1 Əbay 18

Eliya a da a təv əbay Ahav

1 Aka ndza hinne, I huɗ mive makər ŋa ana ya ka, BATSAH kwa ŋa a gwaɗa a Eliya: « Da pàt aba a əbay Ahav, aɗaba i tìɗere a yam aka gər ahəɗ a . » 2 Eliya a da məpàtà aba a Ahav. May riŋ a ge a i Samariya hinne . 3 I fata ya ka, Ahav a zal a Uvadiya, wele ana ga əbay ihər ŋgar a. Tsaatsa ka, Uvadiya a ge magəɗa a BATSAH kwa ŋa hinne. 4 Akahər ana Zezabel, a betse a gà ɓəzla mə̀ma à guma Mbulum a ka, Uvadiya aka ndzək dərməka (100), a kaha tar dzik əzləm dzik əzləm (50, 50), a gà zlə̀lak. A dawa taraha à gà dukw mezime nda yam. 5 Ahav a gwaɗa a Uvadiya: « Tiwlikama kwite fit, aà mayaha gà təv ana yam a sewa iɗəm a tsiye, nda gà tulwah, biytsa ki ŋgeteme a gà kwizir aà magəsa mesife gà piris ma nda gà mule ma, tsəka balaari ki te betseme a gà dukw gənaw ma əŋgal . » 6 Tə sas aba ahəɗ kwite aà madaya aɗəm. Ahav a zla vatwa aà gər ŋgar, Uvadiya tekeɗe a zla a vatwa a gər ŋgar ilik mbaŋa. 7 Akahər ana Uvadiya riŋ, aà vatwa ya ka, dìdèŋgìrŋgìr tàa ləma nda Eliya, Uvadiya a sər a ŋgat, a kal aba a bəɗ a gwaɗar: « Kər ana Eliya batsah gà ŋa tsiye? » 8 Eliya a gwaɗar aaka: « Nda ndzer iye ŋa, daha gwaɗa a batsah yak ŋa ka, Eliya ɗa! » 9 Uvadiya a gwaɗar aaka: « Bakal wara dziye na i ge ya? na ki vile a mala meslire yak ahər a əbay Ahav aà makə̀ɗ iye ya? 10 BATSAH kwa ŋa Mbulum yak riŋ nda mesife, Ahəɗ ŋgiɗ riŋ, kige tsa mekwere ŋgiɗ riŋ, na batsah gà ŋa, aka sləraya aɗəm mburma, aà mayaha kər tsiye ka, riŋ tsa. A vəlawa mimbeɗe, a gà mburma ana ika mekwere ahəɗ ata ya, na ta gwaɗar: « Ar ɗa i faha tsiye . » 11 Dite kinehe ki gweɗiŋŋa kuɗa ka, da gwaɗa a batsah yak ŋa, Eliya naha ya! 12 Ama i təv ana Yàa da a kər a ka, Mezite BATSAH kwa ŋa a de a a kər a, a təv ana i sər a tsiye. Iye ka, i ta ɗeme a a Ahav, ama a le a a kər a tsa, dite iye ka, a kìɗe a iye. Kəla ka, məmàkara a gər a, mala meslire yak a gewa magəɗa a BATSAH kwa ŋa ka, daga a gər ana iye kəla ŋa ya. 13 Wànà tàa ɗamak tsiye batsah gà ŋa, na dukw ana i ge akahər ana Zezabel a betse a gà ɓəzla məma à guma Mbulum BATSAH kwa ŋa ya? Yàa kaha gà mburma ata dərməka (100). I dzaya tar dzik əzləm əzləm (50, 50) a gà slə̀lak, i vəlawa a taraha gà dukw mezime nda yam. 14 Ama kinehe ki gweɗiŋ a ka, da gwaɗa a batsah gà ŋa, Eliya naha ya! ama kəla ka, a de a kìɗe a iye! 15 Ama Eliya a gwa: « BATSAH kwa ŋa riŋ nda mesife, ŋgat na mala aka miɗ gà sliwdze ya, iye riŋ ihər i gere a megemir a, i ta petere a aba a Ahav mbakum ŋa aaha . »

16 Uvadiya a da, aà maləma akaba nda Ahav, a ɗamar, dite Ahav a da aà maləma akaba nda Eliya. 17 I təv ana Ahav a ŋgata a Eliya ya ka, a gwaɗar: « Kər ŋa naha, na ka zlara a mesewere are aka gà Isərayel a! » 18 Eliya a gwaɗar: « Iye tsa, na mala mazlara mesewere are aka gà Isərayel a. Ama kurum nda gà na i huɗ ga i bəra dede yak a. Aɗaba kàa mbəɗum dəba a məpala ahəm BATSAH kwa ŋa, dite kər kà zambaɗawa à mbulum Baal. 19 Kinehe ka, yaha gər a gà Isərayel fit tserdze, a təv gà, aka gər kwite Karmel, nda gà ɓəzla məma à guma mbulum Baal, ata dərməka faɗ nda dzik əzləm a (450), nda gà ɓəzla məma à guma mbulum Akera ata, dərməka faɗ (400), tə zəmawa akaba dukw mezime a təv ilik ŋa nda gà Zezabel a.

