1 Samiyel 20

Zunatan a gəs masla nda Dawda

1 Dawda a val i kwite Nayut i Rama ya asa, a da aà maləma akaba nda Zunatan, a gwaɗar: « Dukula na i ge ya? Menise ga ana i ge ŋgwal ŋa tsiye ana awara? Bakal ga ana awara, na nda təv dede yak a, na a waya medzeye aà iye ya? » 2 Zunatan a gwaɗar aaka: « diydiy a ge ba tsa, ta kiɗe a kər tsa. Dede ga a ge a duwa ilik za metsikiŋ tsa. Aàla na a ta kehe a iye taŋa ya? A ge a ba tsa. 3 Dawda a mbaɗa asa a gwaɗar: Nda ndzer ka, dede yak a sər ka, mə ka nda masla. A gwaɗe a ba Yunatan mà sər taŋa tsa, a tə tsìɓar a hinne. BATSAH kwa ŋa riŋ nda are, dite kər naha mbaŋa. Nda ndzer ka, iye ka ika ahəm dive. » 4 Zunatan a gwaɗa a Dawda: « Dukw ana ki wize a iye ya fit ka, i gik ŋa. » 5 Dawda a gwaɗar aaka: « Tsaraka, ndidwe ka megirive kəla kiye, a da dər nda ndzer ka, mìi ndze a a təv ilik ŋa nda Əbay, mìi zeme a akaba ɗaf. Ama məsak à iye, ka ta kaha ba a dala ndisl a hawa pat məmàkə̀r ŋa. 6 Nda ndzer ka, dede yak a səra ka, iye riŋ tsa. I fata ya ka, ki gwaɗer ŋa: « Dawda a giŋ kamkam hinne aà mede bise tsara a Betelehem kwite ŋgar. A waya mede ka, à megirive gà gwala ana ta gewa kəla mive ta batsawa duwa ya. 7 Nà aka gwa ahər lele ka, i ge a magəɗa tsa. Nà tərfə̀ɗ matsəɓatsəɓ aka zla ŋgat ka, sər ka, aka tsə̀nah ba aà makəɗa iye. 8 Patar à ŋgwal à mala meslire yak, aɗaba ana kə gə̀sama masla nda zləm Mbulum nda iye mala meslire yak a. Na kàa le a bakal ga ka, kər nda ahər yak ŋa kəɗ iye. Aàmala na ki de a iye a təv dede yak dziya? 9 Zunatan a gwaɗar, na Yàa tsaraka dukw ana ŋgwal ŋa tsa tsir ga a geke a ya ka, idep i həmbər a à kər a tsa 10 Dawda a gwaɗa a Zunatan: Meme na i sər a dər ka, dede yak aka fafəlak aaka nda ŋgəlazaza ya? 11 Zunatan a gwaɗa a Dawda: Dara tama a dala, dite tə da akaba sula məma. 12 I fata ya ka, Zunatan a gwaɗa a Dawda: Nda zləm BATSAH kwa ŋa Mbulum gà Isərayel, akahər ŋa aaha ndidwe kige tsa mendze ndidwe ilik a i dzìke a tsir ga, aà masəra dər dukw ana a ge ya. Na bəla madzala gà gər ŋgar riŋ ŋgwal ŋa aka kər a. Na kamala taŋa ya ka, i sləraha mburma aà metsikək. 13 Na bəla dede ga a gike a dukw ana ŋgwal tsiye ka, i tsiki ka mbaŋa. BATSAH kwa ŋa mə viliŋ batsah mesewere are na Yàa slər aaha wura aà metsikik tsiye? Da nda zay BATSAH kwa ŋa mandza nda kər kamala ana a ndza ɗa nda tsir ga ya. 14 Na Yàa ge riŋ mba ka, giŋ ŋgwal BATSAH kwa ŋa, taŋa ka, ta kiɗe a iye tsa. 15 Ka ta zla are mege ŋgwal i huɗ ga i ma ga ya tsa. Ku mege i təv ana BATSAH kwa ŋa a dzeye a à gà ɓəzla mene are yak ilik nda ilik ika gər ahəɗ a. 16 I fata ya ka, Zunatan a gəs masla nda gà ɓəzla ga Dawda, nda magwaɗar: « BATSAH kwa ŋa mə pəl a ɗəm kər aà gà ɓəzla mene are yak a, » 17 Zunatan a mbaɗà a Dawda nda zləm masla tar ata asa. Aɗaba ana a waya ŋgat kamala ana a waya ba ŋgar a. 18 Zunatan a gwaɗar asa: « Ndidwe na kəla kiye ya. Gà mburma tə səra a ka, kər riŋ tsa, aɗaba təv mendze yak a ndze a za mburma. 