Eliya a ɗif à batsah may
17
1 Eliya gà Tisbiya ana ika ahəɗ Galad a, a gwaɗa a Ahav: « BATSAH kwa ŋa Mbulum gà Isərayel ana, i gere a meslire ya, riŋ nda mesife. I huɗ gà mive aaha a dere a ya ka, mə̀rah a tsìle a tsa, yam a dze a tsa, say na Yàa wiz a! » 2 I dəba taŋa ya ka, BATSAH kwa ŋa a gwaɗa a Eliya: 3 « Da i faha ya, ka da ndaka tseke are pat ana a mɓə̀zawara ya. Ka da kàh ba a tulwah Keritiya, ndaka tseke are pat na a mbəzawara i dulwa Yurdan a. 4 Kərga taŋa ya ka, ki sewe a riŋ yam i tulwah ata, dite Yàa gwaɗa a gà ŋgaak ti dewekeha à dukw mezime a fata . » 5 A da, a ge kamala dukw ana BATSAH kwa ŋa a tsikar a. A da, a tə ndza a tulwah Keritiya ana ika tseke are pat ana a mɓə̀zawara i Yurdan a. 6 Gà ŋgaak tə dawaraha aà dukw mezime nda slu i mekwede, i hawa. A sawa yam i tulwah ata ya. 7 I huɗ mendze zaakwa ya ka, yam a se i tulwah ata ya, aɗaba yam aka dza tsa, na ika ahəɗ kwite ata ya.Eliya i bəra madakwa məkəs duwa i Sarepta
8 Tsam ka, BATSAH kwa ŋa a gwaɗa a Eliya: 9 « Hitse i faha ya, da a Sarepta ana ika ahəɗ Sidun a, ka ndza i fata. Yàa gwaɗa a madakwa məkəs duwa riŋ i fata məvəlawak dukw mezime . » 10 Eliya a hitse, a da a Sarepta, a ndze aka biye hərmaga mada a kwite ata ka, madakwa məkəs duwa, riŋ a pele a tsalaka. A zalar a gwaɗar: « I gik kamkam, da tefiŋara yam a, zaakwa te, i se ŋa . » 11 Akahər ana Madakwa məkəs ata riŋ a dere a aaka ya ka, Eliya a zalaraha asa a gwaɗar: « Kamkam, ka sèsiŋ dərra maɗavər ahər a zaakwa te . » 12 Madakwa məkəs ata a gwaɗar aaka: BATSAH kwa ŋa Mbulum yak riŋ nda mesife ya, dukw mezime riŋ aà iye tsa. Na riŋ aà iye ka, gufa dəɗək i dukw gufa, nda mal zaakwa i dis pərra. Iye riŋ ihər kinehe i pele a tsalaka ka, i ti de a dər, dukw mezime ata, aba mə̀r nda kəla gà, dite maa zəm aba ya ka, mìi bebe a mimete ana mìi metebe ya pəra . » 13 ka, Eliya a gwaɗar: « Ki ge magəɗa tsa, da a ma, ge kamala kà tsik a. Dìŋara kəla gatuw a zaakwa dzekwiŋ pəra, ka diŋ dərra, dite ka dwim aba biy kurum nda kəla yak. 14 Aɗaba araha na BATSAH kwa ŋa Mbulum gà Isərayel a gwa ya: « Gufa a ndive a i dukw gufa ya tsa, dite mal a ndive a i dis a tsa haa aka təv ana BATSAH kwa ŋa a dzere a yam aka gər ahəɗ a dzekwiŋ . » 15 A da, a ge dər kamala ana Eliya a tsikar a, Ta ŋgatawa gà dukw mezime i huɗ gà mehinne diŋ a, məkəs ata, huɗ ga ŋgar, aha Eliya. 16 Gufa ana, i dukw gufa ya, aka ndə̀vara iɗəm a tsa, mal ana i dis a tekeɗe aka ndə̀vara iɗəm ɓav tsa, kamala ana BATSAH kwa ŋa a tsik nda ahər Eliya ya.
Məmbə̀lara à kəla madakwa məkəs ata i məməta ya
17 Araha na dukw ana a ge ba i dəba gà dukw ata ya: Kəla məkəs ata a tike Eliya a ga ma ŋgar a, a dəɗ a dukw məməta. Dukw məməta ŋgar ata ka, a zar ndzəɗa a mət dər. 18 Məkəs ata a gwaɗa a Eliya: « Mburma Mbulum, dukùla na ika magər ma, nda kər a? Ka dara a ma gà ya ana, aà maɗama gà bakal gà a Mbulum, aà makəɗa kəla gà ya? 19 Eliya a gwaɗar aaka: « Viliŋ kəla yak ŋa kwaŋ . » Eliya a zla kəla ata ika ahər mama ŋgar a, a da dər a ga mehinne ŋgar ana ika gər ga ata ya. A həna dər aka sləlah ŋgar. 20 Tsam ka, Eliya a zalaha aba a BATSAH kwa ŋa, a gwaɗar: « Da BATSAH kwa ŋa Mbulum gà, Wànà ka waya məvəla mesewere are a madakwa məkəs aaha a gəs iye a ga a ma ŋgar a, nda makəɗa kəla ŋgar a? 21 Eliya a hənaya aka kəla ata sik makər, a zalaha aba a BATSAH kwa ŋa a gwaɗar: « BATSAH kwa ŋa Mbulum gà, kamkam màr aba a mesife a kəla aaha te! » 22 BATSAH kwa ŋa a tsaraka tuwa a Eliya, a màr aba a mesife a kəla ata, a mbəl. 23 Eliya a zla kəla ata, a tar dərra i meɗikwir ŋgar ata ika gər ga ya, a ga ana i bəɗ a, a vəl kəla ata a mama ŋgar, i fata ya, Eliya a gwaɗar: « Pər kwaŋ, kəla yak riŋ nda mesife . » 24 Məkəs ata a gwaɗa a Eliya: « Haya, Yàa sər kinehe kuɗa, kər ka, mburma Mbulum. Dite bazlam BATSAH kwa ŋana ika arah yak a ka, ndzer . »