1 Samiyel 25

Dawda i bəra Nabal

1 Samiyel a mət gà Isərayel fit tə yahaba gər aà məwuɗaha ŋa, akahər ŋa ata ka, ti le i dzedzel ŋgar i Rama. I dəba ŋa ya Dawda a hitse a da à kusak Paraŋ a. 2 Wele duwa riŋ i Mayun, Əbay ŋa gà dukw gənaw ŋgar riŋ hinne. Gà təmaŋ ŋgar ɗekɗek ka, ti sle a dəbuw makər (3000) dite gà awak ŋgar tekeɗe tar dəbuw ilik (1000). Ta kəvawar i Karmel, ŋgat ŋa riŋ i fata nda gà ɓəzla mazaza mesis aà gà təmaŋ ŋgar a. 3 Zləm wele ata ka, Nabal dite zləm məkəs ŋgar tekeɗe Abigayel. Məkəs ata ka, metsehe ŋgar riŋ dite a tsahən asa mbaŋa. Ama zal ŋgar ka, sègèmè i gər, a gewa dukw ana ŋgwal ŋa tsiye, a dara ka i gwala Kalep a. 4 Dawda a tsarakàha a dala a kusak a, Nabal riŋ a zaza a mesis aà gà təmaŋ ŋgar a ka, 5 a slər gà gawla gà mburma kurwa (10) à təv ŋgar a gwaɗa a tar, ki dume a Karmel à bəra Nabal ki gwimə̀ra wusa nda zləm ga. 6 Ki gwaɗumera mive aaha mene ŋgwal ŋa i təv yak. Mendze zay mene nda kər, i ga ma yak dite nda gà limana yak fit dze. 7 Dawda a tsaraka ki zeze a mesis aà gà təmaŋ yak a ka, tsaatsa ka, aka na gà ɓəzla makəva gà təmaŋ yak mi ndzawa akaba i Karmel a ka, tàa ge kurum mə̀dzə̀k tsa. A gəra mə̀r ka, gà dukw gənaw kurum ilik aka dzeye tsa. 8 Wiz aà gà ɓəza yak naka? Ti tsikik ŋa. Dawda a gwa: « gəs gà ɓəzla sik ga naka i sleraha tar a təv yak nda Maŋgayaba, aɗaba mìi dara ka a dukw sawla ya kamkam i gək, vəl à tar dukw ana aà kər i hər a gà kəla yak Dawda nda gà ɓəzla sik ŋgar. » 9 I təv ana gà gawla Dawda aaha tə ndzeha ya ka, tə tsik mifefile ata fit a Nabal nda zləm Dawda, dite tə ndza tiytiy. 10 Nabal a gwaɗa à gà ɓəzla sik Dawda ata: Weke na Dawda a? Weke na kəla Yese ata ya? Mbakum ka, gà ɓele riŋ hinne na ta beyawa aà gà ɓəzla ga tar a. 11 Dite wànà i dze a ba gà dukw mezime ga nda gà dukw mese ga nda gà slu ga ana i de a gà ɓəzla mazaza mesis gà təmaŋ ga ya dite i dze a gà mburma ana i sər təv ana tə dara iɗəm a tsiye ya. 12 Gà gawla Dawda ata ta mbəɗ aba, ta mbəɗara gər a dəba ya. Ti ndzera a təv Dawda a ka, ta mar à dukw ana Nabal a tsik a. 13 I fata ya ka, Dawda a gwaɗa a gà mburma ŋgar ata: « Ku mege weke ma zla masalama ŋgar ma dan aka dumkul, ku weke a ge dər kataya. Dawda mbaŋa a ge dər kataya. Gà sliwdze ti sle a dərməka faɗ (400) tə da aka ba nda gà Dawda. Gà mburma ti zeha a təv kazlaŋa tar ka, dərməka sula (200). 14 Ilik ŋa ika magər gà ɓəzla sik Nabal a à da a mar dər aà bazlam ata Nabal a tsik à gà mburma Dawda a, à Abigayel məkəs Nabal a gwaɗar: « Araha Dawda aka slərra gà ɓəzla məmaya à labara ŋgar i kusak a, aà mege wusa a batsah mə̀r ŋa ya. Ama batsah mə̀r ŋa aka gəs tar ndaka vatwa ŋa ya tsidze. 