1 Samiyel 31

Məməta gà Sul nda gà ɓəza ŋgar

1 Gà Filistiya ta ge guvəl aà gà Isərayel. Gà mburma gà Isərayel tə taz aà gà Filistiya ya, bagwal ŋa tàa mata ika gər kwite Gilbuwa. 2 Gà Filistiya tə dzəba aà malewara a gà Sul nda gà ɓəza ŋgar tits, te ŋgìɗitse a tar. Ta bats makər i liwiŋ gà ɓəza ŋgar a. Gà Zunatan, Abinadab, nda Malikisuwa. 3 Batsah guvəl na ika miɗ Sul a. Gà ɓəzla sìmir tə lewara a təv ana akah aɗəm ba ya tits. A dzeba aà mege magəɗa ika miɗ tar i fata. 4 Sul a gwaɗa a wele ana a dzə̀kara dukw ahər ŋgar a: « Zla masalama kà kəɗ dər iye, aɗaba i waya tsa na gà mburma aaha tar gà masasaŋa tsa ta kiɗe iye ya, ti ne a iye a bakal a. » Ama mala mandzekar dukw ahər a niw, aɗaba magəɗa a ger hinne. I fata ya ka, Sul a zla masalama ŋgar, kə̀v a kəɗ dər ba. 5 Wele ana a ndzekara dukw ahər a pər ka, aka mət ka, ŋgat mbaŋa a zla masalama a kəɗ dər ba. 6 kərga taŋa ya na gà Sul ta mata akaba nda gà ɓəza ŋgar ata makər, aaha wele ana a ndzekawar dukw ahər a, nda gà sliwdze ŋgar, ahər ŋa ilik, a pat ŋa ata ya. 7 Gà asiŋ gà Isərayel ana tar mandza ŋa ika tseke lide tùlwah ŋgiɗ a nda gà na ika tseke gigize dulwa Yurdan a ka, ta pər gà Isərayel riŋ ti tize a dite asa ka, gà Sul nda gà ɓəza ŋgar ka, tàa mata, ta məsak à kwite tar tə taz aba. Gà Filistiya tə daha tə ndza ba a kwite ŋa. 8 Ndidwe ŋa gà Filistiya tə daha aà məpala gà dukw gà mburma ata ta mata ya ka, ti le a məməta Sul nda gà ɓəza ŋgar zàmbàlàhha i gər kwite Gilbuwa. 9 Tə sas gər Sul, tə ndzèk gà dukw ahər ŋgar, dite tə da meɗifeye dər aà gà dukw ata i gà kwite ana i Filistiya ya fit. kərga taŋa ya ta maya à labara ŋa ndisl a ga kwile tar, a gà mburma fit a. 10 Tə dza gà dukw ahər Sul ka, à ga ana Astarte, kwile tar iɗəm a, ti ndiwìɗe gà məməta tar ka, aà zlagam Bet-Seyaŋ. 11 I təv ana gà mburma Yabes ana ika ahəɗ Galaad a tə tsaraka dukw ana gà Filistiya te ge a à Sul a ka, 12 Gà ɓəzla ndzəɗa te hitse a mbulum ika magər tar a, hiyup ta həna ika mede, ta palayara gà məməta Sul nda gà ɓəza ŋgar aà zlagam Bet-Seyaŋ ata ya. Dite ta mbəɗara gər a Yabes a, tə dùlaya a fata. 13 Ta faɗaya gà məmbeter atasl tar, ti leye aà huɗ dizl ɗaf duwa tə zalawar tamaris i Yabes. I dəba ŋa ya te ge ndəra mahinne təsə̀la.