1 Əbay 21

Makəɗa Nabut

1 Araha na dukw ana a ge ba, i dəba gà dukw ata ya, wele duwa zləm Nabut gà Yizereyel, guvah viŋye ŋgar riŋ i Yizereyel, ar ka, aà guva ga Ahav əbay gà Samariya. 2 Ahav a gwaɗa a Nabut: « Viliŋ guvah viŋye yak aaha, i gewe a aɗəm a gà ala duwa, aɗaba ar ka, bise aà guva ga gà, i vileke a aɗəm a, guvah viŋye ŋgiɗ ana ŋgwal ŋa ya. Ama na kà waya ka, i dzeke a ahər a gà siŋgwe tits a tsakala ŋa . » 3 Ama Nabut a gwaɗar aaka a Ahav: « Iye ka, vatwa gà riŋ aà məvəlak guvah viŋye gà bàba gà tsir gà ana ta miyekiŋ dər a tsa, i ne a ka, dukw hwarwa na ika miɗ BATSAH kwa ŋa ya . » 4 Ahav a mbəɗ aba gər a ma, nda gà Maŋgayaba tsa, i huɗ matsəɓatsəɓ a, aɗaba dukw na Nabut gà Yizereyel a gwaɗar ka: « Iye ka, vatwa gà riŋ aà məvəlak guvah viŋye gà bàba gà tsir gà ana ta miyekiŋ dər a tsa . » A həna aka təv mehinne ŋgar, a mbəɗ ahəm aà dəduŋ ga ndup, a waya mazəma dukw mezime tsa. 5 Məkəs ŋgar Zezabel a daha a təv ŋgar a gwaɗar: « Dukùla na a tsiɓeke a ya, na ka waya mazəma dər dukw mezime asa tsiye? » 6 Ahav a gwaɗar aaka: « Aɗaba Yàa fafəl a Nabut gà Yizereyel i gwaɗar ka, viliŋ guvah viŋye yak i sikimiŋa, kige tsa na kàa waya ka, i vilek a ahər a guvah viŋye ŋgiɗ na kàa waya ya. Ama a gweɗìŋ aaka ka: « I vileke a guvah viŋye gà tsa . »

7 Tsam ka, Zezabel məkəs ŋgar a gwaɗar aaka, wànà kər tsiye na əbay ana a kwere a gà Isərayel a! Kər ka, hitse, ka zəm dukw mezime, gəzləŋ yak maŋgayaba. Iye na, a vileke a guvah viŋye Nabut gà Yizereyel ata ya. 8 Zezabel a wetseye gà wakita nda zləm Ahav, a dzaya aakahər nda lamba matsərəɗ əbay. A slərayaha gà wakita ata, a gà bàba ŋana, nda gà ɓəzla makwara ahəɗ, i kwite ata Nabut mandza ŋa iɗəm a. 9 Araha na dukw ana a wetse a huɗ gà wakita ata a ya: « Zalum aà mege ndəra, tikum Nabut, aka miɗ mayahaba gər gà mburma. 10 Kà dzum ahər gà gərlaka gà mburma sula aka miɗ ŋgar, ti ne gà ɓəzla sida, ta gwaɗar ka, kàa tsik dukw ana ŋgwal ŋa tsiye aà gà Mbulum nda əbay. Gəsumara ŋgat a bəra ya, kə kalawum nda kur, mə mət. 11 Gà mburma ana, tar mandza ŋa, i huɗ kwite ŋa ilik nda gà Nabut a, gà bàba gà mburma, gà ɓəzla makwara ahəɗ, ana i kwite ata ya, ta ge kamala ana Zezabel a wetse a huɗ gà wakita ŋgar ata a sləraya taraha ya. 12 Tə zal aà mege ndəra, ti tike Nabut aka miɗ mayahaba gər gà mburma. 13 Gà gərlaka gà mburma sula ya, tə ndza ser aka miɗ Nabut. Gà gərlaka gà mburma ata ti ne gà ɓəzla sida ika miɗ mayahaba gər gà mburma fit tserdze ta gwa: « Nabut ka, aka tsik dukw ana ŋgwal ŋa tsiye aà gà Mbulum nda əbay . » tsam ka, ta gəsara Nabut i huɗ kwite ya, ta kalawa ŋgat nda kur a mət. 14 I dəba ŋa ya, gà ɓəzla makwara ahəɗ ana i huɗ kwite ata ya, tə slər mburma aà ta gwaɗa a Zezabel: « Nabut ka, tàa kalawa ŋgat nda kur, aka mət . » 15 I təv ana Zezabel a tsaraka, tàa kalawa Nabut aka mət a ka, a gwaɗa a Ahav: « Da, ka tə zla guvah viŋye Nabut ana a niw makalàk dər a. Aɗaba Nabut ka, ar à bəra asa tsa, aka mət. 16 I təv ana Ahav a tsaraka, Nabut aka mət a ka, a da a guvah viŋye Nabut gà Yizereyel ata, a zla ba.

