1 Samiyel 18

Masla ana gà Dawda nda Zunatan ta gəs a

1 I dəba ana gà Dawda tə ndəv aba aà mifefile nda Sul aka, Zunatan a dan ba aà Dawda, a waya ŋgat hinne kamala ana a waya ba ŋgar a. 2 A pat ata ka, Sul aka mə̀sak a Dawda aà mə̀mbə̀ɗa gər a ma a bəra dede ŋgar tsa, a zla ŋgat aà megewar megemir. 3 Gà Zunatan tə dza aka ba ahəm nda Dawda biy magəsa masla ika magər tar. Aɗaba na a waya ŋgat kamala ana a waya ba ŋgar a. 4 Zunatan a ndzək ika ba petek guvəl ŋgar a a dzàɗa a Dawda. Gà masalama ŋgar, nda likìɗ ŋgar nda kandà ŋgar fit. 5 Kə̀le a ana Sul a slərawa Dawda a, a dawa a guvəl a ka, ahər ŋgar a mawà a bəɗ tsa. Aɗaba taŋa na, a tike ŋgat aka miɗ gà sliwdze ŋgar a. Gà Isərayel nda gà ɓəzla sik Sul fit ta waya ŋgat.

Sul a dzik ba aà makəɗa Dawda

6 akahər ana gà sliwdze gà Isərayel ta marà a ma i dəba ana Dawda, a kəɗ aba Guliyat a ka, Gà məkəs tə dayara i gà kəsà ŋgiɗ a pampam ika ahəɗ Isərayel a fit nda gà megirive, nda gà malaha dimis aka magə̀zla mediye. Tə da dər aaha a təv Əbay Sul nda gà asiŋ gà dukw megizle ŋgiɗ pampam nda gà mege yereyere. 7 Gà məkəs ata ta gwaɗaya aba ka, nda gà sawla: « Sul a bats gà ɓəzla mene are ŋgar debuw (1000). Ama i Dawda ka, debuw kurwa (10000) . » 8 Sul a ge batsah matsəɓatsəɓ, aɗaba a dar a gər tsa. A zlaŋa a gwa: Ta vəl a Dawda ka, dəbuw kurwa (10000) ŋana, dite i ga ka, dəbuw (1000) ŋana. Taŋa a zeha ana əla asa ya na Əbay ilik pəra tsiye? 9 Daga a a pat ŋa ata ya, na Sul a pərawa à Dawda ka, nda mandùrzùɗa are zluzzwà ya. 10 Ndidwe ŋa ka, Mbulum a vəl vatwa à mezite mesife ana ŋgwala tsiye aka Sul. A dzəba aà mene a ba ŋgar kamala mala məmà à bazlam Mbulum a. A mà aà guma Mbulum ata ka, i madzala gà gər a tsa. Dawda a zlà gandzavəl a dzer kamala ana pìŋŋa ya. Sul riŋ suwal ihar i hər. 11 Sul a yar suwal ata a Dawda, a zlaŋa a gwa: I dzìnake a dər aba nda dùdùŋ zləmana. Ama pat ŋa ata ka, Dawda a zlìmeye iɗəm a sik sula. 12 Sul a ge magəɗa a Dawda, aɗaba BATSAH kwa ŋa riŋ mandza ŋa nda ŋgat. Dite ŋgat ka, BATSAH kwa ŋa aka mə̀sak à ŋgat. 13 Aɗaba taŋa Sul a sə̀rək a ŋgat, diriŋ i təv ŋgar a, a ne a ŋgat batsah ŋa ika gər gà sliwdze dəbuw (1000). I fata ya gà sliwdze tə dawa a guvəl ta mawàra ka, Dawda a ne batsah ŋa ika gər tar. 14 Ŋgat ka, ahər ŋgar a mawà a bəɗ tsa hiywe, na kəla ana aka da a guvəl a, aɗaba BATSAH kwa ŋa riŋ mandza ŋa nda ŋgat. 15 Sul a samata ahər ŋgar a mawà a bəɗ tsa ka, a zàkà a mege magəɗa nda ŋgat. 16 Ama gà sliwdze gà Isərayel nda gà biy gà Yahuda ka, ta waya ŋgat hinne. Aɗaba ana tə dawa à mege guvəl, ta mawàra ka, ŋgat a ne batsah ŋa ika gər tar a.

