1 Əbay 15

Abiyam a ne əbay gà Yahuda

1 I huɗ mive makurwa gər ŋgar tsamakər (18) ŋana, Yerubuwam kəla Nevat a ge a ika mekwere ya ka, Abiyam a ne əbay gà Yahuda. 2 A kwara mive makər i Yeruzalem. Zləm mama ŋgar, Maakiya dəm Absalum. 3 Abiyam a geye gà medzibe gà bakal dede ŋgar ana a gewa ya, akahər ana ŋgat riŋ zukw tsiye. Aka vəl gəzləŋ ŋgar fit a BATSAH kwa ŋa Mbulum ŋgar kamala batsah tsir ŋgar Dawda a tsa. 4 Ama agəra Dawda, na BATSAH kwa ŋa Mbulum ŋgar a kaslar təv mendze mekwere i Yeruzalem, a vəlar asləka kəla, aà mandza aka təv mendze mekwere ŋgar, dite na huɗ kwite Yeruzalem mimbete a tsiye. 5 Aɗaba Dawda a gewa ka, dukw ana a dawa a gər a BATSAH kwa ŋa ya. Aka mbəɗ dəba a mege dukw ana BATSAH kwa ŋa a wizawa ahər, aà mege ya ilik tsidze, na i huɗ mandza a bəra ŋgar a. Say bazlam tar ana ta ge nda Uriya gà Hittiya ya, ilik pəra. 6 Guvəl ana a gewa ika magər gà Rubuwam nda Yerubuwam a ka, a ndiɗik gər hiywe na i huɗ mandza a bəra Abiyam a.

7 Gà asiŋ gà labara Abiyam,nda gà dukw ana a geye ya fit ana, tar riŋ mewetse ŋa i wakita gà labara gà əbay gà Yahuda ibam a? Guvəl ika magər gà Yerubuwam nda Abiyam hiywe. 8 I təv ana Abiyam a mət a ka, ti le ŋgat i huɗ kwite Dawda. Kəla ŋgar Asa a zla təv mendze mekwere ŋgar.

Asa a ne əbay gà Yahuda

9 I huɗ mive ma dzik səla ŋana, Yerubuwam a ge a ika mekwere gà Isərayel a ka, Asa a ne əbay gà Yahuda. 10 A kwara i Yeruzalem ka, mive dzik faɗ gər ŋgar ilik (41). Zləm məmər mama ŋgar ka, Maakiya dəm Absalum. 11 Asa a gewa dukw ana a dewa a gər a BATSAH kwa ŋa ya, kamala batsah tsir ŋgar Dawda a. 12 A dagaza gà mburma ana ta gewa muva biy məvəla mezlibe a gà mbulum tar a, i huɗ kwite tar a fit, a bats gà mendzikiɗe ba gà dukw ana gà bàba gà tsir ŋgar, ta vaɗa, ti neye dər gà mbulum tar a. 13 Aà Maakiya məmər mama ŋgar a tekeɗe ka, aka zla ihər malahalah zləm məkəs əbay a. Aɗaba aka ge dukw ana ŋgwal ŋa tsa ndeyndey nda məvəɗa aba mendzikiɗe ba mbulum Asera. Asa a bats mbulum ŋgar ata, a ta wànà a tulwah Kedrun a. 14 Ama gà təv mewisle ka, tàa mbete ye tsa. Ku mege Asa aka vəl gəzləŋ ŋgar a BATSAH kwa ŋa fit na i huɗ mandza aà bəra ŋgar a tekeɗe ya. 15 Asa a ndzàkaha gà dukw dede ŋgar ana a ne dər tsəɗaŋŋa ya, nda gà dukw ana ŋgat ŋa, a ne dər tsəɗaŋŋa biy Mbulum a, a ga BATSAH kwa ŋa: Gà ndzemde məvəɗa kur siŋgwe, gà gura nda gà asiŋ gà kazlaŋa megemir ŋgiɗ. 16 Gà Asa nda Basa əbay gà Isərayel tə ndzawa kəla wur gà pat ka, i guvəl hiywe. 17 A pat duwa ka, Basa əbay gà Isərayel a hitse aà mege guvəl aà gà Yahuda, a lawara huɗ kwite Rama nda batsah zlagam tits, dite ka, gà mburma Asa, əbay gà Yahuda, tə dara aɗəm a tsa, dite wura madara iɗəm a tsa asa. 18 Asa a ndzək gà ndzemde məvəɗa kur siŋgwe nda gà gura ana a zeha i ga makasla gà limana BATSAH kwa ŋa, nda biy əbay ya. əbay Asa a dza ahər à gà ɓəzla meslire ŋgar, aà tə sləraha a Ben-hadad kəla Tavrimmun, kəla, kəla Hetsiyun əbay gà Siriya ana a ndzawa, i Damas a, aà ta gwaɗar ka: 19 « Gə̀sama masla ika magər ma, kamala na gà tsir yak nda tsir gà ta gəs ɗa aàba masla ya. Araha gà ndzemde məvəɗa kur siŋgwe nda gura naha i slirekehe a kamala dukw taf a. Sas ikaba magəsa masla kurum ana nda Basa əbay gà Isərayel a, dite ka, mandzək gà sliwdze ŋgar ika ahəɗ gà ya . » 20 Ben-hadad a gəs dukw ana Asa a tsikar a, a slər gà ɓəzla aka miɗ gà sliwdze ŋgar, aà mege guvəl aà gà huɗ gà kwite gà Isərayel. Tə duŋ Iyyun, Dan, Avel-Bet-Maaka, ahəɗ kwite Kinneret fit, asa ka, kwite Naftali fit. 21 I təv ana Basa a tsaraka labara ata ya ka, a məlak à mazlazla zlagam Rama, a ta ndza i Tirtsa. 22 I fata ya ka, əbay Asa a zala a gà mburma gà Yahuda fit tserdze, wura ilik aka ze i ma tsa, aà ma ndzàka gà kur nda gà sla aram ana Basa a zlazl dər zlagam ana i Rama ya. Nda taŋa na əbay Asa a zlazl dər batsah zlagam ana i Geva ika ahəɗ gà Bendzamen nda Mitspa ya.

