1 Samiyel 28

1 Akahər ata ka, gà Filistiya tə yaha gər a gà sliwdze tar a təv ilik ŋa, aà mede mege guvəl aà gà Isərayel. Akis a gwaɗa a Dawda, ka sər ndzer tsiye na ki tekwa akaba à guvəl, kər nda gà mburma yak mbaŋa ya. 2 Dawda a gwaɗar aaka à Akis, aɗaba taŋa ki sər a dukw ana mala meslire yak a ge ya, Akis a gwaɗa a Dawda, aɗaba taŋa asa ka, i ne a à kər a mala makasla iye à biybiy.

Dawda a da à təv məkəs duwa mahə̀ram ŋa i Ayni-dur

3 Samiyel ka, aka mbər mimə̀te, dite gà Isərayel fit ka, ta le ŋgat dite tàa mbər məwiɗehe aba ŋgat i kwite ŋgar i Rama ya. Sul tekeɗe aka mbər madigize aba i kwite ŋgar a, gà ɓəzla metike yam a nda gà na ti tsikawa dukw ana a ta ge a ba aka miɗ a. 4 Pat ŋgiɗ duwa ka, gà Filistiya ti yaha gər a gà sliwdze tar à Sunem. Sul a yaha gər à gà Isərayel fit a təv màŋgwaɓà i Gilbuwa 5 I təv ana Sul a ŋgataha a təv màŋgwaɓà gà Filistiya ya ka, a ge magəɗa a dzàrdzàr 6 Sul a zal aba a BATSAH kwa ŋa, ama BATSAH kwa ŋa aka fafəlar aaka tsa. Ku mege i sunwa, ku nda Urim^ª, ku mege nda ahər gà ɓəzla məma guma Mbulum a. 7 Sul a gwaɗa à gà ɓəzla meslire ŋgar, yahumiŋ məkəs ana a tikawa yam a, aà i de a təv ŋgar aà mazlak iye te. Gà ɓəzla meslire ŋgar ta gwaɗar, məkəs ana a tikawa yam a ka, riŋ ilik i Ayne-dur. 8 Sul a dza aka ba gà petek ŋgiɗ pam aà gà mburma tə sər ŋgat tsa. Tə da aka ba nda gà mburma sula. Ti ndze à bəra məkəs ata ka, ndaavəɗ. Sul a gwaɗa a məkəs ata: « Giŋ mahə̀ram, tikin yam, zaliŋ ara à wele ana i tsikika ya te. » 9 Məkəs ata a gwaɗar: « Ka sər, kər mbaŋa dukw ana Sul a ge ya. Meme na a dəgəz gà ɓəzla metike yam nda gà ɓəzla matsika dukw ana a te ge a ba aka miɗ mba ya fit i kwite ŋgar a. Aàmala na ki ŋge ɓele à mandza à bəra ga, ta kiɗe a iye ya? » 10 Sul a mbaɗar nda zləm BATSAH kwa ŋa a gwaɗar: « BATSAH kwa ŋa riŋ nda are duwa a geka ba gər tsa. » 11 Məkəs ata a gwa: « Ka waya ana weke na i zalakar a ya? » Sul a gwaɗar: « Zaliŋ ara à Samiyel a. » 12 I təv ana məkəs ata a ŋgat a Samiyel a ka, a ge a aba batsah zlazlà. A gwaɗa a Sul: « Aàmala na ka pasiŋ za tsaatsa kər ka, Sul a? » 13 Əbay a gwaɗar: « Kə ge magəɗa tsa, Dukula na kə ŋgatar a? » Məkəs ata a gwaɗa a Sul: « I ŋgat a mezite məməta a dara i huɗ biye ya . » 14 Sul a gwaɗar: « A pàt ana meme? » Məkəs ata a gwaɗar: « mandawal mburma na a dara ya, ar mandiwiɗe ŋa nda tumbulum . » Sul a sər ka, taŋa ka, Samiyel, luz a ye gər a bəɗ, a dza gurmits a biye. 15 Samiyel a gwaɗa a Sul: « Aàmala na ka zaliŋ ka wisiŋ ara a gər ika masifekaba ga ya ya? » Sul a gwaɗar aaka: « Iye ka, i batsah mesle duwa, aɗaba gà Filistiya riŋ te ge a iye a guvəl, Mbulum tekeɗe aka məsak à iye, aka fafiliŋ ara ɓav tsa, ku mege nda ahər gà ɓəzla məma à guma Mbulum a, ku mege nda sunwa ya. Agəra taŋa na i zalak a, tsikiŋ dukw ana i ge a ya. 16 Samiyel a gwaɗar: « Aàmala na kà zaliŋ a, ka sər tsiye ka, BATSAH kwa ŋa aka mbə̀ɗak dəba aka ne mala mene are yak a. 17 BATSAH kwa ŋa a ge a dukw ana i tsikik, a te ge a nda kər a kuɗa. BATSAH kwa ŋa aka zlà mazlə̀ɓ ŋgar, aka vəl à misle ŋgiɗ pam, a Dawda. 18 Aɗaba kàa gəs ahəm aà BATSAH kwa ŋa tsa, na kà niw medzeye a à gà Elimelek fit a, agəra taŋa na mesewere are riŋ nda kər mbakum a. 19 BATSAH kwa ŋa a dze a kurum à ahər gà Filistiya, kər nda gà Isərayel, ndidwe ka, ki lwìm ara à iye à təv mendze gà məməta ya, kurum nda gà ɓəza yak. BATSAH kwa ŋa a dze a gà Isərayel ahər gà Filistiya. » 20 Mifefile Samiyel ata ka a dza magəɗa à Sul i fata ya ka, gùzlàɓ a dəɗ a bəɗ, ndeyndey ŋa asa ka, a vak, hiyup a hənaha aka zəm duwa tsa, ndzəɗa i hər tsa. 21 Məkəs ata a daha a təv Sul ata i magəɗa ya, a gwaɗar: « Yàa gəs dukw ana ka tsikiŋ a, Yàa medzeye a à mesife ga aà mege dukw ana ka tsekiŋ a. 22 Kinehe ka, tsarakiŋ dər tə, nà kər mbaŋa ya, iye ka, mala meslire yak. I dzekara ɗaf a kà zəm, kə ŋgat ndzəɗa aà mbə̀ɗa gər à ma. » 23 Sul a gwaɗar aaka, awaŋ i zime a duwa tsa. Ama gà ɓəzla megemir ŋgar ata, nda məkəs ata ta hamar, mandəvandəv ŋa ka, a gəs bazlam tar ata, a zəm dukw mezime. A hitse ika ahəɗ a, tuŋ a ndza aka zlə̀lah. 24 Məkəs ata ka, sla ŋgar riŋ a gəl i meɗekwir mehinne ŋgar. Tsəmma tsara ka, a kəɗ, a ndzekara gufa ble ya, aka nda aaka giɗe tsa, a həlab, a de peŋ a. 25 Məkəs ata a dza gà dukw mezime ata aka miɗ Sul, nda gà ɓəzla meslire ŋgar ata. Tə zəm. Ta mah ba ta mbəɗ gər a ma i huɗ həvəɗ ŋa ata ya.