Dawda a ne mala slagama ika miɗ guvəl

17 Sul a gwaɗa a Dawda: batsah dəm ga naha zləm ŋa Mərab, i vileke a aà daala. Ama kəla ka, giŋ megemir ndaka vatwa ŋa, ki ne a batsah mala ndzəɗa i təv guvəl ana gà Isərayel tì te ge a nda gà Filistiya ya ika miɗ Mbulum a dzekwiŋ. Sul a zlaŋa a gwa: Gà Filistiya na ti ta kəɗ a tsəka, ahər ga ma ta ləm ahər tsa. 18 Dawda a gwaɗa a Sul: « Iye dzena weke? Dite gà gwala gà tsir ga dzena gà weke na i Isərayel a? Na i ti ne a malpa Əbay a. » 19 Məpasla ahər ana ta vile a ahər a Mərab dəm Sul a Dawda a ndzera ka, ta vəl a Adriyel kəla gà Abel-Mahula. 20 Dəm Sul ŋgiɗ riŋ zləm ŋgar Mikal, a dzəba a mawàya Dawda hinne. Tə daha ta mar dər a Sul ka, a dàr a gər hinne. 21 Sul a zlaŋa a gwa: I vileriŋa dite, na a ne a aaka maŋge ɓele ŋgar, gà Filistiya ti te kiɗe a ya. Sul a gwaɗa a Dawda ma sula ŋa asa: « Mbakum ka, ki ne a malpa ga. » 22 Sul a gwaɗa gà ɓəzla sik ŋgar: « Dumaha kà fafəlum a Dawda aà zləm. Gwaɗumar ka, « araha gà Əbay nda gà ɓəzla sik ŋgar ka, ta waya kər, kinehe ka, ne malpa Əbay kùɗa. 23 Gà ɓəzla sik Sul tə daha tə tsiker mifefile ata a Dawda. » Dite Dawda a gwaɗa a tar aaka. « Kurum kà pərum ahər ana kəla duwa ya na mene malpa Əbay a? Iye ka, màtàwak mburma, i sle duwa ku kwizikw tsidze. » 24 Gà ɓəzla sik Sul ta màr aaha a dukw ana Dawda a tsik a. 25 Sul a gwa: « Kamala taŋa ya, ki dumaha ki gwaɗumera a Dawda ka, Əbay a waya limana tsa. Ama a waya ka ahəm dukw gà tsir gà Filistiya dərməka. (100). Dite kamala taŋa ya na i pile a ba gà i təv gà ɓəzla mene are gà ya. Sul a zlaŋa ka, kamala taŋa ya na a diɗe a ahər à gà Filistiya ya. » 26 Gà ɓəzla sik Sul tə daha ta màr a dukw ata à Dawda ka, dukw ata a da gər a Dawda. A ne malpa Əbay. Ələk ana məpasla ahər ŋa a ndzè a ɗəm a ka, Dawda aka geya gà dukw ana ti tsiker a fit. 27 Gà Dawda nda gà mburma ŋgar tə daha ta bats mburma dərməka sula (200) ika magər gà Filistiya ya. Dawda a ndzəkara ahəm dukw gà tsir tar a. Tə ɗama aka miɗ Əbay fit, ələk ŋa na a ti zle a dəm Əbay ata ya, dite Sul a vəlar dəm ŋgar Mikal aà daala kùɗa. 28 Sul a pər, a sər ka, BATSAH kwa ŋa mandza ŋa nda Dawda. Mikal dəm Sul ata a waya Dawda hinne 29 Sul a zàkà aà mege magəɗa a Dawda ndeyndey. A ne dər mala mene are ŋgar à biybiy. 30 akahər ŋa ata ka, gà sliwdze gà Isərayel ta gewa guvəl nda gà Filistiya hiywe. Kəla a guvəl ana ta gewa ya ka, Dawda a newa slagama a za dər gà bàba gà sliwdze Sul aha dziye fit. Dite zləm ŋgar a ɗe zləm hinne ya.