1 Samiyel 22

Duʼek a bats gà ɓəzla məbatsa duwa a Mbulum

1 Dawda a da i fata ya, a da a kaha ba a zlə̀lək bise nda kwite Adullam. Gà damər ŋgar nda gà ma ŋgar fit tə tsarakà ka, tə da a təv ŋgar. 2 Asa ka gà mburma ti sle aà dərməka faɗ (400) tə zàzàm aaha ŋgat. A ne mala aka miɗ tar. Gà mburma ata ka, gà na duwa a slewe a a tar a, gà ɓəzla gwadere, nda gà na gəzləŋ tar marahaŋa nda matsəɓatsəɓ a. 3 Dawda a da i fata ya, a Mitspa ana ika ahəɗ Muwab a. A gwaɗa a Əbay Muwab ata. I gək kamkam, vəl vatwa à gà dede ga, nda mama ga, tə ndə̀zlàrà aka ahəɗ yak a te. Aà məbebe dukw ana Mbulum a waya magiŋ a. 4 I fata ya ka, a da a tar a bəra Əbay gà Muwab, tə ndza riŋ i fata ndisl a təv ana Dawda a ndza i zlagam slagama ya. 5 Pat ŋgiɗ duwa mala məmà à bazlam Mbulum duwa zləm ŋgar Gat a gwaɗa a Dawda: Kà ndza i zlagam aaha tsa. Da, ka mà a kwite Yahuda. Dawda a da a ndzè a kusak ana gà dizl ɗaf riŋ iɗəm hinne bise nda Heret a. 6 A pat ŋgiɗ duwa asa, Sul riŋ mandza ŋa ika təv mendze ŋgar aà huɗ dizl ɗaf duwa tə zalar Tamaris ika gər diyis duwa i Giveya. Badzar ihar ihər, dite dits nda gà ɓəzla sik ŋgar ti ler. A tsaraka kà tàa a le à təv Dawda nda gà mburma ŋgar. 7 Sul a gwaɗa a gà ɓəzla sik ŋgar ata ti ler dits a: Tsarakum kuɗa a kurum gà Bendzamen. Wànà kəla Yese ata a tə dze kurum a gà guvah viŋye nda gà asiŋ gà guvah ŋgiɗ kamala iye ya? A dze a kurum ika gər gà sliwdze dəbuw kige tsa dərməka ya. 8 Kaɗəŋ agərla na kà dzum akaba à iye ahəm a. Wura ilik aka miŋ aà magəsa masla gà kəla gà nda kəla Yese ata ya tsa. Wura ilik ika magər kurum a aka dzala aka iye, aka tsikiŋ ka, kəla gà aka hitse aà mala sik gà Dawda aà medze aà iye maŋgwaɓa tsa. Kamala ana a ŋge a iye mbakum a. 9 Duʼek gà Edumiya riŋ i liwiŋ gà ɓəzla sik Sul ata, a gwa: Yàa ŋgat a kəla Yese ata a daha a Nub a bəra Ahimalek kəla Ahitut. 10 Ahimalek aka zal aba a BATSAH kwa ŋa agəra ŋgat, aka dzar dukw mezime, dite aka vəlar masalama Guliyat gà Filistiya mbaŋa. 11 Sul a slər mburma aà ma tə zalaha a Ahimalek kəla Ahitut mala məbatsa duwa a Mbulum, nda gà ma ŋgar fit. A zal a tar asa ka, nda gà na ta batsawa duwa a Mbulum i Nub a fit kweleŋ. Tə tarəra aka miɗ Əbay ata ya. 12 Sul a gwaɗar tsarakà lele kər kəla Ahitut. Ahimalek a gwaɗar aaka: Iye naha batsah ga ŋa. 13 Sul a gwaɗar: Aàmala na kà dzum akaba à iye ahəm nda kəla Yese ata ya? Aàmala na kà vəlar peŋ nda masalama ata ya? Dite ka, kà zalar aba Mbulum aɗaba ŋgat a? Kà hitse a ŋgat aà mandza iye maŋgwaɓa kamala ana a ge a mbakum a. 14 Ahimalek a gwaɗar aaka a Əbay: Weke na a zàzàm megemir ŋgar lele ika magər gà ɓəzla sik yak kamala Dawda a, dite malpa yak a? Ŋgat ka, mala makasla kər, dite gà mburma tə zləbawa dər ika magər gà mburma yak a? 15 Nda ndzer ana mbakum ilik a na i zal aba a Mbulum aɗaba ŋgat a? Taŋa tsa. Ka ti tike mene are ŋa aka iye mala meslire yak tsa. Ku mege aka weke i huɗ ga gà ya. Aɗaba mala meslire yak a sər aba a duwa ya aka gər ŋa tsa, ku dukw ilik tsidze. 16 Əbay a gwaɗa à Ahimalek, ki mitiŋa Ahimalek! nda ndzer ki mitiŋ a. Kər nda gà ma yak fit dze. 17 Əbay a gwaɗa a gà ɓəzla makasla ŋgat ata bise i təv ŋgar a: Dum batsum gà ɓəzla məbatsa duwa a BATSAH kwa ŋa. Aɗaba tar mbaŋa ka, tàa zlak Dawda. Ti sərawa aà məvele ana a vele a à iye ya ka, ti tsikawiŋ tsa. Ama ka, gà ɓəzla makasla Sul ata ta waya maləma à gà ɓəzla məɓàtsa duwa à BATSAH kwa ŋa tsa. 18 I fata ya ka, Əbay a gwaɗa à Duʼek gà Edumiya: Kər ka da bats gà ɓəzla məbatsa duwa a Mbulum ata. Pat ŋa ata a bats ka, gà mburma dzik tsamakər gəra əzləm (85) gà na nda gà petek ana tə zalar liŋ^ª gà ɓəzla məbatsa duwa à BATSAH kwa ŋana ti tikawa aka ba akataŋa ya. 19 Sul a bats gà ɓəzla məbatsa duwa a BATSAH kwa ŋana i Nub a. Nub ka, kwite ana gà ɓəzla məbatsa duwa a BATSAH kwa ŋa ti ndzawa iɗəm a. A bats nda masalama ka, gà asləka nda gà məkəs ŋa dze fit. Gà ɓəza nda gà ɓəza ndirkìz ŋa ya dze fit. Gà sla, gà hezeŋwè, gà təmaŋ nda gà awak fit dze. 20 Say na a be ka, kəla Ahimalek ana kəla Ahitut a ilik pəra. Zləm ŋgar ka, Abiyatar. A val a təv Dawda. 21 I təv ana a ndzeha a təv Dawda a ka, a mar a labara ana Sul a bats gà ɓəzla məbatsa duwa a BATSAH kwa ŋa ya. 22 Dawda a gwaɗa a Abiyatar: I sər ka, pat ana i lehe à Duʼek gà Edumiya ata ya ka, a dera a me a à dukw ata à Sul. Iye na a ne mala bakal ŋa agəra məɓatsa gà mburma yak ata ya. 23 Ndza ɗa i təv ga, magəɗa magək tsa. Mə̀ ka, mala mene are mà ka, ilik. Wele ana a waya makəɗa kər a ka, a waya makəɗa iye mbaŋa. Na kər i təv ga ka, duwa a gìke a tsa.