1 Əbay 19

Eliya a val aba a Hureb

1 Ahav a ɗama gà dukw ana tserdze Eliya a ge ya, a məkəs ŋgar Zezabel, nda məbatsa gà ɓəzla məma à guma Baal ana a bats tar nda masalama ya. 2 Zezabel a slər mburma a təv Eliya aà magwaɗar ka: « Gà mbulum ta viliŋ batsah mesewere are, na ndidwe kərga naha ya ka, Yàa dzeye aà mesife yak, kamala ana kà dzeye aà mesife gà ɓəzla məma à guma Baal a tsiye! » 3 Eliya a ge magəɗa, a val a be a ba ŋgar, a Beer-Seva ana ika ahəɗ Yahuda ya. I fata na, a məsak à mala meslire ŋgar gawla ŋa ata ya. 4 Ŋgat ŋa, a val aba aka mandazla. Wurwas aà vatwa, a ndza aà huɗ sìsiye kəla dizl ɗaf duwa, a wiz məməta, a gwa: « Aka sle i ga ide BATSAH kwa ŋa! Kinehe ka, zla mesife gà, iye ka, ŋgwal ŋa hinne ika gà tsir gà ya tsa » 5 A həna aà huɗ kəla dizl ɗaf ata, a ndze are. Ama gawla Mbulum a daha a ləm ahər a gwaɗar: « Hitse ka zəm dukw mezime! » 6 Eliya a pər ika ba ya ka, gatuw riŋ medeŋa nda kur ana akwa ihər a, aha yam nda duwa ŋa a gər ŋgar. A zəm dukw mezime, a sa aaka yam, dite a mà aka mehinne asa. 7 Gawla Mbulum a mbəɗaha gər masula ŋa, a ləm ahər a gwaɗar: « Hitse ka zəm dukw mezime, aɗaba ki de a ka, aka zubul vatwa » 8 Eliya a hitse, a zəm dukw mezime, a sa aaka yam. A vəlar ndzəɗa, a dzə̀ dər ba aà mede, gà həpat dzik faɗ (40), gà həvəɗ dzik faɗ (40), tsikw a Hureb, kwite Mbulum.

9 A ta mendzeha a fata ka, a pəts a slə̀lak a həna iɗəm hwiyip. BATSAH kwa ŋa a fafəlarra, a gwaɗar: « Ki ge a megemir la i faha ya, Eliya? » 10 A gwaɗar aaka: « BATSAH kwa ŋa kər ana Mbulum mala aka miɗ gà sliwdze ya, iye ka, Yàa waya kər hinne. Aɗaba gà Isərayel ka, tàa məsak a magəsa masla ana kə gəs nda gà tar a, tàa mbazlaya aà gà təv madulayak aaka duwa, tàa bats gà ɓəzla məma à guma yak nda masalama. Iye ilik na i zeha ya ka, araha ta waya medzeye aà mesife gà » 11 BATSAH kwa ŋa a gwaɗar: « Dara i faka ya, ka hitse aka gər kwite, aka miɗ BATSAH kwa ŋa. Iye BATSAH kwa ŋa i deke a ika miɗ a »

Araha batsah himbiɗ a ge hinne . A ɓazlaya akaba à gà kwite, a batsaya iba gà gurum a, ika miɗ BATSAH kwa ŋa. Ama BATSAH kwa ŋa riŋ i himbiɗ ata tsa. I dəba himbiɗ ata a ge ya ka, ahəɗ a ɓazla, ama, BATSAH kwa ŋa riŋ i huɗ məɓazla ahəɗ ata tsa. 12 I dəba mə̀ɓazla ahəɗ ata ya ka, akwa a vat ba, ama BATSAH kwa ŋa riŋ i akwa ata tsa. I dəba akwa ata ya ka, kəla himbiɗ a ge. 13 I təv ana Eliya a tsaraka ya ka, kəsàf a kaha are ŋgar nda baramusa ŋgar. A dara i slə̀lak a, a hitse aka biye mada a slə̀lak ata. I dəba ŋa ya, a tsaraka mifefile asa, a gwaɗar: « Ki ge a dzena megemir là na i faha ya Eliya? » 14 I fata ya ka, a gwaɗar aaka: « BATSAH kwa ŋa kər ana Mbulum mala aka miɗ gà sliwdze ya, iye ka, Yàa waya kər ka, hinne. Aɗaba gà Isərayel ka, tàa məlak a magəsa masla ana kə gəs nda gà tar a, tàa mbazlaya aà gà təv madulayak aaka duwa, tàa bats gà ɓəzla məma à guma yak nda masalama. Iye ilik na i zeha ya ka, araha ta waya medzeye aà mesife gà. 15 BATSAH kwa ŋa a gwaɗar: « Da, mbəɗ gər ndaka vatwa ana ka da dərra ndaka mandazla ya, a Damas. I təv ana kàa ndze a fata ya ka, mbəɗ mal a gər a Haza-el, mene əbay gà Siriya. 16 I dəba ŋa ya, i mbiɗe à mal a gər a Yehu kəla Nimsi, mene əbay gà Isərayel. Ki mbiɗe à mal aka Elize kəla Safat ana a dara i Avel-Mehula ya. Aà mene mala məmà à bazlam Mbulum a təv mendze yak 17 Gà mburma ana tàa beye i masalama Haza-el a ka, Yehu a ta betse a tar. Gà mburma ana tàa beye i masalama Yehu a ka, Elize a ta betse a tar. 18 Ama i ta miseke a aà gà Isərayel dəbuw təsəla (7 000), gà na tàa dza gurmits a bəɗ aka miɗ Baal, tàa ndzìwìɗer ahəm tsiye »

19 Eliya a da i fata ya ka, aka le a aà Elize kəla Safat, riŋ a fìte a i guvah nda gà sla. Sula sula kurwa gər a sula. Ma kurwa gəra sula ŋana ka, Elize ŋa na riŋ a fìte a dər a. Eliya a daha a təv ŋgar bise, a ye aaka aba baramusa ŋgar a. 20 Elize a mə̀sak aba aà gà sla ŋgar a, a valaha a təv Eliya a gwaɗar: « Kamkam viliŋ vatwa i te a ger a aba wusa a gà dede gà, nda mama gà ya dzekweŋ dite na i dere a i zezeme a kər a » Eliya a gwaɗar aaka: « Da, ka mbəɗ gər a, Yàa wiz aà kər duwa ya? » 21 Elize a məsak aà Eliya, a ndzək aà gà sla mifìte ŋgar ata ya, sula. A dza kamala dukw matawala fəla ya a Mbulum, Dite a de gà sla ata sula ya, nda zukw gà sla ŋa ata, a sasa a gà mburma ŋgar, ta papaɗa. I dəba ŋa ya, a da a tə zazam Eliya, a ne mala meslire ŋgar.