1 Əbay 22

Ahav a waya aà məma à huɗ kwite Ramut ana ika ahəɗ Galaad a.

1 Mive makər ka, gà Siriya nda gà Isərayel, tàa ge guvəl tsa. 2 Ama i huɗ mive məmakər ŋana ka, Yehusafat əbay gà Yahuda a da a təv Ahav əbay gà Isərayel. 3 Tsaatsa ka, əbay gà Isərayel aka mbər megweɗe a gà ɓəzla meslire ŋgar: « Ka sərum tsiye ka, huɗ kwite Ramut ana i Galaad a ka, biy kwa ya. Dite ana aàla na ki geyekwe a ba aà gà gər à məma dər ŋa ihər əbay gà Siriya dze ya ya? 4 A gwaɗa a Yehusafat: « Wànà ka waya mada aà mege guvəl nda iye, aà huɗ kwite Ramut ana i Galaad a ya? » Yehusafat a gwaɗar aaka a əbay gà Isərayel: « Haya, mə nda iye nda kər ka, ilik, gà sliwdze gà ka, gà biy yak, gà piris gà tekeɗe, gà biy yak mbaŋa. 5 Yehusafat a gwaɗar aaka a əbay gà Isərayel asa, kamkam, wiz aà BATSAH kwa ŋa dzekwiŋ.

6 əbay gà Isərayel a yaha ger a gà ɓəzla məma à guma Mbulum, ta ge a dərməka faɗ (400), a gwaɗa tar: « Wànà i sle a a mede a à mege guvəl aà huɗ kwite Ramut ana i Galaad a ya? Tsəna i ndza ba ya? » Ta gwaɗar aaka: « Da, BATSAH kwa ŋa a vileke a huɗ kwite ata ahər yak əbay » 7 Ama Yehusafat a gwaɗar aaka: « Wànà mala məmà à bazlam Mbulum ŋgiɗ ɗa, i faha na, a sle a aà mewizekwe a aà BATSAH kwa ŋa ya tsiye? » 8 əbay gà Isərayel a gwaɗa a Yehusafat: « Mburma riŋ ilik asa na a sle a mewizekwe a aà BATSAH kwa ŋa ya, ama iye ka, i waya ŋgat tsa, aɗaba a mewìŋ ka, a dukw ana ŋgwal ŋa tsiye ɗekɗek, tsəka, na ŋgwal ŋa ya tsa, ŋgat ka, Mikaya kəla Yimla » Yehusafat a gwaɗa a Ahav: « əbay ka, a fefile kamala taŋa tsa! » 9 I fata ya ka, əbay gà Isərayel a zal a mala makwara ahəɗ ŋgar ilik a gwaɗar: « Tsəmma, da ka zeliŋara, a Mikaya kəla Yimla ya!

10 Ahav əbay gà Isərayel nda Yehusafat əbay gà Yahuda tar mandza ŋa, ku mege weke ika təv mendze əbay ŋgar, nda gà petek əbay tar ikaba, ika varavada bise nda biye hərmaga mada a huɗ kwite Samariya. Gà ɓəzla məma à guma Mbulum riŋ ihər ta me a dər ika miɗ tar. 11 Ilik ŋa ika magər gà ɓəzla məma à guma Mbulum ata ya, Tsidikiya kəla Kenana a vaɗa gà mbukum zara a gwa: « Araha na dukw ana BATSAH kwa ŋa a gwa ya, nda gà mbukum aaha ka, ki betse a gà Siriya, ki dzeye a à ter a fit kweleŋ . » 12 Gà ɓəzla məma à guma Mbulum ata tserdze ya, ti tsik bazlam ŋa ilik ta gwa: « Da, ge guvəl aà huɗ kwite Ramut ana i Galaad a, ki mbe aà ter a ŋa » BATSAH kwa ŋa aka vəlak huɗ kwite ata ahər yak, əbay.

