1 Samiyel 24

Dawda a məsak aà makəɗa Sul i En-gidi

1 I təv ata ya ka, Dawda a da a tsìl a kwite slagama i En-Gedi a ndza i fata. 2 I təv ana Sul a mara i màzàzàma gà Filistiya ya ka, ta gwaɗar asa: « Dawda ka, i dala i kusak ana i En-Gedi ya. » 3 Sul a pala gà ŋgwal gà mburma ana i liwiŋ gà sliwdze gà Isərayel a dəbuw makər (3000). A da à mayaha gà Dawda nda gà mburma ŋgar tsikw a kwite ana tə zalar kwite màazawal dala ya. 4 A ndze bise nda dagara gà təmaŋ ana aà guva vatwa ya ka, sləlak duwa riŋ i fata, Sul a tara aɗəm a mataha za. Tsaatsa ka, gà Dawda nda gà mburma ŋgar riŋ makaha ba ŋa iɗəm i fata. 5 Gà mburma Dawda ta gwaɗa a Dawda: « Pat ŋa mbakum na BATSAH kwa ŋa a gwaɗak ka, Yàa vəlak mala mene are yak à hər, ge à dər dukw ana ka waya ya. » Tsə̀kwàɗ Dawda a hitse a da zeye zeye, ndzàɗ a sas ihar ahəm tumbulum Sul a. 6 I dəba ana Dawda a sas aba ya ka, dùwaɗ arəv ada à Dawda a. Aɗaba ana a sas ahəm tumbulum Sul a. 7 A gwaɗa a gà mburma ŋgar: « BATSAH kwa ŋa makasla iye diydiy mageba tsa na i dzeye a mesife ŋgar a, aɗaba ŋgat ka, Əbay ana BATSAH kwa ŋa a zla ya. » 8 Nda mifefile ata ka, Dawda a gəs aaha ahəm aà are gà mburma ŋgar. Aka vəl a tar vatwa aà maləma aà Sul tsa. Sul a hitse ika za ya ka, a dara i sləlak ata ya, a zàzàm vatwa ŋgar 9 I dəba ŋa ya Dawda a dara i sləlak ata ya ka, a zalaha à Sul nda magala a gwa: « Əbay, batsah ga ŋa! » Ə̀bbà Sul a pər a dəba ka, Dawda a ndza gurmits a bəɗ, luz a ye gər a bəɗ aka miɗ ŋgar. 10 Dawda a gwaɗa a Sul, aàmala na ka dza zləm à mifefile gà mburma ana ta gwaɗak ka, Dawda riŋ a yehe a vatwa aà magik dukw ana ŋgwal ŋa tsiye ya? 11 Kə ŋgatar nda are yak tsiye, mbakum ka, BATSAH kwa ŋa aka viliŋ kər à hər gà i sləlak a. Ta gwaɗiŋ ka kəɗakwa, ama ka ndzeŋ ara tsehe Yàa be a kər i gwa ka, i ləme a batsah ga ŋa tsa, aɗaba ana ŋgat ka, Əbay ana BATSAH kwa ŋa a zla ya. 12 Pər ahər kwaŋ tsir ga, dite pər aà ahəm tumbulum yak ana i hər ga ya. Yàa sas ahəm tumbulum yak, Yàa kəɗ kər tsa. Sər dite ka dzala ka, i huɗ matikaba ga ka, Yàa dzala aà magək dukw ana ŋgwal ŋa tsiye, dite Yàa pəl ba ga ya tsa. Ada asa ka Yàa ge a kər bakal a ilik ɓav tsa. Ama kər ka ki zezeme aà medzeya mesife ga hiywe pəra. 13 BATSAH kwa ŋa mene mala seriye ika magər ma ya. BATSAH kwa ŋa na a pile ye aà kər a. Ama ahər ga a ləme à kər a tsa. 14 Kamala ana gà bàba ŋa ta gwaɗawa ɗa ndaka bazlam minew ka, (bakal a dera ka, i təv mala bakal a.) Kamala taŋa ahər ga a ləme a kər a tsa. 15 Aà weke na Əbay gà Isərayel a dara aà mege à ŋgat guvəl a? Ki zezeme a dzena weke? Ki zezeme a kə̀ra ana məmətaŋa ya? Kige tsa màasun a. 16 BATSAH kwa ŋa mala seriye ma à pər a ahər ŋa, a pele ika iye ahəm a dite a be a à iye i hər yak a. 17 I təv ana Dawda a ndəv à mifefile ŋgar a Sul a ka, Sul a gwa: « kəla ga Dawda, kər a na ki fefile ya. » Sul a dzebà a tuwa hinne. 18 Sul a gwaɗa a Dawda « kər ka mala ndzer ika iye ya. Aɗaba kə giŋ ŋgwal, ama iye ka i gək dukw ana ŋgwal ŋa tsiye. 19 Mbakum ka, kàa petiŋ aà ŋgwal yak ana ki gewìŋ a. Aɗaba nda ndzer na BATSAH kwa ŋa aka vəlak iye ahər ka, ama kàa kəɗ iye tsiye. 20 Na bəla wura aka le a mala mene are ŋgar ana, a miseke a ŋgat a zàzàme ba vatwa ŋgar tuwwwa nda zay a? BATSAH kwa ŋa mə pəlak aɗəm dukw ana kə giŋ ŋgwal ŋa mbakum a. 21 Kinehe ka, i sər ndzer a pat ŋgiɗ ka, kər na ki kwere gà Isərayel a, dite ahəɗ tar məvəla ŋa ihər yak. 22 Mbaɗiŋ kinehe nda zləm BATSAH kwa ŋa, na ki dzeye iɗəm à gwala ga i dəba ga ya tsiye? Məsak aà ga gà. 23 kərga taŋa ya, Dawda a mbaɗa a Sul dite Sul a mbaɗ gər a ma ŋgar, dite i dəba ŋa ya na gà Dawda nda gà mburma ŋgar tə tsəl à zlagam slagama ya.