. » I dəba ŋa ya, Arawna a gwaɗa a Əbay asa: « Gà gər a gwa BATSAH kwa ŋa Mbulum yak magəs dukw taf yak aaha . » 24 Ama Əbay a gwaɗa a Arawna: « Awaŋ tsidze, i sìkim a aà kər a ka, nda siŋgwe ana dayday a da dərra. I vile a a BATSAH kwa ŋa Mbulum gà ka, gənaw ana ta viliŋ biy taf masakəŋa, na dite i dùlar a ya tsa. Dawda a səkəm tawar ata nda gà sla ata ka, nda kur siŋgwe dzik əzləm. 25 Dawda a zlazl təv ana tə dùlawa aaka dukw taf a BATSAH kwa ŋa ka, a fata. A dùla ya aaka gà dukw taf a Mbulum, dite nda makəɗar dukw ana a sər ba, aà gà mburma nda Mbulum a. BATSAH kwa ŋa a pàt à mege ŋgwal ŋgar a gà mburma ana ika ahəɗ gà Isərayel a, dite na batsah dukw məməta meslesle dukw ata a ndala ika ahəɗ gà Isərayel a.