1 Əbay 16

1 Araha na bazlam ana BATSAH kwa ŋa a tsik a Yehu kəla Hanani, aka gər a Basa ya: 2 « Yàa zlara kər i bitekwe ya, Yàa tike kər a əbay aka gər gà mburma gà, gà Isərayel, ama kà zazam ka, vatwa Yerubuwam, na dite kà bana gà Isərayel a bakal, bakal tar ata a hìtsiŋara aà matsəɓatsəɓ a. 3 Aɗaba taŋa, i feɗe a iɗəm gà Basa nda ga mburma ana i gwala ŋgar a, kamala ana i ge à gà gwala Yerubuwam kəla Nevat a. 4 Wele ana i gwala Basa a ta mite a i huɗ kwite ya ka, gà kəra na ti te pepiɗe ya, ama na a mite a i dala ya ka, gà məmba na ti ta zim a ya.

5 Gà asiŋ gà labara Basa, nda gà dukw ana a geye ya, nda gà ndzəɗa ŋgar fit ana, riŋ mewetse ŋa i wakita labara gà əbay gà Isərayel ibam a? 6 Basa a mət, ti le ŋgat i Tirtsa, kəla ŋgar Ela a ndza aka təv mendze mekwere ŋgar. 7 Nda ahər mala məmà à bazlam Mbulum Yehu kəla Hananiya asa mbaŋa, na BATSAH kwa ŋa a fafəl aka gər Basa nda gà mburma ŋgar a. Malahalah ŋa ka, aɗaba ana Basa a ge gà dukw ana a da a gər a BATSAH kwa ŋa tsiye, a zlarra matsəɓatsəɓ a BATSAH kwa ŋa ya, nda gà dukw ana a ge nda ahər ŋgar a, kamala dukw ana Yerubuwam a ge ya. Masula ŋana ka, aɗaba ana Basa a bats ɗa gà mburma Yerubuwam a.

Ela kəla Basa a ne əbay gà Isərayel

8 I huɗ mive madzik səla gər ŋgar ndilik (26) ŋana, Asa əbay gà Yahuda a ge a ika mekwere ya ka, Ela kəla Basa a ne əbay gà Isərayel i Tirtsa. A kwara tar, mive sula.

9 Mala meslire Ela ana tə zalar Zimri ya, ŋgat ka, mala aka miɗ mezehe gà asiŋ gà mburma ana nda gà muta piris a. A ge aà ŋgat wirwir, akahər ana əbay riŋ i Tirtsa, i bəra Artsa mala magəsa ga əbay, riŋ a se be a dukw mese, ŋgat makwaya ŋa. 10 Zimri a daha a lakayar a kəɗ Ela, dukw ata a ge ba ka, i huɗ mive madzik səla gər ŋgar təsəla (27) ŋana Asa əbay gà Yahuda a ge a ika mekwere ya. Zimri a zla təv mendze mekwere ŋgar. 11 I təv ana a ne əbay a ndza aka təv mendze mekwere tsara ya ka, a bats gà mburma ana i ga i bəra Basa ya, fit kweleŋ. Aka məsak à asləka mburma ilik nda mesife tsa, ku mege gà ɓəzla megeye ika ŋgat a, ku mege gà masla ŋgar a. 12 Kərga taŋa ya, na Zimri a bats gà mburma ana i ga i bəra Basa ya, kamala ana BATSAH kwa ŋa a tsik aka gər Basa nda ahər mala məma à guma ŋgar Yehu a. 13 Taŋa a ge ba fit ka, agəra gà bakal Basa, nda kəla ŋgar Ela ana ta geye ya. Ta bana dər aɗəm gà Isərayel aà mege medzibe bakal ata. Ta vəl matsəɓatsəɓ a BATSAH kwa ŋa Mbulum gà Isərayel ka, nda mazambaɗa à gà mbulum ana gà ndzer ŋa tsiye.

14 Gà asiŋ gà labara Ela, nda gà dukw ana a geye ya, fit ana riŋ mewetse ŋa i wakita labara gà əbay gà Isərayel ibam a?

Zimri a ne əbay gà Isərayel

15 I huɗ mive madzik səla gər ŋgar təsəla (27) ŋana Asa əbay gà Yahuda a ge a ika mekwere ya ka, Zimri a ne əbay gà Isərayel, a kwara i Tirtsa mehinne təsəla.

