1 Samiyel 30

Gà Elimelek tə zəm kwite Tsiklak

1 I dəba mahinne sula ya ka, gà Dawda nda gà mburma ŋgar ta mbəɗ gər a ma a Tsiklak. Tə daha ka, gà Elimelek tàa mbər mege guvəl aà gà mburma ana ika tseke gular Yahuda ya, tàa dùŋ gà mburma ana i Tsiklak a, dite tàa dzaya akwa aà gà ga tar ŋa. 2 Tàa ndzàka a tar gà məkəs tar aà ɓele ya, nda gà na tə zeha a ama ya fit kweleŋ. Ama tàa kəɗ wura ilik tsa. Ta gasa tar ka, megese pəra, tə da a tar. 3 Gà Dawda nda gà mburma ŋgar tə ndzeha a Tsiklak a, araha ka, tàa wànà kwite tar. Tàa gasaya gà məkəs tar nda gà ɓəza tar aà ɓele. 4 I fata ya ka, gà Dawda nda gà mburma ana tar aka ba ya, tə dza aka ba a tuwa hinne ɓuhhwa haa ndzəɗa a ndəv a tar a à tuwa ya. 5 Tàa gasa gà məkəs Dawda ata sula ya, gà Ahinuwam dəm gà Yizereyel nda Abigayel dəm gà Karmel ana zal ŋgar Nabal a mət ihər a 6 Dawda ka i batsah masle duwa, aɗaba ana gà mburma te geye aka makalawa ŋgat a. Aɗaba ku mege weke riŋ i mesle duwa. Ku mege weke riŋ i matsəɓatsəɓ agəra gà ɓəza ŋgar. Ama Dawda a mà aba arəv a dzala a təv BATSAH kwa ŋa, Mbulum ŋgar. 7 A gwaɗa a mala məbatsa duwa a Mbulum Abiyatar kəla Ahimalek. Dziŋ ara gà Efud nda dukw ana iɗəm gà mburma tə zalawa dər aba a Mbulum a. Abiyatar a ndzə̀kar ara a Dawda a. 8 I fata ya ka, Dawda a wiz aà BATSAH kwa ŋa a gwaɗar: « Na i zàzàm gà mburma ata dzena i le a tar a ya? » BATSAH kwa ŋa a gwaɗar: « Zazam tar ki le a à tar a ndzer dite ka, ki bera à gà ma yak a. » 9 Gà Dawda nda gà mburma ŋgar ata dərməka ndilik (600) a ti ndze a dulwa Bezùr ka, 10 i fata ya ka, gà mburma dərməka sula (200) ka, tàa yayaba. Ti sle a à metsile a i dulwa ata ya tsa. Ti ndza i fata. Gà Dawda tə da nda gà asiŋ a aaha tar dərməka faɗ (400) a. 11 Ti ndze a kusak ka, tàa le a kəla gà Ezipt duwa, tə da dərra a təv Dawda a, ta vəlar yam nda dukw mezime. 12 Tə dzàɗar aaka gà mawà figiye ana makula ŋa ya nda tapa mawà viŋye ana makula ŋa ya sula. I dəba ana a zəm aba ya ka, a mà rə̀v, aɗaba ana aka sa yam tsa, aka zəm ɗaf tsa, daga gà həpat makər gà həvəɗ makər a. 13 Dawda a gwaɗar: kər ana kəla weke? Kər dzena gà la? Kəla ata a gwaɗar: « Iye ka, kəla gà Ezipt, ɓele Elimelekiya duwa, aka ndza kinehe ka, mahinne makər, batsah ga ŋa a məsak à iye, aɗaba ana iye ŋgwal ŋa tsiye. 14 Mər na a ge guvəl aà gà na ika tseke gular gà Kiritiya ya, ika ahəɗ Yahuda ya, nda gà mburma ana ika tseke gular Kalep a, dite mi tike akwa à kwite Tsiklak. » 15 Dawda a gwaɗar: « Wànà ki sle a à meleke a iye à təv mayahaba gər gà mburma ata i bam a? » Kəla ata a gwaɗar aaka, « mbaɗiŋ nda zləm Mbulum na ki kiɗe iye tsiye? Dite ki məsake a iye ahər batsah ga ŋa tsiye? Dite na i leke a kər a təv gà mburma ata ya. »

