1 Əbay 3

Salumun a wiz masəra duwa aà Mbulum

1 Salumun a zla dəm Firawna əbay gà Ezipt. A ne malpa ŋgar. A da metike a huɗ kwite Dawda a Yeruzalem, tsikw haa a pat ana a ndəv à mazlazla ga ŋgar, nda biy BATSAH kwa ŋa, nda Zlagam ana a lawara Yeruzalem tits a. 2 Akahər ŋa ata ka, gà mburma ta batsawa gà duwa a Mbulum ka, ika wuda, aɗaba akahər ŋa taŋa ka, tàa zlazl ga ana ti zlibewe a iɗəm à zləm BATSAH kwa ŋa ya zukw tsa. 3 Salumun ka, a waya BATSAH kwa ŋa, dite a riŋ a zezem a, dukw ana dede ŋgar Dawda a tsike yar a fit tserdze. Ama gər ana ŋgat ka, a batsawa gà dukw gənaw, a dulawa gà makərɗa gà dizl ana a ze hwaŋŋa ya ka, ika wuda ya.

4 A pat ŋgiɗ duwa ka, əbay Salumun a da a Gabawun aà vəla dukw matawala fəla, aɗaba batsah wuda ka, taŋa ilik. Salumun a dza gà dukw matawala fəla ana tə dulawa ya dəbuw (1000), aka gər təv madula aaka duwa a Mbulum. 5 Ndaavəɗ ka, BATSAH kwa ŋa a pàt aàba a Salumun i Gabawun i sunwa ya. Mbulum a gwaɗar: « Wiz dukw ana kà waya, i vilekiŋa. »

6 Salumun a gwaɗar aaka: « Kàa ge ŋgwal a tsir gà Dawda mala meslire yak ndaka vatwa ŋa lele, aɗaba aka ndza ika miɗ yak ndaka vatwa ŋa lele, nda mege dukw ana ndzer a, nda gəzləŋ ŋgar ilik, na dite ki ger batsah ŋgwal aaha ya. Kàa vəlar kəla, ŋgat riŋ mandzaŋa ika təv mendze mekwere əbay ŋgar mbakum. 7 Kinehe ka, BATSAH kwa ŋa Mbulum gà, kər na kà tike iye, mala meslire yak a əbay a, aka təv mendze mekwere tsir gà Dawda ya. Iye ka, kəla gawla masakəŋa, i sər meme na i kwere a mburma ya tsa. 8 Mala meslire yak, ika magər gà mayahaba gər gà mburma yak ana kà pala tar a. Gà mayahaba gər gà mburma yak ata ka, tar gà mawa ba ŋa hinne ti ɗeme ba tsa, agəra ana ta beha ya. 9 Vəl metsehe ana ŋgwal ŋa ya, a mala meslire yak aà makwara gà mayahaba gər gà mburma yak, aà masəra ikaba aà gà dukw ana ŋgwal ŋa ya, ndəna ŋgwal ŋa tsiye. Nda ndzer, na kataya tsəna, weke na a sle a aà makwara gà mayahaba gər gà mburma yak ata hinne ya?

10 Dukw ata Salumun a wiz a ka, a da a gər a BATSAH kwa ŋa. 11 Mbulum a gwaɗar aaka: « Na kà wiz aba ka, taŋa pəra, kwets kà wiz mandza a bəra ana hinne ya tsa, kà wiz limana tsa, ku mege məbatsa gà ɓəzla mene are yak a tekeɗe, kà wiz tsa. Ama kà wiz ka, masəra ikaba à duwa ya, aà mege seriye a gà mayahaba gər gà mburma ndaka vatwa ŋa lele pəra ka, 12 araha i gike a dukw ana kà wiz aà iye ya. I vileke a metsehe nda masəra duwa, biy ana ka, wura aka ge ara kamala kər a, i dəba ya tsiye ya, dite wura a te ge a kamala kər a, ika miɗ yak tsa asa. 13 Gà dukw ana kàa wiz tsiye ka, i dzeke a mbaŋa. Gà limana, nda mezlibe, biy na ka, wura a ta ge a riŋ, i huɗ mandza aà bəra yak a fit, kamala kər a, i liwiŋ gà əbay ya tsa. 14 Na ki zezeme a vatwa gà, nda metike gər a gà məpala ahəm gà, kamala tsir yak Dawda a ka, i sikeheke a à mandza à bəra yak aka miɗ. 15 Salumun a piɗeke, a sər aàba ka, sunwa na a da aaka ya, a mbəɗara gər a Yeruzalem a, a dara a hitse aka miɗ sahər magəsa masla BATSAH kwa ŋa. A dza gà dukw gənaw biy matawala fəla ana tə dulawa ya , nda biy matawala fəla magawuba. A de batsah ɗaf a gà ɓəzla meslire ŋgar fit tserdze asa.