19 Mendze ndidwe ilik ka, pat dukw ana ka tsikama a ge a ba ya. Ki me a à təv makaha ba, à təv ana kə̀ kaha aɗəm ba aka dəba gurum ana tə zalar Ezel a. 20 I mbelewe a sìmir makər ndaka tseke kur ata, kamala ana i mbelewe a duwa ya. 21 I fata ya ka, i sləra aaha kəla aà ma ta palara sìmir a. Na Yàa gwaɗar: Palara gà sìmir naha ɗa ika magər mà, bise nda kər. Taŋa ka, dara ki ge magəɗa tsa. Ki ndze a zay. BATSAH kwa ŋa riŋ nda are. 22 Na bəla a i gwaɗa a kəla ata ka, Pər gà sìmir riŋ diriŋ ika miɗ yak a, taŋa ka, da ba. Aɗaba ana BATSAH kwa ŋa a waya ka, ka da ya. 23 Aka masla mà ata kə gə̀sama ya ka, dzala BATSAH kwa ŋa mala sida ika magər ma hiywe. » 24 I dəba ŋa ya Dawda a da à makaha ba, a dala a pat megirive kəla kiye ata. Əbay a ndza à ɗaf megirive kəla kiye ata. 25 kərga ana a gewa dər a ka, Əbay a ndza a ɗaf aka təv mendze ŋgar dəŋgəɗ aà dùdùŋ ga. Ndàzl Zunatan a ndzàr aka miɗ. Kətsah Abiner tekeɗe a ndzàr aà guva ya. Ama təv mendze Dawda ka, wura ika ka tsa. 26 Ama Sul aka fafəl a pat ŋa ata tsa, aɗaba a zlaŋa a gwa: Duwa aka làhər, ar tsəɗaŋŋa tsa. Ndzer kaɗəŋ ar tsəɗaŋŋa tsa. 27 Ndidwe pat megirive ata asa ka, wura ika təv mendze Dawda tsa asa. Sul a gwaɗa à kəla ŋgar Zunatan: Agəra la na Dawda kəla Yese aka dara aka ɗaf a tsa, ku ndàvanà nda mbakum ŋa asa ya? 28 Zunatan a gwaɗa Sul: Dawda a giŋ kamkam hinne aà mede a Betelehem. 29 A gwaɗiŋ i gək kamkam viliŋ vatwa te, aɗaba məbatsa duwa riŋ i gwala ga i fata. Dite ka, damər ga batsah ŋana a zeliŋàra. Na iye masla yak ndzer ka, viliŋ vatwa i ta ŋgatara gà damər ga ya te. Aɗaba taŋa na Dawda aka ndzera à megirive aaha ya tsiye. 30 Matsəɓatsəɓ a zlà Sul nda təv Zunatan, a gwaɗar: « Kər ka kəla məkəs ana a tsaraka zləm tsa, gər a wisar a. I sər ndzer kà zàzàm ka, Dawda kəla Yese ata. Hurwà mene biy yak nda mama yak. 31 Ama tsaraka lele! na bəla kəla Yese aaha, kà ndza a bəra ka, kər ka ki ndze a zay tsa. Dite ka, mekwere yak a ndze a zay tsa. Kinehe ka, slər aaka mburma ta gə̀siŋara a da dər makiɗe. » 32 Zunatan a gwaɗar aaka: « A ge dzena là? Aàmala na ki kìɗe a ya? » 33 Sul a zla aaka suwal a mbulum aà mayar. Zunatan a sər tsara ka, dede ŋgar aka tsə̀nah ba aà makəɗa Dawda. 34 Tsə̀kwàɗ a hitse a à ɗaf a nda rə̀v, a da, aka maha a mazèmà ɗaf megirive ata ndidwe ŋa asa tsa. Aɗaba a tsəɓar hinne na mandeveye ana Sul a ndàvàyàr agəra Dawda a. 35 Ndidwe ŋa i mèkwède ka, Zunatan a da a təv məpaslaba ahər tar ata a dala nda Dawda a. Tar nda kəla gawla a zàzàm ŋgat. 36 Zunatan a gwaɗa a kəla ata: Da ta paliŋ ara gà sìmir ga aaha i mbelewe ya. Kəla ata a da ka, Zunatan a mbàl sìmir a zàr i gər a. 37 I təv ana kəla ata a ndze a təv sìmir Zunatan ana a ndzè a dəm a ka, Zunatan a tsiker aaha nda magala, a gwaɗar: « Sìmir a ge a riŋ nda ndzer ka, diriŋ ika miɗ yak. 38 A tsiker nda magala asa a gwaɗar: Val tsəmma tsara ka hitse tsa » Kəla ata a zlara sìmir ata ya, a da dəra a təv batsah ŋgar ŋa Zunatan a. 39 Kəla ata ka, aka sər a duwa ya tsa, say gà Zunatan nda Dawda na tə səraba aakaha ya. 40 Zunatan a dzar gà lekiɗ nda gà sìmir ŋgar a kəla ata, dite a gwaɗar a aaka: Mà dər a ma. 41 I dəba ana kəla ata a da iɗəm a ka, Dawda a hitse ara ika makaha ba ŋgar ika dəba kur ika tseke gular kur ata ya. Tə dzaya gurmits a bəɗ sik makər nda malakaya à gər a bəɗ dəbùz dəbùz. Tə tuwa aka ba. Dawda a gəs aàba a tuwa hinne a za biy Zunatan. 42 Zunatan a gwaɗa a Dawda da nda zay, aɗaba ana kà mbàɗamà sula məma nda zləm BATSAH kwa ŋa ya. Kə gwaɗama ka, BATSAH kwa ŋa mandza ika magər ma. Mane mala sida ma, dite, ika magər gà ɓəza ga nda gà ɓəza yak aà biybiy.