1 Samiyel 23

Dawda a be a à kwite Keyila

1 Pat ŋgiɗ duwa, ta màr dər a Dawda ka, gà Filistiya ta ge a guvəl aà gà Keyila. Tar riŋ ti ndzekayà a tar gà duwa ika tawar a. 2 Dawda a wiz aà BATSAH kwa ŋa a gwaɗar: « Wànà i de a à mege guvəl aà gà Filistiya ya? » BATSAH kwa ŋa a gwaɗar: « Da ki be a à gà Filistiya, dite ki be a aà gà Keyila. » 3 Ama gà mburma Dawda ta gwaɗar: Mər naha ɗa i Yahuda ka, i magəɗa. Na ki tekwa à Keyila aà mege guvəl aà gà Filistiya ana a zèke a seyiŋ ivaɗ tsiye? 4 Dawda a wiz aà BATSAH kwa ŋa asa, BATSAH kwa ŋa a gwaɗar aaka: « Hitse ka da, a Keyila. Aɗaba Yàa dza gà Filistiya ahər yak. » 5 Gà Dawda nda gà mburma ŋgar tə da à Keyila. Tə dza ba aà mege guvəl aà gà Flistiya. Dawda a mba tar a sle tar za, a ndzəkara gà palam gà gənaw tar a. kərga taŋa ya na Dawda a be a à gà Keyila ya. 6 Aka na Abiyatar kəla Ahimalek a val a da aà mata maləma aka ba nda Dawda à Keyila ya ka, aka ndzək dər gà Efud, nda gà dukw ana gà mburma ta wizawa dər aaha duwa aà BATSAH kwa ŋa ya. 7 Ta mar dər a Sul ta gwaɗar: Dawda aka ndze a Keyila. I fata ya ka, Sul a gwa: Mbulum aka viliŋ ŋgat ahər ga. Aɗaba ana a da à kah ba à kwite ana gà bàba gà dizl màgədzawaŋa ika biye hərmaga. 8 Sul a yaha gər a gà sliwdze aà mede mege guvəl a Keyila, aà malawara a Dawda nda gà mburma ŋgar tits. 9 Dawda a tsaraka dukw ata ŋgwal ŋa tsa Sul a yaha aà meger nda malawar tits a ka, a gwaɗa a mala məbatsa duwa a Mbulum, Abiyatar: « Dziŋ ara gà Efud nda gà dukw mazala aba Mbulum a kwaŋ. » 10 Dawda a hama a gwa: « BATSAH kwa ŋa, Mbulum gà Isərayel, mala meslire yak aka tsaraka dukw ana Sul a yaha aà meger i Keyila ya. A waya à medzeya aà kwite ata agər iye. 11 Wànà gà ɓəzla makwara kwite ata na ta misekara à iye a hər a? Wànà Sul ana a dera kaɗeŋ kamala ana mala meslire yak a tsaraka ya ya? BATSAH kwa ŋa Mbulum gà Isərayel i hamak, pat dər aà mala meslire yak te . » Dite BATSAH kwa ŋa a gwaɗar: A dehiŋa. 12 Dawda a gwa asa: « Wànà gà ɓəzla makwara Keyila ata na tə misəkere a iye nda gà mburma gà ahər a Sul a? » BATSAH kwa ŋa a gwaɗar haya tə misəkara à kər ahər. 13 I fata ya ka, Dawda a hitse tsara, nda gà sliwdze ŋgar, ti sle a dərməka ndilik (600). Tə da i Keyila ya. Tə dayaba a təv ana ti sle aà madeya aɗəm a fit. Ta mar dər a Sul ka, Dawda aka da i Keyila ya a məsak aà mege guvəl.

Dawda i dala i kusak Zif nda Muʼuŋ

14 Dawda a ndza i dala i kusak, i zlagam slagama. A ndza i gər kwite i dala i kusak Zif. Sul riŋ a yaha ŋgat hiywe, ama Mbulum aka vəlar ŋgat a hər zukw tsa. 15 Dawda a samata ka, Sul riŋ a yahe a à medzeya à mesife ŋgar hiywe. Dawda ka, ar i dala i kusak Zif i təv mayahaba gər gà dizl ɗaf. 16 A pat duwa Zunatan kəla Sul a hitse a da a təv Dawda a dala a təv mayahaba gər gà dizl ɗaf ata, aà mata məvəl a ndzəɗa à Dawda, aà megə̀s Mbulum ɓəŋɓəŋ lele. 17 A gwaɗar asa: Ki ge magəɗa tsa. Aɗaba ahər Sul tsir ga a ləme a kər a tsa. Ki kwere a gà Isərayel dite iye mbaŋa ka, i ne a ma sula yak. I ndze a bise nda kər. Taŋa ka, tsir ga Sul a sər mbaŋa. 18 Ta gəs masla tar ata sula məma ya ika miɗ BATSAH kwa ŋa. Dawda a ndza i ga ɗaf ata, dite Zunatan a məbara a ma ya. 19 Gà Zifiya tar ka, tə tsala a təv Sul a Giveya, tə daha ta gwaɗar: Wànà Dawda dzena makaha ba ŋa riŋ ika magər mə̀r i zlagam slagama i ga ɗaf tsiye? Ar ka i gər kwite Hakila ana ika tseke gular kusak ata ya. 20 Nà ka waya matatsa a dər ŋa ka, kər ka, dara Əbay mə̀r na mìi vileka ŋgat ahər a. 21 Sul a gwaɗa tar: « BATSAH kwa ŋa mə pìse kurum ahəm a kurum ana i ndza kurum are tsehe ya. » 22 Kinehe ka, kamkam kurum dum asa, mə̀rum aba, pərum gà duwa lele, aà masəra dər ar dzena i təv wara, dite weke na a ŋgatar a. Tsəka ta gwa ka, ar wirwir ŋa hinne. 23 Pərum, sərum gà təv makaha ba ŋgar fit. Dite ka mumara a təv ga ya i dəba ana kà sərum duwa aka gər ŋgar fit lele ya. Dite ki tekwa aka ba nda gà kurum. Na bəla ar i huɗ kwite ka, i yeha i liwiŋ gà gwala gà Yahuda ya fit. 24 Ta hitsera i fata ya, tə lah aka miɗ à Sul a Zif. Gà Dawda nda gà sliwdze ŋgar ka, tar i kusak Mayun ika varavada ndaka tseke gular kusak ata. 25 Gà Sul nda gà sliwdze ŋgar tə da à mayaha Dawda. Tə tsik a Dawda gà mburma riŋ ti yaha kər ka, a tsəl a kwite duwa i kusak Maʼuŋ. A ndza riŋ i fata. Sul a tsaraka ka, a zàzàm ŋgat a kusak Mayun ata. 26 Sul a zàzàm kwite ndaka tseka ŋgiɗ, gà Dawda nda gà mburma ŋgar tə zàzàm kwite ata ndaka tseke ŋgiɗ mbaŋa. Dawda a da a be a ba ŋgar aà Sul a. Gà Dawda ka, ta mba aba aà məvele aà Sul a. Gà Sul nda gà mburma ŋgar ka, bise bise tàa megìse gà Dawda nda gà mburma ŋgar mbaŋa. 27 Mala məma labara duwa a dara a tsik a Sul. A mba aba bise aɗaba gà Filistiya riŋ ti dze a ba aà mege guvəl i kwite. 28 Sul a mə̀sak aà màzàzàma Dawda, a da ata mege guvəl nda gà Filistiya. Aɗaba taŋa na tə zalawar a təv ata ka, kwite madaya aba ya ya.