1 Samiyel 19

Sul a ne are a Dawda

1 Sul a tsik a kəla ŋgar Zunatan nda gà ɓəzla sik ŋgar fit aà tə ta kəɗ Dawda. Ama Zunatan kəla Sul ka, a waya Dawda hinne. 2 I dəba ŋa ya, Zunatan a da, a ta magwaɗa a Dawda ka, tsir ga Sul riŋ a yaha vatwa aà makə̀ɗ a kər. Ndidwe i mèkwède ka, ge metsehe, da, ka ta kah ba yak, ka ndza riŋ i təv makaha ba ata i fata. 3 Iye ka, mìi de aka ba ndisl a dala ata ki te a kaha aɗəm a ba ya, i fafiler a à tsir ga aka gər yak, i ŋgete a dukw ana a ge a ya, i meke a dər. 4 Ndidwe i mèkwède ka, Zunatan a zlə̀b à Dawda ika miɗ tsir ŋgar a gwa: « Əbay, ka te ge bakal nda təv mala meslire yak Dawda tsa. Aɗaba aka gək bakal tsa. Tsaatsa ŋgat ka, a gewa ka, dukw ana a zlakawa kər a ivaɗ. 5 A nde are guwum aka gà Filistiya ata, dite na BATSAH kwa ŋa a vəl batsah slagama à gà Isərayel fit a. Kàa ŋgatar tsiye dite kàa ŋgayaba mbaŋa tsiye? Aàmala nà kà waya mandza məmbəz wele ana aka ge bakal tsa nda makəɗa Dawda aaha aka ge duwa tsiye? 6 Sul aka tsaraka bazlam Zunatan ata, a mbaɗa a gwa. « BATSAH kwa ŋa riŋ nda ndzer, ta kiɗe a Dawda tsa. » 7 Zunatan a zalara a Dawda a, dite a mar aà gà mifefile ata fit kweleŋ. A dara à ŋgat a təv Sul a, dite Dawda a ma aka megemir ŋgar kamala ana piŋŋa ya i fata. 8 I dəba ŋa ya tə dza ba aà mege guvəl asa ka, gà Dawda nda gà sliwdze ŋgar tə da a guvəl nda gà Filistiya ka, ta mba aà tar tə taz ika miɗ tar a. 9 BATSAH kwa ŋa a məsak à mezite ana ŋgwal ŋa tsiye a dara aka Sul ana mandza ŋa i ma ŋgar, suwal ihar ihər. Dawda riŋ a dze a gandzavəl. 10 Sul a yar suwal, a waya magawa akaba ŋgat nda dùdùŋ ga. Ama Dawda a zlime a iɗəm a. Badzar ata dzàp a dza a dùdùŋ ga. Dawda a val a lelekwe a ba ndaavəɗ ŋa ata. 11 Sul a slər gà ɓəzla sik ŋgar a bəra Dawda aà tə ta kasla, ta kəɗ ŋgat ka, i mèkwède. Ama məkəs ŋgar Mikal a màr a dukw ata a ge ba ya, a gwaɗar: « Na kàa be a à ba yak i huɗ həvəɗ aaha ya tsəka, ndidwe ka, ta kiɗe a kər. » 12 Mikal a tarəra a ŋgat ndaka biye mandiwek zlagam a. A val a be a à ba ŋgar. 13 I dəba ŋa ya, Mikal a zla terafiŋ^ª a tike aka slə̀làh Dawda, a mbe gər ŋana nda bagwa awak, kə̀rap a kumbuhwà nda petek mehine. 14 Sul a slər gà mburma aà te ta zlara Dawda a ka, Mikal a gwaɗa a tar: « Ŋgwal ŋa tsa . » 15 Sul a slə̀r gà mburma asa, aà tə ta ŋgata a Dawda nda are tar. A gwaɗa a tar ka: zlùmiŋ ara nda slə̀làh ŋa ya dze, aà makiɗe. 16 Gà mburma ata ta marà à bəra Dawda a ka, E'eh! ti le ka, aà terafiŋ məmbeŋa nda bagwa awak aà gər slə̀làh. 17 Sul a gwaɗa a Mikal, aàmala na ka ne a iye bakal a, kà mə̀sak aà mala mene are ga, a be a à ba ŋgar a. Mikal a gwaɗa a Sul, a peliŋ ahəm, a gwaɗiŋ, kàa məsak a iye aà mede tsa ka, i kiɗe a kər. 18 akahər ata na Dawda a val a ba aà ba ŋgar a. A da a təv Samiyel a Rama. A daha a ɗamar dukw ana Sul a gər a fit. Tə da akaba nda Samiyel aà mendze i kwite Nayut. 19 Sul a tsaràka Dawda i kwite Nayut bise nda Rama ka, 20 a slər gà mburma aà tə ta gəsara Dawda a. Gà mburma ata ta ŋgata à mayahaba gər gà ɓəzla məma à guma Mbulum, ti tsike a bazlam Mbulum. Samiyel na mala aka miɗ tar a. Mezite mesife Mbulum a dara aka gà mburma Sul ata ya. Tar tekeɗe tə dza ba aà məma guma Mbulum mbaŋa ka, i madzala gà gər tar a tsa. 21 Ta mar dər a Sul ka, a slər gà mburma ŋgiɗ, tar tekeɗe tə dza ba aà məma guma Mbulum. A slər gà mburma ŋgiɗ pam məmàkə̀r ŋa asa, tar mbaŋa asa ta mà guma Mbulum ka, i madzala gà gər tar a tsa. 22 I fata ya ka, Sul a da nda ahər ŋgar ŋa a Rama. A ndzè a təv batsah tə̀kər duwa i Suku. A wiz gà Samiyel nda Dawda ana i ŋga? Ta gwaɗar aaka, tar i Nayut i Rama. 23 I fata ya ka, riŋ a de a à Nayut à Rama ka, mezite mesife Mbulum a da akara mbaŋa, a mà a guma Mbulum ndisl a Nayut a Rama ka, nda madzala gà gər ŋgar tsa. 24 Ŋgat mbaŋa a dzək ika ba gà petek a, a mà guma Mbulum ika miɗ Samiyel ka, i madzala gà gər a tsa. A dəɗ a bəɗ a ndza wùrwùs dite hiyùp ka, petek ika ka tsa. Aɗaba taŋa na ta gwa ka, Sul mbaŋa ana ika liwiŋ gà ɓəzla məma à guma Mbulum a.