13 Wele ana a da, a tə zalaha a Mikaya ya, a gwaɗar: « Araha na gà bazlam ana gà ɓəzla məma à guma Mbulum tserdze tə tsik a: « Nda biye ɗa ilik, ta mà à ŋgwal ata a əbay, gà gər a gwa ka, bazlam yak mege ka, kamala biy tar a mbaŋa! Mà à ŋgwal bazlam kamala na ti tsik a mbaŋa . » 14 Ama Mikaya a gwa: « BATSAH kwa ŋa riŋ nda mesife, i me a ka, a dukw ana BATSAH kwa ŋa a tsikiŋa ya, ɗekɗek » 15 I təv ana Mikaya a ndze aka miɗ əbay ya ka, əbay a gwaɗar: « Mikaya, wànà mìi sle a aà mede a, aà mege guvəl aà huɗ kwite Ramut ana i Galaad ibam a? tsəna mì ndza ba ya? » A gwaɗar aaka: « Da ki mbe a aà teriŋa, BATSAH kwa ŋa aka vəlak huɗ kwite ata ahər yak əbay » 16 Ama əbay a gwaɗar: « Sik ndaw na i mbeɗeke a ka, dite ki tsikiŋ ŋa dukw ana ndzer nda zləm BATSAH kwa ŋa ya? » 17 Mikaya a gwaɗar aaka: « Yàa ŋgat a

a gà Isərayel fit tserdze tàa gwitse ikaba ya ika gər gà kwite,

kamala gà təmaŋ ana mala makəva tar riŋ tsiye » BATSAH kwa ŋa a gwa:

« Gà mburma ata ka,

mala makəva tar riŋ tsa,

ku mege weke məmbəɗa aba gər a ma, nda zay »

18 əbay gà Isərayel a gwaɗa a Yehusafat ka: « Yàa tsikik tsiye, wele aaha a meweŋ ka, à dukw ana ŋgwal ŋa tsiye ɗekɗek, tsəka, à dukw ana ŋgwal ŋa ya tsa! » 19 Mikaya a gwa: « Ar ka, lele dza zləm a bazlam BATSAH kwa ŋa. Yàa ŋgata BATSAH kwa ŋa riŋ mandza ŋa ika təv mendze əbay ŋgar, gà mayahaba gər gà sliwdze ana i mbulum a fit, tar mehìtsèyèŋa, ika gà tseke ahər gula ndaka tseke ahər mezime ŋgar. 20 BATSAH kwa ŋa a gwa: « Weke na a bene a Ahav, aà mada a mege guvəl aà huɗ kwite Ramut ana i Galad a, aà dite ka, ta kəɗ riŋ a? » Wele ŋgiɗ, a tsik aba dukw ŋgar pam, misle ŋgiɗ aaha a tsik a aba biy ŋgar pam asa. 21 Tsam ka, Mezite mesife a hitse aka miɗ BATSAH kwa ŋa a gwa: « Iye na i de a bene a ŋgat a . » BATSAH kwa ŋa a gwaɗar: « meme na ki ta ge a ya? » 22 A gwaɗar aaka, i de a, i ti ne a mezite mesife masasa parsa, i bazlam gà ɓəzla məma à guma mbulum əbay ata fit tserdze ya. BATSAH kwa ŋa a gwaɗar aaka: « Ki bene a ŋgat, ki ŋgete a mege gara, da te ge dukw ana ka tsik a. 23 Dite kinehe ka, araha BATSAH kwa ŋa aka tike mezite mesife masasak parsa a bazlam gà ɓəzla məma à guma mbulum yak a, əbay. Aɗaba BATSAH kwa ŋa aka hàdzal ba, aà mazla aka kər ara mesewere are ya. 24 Tsidikiya kəla Kenana a sərəkaha a təv Mikaya a lakar aka mahwalum, dite a gwa: « Meme na Mezite mesife BATSAH kwa ŋa a dara i ba gà ya, a fafəlak a? » 25 Mikaya a gwa: « Ki ta ŋgetere a a pat ŋgiɗ ka, ki de a a meɗikwir ana i mendzwil ga ya » 26 əbay gà Isərayel a gwaɗa a mala aka miɗ gà sliwdze ŋgar ilik: « Gəs Mikaya, ka da dər a təv gà Amun mala makwara huɗ kwite, nda Yuwas kəla əbay 27 Da gwaɗa a tar: Araha na dukw ana əbay a gwa ya: ‹ Tikwim wele aaha a daŋgay, ka nikiɗwimar à dukw mezime nda yam, haa a təv ana i mere a ma nda zay ya dzekwiŋ . » 28 Mikaya a gwa: « Na ndzer, kàa mara a ma ya nda zay ka, taŋa ka, BATSAH kwa ŋa aka fafəlak nda bazlam gà tsa. Dite a gwaɗa a gà mayahaba gər gà mburma asa, kurum tserdze, tsarakum dukw ana i tsik a lele.