Gà Eliya nda gà ɓəzla məma à guma Baal

20 Ahav a slər gà ɓəzla məmaya à labara a təv gà Isərayel fit tserdze, dite a yaha gər, a gà ɓəzla məma à guma Mbulum aka gər kwite Karmel. 21 Eliya a sərkàha a təv gà mayahaba gər gà mburma fit tserdze a gwaɗa a tar: « Haa ndeɗime na ki ndìɗìkwime a gər aà mazazama gà Baal nda BATSAH kwa ŋa sula məma ya? Na BATSAH kwa ŋa na Mbulum ndzer a ka, zazamum ŋgat, na Baal ka, zazamum ŋgat . » Ama gà mayahaba gər gà mburma ata ka, tàa fafəlar aaka tsidze. 22 Eliya a gwaɗa a gà mayahaba gər gà mburma asa: « Iye ilik na i zeha mala məma à guma BATSAH kwa ŋa ya. Ama gà ɓəzla məma à guma Baal, tar ka, dərməka faɗ nda dzik əzləm (450). 23 Tə dza kwa gà mbə̀luv gà sla sula: Tə zla iɗəm mbə̀luv ilik, tə tsala ikaba ya, tə dza aka tsalaka, ama ti tike ahər akwa tsa. Iye tekeɗe ka, i ge a nda mbə̀luv sla ŋgiɗ kamala taŋa ya mbaŋa. I dze a aka gər tsalaka. Ama i tike ahər a akwa ɓav tsa. 24 Ki zelwim a, a zləm mbulum kurum, dite iye tekeɗe, i zele a a zləm BATSAH kwa ŋa. Mbulum ana aka ŋgama nda akwa ya ka, taŋa na a ne Mbulum ndzer ŋana ya » . Gà mayahaba gər gà mburma ata fit tserdze, ta ŋgama aaka ta gwa: « Bazlam ata ka, ŋgwal ŋa lele ndzer . »

25 Eliya a gwaɗa a gà ɓəzla məma à guma Baal: « Zlum iɗəm a mbə̀luv sla ya ilik, kà ndzum ahər ba malahalah ŋa. Aɗaba kurum ka, diŋ. Zalum a zləm mbulum kurum, ama ka, ka tikwim ahər akwa tsa . » 26 Gà ɓəzla məma à guma Baal ata, tə zla mbə̀luv sla ata ta vəl a tar a, tə dzəba aà megemir ŋa. Tə zalawa a zləm Baal, daga aà gər mekwede ya, tsikw a magər pat, ta gwa: « Baal, ŋgama a mə̀r aakara! » Ama ka, tàa tsaraka duwa kwizikw tsidze, tə dzəba aà mandabaya a mbulum aà guva təv madula aaka dukw ata, tə zlazl a.