15 Tsaatsa ka gà mburma ŋgar ata ta ge mə̀r ka, gà dukw ana gà ŋgwal ŋa ndzer a. Tàa ge a mə̀r mə̀dzə̀l tsa. Dukw tar ka, ilik aka dzeye tsa na akahər ana mìi suwayawa akaba nda gà tari kusak a. 16 Ku ndaavəɗ, ku ndaapat ka ti ne aka mə̀r ka, kamala zlagam a, na aka na mìi kəvawa gà təmaŋ i təv tar a. 17 Kinehe ka, sər megemir aà kər, aɗaba medzeye aka le a batsah mə̀r ŋa nda gà mà ŋgar fit dze. Ama ŋgat ka, welewele ŋa mawùraba ŋa na aà mifèfiler a. 18 Bise tsara ka, Abigayel a ndzek gà peŋ dərməka sula, guzum ana nda kiwa kwiye ŋa ya sula, gà təmaŋ əzləm, mazleyar ɗa ŋa, maləmbaɗaŋa aà baya aà mede, bàba buhwa masawula wur dukw duwa əzləm, matakwala wur dizl ana tə zalawar viŋye makulaŋa dərməka. Mawà dizl ana tə zalawar figiye ya tekeɗe dərməka sula makulaŋa mbaŋa. A dza aka gà hezweŋe. 19 A gwaɗa a gà ɓəzla megemir ŋgar ata, ndzùm aka miɗ ga. Dite i zezeme a kurum i dəba ya. Aka tsik ihər a zal ŋgar Nabal a tsa. 20 A tsəl aka hezweŋe ŋgar, a tar dərra aà kwite ya. Araha pəzlaŋ gà Dawda nda gà mburma ŋgar, tar tekeɗe ti de a aka tarahiŋa. Abigayel a le a tar. 21 Dawda a gwaɗa ba, biy taf na i kasla gà limana wele aaha i dala i kusak a. Araha ka, dukw tar ilik aka dzeye tsa. A giŋ ka, dukw ana ŋgwal ŋa tsiye, aka ŋgwal ga na i ger a. 22 Mbulum mə viliŋ batsah mesewere are nà Yàa mə̀sak aà mburma ilik i gwala Nabal a, daga aà gà asləka ya ndisl aà gà ɓəza gà asləka ŋana i huɗ kinehe ya, na ta ge riŋ haa ndidwe i mèkwède ya. 23 I təv ana Abigayel a ŋgat a à Dawda a ka, a tarəra bise tsara ika hezweŋe ŋgar a, a dza gurmits a bəɗ aka miɗ Dawda, luz a ye gər a bəɗ. 24 I fata ya ka, a ye ba a bəɗ aka miɗ ŋgar a gwaɗar, à ye na ki peliŋa ahəm a. Vəl vatwa a mala meslire yak mefafəlak aà zləm, dite ka tsaraka mifefile mala meslire yak. 25 Kamkam batsah ga ŋa ka dza zləm à mifefile Nabal welewele ŋa ata tsa. Aɗaba zləm ŋgar a ɗif ka, aà matikaba ŋgar ŋa. Nabal mala məba à dala. Məba à dala i ba ŋgar. Dite iye mala meslire yak a, Yàa ŋgat a gà gawla yak ata kà sləraha tar a tə tsa. 26 Kinehe ka, batsah ga ŋa, nda ndzer ka, BATSAH kwa ŋa riŋ nda are, kər naha mbaŋa, BATSAH kwa ŋa a waya tsa na ki ndze a məmbəz a bəɗ a, ki gebe a seriye nda ahər yak ŋa ya. Gà ɓəzla mene are yak nda gà na ta waya megək dukw ana ŋgwal ŋa tsiye ka, Mbulum mə vəl a tar mesewere are kamala Nabal a. 27 Gəs kamkam gà ŋgwal gà dukw aaha i ndzekara biy məpìse a ahəm à gà gawla yak ana i təv yak a, ka dzaya a tar. 28 Kamkam i gək pəl aà bakal mala meslire yak. I sər nda ndzer ka, BATSAH kwa ŋa a vile a Əbay a gà mburma ana i ga i ma yak a, aà biybiy. Aɗaba kər riŋ ki ge a guvəl ka, biy ŋgar. Tàa le a bakal i təv yak tsìddze na i huɗ mandza aà bəra yak ka. 29 Na ɓele a wura aka hitse a kər a zezeme a kər aà makəɗa kər ka, mezite BATSAH kwa ŋa Mbulum yak a kasle a kər. Mesife yak a ndze a i təv Mbulum