Dawda a məsak a Sul sik ilik asa
26
1 Gà Zifiya ta mbəɗ gər a təv Sul a Giveya asa, Ta gwaɗar: « Dawda makaha ba ŋa ka, ika gər kwite Hakila bise nda kusak. » 2 Sul a hitse a da a dala a kusak Zif nda gà sliedzena gà ndzəɗa ŋa dəbuw makər (3000) ata a pala i liwiŋ gà Isərayel aà mata yahara Dawda i dala i kusak Zif a. 3 Maŋgwaɓà ŋgar ka, ika gər kwite Hakila bise nda kusak aà guva vatwa. Dawda a ndza ka i dala, a tsaraka ka, Sul riŋ a zàzàmeha ŋgat hiywe pəra. 4 Dawda a slər gà mburma nda metsehe aà tə da pərra Sul a nda təv mendze ŋgar ŋa ya ndze. 5 I fata ya ka, Dawda a hitse a da à təv ana Sul a dza aɗəm màŋgwaɓà ya. A ŋgat à təv ana Sul a hənawa iɗəm a. Dite asa biy Abiner kəla Ner ana mala aka miɗ gà sliwdze ŋgar a mbaŋa. Sul mahəna ŋa ika magər gà mburma ŋgar, gà mburma ŋgar tekeɗe, ti ler tits. 6 Dawda a zal a Ahimalek gà Hittiya nda Abisay kəla Tsuriya damər Yu'ab məkəs ŋana. A gwaɗa a tar: « Weke na a de a nda ga iye à təv màŋgwaɓà Sul a? » Abisay a gwaɗar iye naha ki teme aka ba ŋa. 7 Gà Dawda nda Abisay ti da aka ba məma a təv màŋgwaɓà ata. Ta pər ka Sul riŋ mahəna ŋandaàvə̀t ŋa ata ika mendze are ika magər gà mburma ŋgar i təv màŋgwaɓà ata, dzə̀kka suwal ŋgar aà gər. Gà Abiner nda gà mburma ti ler tits, tar ika mendze are. 8 Abisay a gwaɗa a Dawda: « Mbulum aka vəlak mala mene are yak ahər mbakum. Viliŋ vatwa i yara suwal sik ilik, ndzenak i gewa aba nda ahəɗ tsəka, i yar a sik sula tsa. 9 Ama Dawda a gwaɗa a Abisay kə kəɗ tsa, weke na a sle aà mese mesewere are ŋa ya na kə̀ɗe a wele ana BATSAH kwa ŋa a zla ya? 10 BATSAH kwa ŋa riŋ nda are, say ŋgat ilik na a kiɗe a ya, kige tsa ahər mendzeye ŋgar a dzeriŋa a mitiŋ a, kige tsa asa a de a guvəl ta kə̀ɗere a ika miɗ guvəl a. 11 BATSAH kwa ŋa makasla iye aà maləma à wele ana ŋgat a zla ya, zlàmà ka, suwal ana aà gər ŋgar a pəra nda dis yam ŋgar a ka, dite ka tama ba. 12 Dawda a zlà dis yam ŋgar ata nda suwal ŋgar ata aà gər ŋgar a, dite tə da. Wura aka ŋgat a tar tsa, wura aka sər təv tar tsa asa mbaŋa. Wura ilik aka piɗeke tsa. Aɗaba tàa dzaya aaka mendze are fit. BATSAH kwa ŋa a vəl a tar batsah mendze are fit. 13 Dawda a da ndaka tseke ŋgiɗ a hitse aka gər kwite diriŋ aà təv màŋgwaɓà Sul. 14 Dawda a wideya aaha ser aka gà sliwdze, a zal a Abiner kəla Ner. « Abiner fafiliŋ ara kwaŋ. » Abiner a gwa: « weke dziye na a wise a gər a Əbay nda məwideya duwa ya? » 15 Dawda a gwaɗar, kər ana gawla ŋa tsiye? Kataya tsiye? Ŋgwal sliwdze riŋ ika ahəɗ Isərayel kamala kər a ya? Na kataya ana agərla na kə kasla Əbay batsah yak ŋa tsiye? Nà wura a daha aà makəɗa ŋgat a ka, kàa sər ahər tsiye? 16 Dukw ana kə ge ya ka, ŋgwal ŋa tsa, nda zləm BATSAH kwa ŋana riŋ nda are ya ka. Taŋa ka, a da dər makəɗa ahər kurum ide na kə kaslum batsah kurum ŋa, wele ana BATSAH kwa ŋa a zla ya a ne dər Əbay ŋgar a tsiye? Pər kwaŋ gà suwal nda dis yam Əbay ana aà gər a ana i ŋga? 17 Sul a sər ka, biye ɗa Dawda na taŋa ya a gwa: « Kəla ga Dawda, kər a na ki fafile ya? » Dawda a gwa: « biye ɗa ga batsah ga ŋa, Əbay ga. 18 Agərla dziye na Əbay a zezeme a mala meslire ŋgar a? Dukula dziye na i ge ya? Bakal wara na i ge ya? 19 Əbay ga i gək kamkam, tsaraka dukw ana i waya matsikik a. Na BATSAH kwa ŋa na a gwaɗak ge aà iye kamala taŋa ya ka, magəs dukw taf ana i dùlar aaha ya nda maŋgayaba ŋa. Ama na bəla gà mburma taf masakəŋa, na ti digə̀zà iye mbakum ta viliŋ vatwa i ndze a i liwiŋ gà mburma ga i kwite ana BATSAH kwa ŋa a dza ahər gà mburma ŋgar a, kamala ana ta gwaɗiŋ ka, da ka zambàɗa aà gà mbulum ŋgiɗ a. 20 Aʼah! i waya tsa na məmbəz ga a ti dze a aka ahəɗ diriŋ ika are BATSAH kwa ŋa ya tsa. Aɗaba ana Əbay gà Isərayel a da à màzàzàma dakwele aà mege aà ŋgat guvəl kamala gà mburma ana tə digə̀zàwa takuràh aà kwite ya. 21 Sul a gwa « Yàa ge bakal, marà kəla ga Dawda, aɗaba i gək a à dukw ana ŋgwal ŋa tsiye asa tsidze. Aɗaba mandza aà bəra ga ka, kà pər ahər ŋgwal ŋa ika miɗ yak mbakum, ka waya ka, i ndza à bəra. Yàa ge magazlavda na ika miɗ yak a, Yàa ge batsah bakal. » 22 Dawda a gwaɗar: « Suwal Əbay naha, wura ilik ika magər gà gawla yak a màda aakara màzlaha. 23 BATSAH kwa ŋa mə pəlar ku mege a weke dukw ana a ge ŋgwal ŋa lele nda ndzer a. Aɗaba BATSAH kwa ŋa aka viliŋ kər ahər ga mbakum. Ama i waya maləma à wele ana BATSAH kwa ŋa a zla ya tsa. 24 Kamala ana mandza a bəra yak i pər ahər ŋgwal ŋa ika miɗ ga ya ka, kamala taŋa ya mbaŋa na mandza bəra ga a te ge a ŋgwal ŋa ika miɗ BATSAH kwa ŋa ya. A te be a iye i huɗ gà mesewere are ana fit a. » 25 Sul a gwaɗa a Dawda, məpìse ahəm a zlakara kəla ga Dawda, kaɗəŋ ki geye a gà asiŋ gà dukw ŋgiɗ pampam, ki ŋgeteye a ndzer. Dawda a zàzàm vatwa ŋgar, dite Sul a mbəɗ gər a mà ŋgar.