Tsaatsa ka, gà sliwdze gà Isərayel ti tike təv mandzəba tar aà mege guvəl aà Gibbetun ana ika mekwere gà Filistiya ya. 16 Gà sliwdze ana i təv mandzəba ya, tə tsaraka labara ata: « Zimri ka, aka ge wirwir aà əbay, aka kəɗ ŋgat . » A pat ŋa ata i təv mandzəba, gà Isərayel fit tserdze ti ne aà Umri batsah gà ɓəzla aka miɗ gà sliwdze, kamala əbay gà Isərayel a. 17 Gà Umri nda gà Isərayel fit tserdze tə dara i Gibbetun a, tə ta dza maŋgwaɓa aà gà mburma Tirtsa. 18 I təv ana Zimri a pər ka, tàa zla huɗ kwite ya ka, a da a meɗikwir ana ndzəɗa ihər hinne i bəra əbay ya. A tike ha aba, akwa a mət aɗəm. 19 A mət ka, agəra gà bakal ŋgar ana a geye ya, a ge ka, dukw ana a da a gər a BATSAH kwa ŋa tsiye, nda mazazam vatwa Yerubuwam, nda mege bakal ŋgar ana a ge ya, a bana dər aɗəm gà Isərayel a.

20 Ga asiŋ gà megemir Zimri nda mege wirwir ana a ge ya, ana wànà tàa wetse a huɗ wakita labara gà əbay gà Isərayel ibam a?

21 I dəba ŋa ya ka, gà mayahaba gər gà Isərayel tə ndzək ba ikaba ya medzige sula. Gà mezehe ŋa aaha tə zazam Tibni kəla Ginat aà mene dər əbay, gà mezehe ŋa aaha tekeɗe tə zazam Umri. 22 Ama ka, gà mburma ana tə zazam Umri ya, ta mba aà gà mburma ana tə zazam Tibni kəla Ginat a. I təv ana ta kəɗ Tibni ya ka, Umri a ne əbay gà Isərayel.

Umri a ne əbay gà Isərayel

23 I huɗ mive madzik makər gər ŋgar ilik (31) ŋana Asa əbay gà Yahuda a ge a ika mekwere ya ka, Umri a ne əbay gà Isərayel. A kwara mive kurwa gər ŋgar sula. A kwara mive ndilik, i Tirtsa dzekwiŋ. 24 I dəba ŋa ya ka, a səkəm kwite Samariya aà Semer a, nda kur siŋgwe dəbuw ndilik (6 000). A lawara nda batsah zlagam tits. A ɗe zləm a huɗ kwite ata, a zlazla Samariya. Zləm ata a dara ka, i zləm Semer, mala kwite ata ya. 25 Umri aka ge dukw ana a da gər a BATSAH kwa ŋa tsiye. A ge ka, a za dər biy gà asiŋ gà əbay ana tə lah mekwere ɗa piŋŋe ya kweleŋ. 26 A zazam ka, gà vatwa Yerubuwam kəla Nevat, nda gà bakal ana a ge, a bana dər aɗəm gà Isərayel a. A vəl matsəɓatsəɓ a BATSAH kwa ŋa Mbulum gà Isərayel ka, nda mazambaɗa à gà mbulum ana gà ndzer ŋa tsiye.

27 Gà asiŋ gà labara Umri, nda gà dukw ana a geye ya, nda ndzəɗa ŋgar ana, riŋ mewetse ŋa i wakita labara gà əbay gà Isərayel ibam a? 28 I təv ana Umri a mət a ka, ti le ŋgat i Samariya, kəla ŋgar Ahav a ndza aka təv mendze mekwere ŋgar.

Ahav a ne əbay gà Isərayel

29 I huɗ mive madzik makər gər ŋgar tsamakər (38) ŋana Asa əbay gà Yahuda a ge a ika mekwere ya ka, Ahav kəla Umri a ne əbay gà Isərayel. A kwara tar mive dzik səla gər ŋgar sula (22) i Samariya. 30 Ahav kəla Umri a ge dukw ana a da a gər a BATSAH kwa ŋa ya, a za dər gà asiŋ gà əbay ana tə lah mekwere ɗa piŋŋe ŋa ya. 31 Mazazama mege bakal Yerubuwam kəla Nevat ɗekɗek pəra ka, a sler aà are tsa, ŋgat a zla ba, Zezabel/Izabel dəm Etba-al əbay gà Siduniya. A dawa à mege megemir a mbulum Baal, a madzàwar gurmits a biye. 32 A zlazl təv madula aaka duwa a Baal, a huɗ ga ana a ger i Samariya. 33 Ahav a geye, gà mendweŋe biy mazləba a mbulum Asera. A ndiɗik gər aà megeye gà dukw ata ka, aà məvəla matsəɓatsəɓ a BATSAH kwa ŋa Mbulum gà Isərayel, za dər i gər a biy gà əbay gà Isərayel ana a ta kwara ɗa piŋŋe ya, fitìte kweleŋ.

34 Akahər ŋgar ata ka, wele duwa zləm ŋgar Hiyel gà Betel, a mà à zlagam Yeriku aà mbulum. Aka ana a dzəba aà madzàha zlagam ata ya ka, maləkwara kəla ŋgar Aviram a dzeyer a gər. Dite aka ana a dzeye a aɗəm a gà dukw mahəndəka gà biye hərmaga zlagam ata ya ka, kudər ŋgar Segub a dzeye a gər asa mbaŋa. Kamala ana BATSAH kwa ŋa a tsik nda ahər Yesuwa kəla Nun a. Yesuwa 6: 26.