23 Gà asiŋ gà labara Asa fit, gà ndzəɗa ŋgar fit, gà dukw ana a geye ya fit, nda gà kwite ana a zlazlaya ahər batsah zlagam a, ana tàa wetseye a wakita labara gà əbay gà Yahuda ibam a? Akana a ge mandawal a ka, sik a wùrawa ahər hinne. 24 I təv ana Asa a mət a ka, ti le ŋgat a liwiŋ gà bàba gà tsir ŋgar, i kwite Dawda. Yehusafat kəla ŋgar a zla təv mendze mekwere ŋgar.

Nadab a ne əbay gà Isərayel

25 I huɗ mive masula ŋana, Asa əbay gà Yahuda a ge a ika mekwere ya ka, Nadab kəla Yerubuwam a ne əbay gà Isərayel, a kwara mive sula. 26 A gewa ka, dukw ana a de a a gər a BATSAH kwa ŋa tsiye. A zazam ka, vatwa nda gà bakal dede ŋgar ana a gewa a bana dər aɗəm gà Isərayel a. 27 Basa kəla Ahiya, ana i gwala Issakar a, a ge wirwir aà mege dukw ana ŋgwal ŋa tsiye a Nadab. Basa a kəɗ Nadab i Gibbetun ika ahəɗ gà Filistiya, akahər ana ŋgat riŋ nda gà sliwdze gà Isərayel ta ge a guvəl aà Gibbetun a. 28 Basa a kəɗ Nadab ka, aka mive məmakər ŋana Asa a ge a ika makwara gà Yahuda ya. Basa a zla təv mendze mekwere ŋgar. 29 I təv ana a zla əbay tsara ya ka, a bats gà mburma ana i gwala Yerubuwam a fit tserdze. Aka zeha à wura ilik i gwala ŋgar a tsidze. Kamala ana BATSAH kwa ŋa a tsik nda ahər Ahiya mala məmà à bazlam Mbulum ana i Silu a. 30 Agəra gà bakal Yerubuwam ana a ge, akahər ŋa ata, a bana dər aɗəm gà Isərayel a. Taŋa na, a vəl matsəɓatsəɓ a BATSAH kwa ŋa Mbulum gà Isərayel hinne ya.

31 Gà asiŋ gà labara Nadab ana, tar riŋ mewetse ŋa i wakita gà labara gà əbay gà Isərayel ibam a? 32 Gà Asa nda Basa ka, tə ndzawa ka, i guvəl hiywe, na i huɗ mandza a bəra tar a.

Basa a ne əbay gà Isərayel

33 I huɗ mive məmakər ŋana Asa a ge a ika makwara gà Yahuda ya ka, Basa kəla Ahiya a ne əbay ika gər gà Isərayel fit tserdze i Tirtsa. A kwara tar mive dzik sela gər ŋgar faɗ (24). 34 A gewa ka, dukw ana a de a a gər a BATSAH kwa ŋa tsiye. A zazam ka, vatwa nda gà bakal Yerubuwam ana a gewa a bana dər aɗəm gà Isərayel a.