Seriye Salumun ana a ge nda masəra dukw ŋgar a

16 I dəba ŋa ya, a pat duwa ka, gà məkəs duwa gà muva ŋa sula, tə dara aka miɗ əbay Salumun a. 17 Ilik ŋa aà gà məkəs ata ya a gwaɗar: « I gik kamkam batsah gà ŋa, mə̀r nda məkəs aaha ka, mì ndzawa i ga ŋa ilik. I wa kəla gà ka, ŋgat riŋ. 18 I dəba mehinne makər ana i wa kəla gà ya ka, məkəs aaha a wa biy ŋgar mbaŋa. Mì ndzawa ka, məma, mbəlakw aka da aka mə̀r aha i bəra ya tsa. Mə̀r ka susula na i ga ata ya. 19 Pat ŋgiɗ duwa ndaavəɗ ka, kəla məkəs aaha aka mət, aɗaba ana a həna aaka ya. 20 I dəba ŋa ya a hitse aà mbulum nda magər həvəɗ ka, a zla iye kəla gà aà gəzləŋ a, akahər ana iye mala meslire yak ika mendze are ya, a həna aba dər aà gəzləŋ ŋgar. Dite kəla ŋgar ana məməta ŋa ya ka, a hiniŋ dəraha aà gəzləŋ gà. 21 I təv ana i hitse aà mbulum i mekwede aà məvəla awah a kəla gà ya ka, araha aka mət, mbulum a dəv i mekwede, i samata lele ka, kəla gà ana i wa ya tsa. 22 Məkəs ŋgiɗ aaha a gwa: « Parsa, kəla gà ka, naha riŋ nda are ya, kəla yak ka, na a mət a. » Məkəs ŋgiɗ aaha malahalah ŋa ya, a gwa: « Parsa, kəla yak ka, na a mət a, kəla gà ka, na riŋ nda are ya. » Kərga taŋa ya, na ta mbetse aba ahəm ika miɗ əbay ya. 23 əbay a gwa: « Məkəs aaha a gwa ka, kəla gà ka, naha riŋ nda mesife ya, kəla yak ka, na a mət a. Dite kər kə gwa: kəla gà ka, naha riŋ nda mesife ya, biy ŋgar ka, na a mət a. » 24 əbay a gwa asa: « Zlwimiŋara masalama ya kwaŋ. » Tə zlaraha masalama ata. 25 əbay a gwa: « Sasum ikaba kəla aaha riŋ nda mesife ya, sula. Mezehe ŋa, a məkəs ŋgiɗ, mezehe ŋa aaha biy ŋgiɗ a aaha. 26 Məkəs ana kəla ŋgar riŋ nda mesife ya, a waya kəla ŋgar hinne, a gwaɗa a əbay: « Kamkam batsah gà ŋa, vəlar kəla aha riŋ nda mesife ya, kə kəɗ tsa. » Ama məkəs ŋgiɗ aaha a gwa: « Kəla aaha ka, a ne a biy gà tsa, a ne a biy yak ɓav tsa, tə sas ikaba ya. » 27 Tsam ka, əbay a zla mifefile a gwa: « vəlum kəla ka riŋ nda mesife ya, a malahalah məkəs ka, ka kəɗum tsa, ŋgat na məmər kəla ya. » 28 Gà Isərayel fit tserdze tə tsaraka mege seriye ana əbay a ge ndaka vatwa ŋa ya ka, tə sər ka, metsehe Mbulum na i ba ŋgar a, te ger magəɗa.