17 Tsam ka, BATSAH kwa ŋa a gwaɗa a Eliya mala məmà à bazlam Mbulum ata i Tisibiya ya: 18 « Hitse, ka da ləmum akaba nda Ahav əbay gà Isərayel ana i Samariya ya. Riŋ kinehe ka, i guvah viŋye Nabut. A da a mazla ŋa. 19 Ki ta gweɗere a ka, araha na dukw ana BATSAH kwa ŋa a gwa ya: ‹ Dukùla! I dəba ana kə kəɗ mburma ya ka, kì ndzike be a gà dukw ŋgar asa ya? › Ki gweɗere a aaka asa ka, araha na dukw ana BATSAH kwa ŋa a gwa ya: ‹ I təv ana gà kəra tə ndakaɗ məmbəz Nabut a ka, gà kəra ti ndekeɗe a məmbəz yak i fata mbaŋa › . » 20 Ahav a gwaɗa a Eliya: « Kər na mala mene are gà ya, kàa le aà ye? » Eliya a gwaɗar aaka: « Haya i le aà kər ka, aɗaba kà vəl ba aà mege dukw ana a da a gər a BATSAH kwa ŋa tsiye. 21 Aɗaba taŋa BATSAH kwa ŋa a gwaɗak ka: I zle aka kərra dukw mesewere are ya, i dzeye a à gà mburma ana i gwala yak a fit, i dzeye a à gà asləka gà mburma ana i gwala yak a, tar gà ɓele kige tsa, gà mburma ana ti ziwe a gər tar i Isərayel a fit tserdze. 22 I ne a à ga yak ka, kamala ana i ge à gà mburma ana i ga i bəra Yerubuwam kəla Nevat a, a ndzìkìɗe a ba asa ka, kərga na i ge à gà mburma ana i ga i bəra Basa kəla Ahiya ya, aɗaba bakal ana ki ge, a vəl matsəɓatsəɓ a BATSAH kwa ŋa, dite ka bana aɗəm gà Isərayel a. 23 Aka gər Zezabel mbaŋa ka, araha na dukw ana BATSAH kwa ŋa a tsik a. '' Gà kəra ta pepiɗe a Zezabel aà zlagam huɗ kwite Yizereyel. 24 Wele ana i gwala Ahav a ta mite a i huɗ kwite ya ka, gà kəra na ti te pepiɗe ya, ama na a mite a i dala ya ka, gà məmba na ti ta zim a ya. 25 Wura riŋ diydiy kamala Ahav ana a vəl ba aà mege dukw ana ŋgwal ŋa tsa, na i təv are BATSAH kwa ŋa ya. Məkəs ŋgar Zezabel na a bana ahər ŋgat a. 26 Ahav aka geye gà dukw ana ŋgwal ŋa tsiye ndeyndey hinne, na nda mazambaɗa aà gà mbulum ana gà ndzer ŋa tsiye, kamala gà Amuriya ana, BATSAH kwa ŋa a dəgəz tar ika miɗ gà Isərayel a.

27 I təv ana Ahav a tsaraka gà bazlam Eliya ata ya ka, a kwayatsa ikaba à gà petek ŋgar a. A tike akaba petek buhwa, a ge ndəra, a hənawa aka buhwa ata. Dite, a dawa ka, zèye, zèye zèye. 28 BATSAH kwa ŋa a gwaɗa a Eliya gà Tisibiya: 29 « Kàa ŋgatar na Ahav a nikiɗ aba ika miɗ gà ya? Aka nikìɗ aba ika miɗ gà, aɗaba taŋa, i zlekere a mesewere are ya tsa, na i huɗ mandza aà bəra ŋgar a, Mesewere are ata a ti dere a aka gà mburma ŋgar a ka, akahər kəla ŋgar a.