1 Samiyel 21

Dawda a val a Sul a

1 Dawda a da, Zunatan mbaŋa a marà à huɗ kəsà ya. 2 Dawda a da à Nub a bəra, Ahimalek mala məbatsa duwa a Mbulum. Ahimalek a dara a təv Dawda a ka, nda gà magəɗa ya. A dzèdzèrà kwarkwar hinne, a wiz a hər a gwaɗar: Kà dara kər ilik wura a kər tsa ana agəra la? 3 Dawda a gwaɗar aaka: Əbay a viliŋ məpala ahəm a gwaɗiŋ: Wura ma tə sər aà dukw ana i sləra aaka kər a tsa. Aɗaba taŋa na i vəl təv maləma akaba aà gà mburma gà ka, izaɗ zaakwa ya. 4 Dukw mazime riŋ a kər kinehe ya? Dziŋ ara ga peŋ a əzləm kwaŋ, kige tsa dukw ana ka lehər a pəra. 5 Ahimalek a gwaɗa a Dawda: Peŋ mazime mburma fit riŋ i bəɗ tsa. Ama peŋ ana a tike ba aba biy Mbulum a ka, riŋ. I vileke a kəla ka, say na gà mburma yak tàa ləma aà gà məkəs tsa aka ndza zaakwa ya. 6 Dawda a gwaɗar kataya, mə̀r tekeɗe i təv ana mìi dawa a guvəl a ka, mìi ləmawà aà gà məkəs mə̀r tsa. Gà dukw ahər gà mburma gà tekeɗe, tar madzaŋà aba biy Mbulum a. Ku mege dukw ana i da akara à mege ya, i ge a nda zləm Mbulum tsa ka, Mbakum agəra gà dukw hər ŋgar aaha à iye mbakum madzàŋa biy Mbulum a ka, i ge a kəla ka, biy ŋgar. 7 I fata ya ka, mala məbatsa duwa a dzar peŋ ata, Aɗaba gà asiŋ gà peŋ ŋgiɗ riŋ asa tsa, say taŋa ti tike a aba à Mbulum a ɗekɗek pə̀ra. Tə ndzəkara peŋ ata ya ka, ika təv tseɗaŋŋa ya. Ta gewa dər ka, tàa ndzək ika kaya ka, ta mawà dər aɗəm aà mala ana ti de kinkin a 8 Tsaatsa pat ŋa ata ka, mala meslire Sul duwa riŋ ika miɗ BATSAH kwa ŋa i fata. Ŋgat ka, zləm ŋgar Duʼek kəla gà Edumiya mala aka miɗ na ika magər gà ɓəzla makəva gənaw Sul a. 9 Dawda a gwaɗa a Ahimalek: Wànà Suwal kige tsa masalama a kər a? I dara i ma ya ka, kataya, Yàa zlara masalama ga ya, kige tsa gà asiŋ gà dukw ahər ga ya tsa. I hadzalara ka, agəra meslire Əbay ata. 10 Mala məbatsa dukw ata a gwaɗar: Araha masalama Guliyat gà Filistiya ata ka kəɗ i tùlwah Ela ya. Ar mendiweɗe ahər petek ŋa, metike ŋa dər ika dəba Efud. Na kà waya ka, zlà aɗaba biy ŋgiɗ riŋ asa tsa. Dawda a gwa: ŋgwal ŋa riŋ a za dər naha ya? 11 Pat ŋa ata ka, Dawda a hitse a val ika miɗ Sul i fata ŋa ya. A da a bəra Akis Əbay gà Gat. 12 Gà ɓəzla sik Akis ta gwaɗa a Akis: Wànà naha ana Dawda Əbay gà Isərayel tsiye? Wànà ŋgat tsiye na gà məkəs tə lahawa dər dimis, ta gwaɗawa ka: Sul aka bats gà ɓəzla mene are ŋgar ka, də̀buw (1000), ama Dawda ka, dəbuw kurwa (10000) ya. 13 Dawda a tike bazlam ata a gər, dite magəɗa Akis Əbay gà Gat ata a ger hinne. 14 Ika miɗ tar i fata ka, a mbəɗ a metsehe ŋgar, a ne aba kamala ana duwa a gasawa ya. A dza ba aà metsike a dukw ana a da dər tsiye. A wetseya duwa aà gà biye hərmaga. Zəzəzəza tisle a ŋgəzara ihər a aka mazəgumət a. 15 Akis a gwaɗa a gà ɓəzla sik ŋgar: Ka pərum ahər tsiye wele aaha ka, duwa a gasawa ya? Aàmala dziye na ka zlùmiŋ ara ya? 16 Wànà gà ɓəzla məba a dala ɗa i faha tsiye, na kà zlumara a faha aà məpatà a dukw məbadala ŋgar aaha ya? Wànà wele aha dzena, a de a à ga ma ga ya?