1 Əbay 20

əbay Ben-Hadad a dza maŋgwaɓa aà gà Samariya

1 Ben-Hadad əbay gà Siriya a yaha gər a gà sliwdze ŋgar. Gà əbay pampam dzik makər gər ŋgar sula (32), tə daha aà mazlaka ŋgat, nda gà piris tar, nda gà muta piris tar. A da, a dza maŋgwaɓa aà huɗ kwite Samariya, a ge ahər guvəl. 2 A slər gà mburma a huɗ kwite a təv Ahav əbay gà Isərayel. 3 Aà ta gwaɗar ka: « Araha na Ben-Hada a gwa ya: ‹ Siŋgwe yak nda gura yak ka, gà biy gà. Gà məkəs yak nda gà ɓəza yak ana tə tsahə̀naya ya ka, gà biy ga › . 4 əbay gà Isərayel a gwaɗar aaka: « Kamala ana kə gwa ya əbay gà, batsah gà ŋa. Iye ka, ihər yak, nda gà limana gà ŋa fit . »

5 Gà ɓəzla məma à labara ta mbəɗ gər ta gwa: « Araha na dukw ana Ben-Hadad a gwa ya: ‹ Yàa slərrakaha mifefile nda magwaɗak aaha ka, ki ndzìŋera gà ndzemde məvəɗa kur siŋgwe yak a, nda gura yak a, gà məkəs yak nda gà ɓəza yak a fit tserdze › 6 Aɗaba ndidwe kamala naha ya ka, i slə̀raha gà ɓəzla meslire gà a təv yak, ti yahara i ga i ma yak a, nda gà i ga gà ɓəzla meslire yak a. Gà dukw ana a tsahən aà are yak fit tserdze ya ka, ti ndzìkiŋeriŋŋa » 7 əbay gà Isərayel a yaha gər à gà bàba gà mburma ana ika ahəɗ ŋgar a, a gwaɗa a tar: « Kamkam fərum ahər kwaŋ, Ben-Hadad waya a gekwe a ka, ahəm. Aka slərra gà ɓəzla meslire ŋgar a təv gà ya. Aà mandzə̀ka gà məkəs gà, gà ɓəza gà, gà ndzemde məvə̀ɗa kur siŋgwe gà, gà gura gà fit ka, Yàa niw a duwa ilik tsa. 8 Gà bàba gà mburma ata ti yahaba gər a fit a, nda gà Isərayel fit tserdze ta gwaɗar aaka: « Kà dzar zləm tsa, kə gəs akaba tsidze . » 9 A gwaɗa a gà ɓəzla məmaya à labara Ben-Hadad ata: « Da gwaɗum a əbay batsah gà ŋa ka: ‹ Gà dukw ana kà wiz à iye malahalah ŋa ya ka, i ge a taŋa. Ama dukw ana kà wiz aà iye kinehe ya ka, i ge a taŋa asa tsa » Gà ɓəzla məma à labara ata tə da, ta mar dər a Ben-Hadad batsah tar ŋa.

10 Ben-Hadad a slər gà mburma a təv ŋgar, aà ta gwaɗar: « Gà mbulum ta viliŋ batsah mesewere are, na ahəɗ Samariya, aka sle mə̀r aha duwa ahər, nda gà mburma ana tar riŋ ti zezeme a iye ya ! 11 əbay gà Isərayel a gwaɗar aaka: « Gwaɗumar ka: wele ana a de a a guvəl a ka, a ge a zlapa kamala wele ana a mara i guvəl a tsa. 12 Ben-Hadad a tsaraka bazlam ata ka, akahər ana tar riŋ ihər aà masa dukw mese nda gà asiŋ gà əbay ŋgiɗ i mekiriwe ga petek a. A gwaɗa a gà ɓəzla meslire ŋgar: « Dumaha » dite tə dzəba aà mege guvəl aà huɗ kwite Samariya.