Məməta Ahav

29 Ahav əbay gà Isərayel nda Yehusafat əbay gà Yahuda tə da a mege guvəl aà huɗ kwite Ramut ana i Galaad a. 30 Ahav əbay gà Isərayel a gwaɗa a Yehusafat: « Iye ka, i mbiɗe a ba ŋgiɗ aà mada mege guvəl, ama kər ka, dza akaba gà petek əbay yak » Tsam ka, əbay gà Isərayel a mbəɗ ba ŋgiɗ pam, a da a guvəl. 31 əbay gà Siriya aka vəl vatwa a gà ɓəzla aka miɗ gà sliwdze ŋgar ana dzik makər gər ŋgar sula (32) ta kwere a gà sliwdze ana tə tsalawa a gà muta piris a, a gwaɗa a tar: « Ka ta gwim guvəl aà gà sliwdze məfara ŋana tsa, kige tsa aà gà ɓəzla aka miɗ gà sliwdze tsa. Ama gwim guvəl ka, aà əbay gà Isərayel ɗekɗek. 32 I təv ana gà ɓəzla aka miɗ gà sliwdze ana tə tsalawa a gà muta piris a, ta ŋgat a Yehusafat a ka, ta gwa: « Nda ndzer naaka ka, əbay gà Isərayel. Ta mbəɗ aba a mege aà ŋgat guvəl, Yehusafat a dzəba aà matuwa aba. 33 I təv ana gà sliwdze matsala a gà muta piris a, tə samata ka, əbay gà Isərayel tsəka, wudəgər ta mbəɗ aba ta miyak a ŋgat. 34 Ama wele duwa a mbalaha iɗəm simir a zləməŋa pəra ka, a ndza a əbay gà Isərayel, aka magər gà ahəm andiw sayaw (a revoir au vilage) ŋgar. Ahav a gwaɗa a wele ana a peke a muta piris ŋgar a, mbəɗ à iye gər a dəba, ka da à iye ika miɗ guvəl a, aɗaba duwa aka ndzeŋ. 35 Guvəl ata a pat ŋa ata ya ka, akwa ihər hinne, ta miyak à əbay i muta piris ŋgar, ser aka gà Siriya, məmbəz ŋgar a zlala hinne a huɗ muta piris ŋgar ata. Nda hawa ŋana ka, a mət 36 Aka pat ana a diɗe a ya ka, Mewideye a ɗe i təv mandzəba gà sliwdze: « Ku mege weke ma da a huɗ kwite ŋgar! Ku mege weke ma da aka ahəɗ kwite ŋgar! 37 Kərga taŋa ya na əbay a mət a, tə zla məməta ŋa a Samariya ya. Ti le ŋgat i Samariya i fata. 38 Akahər ana tar riŋ ihər ta bere aà muta piris i tə̀kər ana i Samariya ya ka, gà kə̀ra tə ndakaɗa məmbəz ŋa. Gà məkəs ana gà muva ŋa ya, ta bara aɗəm ba. Kamala ana BATSAH kwa ŋa a gwa ya. 39 Gà asiŋ gà labara Ahav, gà dukw ana a ge ya ya, ga ana a zlazl nda zlir matswaslwa ya, gà bàba gà huɗ kwite ana a zlazlaya ya tserdze, ana riŋ mewètsèŋa i wakita gà labara gà əbay gà Isərayel ibam a? 40 Ahav a mət, kəla ŋgar Ahaziya a ndza aka təv mendze mekwere əbay ŋgar.