yak. Ama mesife gà ɓəzla mene are yak ka, a kweze a à dala kamala kur ana ti yawa nda màasliwìr a. 30 I təv ana BATSAH kwa ŋa a ge a gà dukw ana batsah ŋa, ŋgwal ŋa, a batsah ga ŋa ya a tsik a, dite a ne a dər mala makəva gà Isərayel a. 31 Ka ta wise ba gər i madzala gà gər yak tsa, na agəra makəɗa wele ana aka ge dukw ata tsiye tsa. Ka tə ge ba seriye nda ahər yak ŋa tsa. Akana BATSAH kwa ŋa a te ge a gà ŋgwal gà duwa a batsah ga ŋa ya ka, ki məbe dər a a gər a. 32 Dawda a gwaɗa a Abigayel i ge kəkaaha a BATSAH kwa ŋa Mbulum gà Isərayel a, na a sləra kər aà maləma aka ba nda iye ya mbakum a! 33 BATSAH kwa ŋa məpìsek ahəm, aɗaba ŋgwal madzala gà gər yak ata, aka viliŋ vatwa aà makəɗa mburma tsiye. Məpìse ahəm mege ika gər yak, ana ka waya ki kiɗe a mburma, dite kər ŋa ki gebe seriye nda ahər yak ŋa ya. 34 Ama BATSAH kwa ŋa Mbulum gà Isərayel riŋ nda are, ŋgat na a hindikiŋ à vatwa ya. Nà ka dara bise ndeɗiŋa aka miɗ ga ya tsaka, wura a zeha ilik i gwala Nabal tsa na asləka, kəla asləka ŋa ya ndisl aka mbulum ana wekikike i mèkwède ya. 35 Dawda a gəs a Abigayel a gà dukw ata a ndzekar aaha ya, dite a gwaɗar: « Daba a ma nda zay araha sər ka, Yàa tsarakək dər dukw ana ka wiz aà iye ya. I gəs aà kər a ka, nda maŋgayaba ŋa. » 36 Abigayel a mbəɗ gər a ma ka, Nabal riŋ a de a ŋgwal dukw mezime. Ŋgwal dukw mezime ana gà Əbay tə zemawà ya. Ar i maŋgayaba dite ndzə̀raftsaffa makwaya ŋa. Ama Abigayel ka, aka fafəlar tsa haa ndidwe aka mbulum ana wekikike i mèkwède ya. 37 Ama i mèkwède ŋa ata ka, mekweye aka da ika ka ya, məkəs ŋgar a mar a dukw ana a ge ba ya. Day arəv a da ihər a, a mət a rə̀v. 38 I dəba mahinne kuru ya ka, BATSAH kwa ŋa a vəl mesewere are a Nabal, a mət. 39 I təv ana Dawda a tsaraka Nabal aka mət a ka, a gwa: i ge kəkaaha a BATSAH kwa ŋa, ŋgat na a zla təv ga ya i təv mendeveye Nabal ana a ndveyiŋ a. Dite a hənikar a vatwa a mala meslire ŋgar aà mege dukw ata ya i təv dukw ata ya. BATSAH kwa ŋa a mar a bakal a gər Nabal. Dawda a slər gà ɓəzla meslire ŋgar aà mata magwaɗa a Abigayel ka, a waya ŋgat aà daala. 40 Gà ɓəzla meslire ata ti ndze a bəra Abigayel a Karmel ka, ta gwaɗar: « Dawda a sler ara mə̀r a təv yak a, a waya mazla kər aà daala. » 41 Abigayel a dza gurmits a bəɗ aka miɗ tar, luz a ye gər a bəɗ a gwa: « Iye mala meslire ŋgar a matseneha ba ŋa i ne a ɓele ŋgar. I berewa sik gà ɓəzla meslire ŋgar. 42 Abigayel a hitse a mbulum tsara, a tsəl aka hezweŋe. Gà ɓəzla meslire ŋgar gà dəm ŋa əzləm tə zàzàm ŋgat. A zàzàm gà ɓəzla meslire Dawda ata, a ne məkəs Dawda. 43 Dawda aka mbər mazle Ahinuyam ana a ndzàwà i Yizereyel, tar sula məma ti ne gà məkəs ŋgar. 44 Tsaatsa ka, Sul aka mbər mazle dəm ŋgar Mikal məkəs Dawda, aka vəl a Palti kəla Layas gà Gàliyam.