13 Ama mala məmà à bazlam Mbulum duwa a dara a təv Ahav əbay gà Isərayel a, a gwaɗar: « Araha na dukw ana BATSAH kwa ŋa a gwa ya: ‹ Kàa ŋgat a a batsah mayahaba gər gà sliwdze aaka hinne ya tsiye? Yàa dzak gà mburma ata ahər yak mbakum, aà kà sər a dər ka, iye na BATSAH kwa ŋa ya ›. 14 Ahav a gwa: « Ndakahər weke na BATSAH kwa ŋa a dziŋ a tar a? » Mala məma à guma Mbulum ata a gwaɗar aaka: « Ndakahər gà ɓəza gà gawla ana, gà ɓəzla makwara ahəɗ tə dza tar aà megemir sliwdze ya. Ahav a gwa: « Weke na a dze a ba aà mege guvəl a . » A gwaɗar aaka: « Kər ŋa . » 15 I fata ya ka, Ahav a ɗama gà ɓəza gà gawla ana, gà ɓəzla makwara ahəɗ, tə dza tar a megemir sliwdze ya. Tar ka, dərməka sula nda dzik makər gər ŋgar sula (232). I dəba tar ata ya ka, a hadzal gà sliwdze gà Isərayel tserdze, tar dəbuw təsəla (7 000). 16 Tə da a mege guvəl ata ka, nda magər pat ŋa, tsaatsa Ben-Hadad ka, tar riŋ aà masa dukw mese, tar gà makwaya ŋa i mekiriwe ga petek ata hiywe nda gà əbay ata dzik makər gər ŋgar sula (32), tə daha a mazlaka ŋgat a. 17 Gà ɓəza gà gawla ana, gà ɓəzla makwara ahəɗ tə dza tar a megemir sliwdze ya, tə lah aà guvəl. Ben-Hadad a slər gà mburma aà tə da fər ikaba ya. Gà mburma ata tə dara ta mar dər ta gwaɗar: « Gà mburma tàa dara i Samariya ya . » 18 A gwa: « Na tə dara ka, biy mandza zay ka, gasumara tar, nda mesife ya, ku mege na tə dara ka, a guvəl a ka, gasumara tar a nda mesife ya asa mbaŋa. 19 Gà ɓəza gà gawla ana, gà ɓəzla makwara ahəɗ tə dza tar a megemir sliwdze ya, tə dara i huɗ kwite ya ka, gà sliwdze gà Isərayel tə zazamara tar i dəba ya. 20 Ku mege weke a kəɗ mala mene are ŋgar. I fata ya ka, gà Siriya tə təz, gà Isərayel tə zazam tar i dəba ya. Ben-Hadad əbay gà Siriya a be aba ŋgar nda piris, nda gà asiŋ gà ɓəzla matsala aka gà piris ŋgiɗ. 21 I dəba ŋa ya, na əbay gà Isərayel a da a guvəl a, a bats gà piris nda gà muta piris ŋa dze, a dzeye a à gà Siriya birɗek.

22 Mala məma à guma Mbulum a sərkàha a təv əbay gà Isərayel a gwaɗar: « Da, vəl aba ndzəɗa lele, hàdzal ba yak lele. Aɗaba ndizìŋ ka, əbay gà Siriya a mere a aà mege a kər a guvəl a . »

23 Gà ɓəzla meslire əbay gà Siriya ata ya ta gwaɗar: « mbulum tar ka, mbulum ana ika gər kwite ya, aɗaba taŋa na tar gà ndzəɗa tə za kwa ya. Ama na mege ki gekwa guvəl ata, ika varavada ka, nda ndzer ki zekwe a tar a nda ndzəɗa. 24 Araha na dukw ana ki ge a ya: ‹ Ndzək gà əbay ika təv mendze tar a. Dza aɗəm gà ɓèzla makwara ahəɗ a təv mendze tar. 25 Kər ŋa pala gà sliwdze ana gà ndzəɗa ŋa, tits kamala gà na ti dzeye iɗəm a ya. gà piris nda gà muta piris tekeɗe kamala taŋa ya mbaŋa, dite ki te gikwe a guvəl nda gà tar ika varavada. Nda ndzer ka, ki zekwe a ter a ndzəɗa › » Ben-Hadad a dza tar aaka zləm, a ge dukw ana ti tsikar a. 26 Ndiziŋ ŋana ka, Ben-Hadad a da a maɗama gà sliwdze gà Siriya. I dəba ŋa ya, a tsəl a Afek aà mege guvəl aà gà Isərayel. 27 Ahav a ɗama gà Isərayel mbaŋa. Ta vəl a tar dukw mezime, dite tə da a mege guvəl aà gà Siriya ya. Gà ɓəza ga Isərayel ta ge təv mandzəba tar, ser aka tar, kamala gà ɓəza palam gà awak ana sula ya. Ama gà Siriya ka, tə rah aka ahəɗ kwite ata. 28 Mburma Mbulum a sərkàha, a təv əbay gà Isərayel a gwaɗar: « Araha na dukw ana BATSAH kwa ŋa a gwa ya: Aɗaba gà Siriya ta gwa ka, BATSAH kwa ŋa ka, Mbulum ana i gər kwite ya, tsəka Mbulum ana ika varavada ya tsa. I dzeke a batsah mayahaba gər gà mburma aaha fit a, ahər yak. Kərga taŋa ya na, ki sirwim a kuɗa ka, iye na, BATSAH kwa ŋa ya. 29 Gà mburma ata tə ndza i təv mandzəba tar, ser ser akaba mehinne matəsəla. Aà mehinne matəsəla ŋana ka, guvəl a dzahərba. Gà Isərayel ta bats gà sliwdze gà Siriya ana nda sik a, dəbuw dərməka (100 000), i huɗ mehinne ilik a. 30 Gà na ti zeha ya, tə təz a huɗ kwite Afek, ama zlagam a mbazla aka gà mburma ata, tə zeha dəbuw dzik səla gər ŋgar təsəla (27 000) ya.