Yehusafat a ne əbay gà Yahuda

41 I huɗ mive məfaɗ ŋana Ahav əbay gà Isərayel, a ge a ika mekwere ya ka, Yehusafat kəla Asa a ne əbay gà Yahuda mbaŋa. 42 I təv ana Yehusafat a ne əbay ya ka, ŋgat mive dzik makər gər ŋgar əzləm (35). A kwara i Yeruzalem, mive dzik səla gər ŋgar əzləm (25), zləm mama ŋgar, Azuva dəm Silhi. 43 A zazam ka, gà dukw ana tsir ŋgar Asa a gewe ɗa ya. Aka məsak dər ilik tsa, a gewe ka, dukw ana a da a gər a BATSAH kwa ŋa ya. 44 Ama kəla ka, tàa mbazlaya à gà təv mewisle tsa. Gà mayahaba gər gà mburma tə dawa a batsawa aaka gà dukw gənaw nda madula aaka gà dukw ana ti ze hwaŋŋa lele ya hiywe. 45 Gà Yehusafat tə ndza zay nda əbay gà Isərayel. 46 Gà asiŋ gà labara Yehusafat, nda gà ndzəɗa ŋgar nda gà mege guvəl ana a geye ana wànà riŋ mewetse ŋa i wakita labara gà əbay gà Yahuda ibam a? 47 A dzeye à gà ɓəzla muva ana, ta gewa aà mazambaɗa dər a gà mbulum tar ata, ti zehe ɗa akahər Asa dede ŋgar aà bəra ya.

48 Akahər ata ka, əbay riŋ i Edum tsa, say wele ana əbay gà Yahuda a zla, a tike aɗəm a, na a kwere a ya. 49 Yehusafat a geye gà muta yam kamala biy gà Tarsis a, aà mandzəkara gà gura ika ahəɗ kwite Ufir a, ama ka, tàa da asa tsa, aɗaba muta yam a haɓa i Etsiyuŋ-Gever. 50 Ahaziya kəla Ahav a gwaɗa a Yehusafat: « Gà ɓəzla meslire gà nda gà biy yak, tə da akaba nda muta yam a təv ilik ŋa, ama Yehusafat a niw. 51 Yehusafat a mət, ti le ŋgat a liwiŋ gà dive gà tsir ŋgar, i kwite Dawda. Dite Yehuram kəla ŋgar a zla təv mendze mekwere ŋgar.

Ahaziya a ne əbay gà Isərayel

52 I huɗ mive makurwa gər ŋgar təsəla (17) ŋana Yehusafat əbay gà Yahuda, a ge a ika mekwere ya ka, Ahaziya kəla Ahav a ne əbay gà Isərayel i Samariya ya, a kwara mive sula. 53 A gewa ka, dukw ana a da a gər a BATSAH kwa ŋa tsiye, a zazam ka, gà dukw ana gà dede ŋgar, mama ŋgar, nda gà Yerubuwam kəla Nevat ta gewa ɗa ya, ta bana dər aɗəm gà Isərayel a bakal a. 54 Ahaziya a gewa megemir a Baal, a dzawar gurmits a biye. Taŋa na a vəl matsəɓatsəɓ a BATSAH kwa ŋa Mbulum gà Isərayel, kamala ana dede ŋgar a gewa ɗa ya.