Dawda a kah ba i bəra Akis Əbay gà Filistiya
27
1 Dawda a zlaŋa a gwa: « Pat ŋgiɗ ka i dzeye nda ahər Sul. Duwa ŋgiɗ riŋ na i geye tsa say na i vele ba à kwite gà Filistiya ya ilik pəra, dite ka, Sul a məsake a a mayaha iye i kwite Isərayel a fit. kərga taŋa ya na i be a à biybiy i hər ŋgar a. » 2 Dawda a hitse a da, ŋgat nda gà mburma dərməka ndilik (600) ŋa ata tar aka ba ya. Tə da a bəra Akis kəla Maʼuk Əbay gà Gat 3 Dawda a ndza i bəra Akis i Gat, tar nda gà mburma ŋgar ata, ku mege weke nda gà mà ŋgar. Dawda ka, nda gà məkəs sula, Ahinuwam dəm gà Yizereyel nda Abigayel dəm gà Karmel madakwa məkəs ana zal ŋgar Nabal a mət a. 4 Sul a tsarka ka, Dawda aka valaba a makaha ba à Gat ka, a məsak aà màzàzàma ŋgat. 5 Pat ŋgiɗ duwa ka, Dawda a gwaɗa a Akis i gək kamkam, na ka waya məpetiŋ aà ŋgwal yak ka, viliŋ təv mendze i liwiŋ gà kwite yak aaka i dala ya i ndìzle a aɗəm a te. Aàmala na mala meslire yak ti ndze aka ba nda Əbay i huɗ kəsà ŋgar i təv ilik ŋa ya? 6 A pat ŋa ata na Akis a vəlar kwite ana tə zalar Tsiklak a. Aɗaba taŋa Tsiklak ka ar ika mekwere gà Əbay gà Yahuda ndisl a pat ŋa ata. 7 Dawda a ndza i kwite gà Filistiya ka, mive nda kiye faɗ. 8 Gà Dawda nda gà mburma ŋgar gà asləka ŋana ka, tə dawa à mege guvəl aà gà mburma ana i Gesuriya, i Girziya nda gà i Elimelekiya ya. Gà kwite ata ka, sər aka Sur ndisl aka kwiye Ezipt. Aɗaba gà mburma ata ka, tar mandza ŋa i fata daga piŋŋa dukw ŋgar. 9 Dawda a bats gà mburma ata aka məsak à wura ilik tsa, daga gà asləka, gà məkəs fit. A ndzəkawara tar gà gənaw tar a, awak, təmaŋ, sla, hezweŋe nda gà zlìgwèmè kige tsa asa nda gà petek tar a. Ta mawàra i guvəl a ka, tə dawa nda bəra Akis hiywe. 10 I fata ya ka, Akis a wizawa ahər: « Kə gwim guvəl mbakum ana nda gà la? » Dawda a gwaɗawar aaka: « Mi ge guvəl ka, nda gà kwite ana ika tseke gular Yahuda ya, kige tsa nda gà mburma ana ika tseke gular kwite Yaramaliya ya, kige tsa nda gà mburma ana ika tseke gular Kiniya ya. » 11 Dawda aka məsak a wura ilik nda mesife tsa, ku mege asləka ŋa, kige tsa məkəs ŋa aà mede dər a Gat a. Dawda a zlaŋa a gwa: « biytsa a te me a à dukw aaha, a gweɗe a, araha na dukw ana Dawda a ge ya. » kərga taŋa ya na Dawda a ge dər i huɗ mendzena a ndza riŋ ika ahəɗ Filistiya ya. 12 Akis a tike Dawda aà mala ndzer, a zlaŋa a gwa: « Dawda ka, matika ba ŋgar ŋgwal ŋa tsa na i Isərayel ika magər gà mburma ŋgar a, ta waya tsiye, te ge ahir a matsəɓatsəɓ a. A gewiŋa megemir ana i tsikawere ya à biybiy.