Dawda a mba aà gà Elimelekiya

16 kərga taŋa ya, a laka tar, tə daha ka, gà Elimelekiya tàa dzaya ba gà vatwa aka ahəɗ ata, ku weke riŋ a zime a dukw mezime, riŋ a se a dukw mese, ku weke i maŋgayaba, i megirive agəra batsah gà dukw ata tə ndzèk aaha aà gà mburma ana i Filistiya nda gà i Yahuda ya. 17 Dawda a bats tar daga à mekwede ya ndisl a hawa. Wura ilik aka be tsa, say gà ɓəza gawla ana dərməka faɗ (400) tə tsalaya aka zlìgwèmè, tə tazaya ya. 18 Dawda a maya aà gà dukw tar ana gà Elimelekiya ti ndzàkaya a tar a, ndeyndey ŋa a beye a gà məkəs ŋgar ata sula ya. 19 Wura ilik aka zeha tsa ku mege kəla ndirkiz, ku mege batsah mburma, ku mege kəla tar asləka ŋa, ku gà dəm tar tekeɗe ya, ku gà limana tar, ku duwa kuzikw tekeɗe aka zeha tsa. Dawda a maya dər aaha fit aà gà dukw ana gà Elimelekiya tə ndzək a. 20 Dawda a ndzək gà awak, gà təmaŋ, sla nda gà limana tar. Gà mburma ana ta kəvawa dagara gənaw ata ya ta gwa: « Araha limana Dawda ana a ndzəkara ya. » 21 Dawda a ndze a təv gà mburma ata dərməka sula ti yayaba ndeɗiŋe aà màzàzàma ŋgat, ta məsak a tar i dulwa Bezùr a. Tə dara aà maləma aka ba, nda gà Dawda dite aaha gà mburma ana tar aka ba ya. Gà Dawda nda gà mburma ata tar aka ba ya tə sərkàha à təv tar, ta ge tar wusa. 22 Gà mburma ana gà ŋgwal ŋa tsiye, nda gà welèwelè gà mburma riŋ i liwiŋ gà mburma ata tə da akaba nda gà Dawda a. Tə dzəba aà magwaɗaya ka: « kàa takwa a guvəl nda gà tar tsəka, ta ŋgete a limana i dukw ana ka ndzekara ya tsa. Makwa tar ɗekɗek ka, aà gà məkəs tar nda gà ɓəza tar, tə ndzèk tar tə da. » 23 Ama Dawda a gwaɗa a tar: « Gà damər ga kə gwim kataya tsa, na à dukw ana BATSAH kwa ŋa a vəl a kwa ya. Aka kasla kwa, aka Dzawa mayaha gər gà mburma ata tə daha aka kwa ya ahər. 24 Wekè na a waya medzibe dukw ata kà dzalum aà mege ya? Dukw wele ana a da a guvəl a ka, kalkal nda biy wele ana a kasla ɗa gà kazlaŋa kwa ya. Ti dza a ba ka kalkal . » 25 Daga aà pat ŋa ata ya, ndisl à mbakum i Isərayel ka, Dawda aka ne dər məpala ahəm tə zàzàmawà hiywe. 26 I təv ana Dawda a mbəɗ aaha gər à Tsiklak a ka, Dawda a sasayaha gà dukw ata à gà mandawal gà mburma ana i Yahuda, tar gà masla ŋgar a nda magwaɗe tar aaha: « dukw taf kurum naha mbaŋa na ika gər gà limana ana mìi ndzəkara aà gà ɓəzla mene are BATSAH kwa ŋa ya. » 27 A dzaya kamala taŋa ya mbaŋa a gà mandawal gà mburma ana tar gà masla ŋgar i Betel a, a gà mandawal gà mburma ana tar gà masla ŋgar ika tseke gular Rama, a gà na i Yattir a, 28 a gà na i Arur a, a gà na i Sifmut a, a gà na i Estemuwa ya, 29 a gà na i Rakal a, a gà na i kwite Yaramaliya ya, a gà na i kwite Kiniya ya 30 a gà na i Hurma ya, a gà na i Bur-asay a, a gà na i Atak a, 31 a gà na i Hevrun a nda gà bàba gà mburma ana i gà təv ana tserdze gà Dawda nda gà mburma ŋgar tàa da ya a ɗəm a fit.