Gà Filistiya tə dalawa aba Dawda a
29
1 Gà Filistiya ti yaha gər a gà sliwdze tar ka, a Afek. Gà Isərayel tekeɗe təv mandzəba tar ka, bise nda biye yam ana a ŋgizera i Yizereyel a. 2 Gà Əbay gà Filistiya tə da aka miɗ nda gà sliwdze tar, gà asiŋ a dərməka (100), gà asiŋ a dəbuw (1000). Gà Dawda nda gà mburma ŋgar tə daha i dəba ya, tar nda gà Əbay Akis. 3 Gà na ta kwere gà sliwdze gà Filistiya ya ta gwa: « Gà Ibəranikwa aaha ana ta ge a la, na i faha ya? » Akis a gwaɗa a tar: « Naha ka, Dawda mala meslire Sul Əbay gà Isərayel, ar ɗa i təv ga ka, daga mive nda duwa. Duwa riŋ na Yàa ŋgatar i təv ŋgar a tsa, na i vəlar a bakal daga madara ŋgar a, haa mbakum a. » 4 Matsəɓatsəɓ a zlara a gà na ta kwere gà sliwdze gà Filistiya ya nda təv Akis, ta gwaɗar: « Dəgəz ŋgat mə mbəɗ gər a təv ana ka vəlar a. Mada à guvəl nda gà kwa tsa. Ma ta mbəɗ a kwa ala i guvəl tsa. Meme na wele ata a ŋgete ŋgwal a i təv batsah ŋgar ŋa ya, na nda màdar aaha à gər gà mburma kwa ya tsiye? 5 Wànà Dawda aaha tsiye na gà məkəs tə lahawa dər dimis nda megirive ka, ta gwaɗawa: Sul a bats gà ɓəzla mene are ŋgar dəbuw ama Dawda ka, dəbuw kurwa ya? » 6 Akis a zal a Dawda a gwaɗar: « Kər ka, mala ndzer, BATSAH kwa ŋa riŋ nda are, i waya zləmana na ki tewekwa akaba à guvəl nda gà sliwdze yak a fit. Aɗaba Yàa le a bakal i mendze yak tsa, na daga madara yak a haa mbakum a. Ama gà Əbay gà Filistiya na ta waya kər tsiye. 7 Kinehe ka, mbəɗ gər a ma nda zay dite ka, ki ge dukw ana ŋgwal ŋa tsiye, à gà Əbay gà sliwdze gà Filistiya dite ka, matsəɓ a tar a tsa 8 Dawda a gwaɗa a Akis, Dukula na i ge dziye? Dukula na ka le ahər i təv ga ŋgwal ŋa tsa, daga à gər ana i dara ya haa mbakum a, na dite ka, i de a guvəl aà gà ɓəzla mene are yak a tsiye? » 9 Akis a gwaɗa a Dawda: « I sər ka, kàa ge duwa tsa, i waya kər kamala ana i waya gawla Mbulum a. Ama gà Əbay gà sliwdze gà Filistiya na ta gwa ka, a de a guvəl nda gà kwa tsiye. 10 Kinehe ka, i mèkwède ka, hitse a mbulum, kurum nda gà mburma yak ana tə zàzàmara kər a. Aɗaba taŋa, hitsùm i mekwede hedwe ka dùm aka pat ana a mbizera ya. » 11 I mèkwède hedwe ələk pat a mbizera ka, gà Dawda nda gà mburma ŋgar ta mbəɗ gər a kwite gà Filistiya. Gà Filistiya tekeɗe tə da a Yizereyel.