Ben-Hadad a be a huɗ kwite, a kàh ba a meɗikwir ana i mendzwil ga ya. 31 Gà ɓəzla meslire ŋgar ta gwaɗar: « Araha mì tsaraka ka, gà əbay ana i Isərayel a ka, gà əbay ana mburma a ndza tar are tsehe ya. danayakwa aba gà buhwa aka dəmkul, dite ndeweɗeyekwa gà liɓir a gər, dite ki tekwe a dər a bəra əbay gà Isərayel. Biytsa a miseke a a kwa nda mesife . » 32 Tə danaya aba gà buhwa, tə ndeweɗeye gà liɓir a gər. Ti ndze a bəra əbay gà Isərayel ka, ta gwaɗar: « Mala meslire yak Ben-Hadad a gwaɗak ka, məsak aà iye nda mesife te » Ahav a gwaɗar: « Wànà riŋ nda mesife mba ya? Ŋgat ka, damər gà! . » 33 Gà mburma ata Ben-Hadad a sləraha tar a ka, ti tike bazlam ata aà ahər, kamala ŋgwal bazlam a, ta fafəl aaka a Ahav tsara, ta gwaɗar: « Haya, Ben-Hadad ka, damər yak ndzer » Ahav a gwaɗa a tar: « Dum, ka ti yahumara! Ben-Hadad a dara i təv makahaba ŋgar a, Ahav a zla a muta piris ŋgar. 34 Ben-Hadad a gwaɗar: « I meke a aà gà kwite ana dede gà a ndzək ɗa aà dede yak a ahər. Ki dzewuwe a à gà dukw yak i Damas, kamala ana dede gà, a dzawuwa à gà dukw ŋgar i Samariya ya. Dite iye ka, ki gìseme a aba masla, dite ki debiŋa. I dəba ana ta gəs aàba masla ya ka, a daba.

35 Ilik ŋa i liwiŋ gà ɓəza sik gà ɓəzla məma à guma Mbulum a, a gwaɗa a wele ana ta gewa akaba megemir a, kamala ana BATSAH kwa ŋa a gwaɗar a: « Lekiŋ, i gək kamkam! » Ama wele ata a niw malakar. 36 Mala məma à guma Mbulum ata a gwaɗar: « Kàa dza zləm a bazlam BATSAH kwa ŋa tsa, agəra ta ŋa, i təv ana ki de aà iye ya ka, azil a kiɗe a kər. A da i təv ŋgar a ka, azil a dara a le ahər a kəɗ ŋgat . » 37 Mala məma à guma Mbulum ata, a le aà misle ŋgiɗ a gwaɗar asa: « lekiŋ, i gək kamkam! Wele ata a lakar, a gar mbəlak. 38 Mala məma à guma Mbulum a da aka vatwa əbay a ndiwìɗ gər a dan petek aka are. 39 I təv ana əbay a de a ya ka, a zalar a gwaɗar: « mala meslire yak, a da a guvəl. Akahər mege guvəl ka, wele duwa a dara ika mandəra ba ya, a gisiŋaha mburma, a gweɗìŋ: « Kaslìŋ wele aaha, na aka be aà kər a ka, mesife yak a dzeye a aɗaba ŋgat, kige tsa, ki pile a gər nda kur siŋgwe kiliw dzik makər (30) . » 40 I təv ana mala meslire yak riŋ a ge a megemir ŋgiɗ pampam a ka, wele ata a lèlìkw ihər a. əbay gà Isərayel a gwaɗar: « Taŋa kər ŋa kàa sas ikaba seriye yak a. 41 Wele ata a zla petek ika are ŋgar a tsəmma tsara, dite əbay gà Isərayel a sər ŋgat ka, ilik ŋa, i liwiŋ gà ɓəzla məma à guma Mbulum a. 42 I fata ya kuɗa ka, mala məmà à bazlam Mbulum, a gwaɗa a Ahav, araha na dukw ana BATSAH kwa ŋa a tsik a: « Kàa məsak a wele ana i gwaɗak kəɗ a, ama, kà məsak à ŋgat a da ba. Aɗaba taŋa, kər na ki mite a avukw ŋgat a, gà mburma yak ta mete a avukw gà mburma ŋgar. 43 əbay gà Isərayel a mbəɗ gər a ma a Samariya, nda gà Maŋgayaba tsa, i huɗ matsəɓatsəɓ a.