27 A ndze a magər pat ka, Eliya a sawla a tar, a gwa: « Wideywim nda ndzəɗa, aɗaba ŋgat ka, mbulum! biytsa riŋ a megemir, kige tsa riŋ i ma tsa, kige tsa ar aà vatwa, bəla tsa, ar ika mendze are ka, a piɗekiŋe . » 28 Gà ɓəzla məma à guma Baal, ta wideye nda ndzəɗa hinne asa, kamala matawala fəla tar a, tə tayaya ba nda masalama, nda suwal haa məmbəz a zlalayara i ba ya. 29 I təv ana a ndaha i magər pat a ka, Tə səkah aà matsatsafa duwa, tsikw a ndze akahər məvəla dukw taf ana i hawa ya. Ama ka, tàa tsaraka biye ɗa mifefile duwa tsa, mendzikiɗe ba duwa tsa. 30 Eliya a gwaɗa a gà mayahaba gər gà mburma tserdze: « Sərəkumara a təv gà ya . » Gà mayahaba gər gà mburma tserdze tə sərkàha a təv ŋgar. A dzəba aà maləmbaɗa aà təv madula aaka duwa a BATSAH kwa ŋana ta mbazla dər a. 31 A ndzək gà kur kurwa gər ŋgar sula (12), tits aà maɗama ba gà gwala gà ɓəza Zakup ana BATSAH kwa ŋa a gwaɗar: « Ti ta zele a zləm yak ka, Isərayel a . » 32 Eliya a mà təv madula aaka duwa a BATSAH kwa ŋa a bəra nda gà kur ata. Ti le biye tiwlik tits aà guva təv madula aaka duwa a Mbulum ata, yam a de a a biye ata ka, a ge a liter kurwa gər ŋgar əzləm (15). 33 A zlazl akaba gà tsalaka, a tsala ikaba mbə̀luv sla ata ya. A dza aka gər gà tsalaka ata. 34 Dite a gwa: « Ràhayum à yam, a gà dzagwaya faɗ. Mbaɗum aka gər dukw matawala fəla ana tə dulawaha a Mbulum fit kweleŋ a, dite aka tsalaka aaha » A gwaɗa a tar: ‹ Mbaɗum aaka masula ŋa asa › Ta mbaɗa aaka masula ŋa asa. A gwaɗa a tar: ‹ Mbaɗum aaka məmakər ŋa asa › Ta mbaɗa aaka məmakər ŋa. 35 Yam ata a zlala tiwlik tits, dite a rah a biye ata ti le, aà guva təv madula aaka duwa a Mbulum ata ya. 36 A ndze akahər məvəla dukw taf ana ta vəlawa i hawa ya ka, Eliya mala məmà à bazlam Mbulum BATSAH kwa ŋa a sə̀rək a təv madula aaka duwa a Mbulum a gwa: « BATSAH kwa ŋa Mbulum Abəraham, Mbulum Izak, Mbulum Isərayel, gà mburma tə sər mbakum ka, kər Mbulum gà Isərayel, iye ka, mala meslire yak, dite nda bazlam yak na i geye a gà dukw aaha fit tserdze ya. 37 Ŋgemiŋara, BATSAH kwa ŋa, ŋgemiŋara, gà mayahaba gər gà mburma aaha tə sər, kər ka BATSAH kwa ŋa, Mbulum ana ndzer ki mere a à gà gəzləŋ tar a təv yak a . » 38 I fata ya ka, BATSAH kwa ŋa a yara akwa ŋgar a, a wànà dukw ata tə dulawaha a Mbulum fit kweleŋ a, tsalaka ata, gà kur ata nda ahəɗ ŋa dze. A se à yam ata i biye ya. 39 I təv ana gà mayahaba gər gà mburma ata fit tserdze ta ŋgata a dukw ata ka, tə dza gurmits a bəɗ, luz yam are aka ahəɗ, ta gwa: « BATSAH kwa ŋa na Mbulum ndzer ŋa ya! BATSAH kwa ŋa na Mbulum ndzer ŋa ya! » 40 Eliya a gwaɗa a tar: « Gasum gà ɓəzla məma à guma Baal aaka, wura ilik ika magər tar a mibe tsa » Ta gasa tar. Eliya a tar à tar a mandzəndzəruv Kisun, a zleye tar ɗa a fata.

41 Eliya a gwaɗa a Ahav: « Da ka zəm dukw mezime, sa dukw mese! Aɗaba Yàa tsaraka meɗe yam riŋ a zleriŋa, a dze a batsah ŋa » 42 Ahav a da aka mazəma dukw mezime, nda masa dukw mese. Ama, Eliya ŋgat a tsəl aka gər kwite Karmel, a kirik tsim aka ahəɗ, a tike yam are ŋgar aka magər gà gurmits ŋgar. 43 A gwaɗa a mala meslire ŋgar: « Tsə̀lara i gik kamkam, pər ser ndaka tseke batsah duluv » Wele ata a tsə̀laha, a pər ndaka tseke ata, a gwa: « Duwa riŋ tsa » Eliya a sləraya ŋgat sik təsəla aà məfəraha ŋa. 44 Aà sik matəsəla ŋana ka, mala meslire ŋgar ata a gwa: « Araha kəla hulɓùkw naha ndap kamala ahər mburma ya, a tsilere ndaka tseke batsah duluv a » Eliya a gwaɗar: « Da gwaɗa a Ahav: ‹ Hadzal ba tsəmma, danaya gà muta aà gà piris yak, ka da ma, yam mata tə̀rə̀ts kər tsa › » 45 Gəza Mbulum a ne sirikw sirikw agəra hulɓukw ana magawaŋa nda himbiɗ a. Batsah yam a dza. Ahav a tsəl aka muta piris ŋgar, a da a Yizereyel. 46 Eliya a rah nda ndzəɗa BATSAH kwa ŋa. A dan ba i dəmkul a, a val aka miɗ muta piris Ahav, ndisl aka biye hərmaga mada a Yizereyel.